Read Tunen 1 Kɔlɛ́ŋɛ́tɛ 7 Bible Online

1 Kɔlɛ́ŋɛ́tɛ 7 - Tunen bible

1 Kɔlɛ́ŋɛ́tɛ 7

¹Isíŋáka, ɛkasɛ mɛ bɛ́kámɔ́sɔ́na ɔ yatɛ́ ɔyɛ́á nɔ ná mɛaŋɔ́á batá ɔ uwənú hiəfulə. Nɔ ka laa nɔ sɛ́á yɛ́ lɛa muɛsɛ ɛlɔ́áyɛ́ mɔndɔ ɔwá, a túə́nə́ mɛlɛmba.

²Mba, ata nɔ́yɛ́, yɛ́ lɛa muɛsɛ ɔwá mɔndɔ tɛ́á a báá na wayɛ́á muəndú, muəndú tɛ́á na yayɛ́á ibə́ ɔkɛaka ɔwá, a lɛ kɔɛ́na ɔ bɔbɛ́á bɔ́ nɛbambɛa.

³Ába ibə́ a ná siána, a sá hɔ́ánana ɔ wayɛ́á muəndú əlimə utúmə. Muəndú tɔ́na a lɛ síáná əlimə túmə́tɔ́ á yayɛ́á ibə́.

⁴Mɛɛ́lɔ yɛ muəndú yɛ́ lɛ bá yayɛ́, yɛ́ lɛa yɛ yayɛ́á ibə́. Hɔ́ánánátɔ́, mɛɛ́lɔ yɛ ibə́ yɛ́ lɛ bá yayɛ́ tɔ́na, yɛ́ lɛa yɛ muənyí.

⁵Nɔ́yɛ́, nɔ́ sá hɔ́ánana ɔsalana ɔ uwənú bɔaná, úhúlíə́ ábá nɔ ná ɔ́kɔ́nɔ́ ɛlɔ́áyɛ́ tɛ́tɛ́á yɛ ikúílí ɛlɔ́áyɛ́ mabɛ́kálɛ́na. Mba, əlimə yɛ ikúílí, nɔ́ híə́nə́níə́ ɔ buɔmɔ́ bɔ́ nɛbɛ́lɛna, yɛ́ sá bá nɔ́yɛ́, nɔ óso ɔkɔa ɔ mɔkɔ́lɛna má Sátana bɔkɔasɛ́á, nɔ lɛ bá na iŋgínə́ yɛ ɔbɛ́hálɛna.

⁶Yatɛ́ ɔyɛ́á mɛ ndɔ hɔ́yɛ́ laa yɛ́ lɛ bá yəə́kə, mba, ábá nɔ ndɔ kɛa yatɛ́ ɔyɛ́á mɛ ndɔ bənú lɛna, muɛsɛ nɔ́yɛ́.

⁷Ábá ɛlɔ́áyɛ́ ámɛ, mɛ hikəkiə ɔwá, mɔndɔ tɛ́á á túə́nə ɛndandɛ́ ɛ́sɛ́á mɛaŋɔ́á; mba, yɛ́ sa ósó ɔbáá nɔ́yɛ́ bɔkɔasɛ́á, mɔɛ́ta tɛ́á a báka na yayɛ́á ɛnya yɛ buɔmɔ́ ɔbɔ́á Huɛlɛ́ a ná wɛɛ́ya índíə́, ɔ bɔ́mɔtɛ́ a ndɔ bəə́bu índiə ɔkɛaka ɔwá bá bɛ́lɛ́na, ɔ bə́ə́ní ɔkɛaka ɔwá bá lɛ bɛ́lɛ́na.

⁸Isíŋáka, mɛ ndɔ lɛna ɔ mandandɛ́ na bilíkə́ bɛ́ bəəndú mɛ sɛ́á, yɛ́ lɛa muɛsɛ ɔwá bá tuənə́ bíbúə́ ɛ́sɛ́á mɛaŋɔ́á.

⁹Mba, ábá nɔ sa ósó ɔ ɔbɛ́hálɛna, nɔ́ bɛ́lɛ́na ata nɔ́ lɔnɔ; ɔ taká, ɔ́ hoóyi ɔwá ɔ bɛ́lɛ́na yáyɛ́ná ɔwá ilókí yɛ́ aŋɔ́á ónósíə́.

¹⁰Ɔwɔŋgɔkɔnɔ bəlumininə ɔbá bá ndɔ niŋə ɔ miímə yɛ nɛbɛ́lɛna, mɛ ndɔ bata ɔwá, tátá mɛaŋɔ́á mba, á Isə́lúkú á Yə́susu. Muəndú a sá hɔ́ánana ɔ ɔbɛ́álɔ́na na yayɛ́á ibə́.

¹¹Ábá a ná bɛ́álɔ́ná na yayɛ́á ibə́, a sá hɔ́ánana ɔwá a manyɔ́ lɔ́nɔ, ataná á ayɛ́ ányá ɔwá bá híə́nə́níə́ na yayɛ́á ibə́, ibə́ tɔ́na a sá hɔ́ánana ɔ wayɛ́á muəndú ubulə.

¹²Isíŋáka, ɛkasɛ mɛ hɔ́kɛ́na ɔ bɛndɔ bənə́bənə́, mɛaŋɔ́á bɛ́múɛ́tɛ́ mɛ ndɔ nɔ́yɛ́ laa, tátá á Isə́lúkú á Yə́susu: Ábá wɔmɔtɛ́ mulumininə a lɛa na muəndú ɔwá a lɛ bá mulumininə mbá a ná lumínə ɔ uniŋə na wɛɛ́ya, a lɛ wɛɛ́ya bulə́ bɔ́ányɛ.

¹³Hɔ́ánánátɔ́, ábá muəndú ɔwá a lɛ́á mulumininə, a lɛa na ibə́ ɔwá a lɛ bá mulumininə mbá a ná lumínə ɔ uniŋə na wɛɛ́ya, a lɛ wɛɛ́ya bulə́ bɔ́ányɛ.

¹⁴Mɛ ndɔ nɔ́yɛ́ laa bɔkɔasɛ́á, abáka ibə́ ɔwá a nana híáná mulumininə, a híána mɔndɔ wa Huɛlɛ́ ɔ tɔ́mbákɛna na wayɛ́á muəndú ɔwá a lɛ́á mulumininə. Hɔ́ánánátɔ́, muəndú tɔ́na ɔwá a nana híáná mulumininə, a ayɛ́ híána mɔndɔ wa Huɛlɛ́ ɔ tɔ́mbákɛna na yayɛ́á ibə́ ɔwá a lɛ́á mulumininə. Yɛ́ sá bá nɔ́yɛ́, bə́búə́ baná bá sɔ́ ŋɔ bámɛnɛna bá Huɛlɛ́ mbá nɔ́yɛ́ bá lɛ́á baná bá Huɛlɛ́.

¹⁵Ábá mɔndɔ ɔwá a lɛ bá mulumininə a sɛ́á a bɛ́álɔ́ná na wayɛ́á muəndú ɔwá a lɛ́á mulumininə, a lɛa na kuənjə ɔ nɔ́yɛ́ ɔkɛa. Ábá yɛ́ lɛa nɔ́yɛ́, yɛ́ lɛ bá yəə́kə ɔ mɛlɛ́mɛndɔ́ mbá ata muəndú ɔwá a lɛ́á mulumininə, ɔkɛaka ɔwá a niŋə́kə́ na wɛ́ɛ́yɛ́ ɔwá a ná ákáná bɔkɔasɛ́á, Huɛlɛ́ a ka bənú ɛ́lɛakɛna ɔkɛaka ɔwá nɔ híáná báyɛ́á bɛndɔ, nɔ́ niŋə́kə́ tɔ́na ɔ bumbə́nú.

¹⁶Ɔwáwɔ á muəndú ɔwá ɔ lɛ́á mulumininə, ɔ sa ósó ɔmanya ábá Huɛlɛ́ óso ɔ tɔ́mbɛ́na na aŋɔ́á ɔkɛaka ɔwá a yawɔ́á ibə́ núə́kə́níə́; ɔwáwɔ á mɛlɛ́mɛndɔ́ ɔwá ɔ lɛ́á mulumininə, ɔ lɛ ndɔ manya ábá Huɛlɛ́ a óso ɔtɔ́mbɛ́na na aŋɔ́á ɔkɛaka ɔwá a wawɔ́á muəndú núə́kə́níə́.

¹⁷Ɛkasɛ mɛ kɔndá bɔkɔa bɔ́mɔtɛ́, ɔ́ bɔɛ́ta mɛ́ ná úkúnə́kíə́ ɔ bilúkunə bikimə bɛ́ bəlumininə. Mɔɛ́ta tɛ́á a niŋə́kə́ ɔwɔŋgɔkɔnɔ ɛ́sɛ́á Isə́lúkú a Huɛlɛ́ a ná tínímíə́, nɔ́yɛ́ a ná báá a ndɔ niŋə ɔ ikúílí Huɛlɛ́ a ná wɛɛ́ya ɛlɛ́ákɛ́ná ɛlɔ́áyɛ́ ayɛ́.

¹⁸Ɔ́ niɔŋɔ́, ábá mɔndɔ a ka báá ɛŋaná ɔbɛ́ánda ikúílí Huɛlɛ́ a ná wɛɛ́ya ɛ́lɛ́ákɛ́na, a lɛ kɛ́á ɔwá bá wɛɛ́ya anda. Ábá Huɛlɛ́ a ka aŋɔ́á ɛ́lɛakɛna aŋɔ́á bɛ́ándátɔ́, ɔ lɛ bɔ́áwɔ́á buəndí bitə.

¹⁹Ɔ bámɛnɛna ɔbánɔ́ bɛ́ándátɔ́ mbá ata injuə́, mɔsɛ́ŋɛ́ wɔ́ lɛ ba; bɔkɔa bɔ́mɔtɛ́ bɔ́ lɛ́á na mɔsɛ́ŋɛ́, imbə́ndə́ yɛ́ Huɛlɛ́ utə́tə́niə.

²⁰Yɛ́ lɛa muɛsɛ ɔwá, mɔndɔ tɛ́á a ná hɔ́ánáná ɔbáá ɛ́sɛ́á ikúílí Huɛlɛ́ a ná wɛɛ́ya ɛ́lɛ́ákɛ́na.

²¹Ábá ɔ ka báá yɔlɛ́ ikúílí Huɛlɛ́ a ná aŋɔ́á ɛ́lɛ́ákɛ́na, ɔ lɛ sə́híníə́ bɔ́ányɛ, mba, ábá ɔ ná ihə́lí bɔ́ŋɔ́ yɛ́ bukuənjə ukusənə, ɔ lɛ tɛbɛ́na, ɔ nifəŋə niása bɔ́mɔtɛ́ bá aŋɔ́á bɛ́kɛ́ákɛ́na ɛ́sɛ́á ɔ lɛ́á yɔlɛ́.[2]

²²Ɔ taká, yɔlɛ́ ɔwá Isə́lúkú á Huɛlɛ́ a ná ɛ́lɛ́ákɛ́na, a lɛa na bukuənjə ɔ ɔwayɛ́ mɔlɛ́má nuúmə́ bɔkɔasɛ́á, Isə́lúkú á Yə́susu a ka wɛɛ́ya bukuənjə índiə. Hɔ́ánánátɔ́, wɛ́ɛ́yɛ́ ɔwá Huɛlɛ́ a ná ɛ́lɛ́ákɛ́na ikúílí a ná báá bukuənjə, a lɛa híánátɔ́ yɔlɛ́ yɛ́ Kilísitusu.

²³Huɛlɛ́ a ka bənú háŋɔ́na na mukunə́ mɔŋɛ́ŋa, nɔ lɛ híáná bɛɔlɛ́ bɛ́ bɛndɔ.

²⁴Á bənísə́, mɔɛ́ta tɛ́á á ayɛ́ tuə́nə́ nɔ́yɛ́ á Huɛlɛ́ busíə́ ɛ́sɛ́á a ná bámɛ́nɛ́na ikúílí a ná wɛɛ́ya ɛ́lɛ́ákɛ́na.

²⁵Ɔ wɔŋgɔkɔnɔ na mɛlɛmba yɛ́ bɛndɔ, Isə́lúkú a sa ámɛ nɔ́yɛ́ hɛ́na ata bɔkɔa ɔ uwəbú ɛlɔ́á. Mba, ɛkasɛ mɛ ənú lɛná ɛ́sɛ́á mɛ ndɔ bɛ́kɔ́lɔmɔna. Nɔ ná hɔ́ánána ɔ yámɛ́á ɛtambá utə́tə́niə bɔkɔasɛ́á, ɔ tɔ́mbákɛna na mɔlɛ́má muɛsɛ wɔ́ Isə́lúkú á Yə́susu Kilísitusu, a ka kɛaka ɔwá mɛ híáná mɔndɔ ɔwá bá ná hɔ́ánána ɔ nɛkɔmba ɔtálɛ́na.

²⁶Mɛ ndɔ siə ɔlaa ɔwá, ɛ́sɛ́á məsə́kə má lɛ́á ɔ bikúílí bɛ́ isíŋáka, yɛ́ lɛa muɛsɛ ɔwá mɔndɔ a túə́nə́ ɛŋaná muəndú, ɛ́ɛ! A ná hɔ́ánána utuənə ɛ́sɛ́á a lɛ́á.

²⁷Ábá ɔ lɛa na muəndú, ɔ lɛ síə́ ɔwá ɔ bɛ́álɔ́ná na wɛɛ́ya. Ábá ɔ lɛ bá na muəndú, ɔ lɛ mɔɛ́ta siə.

²⁸Ata nɔ́yɛ́ ábá ɔ lɛa bɛ́lɛ́nátɔ, tátá bɔbɛ́á; ábá ɛkɔ́njɛ́ yɛ́ muəndú a ná lɔnɔ, a lɛ bá kɔ́átɔ́ ɔ bɔbɛ́á. Mba, nɔ́ manyá ɔwá, bááyɛ́ ɔbá bá ndɔ niŋə ɔ miímə yɛ nɛbɛ́lɛna, bá ndɔ məsə́kə maŋɛ́ŋa sinə ɔ misí, mɛ lɛ ndɔ hikiə ɔwá nɔ fínə́ ɔ matáyɛ́ məsə́kə.

²⁹Á bənísə́, náana mɛ ndɔ siə ɔlaa; ikúílí yɛ́ lɛa nyɔ́hɛ́nátɔ. Nɔ́yɛ́, ɔ balakɛna isíŋáka, bááyɛ́ ɔbá bá lɛ́á bɛ́lɛ́nátɔ́, bá kɛ́áká ɛ́sɛ́á bá lɛ bá bɛ́lɛ́nátɔ.

³⁰Bááyɛ́ ɔbá bá ndɔ lɛla, bá niŋə́kə́ ɛ́sɛ́á bá sa bá bá ndɔ lɛla, bááyɛ́ ɔbá bá lɛ́á ɔ nɛhɔnɔ, bá niŋə́kə́ ɛ́sɛ́á bá lɛ bá ɔ nɛhɔnɔ, bááyɛ́ ɔbá bá ndɔ ɔ́ndɔ, bá kɛ́áká ɛ́sɛ́á bá lɛ bá itíə́nə́tɔ́ yatɛ́ ɔyɛ́á bá ndɔ ɔ́ndɔkɔ.

³¹Bááyɛ́ ɔbá bá ndɔ maasɛ má yɛ́ɛyɛ misí bɛ́kɛna, bá niŋə́kə́ ɛ́sɛ́á bá sa maáta bɛ́kɛna bɔkɔasɛ́á, yɛ́ɛyɛ misí ɛ́sɛ́á tɔ ndɔ mɛɛ́ta sinə, yɛ́ sɔ́ ŋɔ mɔŋa, yɛ́ lɛa ɔ ɔtɔ́mbáka.

³²Mɛ hikəkiə ɔwá nɔ lɛ bá na isə́hísə́hí yɛ́ bɔkɔa ata bɔ́mɔtɛ́. Wɛ́ɛ́yɛ́ ɔwá a lɛ bá bɛ́lɛ́nátɔ́, a báka na isə́hísə́hí yɛ́ bɛkɔa bɛ́ Isə́lúkú á Yə́susu ɔkɛa, a siəkə ɔwá Isə́lúkú a wɛɛ́ya hikə́kíə́.

³³Wɛ́ɛ́yɛ́ ɔwá a lɛ́á bɛ́lɛ́nátɔ́, a lɛa na isə́hísə́hí yɛ́ bɛkɔa bɛ́ misí, a siəkə ɔwá wayɛ́á muəndú a wɛɛ́ya hikə́kíə́.

³⁴Nɔ́yɛ́, a báka tɔ́na ə́kə́tɔ́ ɔ ətíə́ na wayɛ́á muəndú na Huɛlɛ́. Hɔ́ánánátɔ́, muəndú ɔwá a lɛ bá lɔ́nɔ́tɔ́ mbá ata ɛkɔ́njɛ́ yɛ́ muəndú, bá lɛa na isə́hísə́hí yɛ́ bɛkɔa bɛ́ Isə́lúkú á Yə́susu, bá siəkə ɔ yəbúə́ mɛɛ́lɔ na wəbúə́ umbúínyi ɔhánɛna á Isə́lúkú ɔ bɛkɔa ɔbánɔ́ bikimə. Mba, muəndú ɔwá a lɛ́á lɔ́nɔ́tɔ́, a báka na isə́hísə́hí yɛ́ bɛkɔa bɛ́ misí, a siəkə nəníə́ yayɛ́á ibə́ a wɛɛ́ya hikə́kíə́.

³⁵Mɛ ndɔ hɔ́ɔ́ nɔ́yɛ́ ɛlɔ́áyɛ́ wə́núə́ mɔsɛ́ŋɛ́, mɛ lɛ ndɔ siə ɔkɛa ɔwá nɔ úmbúfə́nə, mba, ɛlɔ́áyɛ́ uwənú ɛnɔ́mɛ yɛɛsɛ uwinə́niə ɔkɛaka ɔwá, nɔ báá bɛ́ɔ́lɔ́kɛ́nátɔ́ á Isə́lúkú a Yə́susu, na mɔlɛ́má úmotí.

³⁶Ɛkasɛ mɛ hɔ́kɛ́na isíŋáka ɔ ɛsalɛ yɛ́ ɛnɔ́kɔ́nɔkɔ na yáyɛ́á ɛkɔŋɛna. Ábá ɛnɔ́kɔ́nɔkɔ na yáyɛ́á ɛkɔŋɛna bá ná ihə́ŋiə ɛtá ɔwá bá bɛ́álɔ́na, mbá a ndɔ bɛ́manya ɔwá ɛkasɛ a yáyɛ́á ɛkɔŋɛna liŋgə́síə́, wɔ́ɔwɔ a lɛa na ilókí yikimə yɛ́ yáyɛ́á ɛkɔŋɛna ɔ ɔwayɛ́ mɔlɛ́má nuúmə, ábá a ná bílúmíníə́ tɔ́na ɔwá bá bɛ́lɛ́nána, á kɛ́áká ɛ́sɛ́á a ndɔ hikiə, nɔ́yɛ́ yɛ́ lɛ bá bɔbɛ́á.

³⁷Ɔ nifəŋə, ábá ɛnɔ́kɔ́nɔkɔ a ná ihə́ŋiə ɛtá ɔwá a sɔ́ ŋɔ yáyɛ́á ɛkɔŋɛna bɛ́lɛna, ábá a ná nɔ́yɛ́ bílúmə́kíníə́ ɔ ɔwayɛ́ mɔlɛ́má, bá sa wɛɛ́ya sáŋɔ́nɛna ɔwá a lɛ bɛ́lɛ́na, ábá a óso ɔ ɔbɛ́hálɛna, nɔ́yɛ́, a ná kɛ́áká muɛsɛ ɔwá a lɛ yáyɛ́á ɛkɔŋɛna bɛ́lɛ́na.

³⁸Ɔ́ niɔŋɔ́, wɛ́ɛ́yɛ́ ɔwá a ná bɛ́lɛ́na ɔ yáyɛ́á ɛkɔŋɛna, a ná kɛ́áká muɛsɛ, wɛ́ɛ́yɛ́ ɔwá a ná bɛ́sáŋɔ́ná, a ná kɛ́áká muɛsɛ ɔ ɔyáyɛ́ná.

³⁹Muəndú a booko tɔanátɔ́ na yayɛ́á ibə́ ikúílí yikimə ɔyɛ́á a lɛ́á ɔ buɔmɔ́; mba; ábá yayɛ́á ibə́ a ná wə́ə́, a lɛa na kuənjə ɔ ɔlɔ́nɔ ɔ mɔndɔ ɔwá a ndɔ hikiə, yayɛ́á ibə́ a ná hɔ́ánána ɔbá mulumininə.

⁴⁰Ɛ́sɛ́á wə́míə́ usinə, a ŋɔ báá ɔ nɛhɔnɔ ábá a ná túə́nə́ ɛ́sɛ́á a lɛ́á, yáyɛ́ná ɔ kətúə́nə ɔ ɔmbɛ́la wɔ́ ibə́ minə́minə́. Nɔ́ ɔ́kɔ́kɛ́ná yatɛ́ ɔyɛ́á mɛ ndɔ laa, mɛ ndɔ manya ɔwá Umbúínyi wɔ́ Huɛlɛ́ wɔ́ lɛa na mɛaŋɔ́á.