Read Tunen 1 Kɔlɛ́ŋɛ́tɛ 4 Bible Online

1 Kɔlɛ́ŋɛ́tɛ 4 - Tunen bible

1 Kɔlɛ́ŋɛ́tɛ 4

¹Nɔ́yɛ́, yɛ́ lɛa hɔ́ánánátɔ́ ɔwá bá bəsú síə́kínə́ ɛ́sɛ́á bɔnyɛna bá Kilísitusu, bááyɛ́ tɔ́na ɔbá Huɛlɛ́ a ná yayɛ́á taká yɛ bítə́tɔ́ tikinə.

²Mba, yatɛ́ ɔyɛ́á bá ndɔ bacɛ́kɛamaasɛ bata ɔ nitifə́, bá ná hɔ́ánána ɔbáá na yɔkɛ́nana.

³Ɛlɔ́áyɛ́ ámɛ, mɛ lɛ bá na mɔsɛ́ŋɛ́ ábá nɔ ndɔ mɛaŋɔ́á sɔ́mɛna, ata bənə́bənə́ bá ndɔ mɛaŋɔ́á sɔ́mɛna, mɛ lɛ ndɔ bɛ́sɔ́kɔ́nɛna mɛaŋɔ́á bɛ́múɛ́tɛ́.

⁴Ɔ taká, ɛ́ɛ! Wə́míə́ mɔlɛ́má wɔ́ lɛ ndɔ mɛaŋɔ́á kə́lə́siə, nɔ́yɛ́ yɛ́ lɛ ndɔ siə ɔlaa ɔwá, mɛ lɛa tɛ́nɛ́mátɔ́ muɛsɛ á Huɛlɛ́ busíə́: Á Isə́lúkú á ŋɔ siəkinə ábá mɛ ka kɛaka muɛsɛ ata mɔbɛ́á.

⁵Ɛlɔ́áyɛ́ nɔ́yɛ́, nɔ lɛ taŋá ɔ bɔsɔ́kɔ́ ukə́lə́siə, mba, nɔ́ ikúílí tátáká ɔyɛ́á Isə́lúkú a ŋɔ ndahíáná bɔkɔasɛ́á, wɛɛ́ya a ŋɔ ɛndɔnɔ yɛ bɛndɔ na bɛkɔa bɛ́ bítímə́tɔ́ ɔ ibínə́binə fə́mə́ləniə ɔ mianyɔ́. Nɔ́yɛ́, Huɛlɛ́ a ŋɔ mɔɛ́ta tɛ́á nyamaka ɛlɔ́áyɛ́ bɔsɔ́ma ɔbɔ́á a ná úndúsíníə́.

⁶Á bənísə́, mɛ ka bənú bɛ́ɛ́yɛ́ bɛkɔa hɔ́kɛ́na ɔwɔŋgɔkɔnɔ na mɛaŋɔ́á na Abolóso ɔkɛaka ɔwá, tɔ bənú ɔ́lɔ́ mbá nɔ ənú hɛkɔakɔ́á mányɛ́na umə́. Mɛ hikəkiə ɔwá nɔ iŋgətí ɛ́tɛ́na ɔ uwəsú, nɔ́ bítíkə́kə́ muɛsɛ ɛ́sɛ́á Mətilə má ndɔ laa. Nɔ lɛ bíbə́líə́ ɔkɛaka ɔwá nɔ wɔ́ɔwɔ híkə́, nɔ wə́ə́ní yómósíə́.

⁷Ɛ́yánɛ́ a ná aŋɔ́á lɛ́na ɔwá ɔ ná bɔsɔ́kɔ́ yáyɛ́ná əə́? Baánɛ, tátá á Huɛlɛ́ a ná aŋɔ́á bɛɛ́la bikimə índíə́ əə́? Mba, ɔ lɛ bíbə́líə́ ɔ́maná ɛ́sɛ́á ɔ ka bɛɛ́ta kusə́nə na yawɔ́á iŋgínə́ yɛ aŋɔ́á bɛ́múɛ́tɛ́.

⁸Uwənú, nɔ ka bɛkɔa bikimə kusənə buɔnɔ́. Nɔ ná híáná tɔ́na buɔnɔ́ bambiaŋɛ. Nɔ ka nɛmanɛna botoliə ɛŋaná bəsú. Ɔ taká, nɔ óso ɔmanɛna ɔkɛaka ɔwá tɔ əsú manákɛ́ná tɔ́na na bənú. Mɛ hikəkiə muɛsɛ muɛsɛ ɔwá nɔ bámɛ́nɛ́ná bisə́lúkú ɔkɛaka ɔwá, tɔ ənú báá bəsú bəkimə bisə́lúkú.

⁹Mba, yɛ́ báka ɔwá, uwəsú á bɔŋgəlimə, Huɛlɛ́ a ka bəsú bɛ́lɛna ɔ yɔkɔ́ yɛ́ nitifə́, tɔ báka ɛ́sɛ́á bɛndɔ bá hɔkɛ́nátɔ́ ɔ nyɛmbɛ́: Símə́síə́tɔ́ ɔ busíə́ bɔ́ bɛndɔ bá misí na bɔ́ bɛáŋgɛlɛ ɔ hiŋgəyə́ ətíə́ yɛ nɛnáka.

¹⁰Bɛndɔ bá misí bá ndɔ bəsú sinə ɛ́sɛ́á bambamɔ́mbámɔ bɔkɔasɛ́á, tɔ ndɔ ɛtambá yɛ́ Kilísitusu nɔŋɔna, mba uwənú, baánɛ, nɔ ndɔ bísinə ɛ́sɛ́á bəmənyí bɔkɔasɛ́á, nɔ lɛa ɔ bɔlatɔ́ na kilísitusu əə́? Bɛndɔ bá ndɔ əbú fɛka bá sɛ́á tɔ lɛa bɔtɔmbɔ́, uwənú, nɔ ndɔ ənú fɛka ɔwá nɔ lɛa na iŋgínə́, tátá nɔ́yɛ́ əə́? Abáka bɛndɔ bá bənú bə́təkiə, bá əsú yomosokiə, tátá nɔ́yɛ́ əə́?

¹¹Ɔ ndafámáká ɔ yɛ́ɛyɛ ikúílí yɛ́ɛyɛ, tɔ lɛa mɛtaná na nuíyí, tɔ lɛ bá na bɔlɛŋa bɔ́ ɔbɛ́háá, bá ndɔ bəsú təkəsə, tɔ húlə́ nəyəkə ɛŋaná ɛbɔ́ka yɛ́ utuənə.

¹²Tɔ nyɔɔkɔ na iŋgínə́ yikimə na mə́súə́ makátá. Ikúílí bɛndɔ bá ndɔ bəsú kɔ́ba, tɔ əsú bɛ́kálákɛna ɔkɛaka ɔwá, Huɛlɛ́ a bəə́bu sana, ikúílí bá ndɔ bəsú təkəsə, tɔ əsú isə́biniə.

¹³Ikúílí bá ndɔ bəsú sɔkɔ, tɔ əsú siəkə á bɛtambá bɛ́ buyoyoní. Bɛndɔ bá ndɔ fɛka ɔwá tɔ lɛa ɛ́sɛ́á bɛwayɛ́, bɛndɔ bá məhilə́ ɔ misí.

¹⁴Mɛ lɛ ndɔ bənú nɔ́yɛ́ tilinə ɔkɛaka ɔwá nɔ sɛma, mba, ɔ́ ɔkɛaka ɔwá, mɛ bənú mə́nyə́síə́ ɛ́sɛ́á bámɛ́á baná ɔ nibo.

¹⁵Ɔ taká, ata nɔ lɛa na ɔmbana muiŋí wɔ́ bakɛndana ɔbá bá ndɔ bənú ɛnɔ́mɛ yɛ́ Kilísitusu ínə́niə, nɔ ŋɔ báá ɔbánɔ́ na isə́ ɛ́mɔtɛ́. Mɛaŋɔ́á mɛ lɛ́á yənúə́ isə́ bɔkɔasɛ́á, nɔ ka níə́núə́ nɛkɔmba tálɛ́na á Yə́susu Kilísitusu ɛnaka mɛ bənú Imbə́nú Yɛɛsɛ nɔŋɔ́nákɛ́na.

¹⁶Nɔ́yɛ́, tɔ́kɔ́lɛ ɔbánɔ́, nɔ́ ɔ́ŋgɔ́kɛ́na ɔwámɛ iŋgətí.

¹⁷Ɔ́ ɛlɔ́áyɛ́ nɔ́yɛ́ mɛ́ ná bənú Timotíó ɔ wamɛ́á mɔná wuhikiə na yɔkɛ́nana á Isə́lúkú lɔmɛna, wɛɛ́ya a ŋɔ bənú bɛ́ámɛ́á bitíkínə́ bɛ́kɔ́lɔmɔkɔnɛna ɔbɛ́á bɛ́ ndɔ mɛaŋɔ́á kɛndana ɔ buɔmɔ́ na Kilísitusu, hɔ́ánánátɔ́ ɛ́sɛ́á mɛ ná húlə́ úkúnəkiə ɔ bilúkunə bikimə bɛ́ bəlumininə.

¹⁸Bɔ́mɔtɛ́ bə́núə́ bɛndɔ bá ndɔ bíbə́liə bɔkɔasɛ́á ba ndɔ fɛka ɔwá, mɛ sɔ́ ŋɔ ndasá ɔ uwənú ɔmbɛ́la.

¹⁹Mba, ábá Isə́lúkú a ná lumínə, mɛ ŋɔ hútú ndafámá uwənú busíə́. Nɔ́yɛ́ mɛ ŋɔ ndasá tátá ɛlɔ́áyɛ́ usinə nəníə́ bɛndɔ bə́níə́mə bá ndɔ manya ɔhɔ́ɔ́, mba, ɛlɔ́áyɛ́ usinə ábá bá óso ɔ bɔkɔa buinə́buinə́ ɔkɛa.

²⁰Mɛ ndɔ hɔ́ɔ́ nɔ́yɛ́ bɔkɔasɛ́á, Huɛlɛ́, a sa ósó ɔ mɔndɔ ɔkáha ɔ ɔwayɛ́ nɛmanɛna bɔkɔasɛ́á, a ndɔ manya ɔhɔ́ɔ́, mba, ɔ tɔ́mbákɛna na bɛ́áyɛ́á bɛnyɛná.

²¹Nɔ́ mɛaŋɔ́á lɛ́na; yatɛ́ nɔ ndɔ siə əə́? Mɛ́ ndásá ɔ uwənú busíə́ na ɔŋɔ́ányɛ́ ɔ mɔkátá ataná, na mɔlɛ́má wɔ́ uhikəniə, na buyoyoní ɔkɛaka ɔwá mbá nɔ manyá nɔ sɛ́á mɛ ndɔ bənú hikiə əə́?