Read Tunen 1 Kɔlɛ́ŋɛ́tɛ 2 Bible Online

1 Kɔlɛ́ŋɛ́tɛ 2 - Tunen bible

1 Kɔlɛ́ŋɛ́tɛ 2

¹Á bənísə́, ɛnaka mɛ ndáfámá ɔ uwənú busíə́, mɛ sa ndasá ɛlɔ́áyɛ́ uwənú ɔ taká ɔnɔŋɔnɛna ɔyɛ́á Huɛlɛ́ a ná bítə́ na bɛtambá bɛ́ siomókótɔ́ bɛ́ mɔsá, mbá ata bɛ́ ɛmanya.

²Ɔ taká, á Yə́susu Kilísitusu ɔbánɔ́ mɛ́ ná híkə́kíə́ ɔhɛ́na uwənú ətíə́, ɔwayɛ́ ɔwá bá ná ɔ́mɔ́kɛ́na ɔ ɔmbásá.

³Ɔ́ ɛ́lɔ́áyɛ́ nɔ́yɛ́ mɛ ná báá ɔ uwənú ətíə́ ɛ́sɛ́á mɔndɔ wa hə́hə́nə́tɔ, mɛ ndɔ kílímə na bɔkɔ́lɔ́ma bukimə.

⁴Ikúílí mɛ ná bá mɛ ndɔ úkúniə, na Imbə́nú Yɛɛsɛ ɔ húlə́ nɔŋɔna, mɛ sa ɛmanya yɛ bɛndɔ bá yɛ́ɛyɛ misí bɛ́kɛna ɔkɛaka ɔwá bá lumínínə; mba, injiŋə yɛ Umbúínyi Mɔnaŋanaŋa yɛ́ ná kɛ́áka ɔwá, nɔ manyá nɔ sɛ́á yɛ́táyɛ́ imbə́nú yɛ́ lɛa taká.

⁵Nɔ́yɛ́, nɔ ka níə́núə́ nɛkɔmba tálɛ́na á Yə́susu bɔkɔasɛ́á, nɔ ka injiŋə yɛ Huɛlɛ́ siəkinə, tátá bɔkɔasɛ́á nɔ ka ɛmanya yɛ bɛndɔ bá misí siəkinə.

⁶Ɛmanya tɔ ndɔ yəmbələniə ɔ busíə́ bɔ́ bááyɛ́ ɔbá yə́búə́ ilumininə yɛ́ lɛ́á ɔ́nɔ́lɛ́nátɔ. Tátá ɛmanya yɛ bɛndɔ bá yɛ́ɛyɛ misí, ata ɛmanya yɛ bááyɛ́ ɔbá bá ndɔ misí manɛna; Huɛlɛ́ a ŋɔ bəə́bu nímə́siə.

⁷Ɔ nifəŋə, ɛmanya ɔyɛ́á tɔ ndɔ bənú nɔŋɔnɛna yɛ́ ndɔ húlínə na Huɛlɛ́, yɛ́ lɛa ɛndɔnɔ ɔyɛ́á Huɛlɛ́ a ná bítə́ ubusíə́ ɔbɔ́á a misí bɔta. A ka yɛɛ́ta bítə ɔkɛaka ɔwá tɔ́ əsú fínə́ ɔ ɔwayɛ́ tuúmə.

⁸Ata mɔndɔ ətíə́ yɛ bááyɛ́ ɔbá bá ndɔ misí manɛna, a sa yɛ́táyɛ́ ɛmanya núnə bɔkɔasɛ́á, ata bá yɛɛ́ta núnə́, há bá sa Isə́lúkú ɔ́mɛ́na ɔ ɔmbásá ɔwá a lɛ́á hɛnyɔ́nyɔ hɛ́ tuúmə.

⁹Mba, Mətilə má ndɔ laa má sɛ́á: «Yatɛ́ ɔyɛ́á mɔndɔ a sa ndə́sinə na máyɛ́á məə́sə, ata ɔwɔ́kɔ na máyɛ́á məlúə́, yatɛ́ ɔyɛ́á mɔlɛ́má wɔ́ mɔndɔ wɔ́ sa ndabɛ́kɔ́lɔmɔna, ɔ́ yatɛ́ ɔyɛ́á Huɛlɛ́ a ná tábɔ́nákɛ́na ɛlɔ́áyɛ́ bááyɛ́ ɔbá bá ndɔ wɛɛ́ya hikiə.»

¹⁰Nɔ́yɛ́, ɛlɔ́áyɛ́ əsú á Huɛlɛ́ a ná bɛ́táyɛ́ bɛkɔa fə́mə́lə́níə́ ɔ tɔ́mbákɛna na Umbúínyi mɔnaŋanaŋa. Ɔ taká, Umbúínyi wɔ́ ndɔ manya bɛkɔa bikimə, ata ɛndɔnɔ yɛ Huɛlɛ́ ɔyɛ́á yɛ́ lɛ́á bítímə́tɔ́ ɔ yuúndúndə.

¹¹Ata mɔndɔ a lɛ ndɔ manya yatɛ́ ɔyɛ́á yɛ́ lɛ́á ɔ mɔlɛ́má wɔ́ mɔndɔ. Mba, Umbúínyi ɔwá wɔ́ lɛ́á á mɔndɔ mɔlɛ́má, wɔ́ ndɔ manya yatɛ́ ɔyɛ́á yɛ́ lɛ́á ɔ ɔwayɛ́ nuúmə́. Hɔ́ánánátɔ́, yatɛ́ ɔyɛ́á Huɛlɛ́ a ndɔ manya, ata mɔndɔ a sa ndámanya, úhúlíə́ á Umbúínyi Mɔnaŋanaŋa.

¹²Mba uwəsú, tátá umbúínyi wɔ́ bɛndɔ bá yɛ́ɛyɛ misí tɔ́ ná kúsə́nə, Umbúínyi ɔwá wɔ́ ndɔ húlínə na Huɛlɛ́. Nɔ́yɛ́, ɔ́ ɔkɛaka ɔwá tɔ́ məəbə manyá ɔmá Huɛlɛ́ a ná bəsú índíə́ ndəmə.

¹³Ɛ́lɔ́áyɛ́ nɔ́yɛ́ tɔ lɛ ndɔ hɛ́na na nihókí ɔnɛ́á ɛmanya yɛ mɔsá yɛ ndɔ bəsú úkúniə, mba, na bɛtambá ɔbɛ́á Umbúínyi wɔ́ Huɛlɛ́ wɔ́ ndɔ bəsú úkúniə. Ɔ́ nɔ́yɛ́ tɔ ndɔ bɛkɔa bɛ́ taká nífúnə ɔbɛ́á bɛ́ ndɔ húlínə na Umbúínyi Mɔnaŋanaŋa ɔ bááyɛ́ ɔbá bá lɛ́á na wútə́yí Umbúínyi.

¹⁴Mɔndɔ ɔwá a lɛ bá na Umbúínyi wɔ́ Huɛlɛ́, a sa ósó ɔ taká uluminə ɔyɛ́á Umbúínyi wɔ́ Huɛlɛ́ wɔ́ ndɔ húlə́nə. A sa ósó ɔ mɛ́táyɛ́ taká ɔwɔ́kɔ, yɛ́ báka ɛlɔ́áyɛ́ ayɛ́ bɔkɔa bɔ́ ɔmbamɔ́ bɔkɔasɛ́á, mɔndɔ ɔwá lɛ́á na Umbúínyi Mɔnaŋanaŋa wɛɛ́ya a ndɔ mɛɛ́ta búlúnə.

¹⁵Ɔ nifəŋə, mɔndɔ ɔwá a lɛ́á na Umbúínyi wɔ́ Huɛlɛ́, a lɛa hɔ́ánánátɔ́ ɔ bɛkɔa bikimə ubúlúnə, mba, ata mɔndɔ ɔmɔtɛ́ a sa ósó ɔ bɛ́áyɛ́á bɛkɔa ubulúnə.

¹⁶Ɔ taká, Mətilə má ndɔ laa má sɛ́á: «Ɛ́yánɛ́ a ná ɛfɛka yɛ́ Isə́lúkú mányá əə́? Ɛ́yánɛ́ a óso ɔ ɔwayɛ́ ɔ malɛ́hána uwíndiəkinə əə́?» Mba, uwəsú, tɔ lɛa na ɛfɛka yɛ́ Kilísitusu.