Read Tunen 1 Kɔlɛ́ŋɛ́tɛ 12 Bible Online

1 Kɔlɛ́ŋɛ́tɛ 12 - Tunen bible

1 Kɔlɛ́ŋɛ́tɛ 12

¹Á bənísə́, tɔ́ ənú hɔ́kɛ́na isíŋáka ɛlɔ́áyɛ́ iŋgínə́ ɔyɛ́á Umbúínyi Mɔnaŋanaŋa wɔ́ ndɔ bɛndɔ índiə ɛlɔ́áyɛ́ bɛkɔa ɔkɛa. Mɛ hikəkiə ɔwá, nɔ taká mányá ɔyɛ́á yɛ́ lɛ́á umə́.

²Nɔ ndɔ manya ɔwá, ɔ ikúílí nɔ́ ná bámɛ́nɛ́ná balɛmanyáhuɛlɛ́, bá ka bənú ákakana ɔ bililí ulúbúnə ɔbɛ́á bɛ́ sa ósó ɔhɔ́ɔ́.

³Ɔ́ ɛlɔ́áyɛ́ nɔ́yɛ́, mɛ́ ndɔ bənú lɛna tə́lə́ŋu ɔwá, Umbúínyi wɔ́ Huɛlɛ́ wɔ́ sa ósó ɔ mɔndɔ uwikíniə ɔkɛaka ɔwá a ɔlaa a sɛ́á: «Ɛbɔ́má na Yə́susu!» Nɔ́ manyá ɔwá, ata mɔndɔ a sa ósó ɔlaa a sɛ́á: «Yə́susu a lɛ́á Isə́lúkú.» Yɛ́ sa bá ɔ sɛ́á a ndɔ hɛ́na na injiŋə yɛ Umbúínyi Mɔnaŋanaŋa.

⁴Məndínə́ má iŋgínə́ yɛ bɛkɔa ɔkɛa má báka ɛnyɛnya ɔmá Umbúínyi Mɔnaŋanaŋa wɔ́ ndɔ índiənə. Mba Umbúínyi úmotí wɔ́ ndɔ maáta índiənə.

⁵Məndínə́ má bɛnyɛná má báka ɛnyɛnya ɔbɛ́á Isə́lúkú a ná índíə́kínə ɔ bɛndɔ, mba, ɔ́maná Isə́lúkú ɛ́mɔtɛ́ tɔ́ ndɔ nyɛna.

⁶Məndínə́ má masɔ́ma má Huɛlɛ́ má báka məəŋí, mba, ɔ́maná Huɛlɛ́ ɛ́mɔtɛ́ yɛ́ ndɔ mɔɛ́ta tɛ́á yɛ́táyɛ́ iŋgínə́ índiə yɛ ɔkɛa.

⁷Huɛlɛ́ a ka iŋgínə́ yɛ Umbúínyi índiə ɔ mɔɛ́ta tɛ́á ɔkɛaka ɔwá á yɛɛ́ta fə́mə́lə́níə́ ɛlɔ́áyɛ́ buɛsɛ bɔ́ bəkimə.

⁸Umbúínyi wɔ́ ndɔ wɔmɔtɛ́ ɛmanya índiə yɛ ɔhɔ́ɔ́ muɛsɛ, wútə́yí Umbúínyi wɔ́ ndɔ kɛa ɔwá wɔmɔtɛ́ a taká yɛ Huɛlɛ́ mánya.

⁹Ɔ́ wútə́yí Umbúínyi úmotí, wɔ́ ndɔ wɔmɔtɛ́ ilumininə índiə. Ɔ wə́ə́ní, iŋgínə́ yɛ bɛnákɛnákɛ uniŋəsiə.

¹⁰Umbúínyi wɔ́ ndɔ wɔmɔtɛ́ iŋgínə́ índiə yɛ bisə́mə́tə́ ɔ ɔkɛa, ɔ wɔmɔtɛ́, niəbə nɛ́ imbə́nú yɛ Huɛlɛ́ utúmbə́ləniə, ɔ wɔmɔtɛ́ iŋgínə́ yɛ bɛkɔa bɛ́ Umbúínyi Mɔnaŋanaŋa, na bɛ́ umbúínyi mɔbɛ́á ɔmanya, ɔ wɔmɔtɛ́ tɔ́na nɛ́ mohókí ɔhɔ́ɔ ɔmá a sa ɔ́kɔ́na, ɔ tifəkə wɔ́ wɔmɔtɛ́ niəbə índiə nɛ́ mátáyɛ́ mohókí utúmbə́ləniə.

¹¹Bɛ́ɛ́yɛ́ bɛkɔa bikimə umbúínyi úmotí wɔ́ ndɔ mɔɛ́ta tɛ́á iŋgínə́ índiə ɔ nɔ́yɛ́ uwundúsiniə, ɛ́sɛ́á wɔ́ ndɔ hikiə.

¹²Tɔ́ iŋgətí ɛ́tɛ́na ɔ mɛɛ́lɔ yɛ mɔndɔ. Mɛɛ́lɔ yɛ mɔndɔ yɛ́ lɛa ɛ́mɔtɛ́, mba, yɛ́ lɛa na bɛláŋa biəŋí; ata nɔ́yɛ́ ɛ́sɛ́á bɛ́ɛ́yɛ́ bɛláŋa bɛ́ lɛ́á biəŋí, bɛ́ ndɔ tɔana mɛɛ́lɔ ɛ́mɔtɛ́. Nɔ́yɛ́ yɛ́ lɛ́á ɛlɔ́áyɛ́ Kilísitusu.

¹³Ɔ́ niɔŋɔ́, Bɛyútɛnɛ ata balɛmanyáhuɛlɛ́, bɛɔlɛ́ mbá ata bifəyí, bəsú bəkimə tɔ ka nɛsɔa kusənə, injiŋə yɛ wútə́yí Umbúínyi úmotí yɛ́ ná kɛ́áka ɔwá tɔ báá mɛɛ́lɔ ɛ́mɔtɛ́. Ɔ́ wútə́yí Umbúínyi úmotí wɔ́ ná fínə́ ɔ uwəsú mɛlɛ́má.

¹⁴Mɛɛ́lɔ yɛ mɔsá yɛ́ booko na bɛláŋa biəŋí, mba, tátá ɛláŋa ɛ́mɔtɛ́.

¹⁵Mɔkɔlɔ́ wɔ́ sa ósó ɔlaa wɔ́ sɛ́á: «Ɛ́sɛ́á mɛ lɛ bá mɔkátá, mɛ lɛ bá ɛláŋa yɛ́ mɛɛ́lɔ.» Ata nəníə́ wɔ́ nɔ́ hɔ́ɔ́kɔ, wɔ́ lɛa ɛláŋa yɛ́ mɛɛ́lɔ.

¹⁶Mulúə́ wɔ́ sa ósó ɔlaa wɔ́ sɛ́á: «Ɛ́sɛ́á mɛ lɛ bá niísə, mɛ lɛ bá ɛláŋa yɛ́ mɛɛ́lɔ.» Ata nəníə́ wɔ́ nɔ́ hɔ́ɔ́kɔ, wɔ́ lɛa ɛláŋa yɛ́ mɛɛ́lɔ.

¹⁷Ata mɛɛ́lɔ mikimə yɛ́ báá məə́sə na məə́sə, há nəníə́ abáka tɔ ɔ́kɔ́kɛnana əə́? Ata yɛ́ báá məlúə́ na məlúə́, há nəníə́ abáka tɔ inumbí ɔ́kɔ́kɛna əə́?

¹⁸Mba, Huɛlɛ́ a ka ɛláŋa tɛ́á yɛ́ mɛɛ́lɔ tɔa ɛ́sɛ́á a ná híkə́kíə́.

¹⁹Ata ɛláŋa yɛ́ báá ɛ́mɔtɛ́, há yɛ́ lɛ bá mɛɛ́lɔ.

²⁰Ɔ taká, bɛláŋa bɛ́ lɛa biəŋí, mba, mɛɛ́lɔ ɛ́mɔtɛ́.

²¹Nɔ́yɛ́, niísə nɛ́ sa ósó ɔ mɔkátá ɔlɛna nɛ́ sɛ́á: «Mɛ lɛ bá na yáwɔ́á ilókí.» Mɔlɔ́á wɔ́ sa ósó ɔ makɔlɔ́ ɔlɛna wɔ́ sɛ́á: «Mɛ lɛ bá na yə́núə́ ilókí.»

²²Ɔ nifəŋə, bɛláŋa bɛ́ mɛɛ́lɔ ɔbɛ́á tɔ ndɔ sinə tɔmbɔ́kɔ́tɔ́ ɔ ɔyáyɛ́na, bɛ́ lɛa na mɔsɛ́ŋɛ́.

²³Ɔbɛ́á tɔ ndɔ fɛka ɔwá bɛ́ lɛa tuyomo, ɔ́ bɛɛ́ta tɔ́ ndɔ bóŋgo na hibə́təniə hikimə. Bɛ́ɛ́yɛ́ ɔbɛ́á tɔ lɛ ndɔ kionono, ɔ́ bɛɛ́ta tɔ́ ndɔ ɛ́ta na mukunə́ mɔŋɛ́ŋa.

²⁴Abáka tɔ lɛ sulú bɛláŋa bɛ́ yəsúə́ mɛɛ́lɔ hóyiə ɔbɛ́á bɛ́ ndɔ sinənə. Nɔ́yɛ́, Huɛlɛ́ a ka tuúmə índiə ɔ bɛláŋa bɛ́ ɛŋaná hibə́təniə.

²⁵A ka nɔ́yɛ́ hikəkiə ɔkɛaka ɔwá, undumbú wɔ́ fínə́ ɔ ətíə́ yɛ bɛláŋa bɛ́ mɛɛ́lɔ; mba, bɛ́ ná hɔ́ánána uhíkə́nə bəə́bu na bəə́bu.

²⁶Ábá ɛláŋa ɛ́mɔtɛ́ yɛ́ ndɔ məsə́kə ɔ́kɔ, bikimə bɛ́ məsə́kə ɔ́kɔ́kɛna tɔ́na; ábá ɛláŋa ɛ́mɔtɛ́ yɛ́ lɛa na tuúmə, bɛ́ɛ́yɛ́ bikimə bɛ́ báá ɔ nɛhɔnɔ na wɛɛ́ya.

²⁷Nɔ́yɛ́, bənú nɔ́ lɛ́á mɛɛ́lɔ yɛ Kilísitusu, mɔɛ́ta tɛ́á ɔ uwənú ətíə́ a lɛa ɛsalɛ yɛ́ yɛ́táyɛ́ mɛɛ́lɔ.

²⁸Huɛlɛ́ a ka mɔɛ́ta tɛ́á tínímiə ɔ ɔwayɛ́ ɛbɔ́ka ɔ ətíə́ yɛ ilúkunə yɛ́ bəlumininə: Wúbúsíə́ basɔ́másɔma, ɔwɔŋgɔkɔnɔ bɔhɛ́nátɔtányɛ́, ɔ́lálɔ́ bələ́liə ɔbá bá ndɔ húlə́ yáyɛ́á ɛtambá úkúniə, əlimə yɛ nɔ́yɛ́, bááyɛ́ ɔbá bá lɛ́á na niəbə nɛ́ bisə́mə́tə́ ɔkɛa, bááyɛ́ tɔ́na ɔbá bá ndɔ bɛnákɛnákɛ niŋəsiə; bɔ́mɔtɛ́, ɛlɔ́áyɛ́ bɔsɔ́kɔ́ ɔwɔ́lɔ, bɔ́mɔtɛ́ ɔ uwəbú ɔkɛndana, ata mohókí ɔhɔ́ɔ́ ɔmá bá sa ɔ́kɔ́na.

²⁹Tátá bəkimə bá lɛ́á basɔ́másɔma, bɔhɛ́nátɔtányɛ́ ata bələ́liə bá ɛtambá yɛ́ Huɛlɛ́. Bəkimə bá lɛ bá na niəbə nɛ́ bisə́mə́tə́ ɔkɛa.

³⁰Tátá bəkimə bá lɛ́á na niəbə nɛ́ bɛnákɛnákɛ uniŋəsiə, tátá bəkimə bá ndɔ mohókí hɔ́ɔ́ ɔmá bá sa ɔ́kɔ́na, tátá bəkimə tɔ́na bá lɛ́á na niəbə nɛ́ mátáyɛ́ mohókí utúmbə́ləniə.

³¹Mba, nɔ́ síə́kə́ na wə́núə́ mɔlɛ́má mukimə á məəbə ɔmá Umbúínyi wɔ́ ndɔ índiə ɔ bɛndɔ. Isíŋáka, ɛkasɛ mɛ bənú ɛnɔ́mɛ ínə́níə́ ɔyɛ́á yɛ́ ná bɛ́ɛ́yɛ́ bikimə yayɛna.