Read Tunen 1 Kɔlɛ́ŋɛ́tɛ 13 Bible Online

1 Kɔlɛ́ŋɛ́tɛ 13 - Tunen bible

1 Kɔlɛ́ŋɛ́tɛ 13

¹Ata mɛ ŋɔ manya ɔ mohókí məkimə má bɛndɔ ɔhɔ́ɔ́, ata ɔmá bɛáŋgɛlɛ, ábá mɛ lɛ ndɔ bɔsɔ́kɔ́ hikiə, mɛ lɛ ndɔ nikələ́ŋə ata ɛŋgɔmɔ yáyɛ́na ɔyɛ́á yɛ́ ndɔ moŋóŋóni fə́miə ɔmá má ndɔ məlúə́ má bɛndɔ sánɔ́lɔna.

²Ata mɛ ŋɔ imbə́nú túmbə́ləkəniə ɔyɛ́á yɛ́ ndɔ húlínə na Huɛlɛ́, ata mɛ ŋɔ bá na ɛmanya yɛ́ bɛkɔa bikimə, ata mɛ ŋɔ bá mɛ ndɔ bɛkɔa manya ɔbɛ́á Huɛlɛ́ a ná bítə́, ata mɛ ŋɔ bá na nɛkɔmba nikimə tálɛ́nátɔ́ á Huɛlɛ́ ɔ nindínə́ ɔnɛ́á, mɛ́ óso ɔ ɛmáá ɔlɛna mɛ sɛ́á yɛ́ tɔkɔ́nɔ́á, ábá mɛ lɛ ndɔ bɔsɔ́kɔ́ hikiə, mɛ lɛa ndəmə.

³Ata mɛ ŋɔ mámɛ́á maasɛ məkimə afakɛna ɔ tɔtɔyɔ́nɔ́, ata mɛ ŋɔ yamɛ́á mɛɛ́lɔ hakaka ɔ hiwə ɛlɔ́áyɛ́ Kilísitusu, ábá mɛ lɛ ndɔ bɔsɔ́kɔ́ hikiə, mɛ lɛa bá na mɔsɛ́ŋɛ́.

⁴Wɛ́ɛ́yɛ́ ɔwá a ndɔ bɔsɔ́kɔ́ hikiə, a ndɔ tiŋiminə, a bɔsɔ́kɔ́ ɔ́lɔ́kɛna, a lɛ bá na məə́sə matatánɛ, a lɛ ndɔ bíbə́liə, a lɛ bá na niə́mə.

⁵A lɛ ndɔ bɛkɔa bɛ́ ɛsɛ́má kɛa, a lɛ ndɔ wə́yíə́ mɔsɛ́ŋɛ́ siə, a lɛ ndɔ hilóbi ɛta, a lɛ ndɔ ɛbɛkɛ́ tə́tə́níə́,

⁶a lɛ ndɔ nɛhɔnɔ ɔ́kɔ ɔ bɛkɔa bɛ́ məndíbə́, mba a ndɔ bílə́nə ɔ bɛkɔa bɛ́ taká.

⁷Wɛ́ɛ́yɛ́ ɔwá a ndɔ bɔsɔ́kɔ́ hikiə, a ndɔ nɛasɛna bikimə, a ndɔ luminə bikimə ɔbɛ́á bá ndɔ wɛɛ́ya lɛna, a ndɔ nánɛna ɔwá bikimə bɛ́ ŋɔ kɛndaka muɛsɛ, a ndɔ ísə́biniə bikimə.

⁸Wɛ́ɛ́yɛ́ ɔwá a ndɔ bɔsɔ́kɔ́ hikiə, a lɛ bikúílí bikimə na nibo ɔ ɔwayɛ́ mɔlɛ́má, ikúílí yɛ́ ŋɔ ndafámá ɔyɛ́á nitúmbə́ləniə nɛ́ imbə́nú yɛ Huɛlɛ́ nɛ́ ŋɔ hɔ́á, niəbə nɛ́ mohókí ɔmá bá sa ɔ́kɔ́na nɛ́ ŋɔ hɔ́á, bɛndɔ bá sɔ́ ŋɔ taká yɛ Huɛlɛ́ manya tɔ́na.

⁹Ɔ taká, yəsúə́ ɛmanya yɛ́ lɛa ɛsalɛsalɛ. Níə́súə́ nitúmbə́ləniə nɛ́ imbə́nú yɛ Huɛlɛ́ nɛ́ lɛa ɛsalɛsalɛ.

¹⁰Mba, ɛnáká Huɛlɛ́ a bɛkɔa fə́mə́lə́níə́ muɛsɛ, ɔ yɛ́ɛ́yɛ́ ikúílí yikimə, ɔbɛ́á bɛ́ lɛ́á ɛsalɛsalɛ bɛ́ ŋɔ nímínə.

¹¹Ikúílí ɔyɛ́á mɛ ná báá hɛlɔ́matɔ́, mɛ lɛ hɔ́ɔ́kɔ ɛ́sɛ́á hɛlɔ́matɔ́, mɛ bílúmə́kiniə ɛ́sɛ́á hɛlɔ́matɔ́, mɛ bɔkɔa fɛkaka tɔ́na ɛ́sɛ́á hɛlɔ́matɔ́. Isíŋáka ɔwá mɛ ná híáná mɔhɔ́mɔ́, mɛ lɛ ndɔ bítíkə tɔ́na ɛ́sɛ́á hɛlɔ́matɔ́.

¹²Isíŋáka, tɔ ndɔ bɛkɔa sinə umbulúmbulú ɛ́sɛ́á abáka bá siəkinənə ɔ ibióki yɛ́ isinínə́ nuúmə́, ikúílí yɛ́ ŋɔ ndafámá ɔwá, tɔ ŋɔ bɛ́ɛ́yɛ́ bɛkɔa bikimə siəkinə ɔ mianyɔ́ uwəsú busíə́. Bɛkɔa bɛ́ báka isíŋáka ɔbɛ́á mɛ ndɔ manya ɛsalɛsalɛ, ɔ hítə́yí hinó, mɛ ŋɔ bikimə manya muɛsɛ ɛ́sɛ́á Huɛlɛ́ bɛ́múɛ́tɛ́ a ndɔ mɛaŋɔ́á manya.

¹³Nɔ́yɛ́, bɛkɔa bɛ́ lɛa bɛ́lálɔ́ ɔbɛ́á bɛ́ sa ndáhɔa: Ilumininə, yɔnɛ́nɛna na nibo; mba, nibo nɛ́ ná bɛ́ɛ́yɛ́ bikimə yayɛna.