Read Tunen 1 Kɔlɛ́ŋɛ́tɛ 14 Bible Online

1 Kɔlɛ́ŋɛ́tɛ 14 - Tunen bible

1 Kɔlɛ́ŋɛ́tɛ 14

¹Nɔ́ ənú ányá ɔ bɔsɔ́kɔ́ uhikiə, nɔ́ bílókínə́ á iŋgínə́ yɛ bɛkɔa ɔkɛa ɔbɛ́á Umbúínyi Mɔnaŋanaŋa wɔ́ ndɔ índiə ɔ bɛndɔ, mba, sulusulu á iŋgínə́ yɛ imbə́nú utúmbə́ləniə ɔyɛ́á yɛ́ ndɔ húlínə ná Huɛlɛ́.

²Wɛ́ɛ́yɛ́ ɔwá a ndɔ mohókí hɔ́ɔ ɔmá a sa ɔ́kɔ́na, tátá ɔ bɛndɔ a ndɔ hɛ́na, mba, á Huɛlɛ́ bɔkɔasɛ́á, ata mɔndɔ a lɛ ndɔ wɛɛ́ya ɔ́kɔ. A ndɔ bɛkɔa bɛ́ bítímə́tɔ́ hɔ́ɔ́ na iŋgínə́ yɛ Umbúínyi Mɔnaŋanaŋa.

³Mba, wɛ́ɛ́yɛ́ ɔwá ndɔ bɔsɔ́kɔ́ imbə́nú túmbə́ləniə ɔyɛ́á yɛ́ ndɔ húlínə na Huɛlɛ́, a ndɔ bəə́bu túmbə́ləniə ɛlɔ́áyɛ́ uwəbú ɔwɔ́lɔ ɔ uwəbú ilumininə uwoníniə, a ndɔ bəə́bu túmbə́ləniə ɛlɔ́áyɛ́ uwəbú ɔlɛ́ha, a ndɔ bəə́bu túmbə́ləniə ɛlɔ́áyɛ́ uwəbú ɔ makɛ́nda uwíndiə.

⁴Wɛ́ɛ́yɛ́ ɔwá a ndɔ mohókí hɔ́ɔ́ ɔmá a sa ɔ́kɔ́na, a ndɔ yáyɛ́á ilumininə bɛ́múɛ́tɛ́ óníniə. Nɔ́yɛ́, wɛ́ɛ́yɛ́ ɔwá a ndɔ imbə́nú túmbə́ləniə ɔyɛ́á yɛ́ ndɔ húlínə na Huɛlɛ́, a ndɔ ilúkunə yɛ́ bəlumininə yɛ́ Huɛlɛ́ óníniə.

⁵Mɛ hikəkiə muɛsɛ ɔwá nɔ mohókí hɔ́ɔ́kɔ́ ɔmá nɔ́ sa ɔ́kɔ́na bənú bəkimə, mba, mɛ lɛa na ilókí ɔ ɔyáyɛ́na ɔwá, nɔ imbə́nú túmbə́lə́níə́ ɔyɛ́á yɛ́ ndɔ húlínə na Huɛlɛ́. Ɔ taká, wɛ́ɛ́yɛ́ ɔwá a ndɔ imbə́nú túmbə́ləniə ɔyɛ́á yɛ́ ndɔ húlínə na Huɛlɛ́, a lɛa na mɔsɛ́ŋɛ́ yáyɛ́ná wɛ́ɛ́yɛ́ ɔwá a ndɔ mohókí hɔ́ɔ́ ɔmá a sa ɔ́kɔ́na, úhúlíə́ ɔwá, ábá a ndɔ túkiə ɔkɛaka ɔwá a ilúkunə yɛ́ bəlumininə yɛ́ Huɛlɛ́ ónókíniə ɔ uwəbú ilumininə.

⁶Nɔ́yɛ́, á bənísə́, baánɛ, ábá mɛ ná ndáfámá ɔ uwənú busíə́, yatɛ́ mɔsɛ́ŋɛ́ nɔ́ ŋɔ kusənə ábá mɛ ndɔ mohókí hɔ́ɔ ɔmá mɛ sa ɔ́kɔ́na əə́? Ata bɔɔ́la bɔkɔasɛ́á, bɛ́ámɛ́á bɛtambá bɛ́ sa bənú ɔ́lɔ ɔ taká ɔmanya ɔyɛ́á yɛ́ ndɔ húlínə na Huɛlɛ́, bɛ́ sa bənú ɔ́lɔ́ ɔ bɛkɔa bɛɔ́sɔ ɔmanya, bɛ́ sa bənú ɔ́lɔ ɔ imbə́nú ɔwɔ́kɔ ɔyɛ́á yɛ́ ndɔ húlínə na Huɛlɛ́, bɛ́ sa bənú bɛkɔa bɛɔ́sɔ úkúniə.

⁷Yɛ́ lɛa hɔ́ánánátɔ́ ɔ bikúlúmə́ bɛ́ maŋana, ilolí mbá ata hɛndɔ́ŋɔ́, ábá bá lɛ ndɔ nióni nɛ́ ikúlúmə́ tɛ́á ɔ́kɔ, nəníə́ ɛ́kɛ bá manya ábá hɛndɔ́ŋɔ́ ata ilolí yɛ́ ndɔ təkunə əə́?

⁸Ábá mutəkunə má lɛ ndɔ kɛa ɔwá nióni nɛ́ mɔsɛ́bɛ́ nɛ́ fámálákáná muɛsɛ, ɛ́yánɛ́ a ŋɔ bɛ́tábɔ́naka ɛlɔ́áyɛ́ bilə́ əə́?

⁹Hɔ́ánánátɔ, ábá ɔ ndɔ bɛndɔ hɛ́na na nihókí ɔnɛ́á bá lɛ ndɔ ɔ́kɔ, nəníə́ ɛ́kɛ bá kɛaka mbá bá ɔ́kɔ́kɛ́ná yatɛ́ ɔyɛ́á ɔ ndɔ laa əə́? Ɔ ndɔ lə́kə́tə ɔbánɔ́.

¹⁰Mohókí ma lɛa ɔ misí ɔ məndínə́ məndínə́ taká, mba, abáka bá nihókí tɛ́á bɛ́kɛakɛna ɛlɔ́áyɛ́ bɔkɔa ɔlaa.

¹¹Ábá mɔndɔ a ndɔ mɛaŋɔ́á hɛ́na na nihókí ɔnɛ́á mɛ lɛ ndɔ ɔ́kɔ, wɛ́ɛ́yɛ́ ɔwá a ndɔ mɛaŋɔ́á hɛ́na, a lɛa mukiníə́nú ɔwámɛ busíə́, mɛaŋɔ́á tɔ́na mɛ lɛ mukiníə́nú ɔwayɛ́ busíə́.

¹²Nɔ́yɛ́, uwənú tɔ́na, nɔ́ ənú ányá ɔ iŋgínə́ ukusənə ɔyɛ́á Umbúínyi Mɔnaŋanaŋa wɔ́ ndɔ bɛndɔ índiə ɔkɛaka ɔwá bá bɛkɔa kɛ́áka, mba sulusulu, nɔ́ kɛ́áká nɔ́yɛ́ bɔkɔasɛ́á nɔ ndɔ nɔ́yɛ́ hikiə ɔkɛaka ɔwá, nɔ́ ilúkunə yɛ́ bəlumininə yɛ́ Huɛlɛ́ ónókíníə́.

¹³Ɔ́ ɛlɔ́áyɛ́ nɔ́yɛ́, wɛ́ɛ́yɛ́ ɔwá a ndɔ mohókí hɔ́ɔ́ ɔmá a sa ɔ́kɔ́na, a ná hɔ́ánána á Huɛlɛ́ ɔbɛ́kálɛ́na ɔwá, a wɛɛ́ya índíə́ á niəbə nɛ́ maáta utúkiə.

¹⁴Ábá mɛ ndɔ bɛ́kálɛ́na na nihókí ɔnɛ́á mɛ lɛ ndɔ ɔ́kɔ, wə́míə́ mɔlɛ́má wɔ́ ndɔ bɛ́kálɛ́na taká, mba, yámɛ́á ɛfɛka yɛ́ lɛ bá umə́.

¹⁵Yatɛ́ ɛkasɛ mɛ kɛ́áka nə́ə əə́? Ɛkasɛ mɛ bɛ́kálákɛ́ná ɛ́sɛ́á Umbúínyi Mɔnaŋanaŋa wɔ́ ndɔ mɛaŋɔ́á ínə́niə, ɛkasɛ mɛ bɛ́kálákɛ́ná tɔna na nihókí ɔnɛ́á mɛ ndɔ ɔ́kɔ, ɛkasɛ mɛ wɛɛ́ya maŋana ósókínə́ ɛ́sɛ́á Umbúínyi Mɔnaŋanaŋa wɔ́ ndɔ mɛaŋɔ́á ínə́niə, ɛkasɛ mɛ wɛɛ́ya ósókínə́ tɔ́na na nihókí ɔnɛ́á mɛ ndɔ ɔ́kɔ.

¹⁶Ɔ taká, ábá Umbúínyi Mɔnaŋanaŋa wɔ́ ndɔ aŋɔ́á lɔ́ma á Huɛlɛ́ mohóloniə híə́niniə na nihókí ninə́ninə́, wɛ́ɛ́yɛ́ ɔwá a lɛ ndɔ aŋɔ́á ɔ́kɔ, a sa ósó uluminə a sɛ́á: «Amɛna» bɔkɔasɛ́á, a lɛ ndɔ bɛtambá ɔ́kɔ ɔbɛ́á ɔ ndɔ Huɛlɛ́ mohóloniə híə́niniə.

¹⁷Ata nəníə́ máwɔ́á mabɛ́kálɛ́na má nɔ́ báá maasɛ, má lɛ ndɔ mukúlə́kulə mɔsɛ́ŋɛ́ húlə́ninə.

¹⁸Mɛ ndɔ Huɛlɛ́ mohóloniə híə́niniə ɔ yatɛ́ ɔyɛ́á mɛ ndɔ mohókí hɔ́ɔ́ ɔmá mɛ sa ɔ́kɔ́na yáyɛ́na bənú bəkimə.

¹⁹Mba, ɔ busíə́ bɔ́ ilúkunə yɛ́ bəlumininə, mɛ hikəkiə ɔhɔ́ɔ bɛtambá bɛ́lánɔ ɔbɛ́á bɛndɔ bá óso ɔwɔ́kɔ ɛlɔ́áyɛ́ bənə́bənə́ uwukúniə, yáyɛ́na ɔwá mɛ hɔ́ɔ́kɔ́ bɛtambá biəŋí na mohókí ɔmá mɛ sa ɔ́kɔ́na.

²⁰Á bənísə́ nɔ lɛ bɛkɔa fɛká ɛ́sɛ́á tɔlɔ́matɔ́, nɔ́ bámɛ́nɛ́ná ɛ́sɛ́á tɔlɔ́matɔ́ ɛsalɛ yɛ́ bɔbɛ́á, ɔ́ niɔŋɔ́, bááyɛ́ ɔbá bá lɛ ndɔ bɔbɛ́á manya. Mba, nɔ́ báá bahɔ́mɔ́ ɔ uwənú ɛnya yɛ́ ɔfɛka.

²¹Isə́lúkú á Huɛlɛ́ a ndɔ laa ɔ ɔwayɛ́ hiəfulə a sɛ́á: «Mɛ ŋɔ yɛ́ɛ́yɛ́ ilúkunə hɔ́kɛna ɔ tɔ́mbákɛna na bɛndɔ bá nihókí ninə́ninə́, ɔ tɔ́mbákɛna tɔ́na na munuə wɔ́ bɛndɔ bá mɔnɔŋɔ mənə́mənə́. Mba, ata mɛ ŋɔ nɔ́yɛ́ kɛaka, yamɛ́á ilúkunə bá sa ndá mɛaŋɔ́á ɔ́kɔ.»

²²Nɔ́yɛ́, mohókí ɔhɔ́ɔ́ ɔmá bá sa ɔ́kɔ́na, yɛ́ lɛa hɛŋgɛtɛ́nɛ́á ɛlɔ́áyɛ́ bááyɛ́ ɔbá bá lɛ bá bəlumininə. Mba, yɛ́ lɛ bá hɛŋgɛtɛ́nɛ́á ɛlɔ́áyɛ́ bəlumininə. Ɔ nifəŋə, imbə́nú utúmbə́ləniə ɔyɛ́á yɛ́ ndɔ húlínə na Huɛlɛ́, yɛ lɛa hɛŋgɛtɛ́nɛ́á ɛlɔ́áyɛ́ bəlumininə, táta hɛŋgɛtɛ́nɛ́á ɛlɔ́áyɛ́ bááyɛ́ ɔbá bá lɛ ndɔ lumininə.

²³Ɛ́sɛ́á iŋgətí; ábá ilúkunə yɛ́ bəlumininə bá ná kɔtákána mbá bá ndɔ hɔ́ɔ́ á mohókí ɔmá bá sa ɔ́kɔ́na, ábá bɛndɔ bítə́mbí ata bááyɛ́ ɔbá bá lɛ ndɔ lumininə, bá ná fíə́kínə ɔ ɛbɔ́ka ɔyɛ́á bá lɛ́á, bá sa láá bá sɛ́á nɔ lɛa bambamɔ́mbámɔ əə́?

²⁴Ɔ nifəŋə, ábá bəkimə bá ndɔ imbə́nú utúmbə́ləniə ɔyɛ́á yɛ́ ndɔ húlínə na Huɛlɛ́, mbá wɛ́ɛ́yɛ́ ɔwá a lɛ ndɔ lumininə, ata mɔndɔ witə́mbí, bá ná fínə́ ɔ ɛbɔ́ka ɔyɛ́á nɔ lɛ́á, bíə́núə́ bɛtambá bɛ́ ŋɔ bəə́bu itiələ, nɔ́yɛ́, bá ŋɔ mə́búə́ mabɛ́á manya.

²⁵Nɔ́yɛ́, ɛndɔnɔ yɛ mɔɛ́ta tɛ́á yɛ́ ŋɔ fámálana ɔ mianyɔ́. A ŋɔ kiniə á Huɛlɛ́ busíə́, a ŋɔ wɛɛ́ya nyamaka, a ŋɔ fə́mə́ləniə tə́lə́ŋu a sɛ́á: «Huɛlɛ́ a lɛa taká ɔ uwənú ətíə́!»

²⁶Á bənísə́, yatɛ́ ɛ́kɛ tɔ tifəniə əə́? Ikúílí nɔ ná kɔtákána ɛlɔ́áyɛ́ Huɛlɛ́ ulúbúnə, wɔ́ɔwɔ a óso ɔ bɔŋana uwóso, wə́ə́ní a hɔ́ɔ́kɔ ɛlɔ́áyɛ́ bɔsɔ́kɔ́ úkúniə, wɔmɔtɛ́ a bɛkɔa bɛ́ Huɛlɛ́ fə́mə́ləkəniə ɔbɛ́á bɛ́ lɛ́á bítímə́tɔ, wɔmɔtɛ́ a hɔ́ɔ́kɔ na mohókí ɔmá a sa ɔ́kɔ́na, wɔmɔtɛ́ tɔ́na a yɛ́táyɛ́ Imbə́nú túmbə́ləkəniə. Bɛ́ɛ́yɛ́ bikimə bɛ́ ná hɔ́ánána ɔbɛ́kɛa ɔkɛaka ɔwá, bá ilumininə yɛ́ bɛndɔ ónókiniə.

²⁷Ábá bɛndɔ bá ná tuə́nə ɔ mohókí ɔhɔ́ɔ́ ɔmá bá sa ɔ́kɔ́na, yɛ́ lɛa hɔ́ánánátɔ́ ɔwá báfandɛ́ ata bálálɔ́ bá nɔ́yɛ́ kɛ́áka, mɔɛ́ta tɛ́á ɔ ɔwayɛ́ ikúílí, wɔmɔtɛ́ tɔ́na a ná hɔ́ánána utúmbə́ləniə yatɛ́ ɔyɛ́á bə́ə́ní bá ndɔ laa.

²⁸Ábá mutúmbə́ləniə a lɛ bá, munísə́ a sá hɔ́ánana ɔhɔ́ɔ́ ətíə́ yɛ bɛndɔ, á Huɛlɛ́ hɔ́kɛ́ná bɛ́múɛ́tɛ́ ɔ ɔwayɛ́ mɔlɛ́má nuúmə́.

²⁹Ɛlɔ́áyɛ́ bááyɛ́ ɔbá bá ndɔ imbə́nú túmbə́ləniə ɔyɛ́á yɛ́ ndɔ húlínə na Huɛlɛ́, bɛndɔ báfandɛ́ ata bálálɔ́ bá ná hɔ́ánána ɔhɔ́ɔ́, bɔ́mɔtɛ́ bá ɔ́kɔ́kɛna yatɛ́ ɔyɛ́á bá ndɔ laa ɔkɛaka ɔwá, bá siəlínə́ ábá nɔ́yɛ́ yɛ́ lɛa taká.

³⁰Ábá mɔndɔ ɔ uwənú ətíə́ a lɛa na ɔhɔ́ɔ́, mbá Huɛlɛ́ a ná wɛɛ́ya bɔ́mɔtɛ́ bɔkɔa ínə́níə́, wəbusíə́ a ayɛ́ nə́yə́niə ɔkɛaka ɔwá, mukúlə́kulə á ayɛ́ hɔɔkɔ.

³¹Bənú bəkimə nɔ óso ɔ mɛsɔ́ma utúmbə́ləniə ɔyɛ́á yɛ́ ndɔ húlínə na Huɛlɛ́, mba, nɔ ná hɔ́ánána ɔhɔ́ɔ́ ɔmɔtɛ́ na ɔmɔtɛ́ ɔkɛaka ɔwá bənú bəkimə nɔ́ bɔkɔa ɔ́kɔ́náka, yə́núə́ ilumininə yɛ́ ɔ́nɔ́kɛ́na.

³²Bááyɛ́ ɔbá bá ndɔ imbə́nú túmbə́ləniə ɔyɛ́á yɛ́ ndɔ húlínə na Huɛlɛ́, bá ná hɔ́ánána ɔbɛ́hálɛna, bá hɔ́ɔ́kɔ ɔ ikúílí ɔyɛ́á yɛ́ ná hɔ́ánána.

³³Ɔ taká, abáka Huɛlɛ́ a lɛ undumbú híkíə́, abáka a hikəkiə á bumbə́nú. Ɛ́sɛ́á abáka nɔ́yɛ́ yɛ́ bɛ́kɛaka ɔ bilúkunə bikimə bɛ́ bəlumininə,

³⁴bəəndú bá ná hɔ́ánána ɔ unə́yə́niə. Bá lɛ bá na kuənjə ɔ ɔhɔ́ɔ́ umə́; bá ná hɔ́ánána ubílólosoliə ɛ́sɛ́á Umbə́ndə́ tɔ́na wɔ́ ndɔ laa.

³⁵Ábá bɔkɔa bɔ́ báka ɔbɔ́á bá sá ɔ́kɔ, bá bata á yəbúə́ ibə́ ɔ ɔmbɛ́la. Yɛ́ lɛ bá muɛsɛ ɔwá muəndú a hɔ́ɔ́kɔ́ ɔ ətíə́ yɛ ilúkunə.

³⁶Nɔ ndɔ manya muɛsɛ nɔ sɛ́á ɛtambá yɛ́ Huɛlɛ́ yɛ́ ka botoliniə ɔ uwənú. Ataná, bənú bíbúə́ nɔ ná yɛ́táyɛ́ ɛtambá kúsə́nə.

³⁷Ábá wɔmɔtɛ́ ɔ uwənú ətíə́ a ndɔ bɛ́kɔ́lɔmɔna ɔwá a lɛa mɔhɛ́nátɔtányɛ́, ataná, a lɛa na iŋgínə́ ɔyɛ́á Umbúínyi Mɔnaŋanaŋa wɔ́ ndɔ wɛɛ́ya índiə, á manyá ɔwá yatɛ́ ɔyɛ́á mɛ ndɔ bənú tilinə háha yɛ́ ndɔ húlínə na Isə́lúkú.

³⁸Mba, ábá a lɛ ndɔ nɔ́yɛ́ manya, á manyá ɔwá Huɛlɛ́ tɔ́na, a lɛ ndɔ ayɛ́ wɛɛ́ya manya.

³⁹Nɔ́yɛ́ á bámɛ́á bənísə́, nɔ báá na ilókí yɛ́ imbə́nú utúmbə́ləniə ɔyɛ́á yɛ́ ndɔ húlínə na Huɛlɛ́, nɔ lɛ ɔsɔ́kɔ́ kotíə́ ɔ mohókí ɔhɔ́ɔ́ ɔmá a sa ɔ́kɔ́na.

⁴⁰Mba, bikimə bɛ́ bɛ́kɛ́áká ɛ́sɛ́á yɛ́ ndɔ bísiə, mba tátá na mətuŋulə.