Read Tunen 1 Kɔlɛ́ŋɛ́tɛ 3 Bible Online

1 Kɔlɛ́ŋɛ́tɛ 3 - Tunen bible

1 Kɔlɛ́ŋɛ́tɛ 3

¹Á bənísə́, ɔwámɛ, ikúílí mɛ ná báá ɔ uwənú ətíə́, mɛ sa bənú hɛ́na ɛ́sɛ́á ɔ bɛndɔ ɔbá bá lɛ́á na Umbúínyi wɔ́ Huɛlɛ́, mba, mɛ ka bənú hɔ́kɛna ɛ́sɛ́á ɔ bɛndɔ bá yɛ́ɛyɛ misí bɔkɔasɛ́á, nɔ ka báá ɛ́sɛ́á ɔ bosoní ɔ ɛnɔ́mɛ yɛ́ Kilísitusu.

²Yatɛ́ ɔyɛ́á mɛ ná bənú úkúnə́kíə́, yɛ́ ka báá ɛ́sɛ́á mabɛ́nyɛ, tátá bɔ́labɔ́nɛ́á bɔ́ natákátɔ bɔkɔasɛ́á, há nɔ sa óso ɔ bɛɛ́ta ɔnɛ́á. Mba, ata isíŋáka nɔ sa nɔ́yɛ́ ósó bɔkɔasɛ́á,

³nɔ nabáka ɔ uniŋə ɛ́sɛ́á bɛndɔ bá yɛ́ɛyɛ misí. Nikóyi na biəmə́niə bɛ́ nabáka ɔ uwənú ətíə́, nɔyɛ́ yɛ́ ndɔ ínə́niə ɔwá, nɔ ndɔ bítíkə ɛ́sɛ́á bilókílókí bɛ́ yənúə́ mɛɛ́lɔ bɛ́ ndɔ bənú kɛndana, nɔ ndɔ bítíkə tɔ́na ɔ ɛnya yɛ mɔsá mukimə.

⁴Ikúílí ɔmɔtɛ́ uwənú ətíə́, a ndɔ laa a sɛ́á: «Mɛ lɛa á Báwolo əlimə.» Wɔmɔtɛ́ a sɛ́á: «Mɛ lɛa á Abolóso əlimə.» Baánɛ, nɔ lɛ ndɔ hɔ́yɛ́ bítíkə ɛ́sɛ́á mɔsá mukimə əə́?

⁵Ɔ taká, ɛ́yánɛ́ a lɛ́á Abolóso əə́? Ɔwámɛ á Báwolo mɛaŋɔ́á ɛ́yánɛ́ əə́? Tɔ əsú báka ɔbánɔ́ bɔnyɛna bá Huɛlɛ́ ɔbá a ná lɔ́má ɔkɛaka ɔwá, nɔ níə́núə́ nɛkɔmba tálɛ́ná á Kilísitusu. Mɔɛ́ta tɛ́á ɔ uwəsú ətíə́ a ndɔ bɔsɔ́ma úndúsiniə ɔwɔŋgɔkɔnɔ na niəbə ɔnɛ́á Isə́lúkú a ná wɛɛ́ya índíə́.

⁶Tɔ ka báá ɛ́sɛ́á bɔnyɔɔ, mɛ ka ámɛ bɔlɔŋɔ́tɛ́ nɛma, Abolóso a ná bɔɛ́ta olókínə, mba, á Huɛlɛ́ a ná bɔɛ́ta ombókíə́.

⁷Nɔ́yɛ́, wɛ́ɛ́yɛ́ ɔwá a ndɔ nɛma a lɛa ndəmə; wɛ́ɛ́yɛ́ tɔ́na ɔwá a ndɔ ólinə, a báka ndəmə. Á Huɛlɛ́ bíbúə́ bá ndɔ fanɛna, ɔwayɛ́ ɔwá a ndɔ bɔlɔŋɔ́tɛ́ ómbosiə.

⁸Wɛ́ɛ́yɛ́ ɔwá a ndɔ nɛma na wɛ́ɛ́yɛ́ ɔwá a ndɔ ólinə, bá lɛa hɔ́ánánátɔ; Huɛlɛ́ a ŋɔ mɔɛ́ta tɛ́á wə́yíə́ mɔsábɔ́náná índiə ɔwɔŋgɔkɔnɔ bɔ́áyɛ́á buolí bɔ́ bɛ́múɛ́tɛ́.

⁹Ɔ taká, tɔ ndɔ əsú buolí bɔ́ Huɛlɛ́ nyɔɔ iŋgində́, uwənú, nɔ lɛa ɛ́sɛ́á ɛtɔbɔtɔ́bɔ́ yɛ́ Huɛlɛ́. Nɔ báka tɔ́na ɛ́sɛ́á miímə ɔyɛ́á Huɛlɛ́ a ndɔ falaba.

¹⁰Na iŋgínə́ ɔyɛ́á Huɛlɛ́ a ná mɛaŋɔ́á índíə́, mɛ ka bɛtɛ́kɛ́ná bɛ́lɛna uwənú ətíə́ ɛ́sɛ́á mɔfalaba muɛsɛ. Bənə́bənə́ bá ndɔ nɛfalaba ákánana ɔ busíə́; mba, mɔɛ́ta tɛ́á a manyaka ɔ nindínə́ ɔnɛ́á a ndɔ ayɛ́ falaba.

¹¹Ɔ taká, mɔndɔ muinə́muinə́ a sa ósó ɔ bɛtɛ́kɛ́ná ɔbɛ́lɛna binə́binə́, bɛtɛ́kɛ́ná ɔbɛ́á bɛ́ lɛ́á buɔnɔ́, á Yə́susu Kilísitusu.

¹²Bɔ́mɔtɛ́ bɛndɔ bá ndɔ kóolo bɛ́kɛna ɔ bɛ́táyɛ́ bɛtɛ́kɛ́ná ɔfalaba, bɔ́mɔtɛ́ sílíba, bɔ́mɔtɛ́ biomí bɛ́ miɔkɔ, bɔ́mɔtɛ́ imbiŋə, bɔ́mɔtɛ́ ɔmɛtá, bɔ́mɔtɛ́ tɔnjɔ́,

¹³buolí bɔ́ mɔɛ́ta tɛ́á bɔ́ ŋɔ ɛ́nána ɔ mianyɔ́ ɔ hinó ɔhɛ́á Yə́susu Kilísitusu a ŋɔ ndahíáná ɔ bɛndɔ ukə́lə́siə. Ɛ́ɛ! Ɔ hítə́yí hinó, hiwə hɛ́ ŋɔ tɔ́mbɛ́na ɔ buolí bɔ́ mɔɛ́ta tɛ́á, nɔ́yɛ́, bá ŋɔ ɛnya yɛ buolí siəkinə ɔbɔ́á a ná kɛ́áka.

¹⁴Ɛ́bá hiwə hɛ́ sa miímə lúə́ŋiə ɔyɛ́á mɔndɔ a ná fálábáka ɔ bɛ́táyɛ́ bɛtɛ́kɛ́ná, Huɛlɛ́ a ŋɔ wɛɛ́ya mɔsábɔ́náná índiə.

¹⁵Mba, mɔndɔ ɔwá hiwə hɛ́ ŋɔ miímə lúə́ŋəkiə ɔyɛ́á a ná fálábáka, Huɛlɛ́ a sɔ́ ŋɔ wɛɛ́ya mɔsábɔ́náná índiə. A ŋɔ wɛɛ́ya nuəkəniə, muití a ŋɔ bɛ́ɔ́lɔ ɛ́sɛ́á abáka bá bɛ́ɔ́lɔ ɔ musoŋó wɔ́ hiwə.

¹⁶Nɔ lɛ ndɔ manya muɛsɛ ɔwá, bənú nɔ́ lɛ́á miímə yɛ Huɛlɛ́, Umbúínyi Mɔnaŋanaŋa wɔ́ ndɔ tuənə tɔ́na ɔ uwənú mɛɛ́lɔ nuúmə́ əə́?

¹⁷Ábá mɔndɔ a ná miímə yɛ Huɛlɛ́ kátáka, Huɛlɛ́ a ŋɔ ayɛ́ wɛɛ́ya kataka bɔkɔasɛ́á, miímə yɛ Huɛlɛ́ yɛ́ lɛa bɛ́áyɛ́á bituənínə́: Bənú nɔ́ lɛ́á yɛ́táyɛ́ miímə.

¹⁸Ata mɔndɔ bɛ́múɛ́tɛ́, a lɛ tíkə́ bínímbə: Ábá ɔmɔtɛ́ ɔ uwənú ətíə́ a ndɔ fɛka ɔwá, a lɛa mumənyí ɔ ɛnya yɛ bɛndɔ bá misí, a ná hɔ́ánána ɔhíána ɛ́sɛ́á yaálála ɔkɛaka ɔwá, a bámɛ́nɛ́ná tiísi yɛ mumənyí.

¹⁹Ɔ taká, ɛmanya yɛ bɛndɔ bá misí yɛ́ lɛa bɔála á Huɛlɛ́ busíə́. Ɛlɔ́áyɛ́ nɔ́yɛ́, Mətilə má ndɔ laa má sɛ́á: «Abáka Huɛlɛ́ a bəmənyí kɔ́ásáka ɔ tɔlámba tɔ́ túə́búə́ tuŋgəsə́ tɔ́ bɛ́múɛ́tɛ́.»

²⁰Má ndɔ laa tɔ́na má sɛ́á: «Isə́lúkú a ndɔ bɛfɛka bɛ́ bəmənyí manya, a ndɔ manya tɔ́na ɔwá bɛ́ booko ɔbánɔ́ bihilə́hilə.»

²¹Nɔ́yɛ́, mɔndɔ a sá hɔ́ánana ɔ niə́mə tálɛ́na ɔ bɔsɔ́kɔ́ bɛndɔ bɔkɔasɛ́á, Huɛlɛ́ a ka bənú bəə́bu índiə na bɛ́táyɛ́ bɛkɔa bikimə.

²²Ata ɔwámɛ á Báwolo, Abolóso ata á Sɛ́fasɛ, bikimə ɔbɛ́á bɛ́ lɛ́á ɔ misí, buɔmɔ́ mbá ata nyɛmbɛ́, bɛkɔa bɛ́ isíŋáka ata bɛ́ ɔsákɔna, bikimə bɛ́ lɛa bíə́nu,

²³mba, nɔ ənú báka bá Kilísitusu, Kilísitusu ayɛ́ lɛa wa Huɛlɛ́.