Read Tunen 1 Kɔlɛ́ŋɛ́tɛ 16 Bible Online

1 Kɔlɛ́ŋɛ́tɛ 16 - Tunen bible

1 Kɔlɛ́ŋɛ́tɛ 16

¹Ɛkasɛ mɛ bənú hɔ́kɛ́na ɛlɔ́áyɛ́ məndunə́ ɔmá nɔ ŋɔ kɔtaka ɔkɛaka ɔwá, nɔ lɔ́mɛ́ná ɔ bikilísitənə bɛ́ Yəlúsalɛma. Bənú tɔ́na, nɔ ŋɔ ɔŋgɔkɛna ɔ bɛtɛ́nɛ́mɛ́ná ɔbɛ́á mɛ ná índíə́kínə́ ɔ bilúkunə bɛ́ bəlumininə ɔbɛ́á bɛ́ lɛ́á ɔ Kalátɛ.

²Indílí tɛ́á, mɔɛ́ta tɛ́á a ŋɔ məndunə́ bɛ́lɛna ɔ ɛmɛ́ŋɛ́, yatɛ́ ɔyɛ́á a ná tə́tə́níə́ ɛ́sɛ́á bɛ́áyɛ́á bɛhámbálɛ́ ɔkɛaka ɔwá, bá lɛ mɛaŋɔ́á tátá ɔ ikúílí mɛ ŋɔ ndafámá ɛlɔ́áyɛ́ mahánɛna ɔkɔta.

³Ɛnáká mɛ ndáfámá, mɛ ŋɔ bááyɛ́ lɔ́ma ɔbá nɔ ná tɛ́fá na tuəfulə ɔtɔ́á mɛ ná tílə́kə ɔkɛaka ɔwá, bá níə́núə́ nɛhánɛna ákánána ɔ Yəlúsalɛma.

⁴Ábá yɛ́ ná báá ɔwá mɛaŋɔ́á bɛ́múɛ́tɛ́ mɛ́ ákáná umə́, há tɔ ŋɔ kindəkəniə na bəə́bu iŋgində́.

⁵Mɛ ndɔ siə ɔwakána ɔ bɔnɔŋɔ bɔ́ Masɛtɔánɛ, əlimə yɛ nɔ́yɛ́, mɛ ŋɔ nda bənú síə́línə.

⁶Ɔmbáŋíndíə́, mɛ ŋɔ tɛ́tɛ́á yɛ ikúílí túmbiə na bənú ɔ ikúílí yikimə yɛ́ əmbumə ɔkɛaka ɔwá, nɔ mɛaŋɔ́á tɛ́tɛ́á yɛ bɔɔ́la índíə́ ɛlɔ́áyɛ́ wə́míə́ mɔkɛnda mukimə ata hə́níə́ mɛ ŋɔ kafama.

⁷Isíŋáka, mɛ lɛ ndɔ siə ɔbánɔ́ ɔ uwənú usinə ɔ tɔ́mbáka, mɛ ndɔ nánɛna utuənə tɛ́tɛ́á yɛ ikúílí na bənú, ábá Isə́lúkú a ná hikə́kíə́.

⁸Mba, mɛ ndɔ siə utuənə ɔ yɛ́ɛyɛ bətínə́ yɛ Ɛfɛ́sɛ ɔkafámáká əlimə yɛ ɛŋganda yɛ Bɛndɛkɔ́sɛtɛna.

⁹Ɔ taká, Huɛlɛ́ a ná mɛaŋɔ́á ɛnɔ́mɛ yɛɛsɛ kunínə umə́ ɔkɛaka ɔwá, mɛ bɔ́áyɛ́á buolí nyɔ́ɔ́kɔ, ata nɔ́yɛ́ ɛ́sɛ́á bámɛ́á bokóyíkoyi bá lɛ́á bəəŋí.

¹⁰Ábá Timotíó a ná ndáfámá, nɔ kɛaka ɔwá bɔkɔ́lɔ́ma bɔ́ lɛ wɛɛ́ya itíə́ ɔ uwənú ətíə́ bɔkɔasɛ́á, a lɛa ɔ buolí bɔ́ Isə́lúkú ɛ́sɛ́á mɛaŋɔ́á.

¹¹Mɔndɔ á sá hɔ́ánana ɔ ɔwayɛ́ uyəniə. Nɔ́ wɛɛ́ya ɔ́lɔ́ ɔkɛaka ɔwá a kɛndáká ɔ bumbə́nú nuúmə́, á ndáhíáná ɔwámɛ busíə́, ɔ taká, na mɛaŋɔ́á na bənísə́ tɔ ndɔ wɛɛ́ya táta.

¹²Ɛlɔ́áyɛ́ wəsúə́ munísə́ á Abolóso, mɛ ka wɛɛ́ya bɛ́tɔ́kɔ́lɔkɛna bikúílí biəŋí ɔkɛaka ɔwá, a ndá bənú síə́línə́ na bɔ́mɔtɛ́ bənísə́, mba, a lɛ ndɔ hikiə ɔndasá isíŋáka. Ɛnáká a ikúílí bɔ́ŋɔ́, a ŋɔ ndasa.

¹³Nɔ́ báá ɛmbɛnyɛ́, nɔ́ ɔ́nɛ́nɛ́na ətíə́ yɛ ilumininə, nɔ́ kánjɔ́á, nɔ́ bá na iŋgínə́.

¹⁴Nɔ́ bɛkɔa bikimə kɛ́áka ətíə́ yɛ nibo.

¹⁵Á bənísə́, tɔ́kɔ́lɛ ɔbánɔ́ tɔ́na, nɔ ndɔ manya ɔwá Itifányɛ na nɛ́áyɛ́á nikúlə, bá ka báá bə́búsíə́ ɔ níə́búə́ nɛkɔmba ɔtálɛ́na á Kilísitusu ɔ nɛkɛ́tɛ nɛ́ misí ɔ Akáyɛ, bá ka nyɔɔkɔ na iŋgínə́ yikimə tɔ́na ɔkɛaka ɔwá, bá bɛláŋa bɛ́ ilúkunə yɛ́ Huɛlɛ́ ɔ́lɔ.

¹⁶Nɔ́ yɛ́ɛ́yɛ́ ɛnya yɛ́ bɛndɔ ɔ́kɔ́kɛ́nɛ́na, na bááyɛ́ bəkimə ɔbá bá ndɔ nyɔɔ mɔŋɛ́ŋa na bəə́bu.

¹⁷Mɛ ndɔ wə́ə́ na nɛhɔnɔ ɔwá Itifányɛ, Fɔlɔtunátusu na Akayákusu, bá ka ndáfáma ɔwámɛ busíə́, ikúílí mɛ ndɔ bəə́bu sinə, ɔ́maná ɛ́sɛ́á bənú bəkimə mɛ ndɔ sinə.

¹⁸Bá ka mɛaŋɔ́á mɔlɛ́má óníniə ɛ́sɛ́á bá ná ənú ónókíníə́ tɔ́na. Nɔ ná hɔ́ánána ɔ yɛ́ɛ́yɛ́ ɛnya yɛ bɛndɔ ɔ hibə́təniə uhíə́niniə.

¹⁹Ilúkunə yɛ́ bəlumininə ɔ nɛkɛ́tɛ nɛ́ misí ɔ Ásia bá ná bənú bíhólíə́. Akílasɛ, Bilisikíli na bɛláŋa bɛ́ ilúkunə yɛ́ bəlumininə ɔbá bá ndɔ kɔtana ɔ uwəbú ɔmbɛ́la yɛ́ ndɔ bənú mə́búə́ məbíhóloniə maasɛ lɔ́mɛ́na ɔ niínyə nɛ́ Isə́lúkú.

²⁰Bənísə́ bəkimə ɔbá bá lɛ́á háha bá ná bənú bíhólíə́. Nɔ́ hólókóníə́, nɔ́ bíə́ŋə́lə́kə́níə́ bənú na bənú ɛ́sɛ́á baná bá ninyə́.

²¹Ɔ́ wə́míə́ mɔkátá wɔ́ utilə wúuwu, mɛaŋɔ́á Báwolo, mɛ ná bənú bíhólíə́.

²²Indimisi na wɛ́ɛ́yɛ́ ɔwá a lɛ ndɔ Isə́lúkú hikiə Malanáta.[3]

²³Nyɔnɔ yɛ Isə́lúkú á Yə́susu yɛ́ bámɛ́nɛ́ná na bənú.

²⁴Mɛ ndɔ bənú bəkimə hikiə ɔ nɛtɔana na Yə́susu Kilísitusu.