Read Tunen 1 Kɔlɛ́ŋɛ́tɛ 15 Bible Online

1 Kɔlɛ́ŋɛ́tɛ 15 - Tunen bible

1 Kɔlɛ́ŋɛ́tɛ 15

¹Á bənísə́, mɛ ndɔ bənú Imbə́nú Yɛɛsɛ bɛ́kɔ́lɔmɔnɛna ɔyɛ́á mɛ ná bənú nɔ́ŋɔ́nákɛ́na; nɔ ka yɛ́táyɛ́ Imbə́nú luminə, nɔ ná yɛɛ́ta bɛ́ɔ́lɔ́kɔ́kɛ́na.

²Ábá nɔ ná yɛ́táyɛ́ Imbə́nú Yɛɛsɛ lumínə́ ɛ́sɛ́á mɛ ná bənú nɔ́ŋɔ́nákɛ́na, ɔ tɔ́mbákɛna na yɛɛ́ta, Huɛlɛ́ a ŋɔ bənú nuəkəniə. Yɛ́ sá bá nɔ́yɛ́, ɛlɔ́áyɛ́ ndəmə nɔ́ ná híáná bəlumininə.

³Mɛ ka taŋa ɔ uwənú ɔ yɔkɔ́na uwíndiə ɔyɛ́á mɛ ná kúsə́nə mɛaŋɔ́á bɛ́múɛ́tɛ́: Kilísitusu a ka wínə ɛlɔ́áyɛ́ mə́súə́ mabɛ́á, ɛ́sɛ́á Mətilə má ndɔ laa.

⁴Bá ka wɛɛ́ya háá ɔ munyə́, Huɛlɛ́ a ka wɛɛ́ya huŋuəsiə əlimə yɛ tunó tɔ́lálɔ́, ɛ́sɛ́á Mətilə má ndɔ laa.

⁵Ɛnaka á hɔŋɔ́á, a ná bínə́níə́ á Sɛ́fasɛ busíə́, əlimə yɛ ikúílí, a ná bínə́níə́ ɔ bɔ́mɔtɛ́ bɔkɔ́nɛna.

⁶A ka bínə́niə tɔ́na ɔ ikúílí ɛ́mɔtɛ́ ɔ bɛbɔ́ɛ́yɛa bɛ́lánɔ bɛ́ bənísə́ ɔ ɔyáyɛ́na. Bɔ́mɔtɛ́ bá nabáka ɔ buɔmɔ́. Bɔ́mɔtɛ́ bá ka wə́kunə.

⁷A ka Yákɔbɔ bínə́niə, əlimə yɛ nɔ́yɛ́, a ná bínə́níə́ ɔ basɔ́másɔma.

⁸Ɔ nitifə́, a ná mɛaŋɔ́á bínə́níə́, ɔwámɛ ɔwá mɛ lɛ́á ɛ́sɛ́á mɔná ɔwá bá ná bíə́nə́ ɛŋaná ikúílí ɔnyána.

⁹Ɛ́ɛ! Mɛaŋɔ́á mɛ́ lɛ́á mɔtɛ́tɛ́á wa bɔŋgəlimə bəkimə; mɛ lɛ bá hɔ́ánánátɔ́ ɔwá bá mɛaŋɔ́á ɛ́lɛ́ákɛ́nɛ́ná muɔŋgəlimə bɔkɔasɛ́á, mɛ ka ilúkunə yɛ́ bəlumininə yɛ́ Huɛlɛ́ təkəsəkə.

¹⁰Mba, ɔ tɔ́mbákɛna na mɔlɛ́má muɛsɛ wɔ́ Huɛlɛ́, a ka kɛaka mɛ ná híáná mɔndɔ ɛ́sɛ́á mɛ lɛ́á. Nyɔnɔ ɔyɛ́á Huɛlɛ́ a ná mɛaŋɔ́á índíə́ yɛ́ sa híána ndəmə. Mɛ ka nyɔɔkɔ yáyɛ́ná bɔŋgəlimə bəkimə; ɔ taká, tátá na yamɛ́á iŋgínə́ mɛ́ ná nɔ́yɛ́ kɛ́áka, mba, nyɔnɔ yɛ Huɛlɛ́ yɛ́ ná mɛaŋɔ́á ɔ́lɔ́ ɔ nɔ́yɛ́ ɔkɛa.

¹¹Tɔ́ ákáná usinə, ata mɛaŋɔ́á mbá ata bɔ́mɔtɛ́ bɔŋgəlimə, bəsú bəkimə tɔ ndɔ nɔŋɔna bɔkɔa bɔ́mɔtɛ́, ɔ́ bɔɛ́ta nɔ́ ná lumínə.

¹²Tɔ ndɔ túmbə́ləniə ɔwá Huɛlɛ́ a ka Kilísitusu huŋuəsiə ɔ ətíə́ yɛ bəwə́nú. Mba, nəníə́ bɔ́mɔtɛ́ ɔ uwənú ətíə́ bá óso ɔlaa bá sɛ́á nɛhɔŋɔa nɛ́ bəwə́nú nɛ́ lɛ boóko əə́?

¹³Ábá nɔ́yɛ́ yɛ́ lɛ́á, há ata á Kilísitusu a sa hɔŋɔa.

¹⁴Mba, ábá Kilísitusu a sa hɔŋɔa, ɔ́ niɔŋɔ́, imbə́nú ɔyɛ́á tɔ́ ná bənú nɔ́ŋɔ́nákɛ́na yɛ́ lɛa ndəmə, yə́núə́ ilumininə tɔ́na yɛ́ lɛa ndəmə.

¹⁵Ábá taká bəwə́nú bá sa ndáhɔ́ŋɔ́á, ɔ́ niɔŋɔ́, Huɛlɛ́ a sa kilísitusu huŋuəsiə ətíə́ yɛ bəwə́nú, nɔ́yɛ́, tɔ ndɔ Huɛlɛ́ kanjɛna bɔkɔasɛ́á, tɔ ka bɛndɔ lakɛna ɔwá Huɛlɛ́ a ka Yə́susu Kilísitusu huŋuəsiə.

¹⁶Ábá Huɛlɛ́ a sa ndá bəwə́nú huŋúə́síə́, ata á Kilísitusu tɔ́na Huɛlɛ́ a sa wɛɛ́ya huŋuəsiə.

¹⁷Ábá Kilísitusu a sa hɔŋɔa, yə́núə́ ilumininə yɛ́ lɛa ndəmə, nɔ nabáka tɔ́na úndúə́tɔ́ na mə́núə́ mabɛ́á.

¹⁸Nɔ́yɛ́ yɛ́ ndɔ siə ɔlaa ɔwá, bááyɛ́ ɔbá bá ná wə́kúnə na níə́búə́ nɛkɔmba tálɛ́nátɔ́ á Kilísitusu, bá lɛa nímínə́tɔ.

¹⁹Ábá tɔ ka yə́súə́ ɛnánɛna yikimə tálɛ́na á Kilísitusu ɔkɛaka ɔwá, a bəsú ɔ́lɔ́ ɔbánɔ́ ɔ buɔmɔ́ bɔ́ yɛ́ɛyɛ misí, tɔ lɛa ətíə́ yɛ bááyɛ́ ɔbá bá ná hɔ́ánána ɔ mahana uwə́ə́.

²⁰Mba bóo! Kilísitusu a ka hɔŋɔa ɔ ətíə́ yɛ bəwə́nú, a lɛa wəbusíə́ ɔwá Huɛlɛ́ a ná huŋúə́síə́, nɔ́yɛ́, bəwə́nú bá ŋɔ əbú hɔŋɔakɛa hɔ́ánánátɔ.

²¹Mba, ɛ́sɛ́á nyɛmbɛ́ yɛ́ ná húlínə́ ɔ tɔ́mbákɛna na mɔndɔ ɔmɔtɛ́, ɔ tɔ́mbákɛna na mɔndɔ ɔmɔtɛ́ tɔ́na á nɛhɔŋɔa nɛ́ ndɔ húlínə.

²²Bɛndɔ bəkimə bá ndɔ wə́ə́ bɔkɔasɛ́á, bá lɛa bá ɛndɛkɛ Átama, hɔ́ánánátɔ́, bəkimə tɔ́na bá ŋɔ ndahíáná ɔ buɔmɔ́ bɔkɔasɛ́á, bá lɛa ɔ nɛtɔana na Kilísitusu,

²³mba, mɔɛ́ta tɛ́á ɔ ɔwayɛ́ ikúílí. Wəbusíə́ ɔwá a ná taŋá, á Kilísitusu; əlimə yɛ nɔ́yɛ́, bááyɛ́ ɔbá bá lɛ́á ɔ nɛtɔana na Kilísitusu ɔ ikúílí ɔyɛ́á a ŋɔ ndahiana.

²⁴Əlimə yɛ nɔ́yɛ́, nisúki nɛ́ ŋɔ ndafama, ɛnáká a mənjiŋə məkimə má mabɛ́á, na bíə́búə́ bisə́lúkú nímə́síə́, a ŋɔ bɛndɔ bəkimə bá mamanɛna nímə́siə, nɔ́yɛ́, ɛnáká misí na bɛ́áyɛ́á bɛɛ́la bikimə bɛ́ hɔ́á, a ŋɔ iŋgínə́ yɛ nɛ́áyɛ́á nɛmanɛna híə́níə́ á Huɛlɛ́ Isə́ mɔkátá.

²⁵Ɔ taká, wɛɛ́ya a ná hɔ́ánána ɔmanɛna ɔkafámáká ɔ hinó ɔhɛ́á Huɛlɛ́ a ŋɔ kɛaka ɔwá, a bááyɛ́á bəbəniə tafáká na máyɛ́á makɔlɔ́.

²⁶Mubəniə ɔwá a ŋɔ tifəniə ɔ unímə́siə á nyɛmbɛ́.

²⁷Ɔ taká, Mətilə má ndɔ laa má sɛ́á: «Huɛlɛ́ a ka iŋgínə́ índiə á wayɛ́á mɔná ɔkɛaka ɔwá a bɛɛ́la bikimə manákɛ́na.» Mba, nɔ́yɛ́ yɛ́ ndɔ ɛ́nána ɔwá Kilísitusu a sa ndá Huɛlɛ́ mánɛ́ná bɔkɔasɛ́á, á Huɛlɛ́ a ná wɛɛ́ya nɛmanɛna índíə́.

²⁸Ɛnáká Huɛlɛ́ á Isə́ a kɛ́áka ɔwá wayɛ́á mɔná a bɛkɔa bikimə manákɛ́na, Kilísitusu ɔwayɛ́ á Mɔná wa Huɛlɛ́, a ŋɔ Huɛlɛ́ ɔ́kɔ́kɛnɛna bikúílí bikimə, ɔwayɛ́ ɔwá a ná wɛɛ́ya nɛ́táyɛ́ nɛmanɛna índíə́. Əlimə yɛ nɔ́yɛ́ Huɛlɛ́ a bámɛ́nɛ́na munəni wa bɛkɔa bikimə.

²⁹Bɛndɔ bá báka ɔbá bá ndɔ nɛsɔa kusənə ɔ nióni nɛ́ bááyɛ́ ɔbá bá ná wə́kúnə. Ábá taká abáka bɛndɔ bá lɛ hɔŋɔ́á, ɛlɔ́áyɛ́ yatɛ́ bá ndɔ nɛ́táyɛ́ nɛsɔa kusənə əə́?

³⁰Ábá bɛndɔ bá sa ndáhɔ́ŋɔ́á ɛlɔ́áyɛ́ yatɛ́ tɔ ndɔ nyɛmbɛ́ sinə ikúílí tɛ́á əə́?

³¹Á bənísə́, buɔsɛ́ tɛ́á, mɛ ndɔ nyɛmbɛ́ sinə nɔ́yɛ́ taká, mɛ ndɔ nɛhɔnɔ ɔ́kɔ nɔ́yɛ́ taká bɔkɔasɛ́á, nɔ lɛa ɔ nɛtɔana na Yə́susu kilísitusu ɔ yəsúə́ Isə́lúkú.

³²Mɛ ka bɛndɔ nuəkiə ɔbá bá ná báá ɛ́sɛ́á mɛnyama yɛ́ ɛmbɔ́ma ɔ bətínə́ yɛ Ɛfɛ́sɛ. Ábá bɛ́ámɛ́á bɛfɛka bɛ́ lɛa ɛ́sɛ́á bɛ́ bɛndɔ bá misí, yatɛ́ mɔsɛ́ŋɛ́ bɛ́táyɛ́ bituəmə bɛ́ ndɔ mɛaŋɔ́á húlə́ninə əə́? Ábá nɔ́yɛ́ yɛ́ lɛ́á ɔwá, bəwə́nú bá sa ndáhɔ́ŋɔ́á, ɛkasɛ mɛ ámɛ láá ɛ́sɛ́á bɔsɔ́kɔ́ mɛ sɛ́á: «Tɔ́ ənú nɛaka, tɔ́ nyákɛ́ná bɔkɔasɛ́á, bulílə́ tɔ ŋɔ wə́kunə».

³³Nɔ lɛ bínímbə́ bɔ́ányɛ: Ábá nɔ ndɔ kindəniə na bɛndɔ ɔbá bá lɛ́á na malɔŋa mabɛ́á, nɔ ŋɔ kɔɛna ɔ uwəbú mɔkɔlɔ́.

³⁴Nɔ lɛ bíyúkúsíníə́, nɔ lɛ bɔbɛ́á kɛ́á tɔ́na; ɔ taká, bɔ́mɔtɛ́ ɔ uwənú ətíə́ bá nana Huɛlɛ́ mánya, ɛsɛ́má na bənú ábá mɛ ndɔ bənú nɔ́yɛ́ hɛ́na.

³⁵Mba, bɛndɔ bá ndɔ bata bá sɛ́á: «Nəníə́ Huɛlɛ́ a ŋɔ bɛndɔ huŋuəkiə əə́? Na yatɛ́ nindínə́ nɛ́ mɛɛ́lɔ bá ŋɔ əbú bámɛnɛna əə́?»

³⁶Ikúílí ɔ ndɔ bata nɔ́yɛ́, ɔ́ niɔŋɔ́, ɔ lɛa yaála! Ɔ lɛ ndɔ manya ɔwá, ábá ɔ ná mɔsámá nɛ́má ɔ misí, abáka wɔ́ fɔnɔkɔ əlimə yɛ ikúílí mbá bɔlɔŋɔ́tɛ́ bɔ́ tɔsɔ́ əə́?

³⁷Mɔsámá ɔbánɔ́ abáka ɔ nɛma, ɔ yɛ́mɔtɛ́ ikúílí, wɔ́ ɔmbásáká ata wɔ́ yɛ́mɔtɛ́ ɛnya yɛ nifumə́, mba, tátá bɔlɔŋɔ́tɛ́ ɔbɔ́á ɛkasɛ bɔ́ tɔsɔ.

³⁸Ikúílí ɔ ná wútə́yí mɔsámá nɛ́má, á Huɛlɛ́ a ndɔ mɔsámá luəsiə, wɔ́ híána ɔ ɛnya yɛ bɔlɔŋɔ́tɛ́ ɔbɔ́á a ndɔ hikiə. Mɔsámá tɛ́á na yayɛ́á ɛnya yɛ bɔlɔŋɔ́tɛ́.

³⁹Mɛɛ́lɔ yɛ bɛbɔ́tɛ́ná tɛ́á ɔbɛ́á bɛ́ ndɔ niŋə yɛ́ booko nifəŋə. Mɛɛ́lɔ yɛ mɔsá bɛnama nifəŋə na yɛ mɛnyama, yɛ tunoní nɔ́yɛ́, yɛ tuɔfɔ́ nɔ́yɛ́.

⁴⁰Bɛɛ́la bɛ́ booko ɔ nɔɔ́mɛná, bɛ́mɔtɛ́ tɔ́na ɔ misí. Ɛsakɛsakɛ yɛ́ bɛɛ́la bɛ́ nɔɔ́mɛná nifəŋə na yɛ́ bɛɛ́la bɛ́ misí.

⁴¹Hiɔtɔ́tɔ́ hɛ́ booko na yáyɛ́á ɛnya yɛ ɛsakɛsakɛ, muilí na yayɛ́, tusənji tɔ́na na yəbúə́ ɛnya yɛ ɛsakɛsakɛ; ata tusənji tɔ́ lɛ boóko na ɛnya yɛ ɛsakɛsakɛ ɛ́mɔtɛ́.

⁴²Nɔ́yɛ́ yɛ́ ŋɔ báá ɔ ikúílí ɔyɛ́á bəwə́nú bá ŋɔ hɔŋɔakɛa. Umimə wɔ́ mɔndɔ ɔwá bá ná háá ɔ misí, wɔ́ fɔnɔkɔ, ikúílí ɔyɛ́á wɔ́ ná hɔŋɔ́á wɔ́ sa ndə́wə́ə́ tɔ́na.

⁴³Ikúílí a bá ná muítə háá ɔ misí, wɔ́ ka báá bɔɔ́la bɔ́ ndəmə, tɔmbɔ́kɔ́tɔ. Ɛnáká wɔ́ hɔŋɔ́á, wɔ́ ŋɔ bámɛnɛna na iŋgínə́, na tuúmə.

⁴⁴Ikúílí bá ná muítə háá ɔ misí, wɔ́ lɛa ɔbánɔ́ mɛɛ́lɔ. Ɛnáká wɔ́ hɔŋɔ́á, wɔ́ ŋɔ báá mɛɛ́lɔ ɔyɛ́á Umbúínyi Mɔnaŋanaŋa wɔ́ ndɔ kɛndana. Mɛɛ́lɔ yɛ́ báka ɔyɛ́á yɛ́ lɛ́á yɛ misí, yɛmɔtɛ́ yɛ́ báka tɔ́na ɔyɛ́á Umbúínyi wɔ́ ndɔ kɛndana.

⁴⁵Ɔ́ ɛlɔ́áyɛ́ nɔyɛ́, Mətilə má ndɔ laa má sɛ́á: «Átama a ka bá mɔndɔ wəbusíə́ ɔwá Huɛlɛ́ a ná buɔmɔ́ índíə́.» A ka kɛaka tɔ́na ɔwá Átama wənitifə́ a ndafama, ɔ́ Umbúínyi ɔwá wɔ́ ndɔ buɔmɔ́ índiə.

⁴⁶Bɔɔ́la ɔbɔ́á bɔ́ a ná táŋá ɔ ɔfámálana, bɔ́ sa bá mɛɛ́lɔ ɔyɛ́á yɛ́ ndɔ húlínə na Umbúínyi, bɔ́ ka báá mɛɛ́lɔ yɛ mɔndɔ wa misí, əlimə yɛ ikúílí, mɛɛ́lɔ ɔyɛ́á yɛ́ ndɔ húlínə na Umbúínyi yɛ́ ná ndafama.

⁴⁷Huɛlɛ́ a ka mɔndɔ wəbusíə́ maaka na umbunə́, ɔ́ ɛ́lɔ́áyɛ́ nɔyɛ́ a lɛ́á mɔndɔ wa umbunə́. Mɔndɔ ɔwá a ná ɔ́ŋgɔ́nɔ, a ndɔ húlínə ɔ nɔɔ́mɛná.

⁴⁸Bááyɛ́ bəkimə ɔbá bá lɛ́á ɔ misí, bá lɛa hɔ́ákátɔ́ ɔ mɔndɔ ɔwá Huɛlɛ́ a ná maáká na umbunə́. Bɛndɔ bəkimə bá nɔɔ́mɛná, bá ŋɔ hɔ́áka ɔ wɛ́ɛ́yɛ́ ɔwá a ndɔ húlínə ɔ nɔɔ́mɛná.

⁴⁹Hɔ́ánánátɔ́ ɛ́sɛ́á tɔ́ lɛ́á hɔ́ákátɔ́ ɔ wɛ́ɛ́yɛ́ ɔwá Huɛlɛ́ a ná maáká na umbunə́, nɔ́yɛ́ tɔ ŋɔ báá hɔ́ákátɔ́ ɔ wɛ́ɛ́yɛ́ ɔwá a ndɔ húlínə ɔ nɔɔ́mɛná.

⁵⁰Á bənísə́, mɛ ndɔ siə ɔlaa náana ɔwá, ɛ́sɛ́á mɛɛ́lɔ yɛ́ booko na iməhú na manɔ́ŋɔ́, yɛ́ sa ósó ufínə ɔ nɛmanɛna nɛ́ Huɛlɛ́. Bɛɛ́la ɔbɛ́á abáka bɛ́ fɔnɔkɔ, bɛ́ sa ósó utuənəniə na bɛ́ buɔmɔ́ bɔ́ ikúílíə́kimə.

⁵¹Bɔkɔa bɔ́ bítə́tɔ́ ɛkasɛ mɛ bənú lɛ́na: Tɔ lɛ ndɔ wə́ə́ bəsú bəkimə, mba, Huɛlɛ́ a ŋɔ kɛaka ɔwá yəsúə́ mɛɛ́lɔ yɛ́ bíúŋúnə́níə́.

⁵²Nɔ́yɛ́ yɛ́ ŋɔ bɛ́kɛaka ikúílí ɛ́mɔtɛ́ ɔ hikə́bikə́bi hɛ́ niísə, ɛnáká mɔsɛ́bɛ́ wɔ́ nitifə́ wɔ́ lɔŋɔ. Ɛnáká bá mɔsɛ́bɛ́ lɔ́ŋɔ́kɔ́, bəwə́nú bá ŋɔ hɔŋɔakɛa na mɛɛ́lɔ ɔyɛ́á yɛ́ sa ndə́wəə, bəsú bəkimə Huɛlɛ́ a ŋɔ kɛaka ɔwá tɔ mɛɛ́lɔ miɔ́sɔ kusə́nə.

⁵³Ɔ́ niɔŋɔ́, yɛ́ɛyɛ mɛɛ́lɔ ɔyɛ́á yɛ́ ná hɔ́ánánátɔ́ uwə́ə́, yɛ́ ŋɔ bíúŋúnəniə, yɛ́ híáná mɛɛ́lɔ ɔyɛ́á yɛ́ sa ndə́wə́ə́ tɔ́na, mɛɛ́lɔ ɔyɛ́á yɛ ná hɔ́ánána ɔfɔnɔ, yɛ́ ŋɔ híána mɛɛ́lɔ ɔyɛ́á yɛ́ sa ndáfɔ́nɔ.

⁵⁴Ikúílí ɔyɛ́á yəsúə́ mɛɛ́lɔ yɛ́ sɔ́ ŋɔ wə́ə́, ikúílí ɔyɛ́á yɛ́ sɔ́ ŋɔ fɔnɔ tɔ́na, nɔ́yɛ́ bɛtambá bɛ́ Mətilə bɛ́ ndɔ bíúndúsíníə́ bɛ́ sɛ́á: «Bá ka nyɛmbɛ́ nímə́siə, bá ná mɛɛ́ta nuəkíə́, bá ná nɔba.

⁵⁵Əə́! Ɔwáwɔ á nyɛmbɛ́, hə́níə́ nɛ́áwɔ́á nɛnɔba nɛ́ lɛ́á əə́? Ə́ə́! Ɔwáwɔ á nyɛmbɛ́, hə́níə́ wə́wúə́ mɔsɔsɔlɔŋɛ́ wɔ́ lɛ́á əə́?»

⁵⁶Mɔsɔsɔlɔŋɛ́ wɔ́ nyɛmbɛ́, ɔ́ bɔbɛ́á, Umbə́ndə́ wɔ́ Huɛlɛ́ tɔ́na, wɔ́ ayɛ́ bɔbɛ́á iŋgínə́ índiəkinə.

⁵⁷Tɔ́ Huɛlɛ́ mohóloniə híə́níníə́ ɔwá a ndɔ kɛa ɔwá, tɔ nyɛmbɛ́ nɔ́bá ɔ tɔ́mbákɛna na Yə́susu Kilísitusu ɔ yəsúə́ Isə́lúkú.

⁵⁸Á bənísə́ bá nibo, nɔ́ ɔ́nɛna, nɔ́ báá na iŋgínə́, nɔ lɛ tɔmbɔ, nɔ́ buolí bɔ́ Isə́lúkú nyɔ́ɔ́kɔ́ na mɔlɛ́má muɛsɛ. Nɔ ndɔ manya ɔwá, buolí ɔbɔ́á nɔ ndɔ nyɔɔ ɔ bɔlatɔ́ na wɛɛ́ya, bɔ́ sa ndafámá ndəmə.