Read Tunen 1 Kɔlɛ́ŋɛ́tɛ 6 Bible Online

1 Kɔlɛ́ŋɛ́tɛ 6 - Tunen bible

1 Kɔlɛ́ŋɛ́tɛ 6

¹Ikúílí ɔmɔtɛ́ ɔ uwənú ətíə́ a lɛa ɔ bɛsáká na mukúlə́kulə, yɛ́ lɛa muɛsɛ ɔwá á wɛɛ́ya sɔ́mɛ́na ɔ busíə́ bɔ́ balɛmanyáhuɛlɛ́ əə́? Ɔ nifəŋə, bɛláŋa bɛ́ ilúkunə yɛ́ Huɛlɛ́ bá ná hɔ́ánáná ɔ ihə́ŋiə ɔwɛta ɛlɔ́áyɛ́ yɛ́táyɛ́ ɛsáká.

²Nɔ lɛ ndɔ manya ɔwá bɛláŋa bɛ́ ilúkunə yɛ́ Huɛlɛ́ bá ŋɔ bɛndɔ bá misí kə́lə́səkiə əə́? Mba, ábá nɔ lɛa hɔ́ánánátɔ́ ɔ bɛndɔ bá misí ukə́lə́siə, nɔ lɛa hɔ́ánánátɔ́ tɔ́na ɔ tɔsákásáká ukə́lə́siə.

³Nɔ lɛ ndɔ manya ɔwá bəsú tɔ ŋɔ bɛáŋgɛlɛ kə́lə́səkiə əə́? Ábá bəsú tɔ́ ŋɔ bəə́bu kə́lə́səkiə, yɛ́ lɛa hɔ́ánánátɔ́ ɔwá, tɔ ŋɔ bɛsáká bɛ́ bɛndɔ bá misí kə́lə́səkiə.

⁴Ikúílí bɛsáká bɛ́ lɛ́á ɔ uwənú ətíə́, nɔ ndɔ ka bəkə́lə́siə ɛtá ɔbá ilúkunə yɛ́ Huɛlɛ́ yɛ́ ndɔ yomosiə.

⁵Nɔ lɛ ndɔ ənú sɛ́má ata ɔbánɔ́ əə́? Mɔndɔ wa ɛmanya a lɛ bá ɔ uwənú ətíə́ ɔwá a ndɔ manya ɔ bíə́núə́ bɛsáká usúmbə́niə ətíə́ yɛ bəlumininə əə́?

⁶Yɛ́ lɛ bá muɛsɛ ɔwá mulumininə á ɔsɔ́kɔ́ mulumininə sɔ́mɛ́na ɔ busíə́ bɔ́ balɛmanyáhuɛlɛ́.

⁷Ɔ məndínə́ ɔbánɔ́ məkimə, nɔ lɛa nanákátɔ́ ikúílí nɔ ndɔ sɔ́mɛnana bənú na bənú ɔ busíə́ bɔ́ bɛndɔ bənə́bənə́. Ábá ɔsɔ́kɔ́ mulumininə a ná aŋɔ́á tɛ́ŋákɛ́nɛ́na, ɔ sa ósó uwisíbiniə əə́? Ábá a ná aŋɔ́á óbókínə, ɔ sa ósó ɔniasa əə́?

⁸Mba ɔ nifəŋə, bənú nɔ ndɔ bɔsɔ́kɔ́ tɛŋɛnɛna, nɔ ndɔ bɔsɔ́kɔ́ óbínə ata nɔ́yɛ́ ɛ́sɛ́á bá lɛ́á bə́núə́ bənísə́ ɔ ilumininə.

⁹Nɔ ndɔ manya muɛsɛ ɔwá, bááyɛ́ ɔbá bá ndɔ bɔbɛ́á kɛa, bá lɛ bá na nioko ɔ nɛmanɛna nɛ́ Huɛlɛ́. Nɔ lɛ bínímbə́ bɔ́ányɛ: Bɛndɔ bá nɛbambɛa, bəlúbúnə bililí, bá nilókóno, na bááyɛ́ ɔbá bá ndɔ bɛ́lɛnana bəə́bu na bəə́bu,

¹⁰boóbi, bá məə́sə matatánɛ, bəhíólóhiolo, bámɔ́láŋa, bááyɛ́ ɔbá bá ndɔ bɛɛ́la bɛ́ bɛndɔ ɔ́lɛ́na ɔ iŋgínə́ ɔmbáŋá, bááyɛ́ bəkimə bá lɛ bá na nioko ɔ Nɛmanɛna nɛ́ Huɛlɛ́.

¹¹Ɔ́ nɔ́yɛ́ bɔ́mɔtɛ́ ɔ uwənú ətíə́ bá ná báá bá ndɔ bítíkə. Mba isíŋáka, Umbúínyi wɔ́ yəsúə́ Huɛlɛ́ wɔ́ ka bənú nəŋəsiə, wɔ́ ka kɛaka ɔwá nɔ híáná bɛndɔ bá Huɛlɛ́, wɔ́ ná kɛ́áka ɔwá nɔ híáná bátaká á Huɛlɛ́ busíə́ bɔkɔasɛ́á, nɔ ka níə́núə́ nɛkɔmba tálɛ́na á yəsúə́ Isə́lúkú á Yə́susu Kilísitusu.

¹²Bɔ́mɔtɛ́ uwənú ətíə́ bá ndɔ laa bá sɛ́á: «Mɛ lɛa na iŋgínə́ yɛ ɔkɛa yatɛ́ ɔyɛ́á mɛ ndɔ siə.» Mba ɔ bɛkɔa bikimə ɔbɛ́á mɛ ndɔ kɛa, bɛ́mɔtɛ́ bɛ́ lɛ ndɔ mɛaŋɔ́á ɔ́lɔ. Mɛ ndɔ ámɛ laa tɔ́na ɔwá, mɛ lɛa na iŋgínə́ yɛ ɔkɛa ata yatɛ́ yikimə ɔyɛ́á mɛ ndɔ siə, mba, mɛ lɛ ndɔ siə ɔwá, mɛ híáná yɔlɛ́ yɛ́ bɔkɔa.

¹³Nɔ ndɔ ənú laa nɔ sɛ́á. «Bɔ́labɔ́nɛ́á bɔ́ booko ɛlɔ́áyɛ́ tɔna, tɔna ɛlɔ́áyɛ́ bɔ́labɔ́nɛ́á.» Ɛ́ɛ! Mba Huɛlɛ́ a ŋɔ bikimə bɛ́fandɛ́ kataka, tɔna na bɛ́labɔ́nɛ́á. Nɔ́yɛ́, Huɛlɛ́ a sa yəsúə́ mɛɛ́lɔ kɛa ɛlɔ́áyɛ́ nɛbambɛa ɔkɛa, a ka mɛɛ́ta kɛaka ɛlɔ́áyɛ́ ɔwayɛ́ ɔnyama, wɛɛ́ya a ndɔ mɛɛ́ta sókóbiə.

¹⁴Huɛlɛ́ ɔwá a ná Isə́lúkú huŋúə́síə́, a ŋɔ bəsú huŋuəsiə tɔ́na ɔ tɔ́mbákɛna na yayɛ́á injiŋə.

¹⁵Nɔ lɛ ndɔ manya ɔwá yənúə́ mɛɛ́lɔ yɛ́ báka bɛláŋa bɛ́ mɛɛ́lɔ yɛ Kilísitusu əə́? Baánɛ mɛ óso ɔ mɛɛ́lɔ yɛ Kilísitusu ɔwɛta ɔkɛaka ɔwá, mɛ tɔ́á ɔ mɛɛ́lɔ yɛ muəndú wa nɛbambɛa əə́? Bóo, yɛ́ lɛ bá nɔ́yɛ́!

¹⁶Nɔ lɛ ndɔ manya ɔwá, mɔndɔ ɔwá a ná sianákɛ́ná na muəndú wa nɛbambɛa, a ndɔ híána mɛɛ́lɔ ɛ́mɔtɛ́ na wɛɛ́ya əə́? Ɔ taká, Mətilə má ndɔ laa má sɛ́á: «Bəə́bu báfandɛ́ bá ŋɔ bámɛnɛna mɔndɔ ɔmɔtɛ́.»

¹⁷Wɛ́ɛ́yɛ́ ɔwá a lɛ́á bɛ́tɔ́átɔ́ á Isə́lúkú, a lɛa híánátɔ́ Umbúínyi úmotí na wɛɛ́ya.

¹⁸Nɔ́ nɛbambɛa tɛbákɛ́na. Mabɛ́á məkimə ɔmá mɔndɔ a ndɔ kɛa, má lɛ ndɔ yayɛ́á mɛɛ́lɔ bítísə; mba, mɔndɔ ɔwá a ná bíndíə́ ɔ nɛbambɛa, a ndɔ bɔbɛ́á kɛa a ndɔ yayɛ́á mɛɛ́lɔ tífílə.

¹⁹Nɔ lɛ ndɔ manya ɔwá, yənúə́ mɛɛ́lɔ yɛ́ báka tɛ́mbɛlɛ yɛ Umbúínyi Mɔnaŋanaŋa əə́? Wútə́yí Umbúínyi, ɔ́ ɔwá Huɛlɛ́ a ná bənú índíə́ ɔwá wɔ́ lɛ́á ɔ uwənú mɛlɛ́má nuúmə́; nɔ lɛ bá tɔ́na ɛlɔ́áyɛ́ bənú bɛ́múɛ́tɛ́, mba, ɛlɔ́áyɛ́ Huɛlɛ́.

²⁰Huɛlɛ́ a ka bənú háŋɔ́na na mukunə́ mɔŋɛ́ŋa. Ɛlɔ́áyɛ́ nɔ́yɛ́, nɔ́ yənúə́ mɛɛ́lɔ yɛ bɛ́múɛ́tɛ́ bɛ́kɛ́ákɛ́na ɛlɔ́áyɛ́ ɔwayɛ́ ɔ tuúmə uhíə́niniə.