Read Tunen 1 Kɔlɛ́ŋɛ́tɛ 8 Bible Online

1 Kɔlɛ́ŋɛ́tɛ 8 - Tunen bible

1 Kɔlɛ́ŋɛ́tɛ 8

¹Ɛlɔ́áyɛ́ mɛnyama ɔyɛ́á bá ndɔ hánɛna ɔ bililí, yɛ́ lɛa taká ɔwá bəsú bəkimə tɔ ndɔ bɔkɔa manya ɛlɔ́áyɛ́ nɔ́yɛ́. Abáka yɛ́ɛ́yɛ́ ɛmanya yɛ́ mɔndɔ híə́nəsiə na niə́mə, mba ɔ nifəŋə, nibo nɛ́ ná hɔ́ánána ɔ uwəsú ɔwɔ́lɔ ɔkɛaka ɔwá tɔ́ bámɛ́nɛ́ná ɔ́nɛ́nátɔ.

²Ábá mɔndɔ a ndɔ bɛ́kɔ́lɔmɔna ɔwá a ndɔ bɔ́mɔtɛ́ bɔkɔa manya, muití a nana kafámá ɔmanya ɛ́sɛ́á Huɛlɛ́ a ndɔ siə ɔwá a manya.

³Mba, ábá mɔndɔ a ndɔ Huɛlɛ́ hikiə, Huɛlɛ́ a ndɔ áyɛ́ wɛɛ́ya manya.

⁴Nɔ́yɛ́, baánɛ bá óso ɔ mɛnyama ɔnɛ́á ɔyɛ́á bá ná hánɛ́na ɔ bililí əə́? Tɔ ndɔ manya muɛsɛ ɔwá, ata ililí ɛ́mɔtɛ́ yɛ́ lɛ bá tiísi yɛ bɔkɔa ɔ misí, tɔ ndɔ manya tɔ́na ɔwá huɛlɛ́ minə́minə́ yɛ́ lɛ bámɛ́nɛ́na, ɔ́maná Huɛlɛ́ ɛmɔtɛ́.

⁵Ɔ taká, bɛɛ́la bɛ́ booko ɔ nɔɔ́mɛná ata ɔ misí ɔbɛ́á, abáka bɛndɔ bá lúbúnəkə ɔ́maná ɛ́sɛ́á á Huɛlɛ́, bɛhuɛlɛ́ bɛ́ lɛa biəŋí, bisə́lúkú tɔ́na biəŋí.

⁶Ɛlɔ́áyɛ́ əsú, Huɛlɛ́ yɛ́ báka ɔbánɔ́ ɛ́mɔtɛ́, yəsúə́ Isə́ ɔwá a ná bikimə bɔ́táká, a ka bəsú bɔ́ta tɔ́na ɔkɛaka ɔwá tɔ́ bámɛ́nɛ́ná báyɛ́á bɛndɔ, Isə́lúkú yɛ́ báka tɔ́na ɛ́mɔtɛ́, á Yə́susu Kilísitusu, Huɛlɛ́ a ka tɔ́mbɛ́na na wɛɛ́ya ɔkɛaka ɔwá a bikimə bɔtaka, ɔ tɔ́mbákɛna na wɛɛ́ya tɔ́na tɔ ndɔ niŋə.

⁷Mba, bɛndɔ bəəŋí uwənú ətíə́ bá lɛ ndɔ manya ɔwá bililí bɛ́ lɛ bá na mɔsɛ́ŋɛ́. Bɔ́mɔtɛ́ bá ka hílə́kəniə ɛmbáta ɔ bililí, ɔ ndafámáká niɔfɛ́nɛ, bá nabáka ɔ mɛnyama ɔnɛ́á ɔyɛ́á bá ná hánɛ́na ɔ bililí, ikúílí bá ndɔ yɛ́táyɛ́ mɛnyama nɛ́á, bá ndɔ fɛka ɔwá bililí bɛ́ lɛ́á yəbúə́ huɛlɛ́. Bá lɛ ndɔ bɛkɔa bɛ́ Huɛlɛ́ manya muɛsɛ. Nɔ́yɛ́ bá ndɔ bɛ́ɔ́kɔ ɔwá, yɛ́ɛ́yɛ́ mɛnyama yɛ́ ndɔ bəə́bu tífílə á Huɛlɛ́ busíə́.

⁸Tɔ ndɔ manya ɔwá, tátá bɔ́labɔ́nɛ́á abáka bɔ́ kɛaka bɔ́ sɛ́á tɔ báá ɛmɛ́ŋɛ́ yɛ Huɛlɛ́, tɔ bɛɛ́ta nɛ́áka ɔbánɔ́, tɔ lɛ bá na mɔsɛ́ŋɛ́; tɔ lɛ nɛ́á ɔbánɔ́, nɔ́yɛ́ yɛ́ sa ndá bəsú húlíə́ ata bɔkɔa.

⁹Nɔ́yɛ́, nɔ manyaka, nɔ lɛa na kuənjə yɛ ɔnɛ́á yatɛ́ yikimə ɔyɛ́á nɔ ndɔ siə, yɛ́ óso ɔ bááyɛ́ ukuəsiə ɔ bɔbɛ́á ɔbá bá lɛ́á tɔmbɔ́kɔ́tɔ́ ɔ ɛnɔ́mɛ yɛ́ Huɛlɛ́.

¹⁰Ɔ taká, ɔwáwɔ ɔwá ɔ ndɔ taká yɛ bililí manya, ábá bá ndɔ aŋɔ́á sinə ɔ ɔnɛ́á ɔ tɛ́mbɛlɛ yɛ bililí, ɛmanya yɛ mɔndɔ wa tɔmbɔ́kɔ́tɔ́ ɔ ɛnɔ́mɛ yɛ́ Huɛlɛ́ yɛ́ ŋɔ wɛɛ́ya iŋgínə́ índiə ɔ mɛnyama yɛ́ bililí ɔnɛ́á tɔ́na.

¹¹Nɔ́yɛ́, yatɛ́ ɔyɛ́á ɔ ná kɛ́áka ɔ tɔŋɔ́, yɛ́ ŋɔ kɛaka ɔwá wɛ́ɛ́yɛ́ munísə́ a nímínə́ ɔwá a lɛ́á tɔmbɔ́kɔ́tɔ́ ɔ ɛnɔ́mɛ yɛ́ Huɛlɛ́ mbá nɔ́yɛ́ á Kilísitusu a ná wínə́ ɔ ɔwayɛ́ ɛlɔ́á.

¹²Ikúílí ɔ ndɔ nɔ́yɛ́ kɛa, ɔ ndɔ munísə́ kuəsiə ɔ bɔbɛ́á ɔwá a lɛ́á tɔmbɔ́kɔ́tɔ́ ɔ ɛnɔ́mɛ yɛ́ Huɛlɛ́, ɔ ndɔ wə́yíə́ mɔlɛ́má tuŋulə, á Kilísitusu bɛ́múɛ́tɛ́ nɔ́ ndɔ bɔbɛ́á kɛa.

¹³Ɔ́ ɛlɔáyɛ́ nɔ́yɛ́, ábá mɛnyama yɛ́ ná kɛ́áka ɔwá munísə́ áyɛ́ kɔɛ́na ɔ bɔbɛ́á, mɛ sa ndá mɛnyama nɛ́á ɔkɛaka ɔwá mɛ wɛɛ́ya nənə́síə́.