Read Tunen 1 Kɔlɛ́ŋɛ́tɛ 9 Bible Online

1 Kɔlɛ́ŋɛ́tɛ 9 - Tunen bible

1 Kɔlɛ́ŋɛ́tɛ 9

¹Ɔwámɛ tɔ́na, mɛ lɛ bá na kuənjə yɛ ɔkɛa yatɛ́ ɔyɛ́á mɛ ndɔ siə əə́? Mɛ lɛ ámɛ bá mɔsɔ́másɔma əə́? Mɛaŋɔ́á tɔ́na mɛ sa yəsúə́ Isə́lúkú a Yə́susu sinə na mámɛ́á məə́sə əə́? Nɔ lɛ ənú bá tɔtámátámá tɔ́ bɔ́ámɛ́á buolí ɛlɔ́áyɛ́ Isə́lúkú əə́?

²Ata bənə́bənə́ bá lɛ ndɔ mɛaŋɔ́á manya ɛ́sɛ́á mɔsɔ́másɔma, uwənú, nɔ ndɔ nɔ́yɛ́ manya muɛsɛ ɔwá mɛ lɛa mɔsɔ́másɔma. Ɔ taká, ɛ́sɛ́á nɔ lɛ́á tɔanátɔ́ na Isə́lúkú, bənú nɔ lɛ́á hɛŋgɛtɛ́nɛ́á ɔhɛ́á hɛ́ ndɔ ínə́niə ɔwá, mɛ báka mɔsɔ́másɔma.

³Náana mɛ ndɔ bááyɛ́ bɛ́kámɔsɔna ɔbá bá ndɔ mɛaŋɔ́á sɔ́mɛna:

⁴Tɔ lɛ bá na kuənjə yɛ ɔnɛ́á na ɔnyɛ́na ɛlɔ́áyɛ́ búə́súə́ buolí əə́?

⁵Tɔ lɛ bá hɔ́ánánátɔ́ ɔ ɛkɔŋɛna yɛ́ muəndú ɔwɛta ɔwá a lɛ́á mulumininə, ɛ́sɛ́á abáka basɔ́másɔma bənə́bənə́ bá əbú nɔ́yɛ́ kɛaka əə́? Ɛ́sɛ́á bənísə́ bá Isə́lúkú bá ná kɛ́áká na Sɛ́fasɛ əə́?

⁶Ataná, mɛaŋɔ́á bíbúə́ na Banábasɛ tɔ́ ná hɔ́ánána ɔnyɔɔ ɔkɛaka ɔwá mbá tɔ ŋguɛtɛ yɛ buɔsɛ́ kúsə́nə əə́?

⁷Baánɛ, abáka mɔnɔabilə́ a bɛ́sábɔ́na bɛ́múɛ́tɛ́ əə́? Ɛ́yánɛ́ mɔnyɔɔ bɛtɔbɔtɔ́bɔ́ abáka a lɛ nɛ́á ikúílí məhuə má ná fámá əə́? Ɔ́ uwə́níə́ mɔtátá bilúkə́ ɔwá a ndɔ mabɛ́nyɛ kɛma a lɛ maáta nyáá əə́?

⁸Mba, mɛ lɛ ndɔ hɛ́na ɔbánɔ́ á bɛkɔa bɛ́ buɔmɔ́ ɔbɛ́á bɛndɔ bá ndɔ fɛka, Nɔ́yɛ́ yɛ́ lɛa tilə́kə́tɔ́ ɔ hiəfulə hɛ́ umbə́ndə́ wɔ́ Mósisi.

⁹Ɔ taká, Mósisi a ka tiləkə ɔ Umbə́ndə́ a sɛ́á: «Abáka bá lɛ munuə wɔ́ ɛfɔŋɔ sɛ́ŋɛ́ná ɔyɛ́á yɛ́ ndɔ buolí nyɔɔ ɔ ɛtɔbɔtɔ́bɔ́.» Nɔ ndɔ ənú fɛka ɔwá Huɛlɛ́ a ndɔ nɔ́yɛ́ hɛ́na ɛlɔ́áyɛ́ bɛfɔŋɔ bíbúə́ əə́?

¹⁰Tátá ɛlɔ́áyɛ́ əsú a ndɔ nɔ́yɛ́ hɛ́na əə́? Ɛ́ɛ! Ɛlɔ́áyɛ́ əsú a ná nɔ́yɛ́ tílə́kə. Yɛ́ lɛa muɛsɛ ɔwá, wɛ́ɛ́yɛ́ ɔwá a ndɔ nyɔɔ ɔ ɛtɔbɔtɔ́bɔ́, a ndɔ nánɛna ɔwá a ŋɔ nioko nɛ́ máyɛ́á məhuə kusənə. Wɛ́ɛ́yɛ́ ɔwá a ndɔ ɛmbásáká sɛa, a ndɔ nánɛna ɔwá a ŋɔ mɔsábɔ́náná wɔ́ bɔ́áyɛ́á buolí kusənə.

¹¹Tɔ ka Ɛtambá yɛ́ Huɛlɛ́ nɛma ɔ uwənú mɛlɛ́má nuúmə́, yɛ́ lɛa mɔbɛ́á ɔwá nɔ bəsú mə́núə́ maasɛ índíə́kínə əə́?

¹²Ábá bənə́bənə́ bá lɛa na yɛ́táyɛ́ kuənjə ɔ bíə́núə́ bɛɛ́la ukusənə, tɔ əsú lɛa na hifílí ɔ bɛɛ́ta ukusənə yáyɛ́ná bəə́bu. Mba tɔ sa nɔ́yɛ́ kɛa, ɔ nifəŋə, tɔ ndɔ məsə́kə məkimə ísə́biniə ɔmá má ndɔ nda bəsú fámɛ́ná ɔkɛaka ɔwá, tɔ lɛ bɔkɔa kɛ́á ɔbɔ́á bɔ́ ndɔ mɔndɔ kotiə ɔwá, a lɛ Imbə́nú Yɛɛsɛ yɛ Yə́susu Kilísitusu ɔkɔ.

¹³Nɔ ndɔ manya muɛsɛ ɔwá, bááyɛ́ ɔbá bá ndɔ nyɛna ɔ Tɛ́mbɛlɛ bá ndɔ bíə́búə́ bɛ́labɔ́nɛ́á kusənə ɔbɛ́á bɛ́ ndɔ húlínə ɔ Tɛ́mbɛlɛ, bááyɛ́ tɔ́na ɔbá bá ndɔ bɛnamá índiə ɔ niɔlɔ nɛ́ mahánɛna, ba ndɔ níə́búə́ nioko kusənə ɔ mááyɛ́ mahánɛna.

¹⁴Hɔ́ánánátɔ́, Isə́lúkú a ka manɛna ɔwá, bááyɛ́ ɔbá bá ndɔ Imbə́nú Yɛɛsɛ nɔŋɔna, bá niŋə́kínə ɔ yɛ́táyɛ́ Imbə́nú Yɛɛsɛ.

¹⁵Mba, ɔwámɛ, mɛ sa ɔŋgɛna nɔ́yɛ́, mɛ sa hítə́yí hiəfulə tilə ɔkɛaka ɔwá nɔ mɛaŋɔ́á bɔɔ́la índíə́. Yɛ́ lɛa muɛsɛ ɔwá mɛ wə́ə́ yáyɛ́na ɔwá mɛ mɔndɔ bɔɔ́la bata. Mɔndɔ a lɛ tíkə́ mɛaŋɔ́á símə́siə.

¹⁶Ábá mɛ ndɔ Imbə́nú Yɛɛsɛ yəmbələniə, mɛ sá hɔ́ánana ɔ ɔbɛ́lɛ́áŋɔna, mɛ ndɔ yɛɛ́ta nɔŋɔna bɔkɔasɛ́á, ɔ́ buolí ɔbɔ́á Huɛlɛ́ a ná mɛaŋɔ́á íkíníə́; indimisi na mɛaŋɔ́á ábá mɛ sá Imbə́nú Yɛɛsɛ yəmbələniə!

¹⁷Ábá mɛaŋɔ́á bɛ́múɛ́tɛ́ mɛ ná bɔ́táyɛ́ bɔsɔ́ma bílókínə́, bá ná hɔ́ánána ɔ ɔwámɛ ɔsábɔ́na. Ɛ́sɛ́á ikúílí á Huɛlɛ́ a ná mɛaŋɔ́á íkíníə́, mɛ ndɔ bɔɛ́ta úndúsiniə ɔbánɔ́ ɛ́sɛ́á yɛ́ ná hɔ́ánána.

¹⁸Yatɛ́ yɛ́ lɛ́á wə́míə́ mɔsábɔ́náná nə́ə əə́? Ɔ́ ɔnɔŋɔna wɔ́ Imbə́nú Yɛɛsɛ ɔ bɛndɔ ndəmə. Mɛ lɛa na iŋgínə́ ɔ bɔɔ́la ɔbata ɛlɔ́áyɛ́ yɛ́táyɛ́ Imbə́nú Yɛɛsɛ ɔyɛ́á mɛ ndɔ nɔŋɔna, mba, mɛ lɛ ndɔ nɔ́yɛ́ bata.

¹⁹Ɛ́ɛ! Mɛ lɛa na bukuənjə, mɛ lɛ bá yɔlɛ́ yɛ́ mɔndɔ, mba, mɛ ka híána yɔlɛ́ yɛ́ bəkimə ɔkɛaka ɔwá, ɔmbana muiŋí wɔ́ bɛndɔ bá níə́búə́ nɛkɔmba tálɛ́ná á Yə́susu.

²⁰Ikúílí mɛ lɛ́á ɔ ətíə́ yɛ Bɛyútɛnɛ, mɛ niŋəkə tɔ́na ɛ́sɛ́á bəə́bu ɔkɛaka ɔwá bá níə́búə́ nɛkɔmba tálɛ́ná á Isə́lúkú á Yə́susu. Mɛ lɛ ndɔ umbə́ndə́ wɔ́ Mósisi bítə́tə́niə, mba, ikúílí mɛ lɛ́á ətíə́ yɛ bááyɛ́ ɔbá bá ndɔ wútə́yí umbə́ndə́ bítə́tə́niə, mɛ kɛaka ɛ́sɛ́á bəə́bu ɔkɛaka ɔwá, bá níə́búə́ nɛkɔmba tálɛ́ná á Isə́lúkú á Yə́susu.

²¹Hɔ́ánánátɔ́, ikúílí ɔyɛ́á mɛ lɛ́á na bááyɛ́ ɔbá bá lɛ ndɔ umbə́ndə́ wɔ́ Mósisi manya, mɛ ámɛ kɛaka ɛ́sɛ́á bəə́bu ɔkɛaka ɔwá, bá níə́búə́ nɛkɔmba tálɛ́ná á Isə́lúkú á Yə́susu. Nɔ́yɛ́ yɛ́ lɛ ndɔ siə ɔlaa ɔwá mɛ lɛ ndɔ Umbə́ndə́ wɔ́ Huɛlɛ́ tə́tə́niə, mba, mɛ ndɔ muítə bítə́tə́niə bɔkɔasɛ́á, mɛ ndɔ ɔŋgɛna ɔ umbə́ndə́ wɔ́ Kilísitusu.

²²Ikúílí mɛ lɛ́á ɔ ətíə́ yɛ bááyɛ́ ɔbá bá lɛ́á bɔtɔmbɔ́ ɔ ɛnɔ́mɛ yɛ́ Huɛlɛ́, mɛ kɛaka ɛ́sɛ́á bəə́bu ɔkɛaka ɔwá bá níə́búə́ nɛkɔmba tálɛ́ná á Isə́lúkú a Yə́susu. Nɔ́yɛ́, ikúílí mɛ ná káfámá á mɔɛ́ta lɛ́á, ata nəníə́ a lɛ́á, mɛ kɛaka ɛ́sɛ́á wɛɛ́ya ɔkɛaka ɔwá, bɔ́mɔtɛ́ bá níə́búə́ nɛkɔmba tálɛ́ná á Isə́lúkú a Yə́susu, Huɛlɛ́ á ayɛ́ bəə́bu nuəkə́níə́ tɔ́na.

²³Mɛ ndɔ bɛ́ɛ́yɛ́ bikimə kɛna ɔkɛaka ɔwá, Imbə́nú Yɛɛsɛ yɛ́ yambána ɔ bɛbɔ́ka ɔbánɔ́ bikimə, mɛaŋɔ́á tɔ́na mɛ nɛ́ámɛ́á nioko nɛ́ mɔsábɔ́náná kúsə́nə ɔnɛ́á nɛ́ lɛ́á umə́.

²⁴Nɔ ndɔ manya muɛsɛ ɔwá abáka batɛbɛna bəkimə bá tibəkinəniə ɔ ɛbɔ́ka yɛ́ mɔtɛbɛna, mba, ɔmɔtɛ́ abáka a fáma wəbusíə́, a mɔsábɔ́náná kusənə. Nɔ́yɛ́, nɔ́ ənú ányá ɔ mɔtɛbɛna ɔkɛaka ɔwá, bənú tɔ́na nɔ́ mɔsábɔ́náná kúsə́nə.

²⁵Bááyɛ́ bəkimə ɔbá bá lɛ́á ɔ hibələniə, abáka bá bɛ́tábɔ́naka na iŋgínə́ yikimə, bá bɛ́mɔtɛ́ bɛkɔa bítə́tə́kəniə ɔkɛaka ɔwá, bá mɔsábɔ́náná kúsə́nə. Mba wííyí mɔsábɔ́náná ɔwá ɛkasɛ bá kusə́nə wɔ́ sɔ́ ŋɔ mɔŋa. Mba uwəsú, tɔ ndɔ bɛ́tábɔ́na ɔ mɔtɛbɛna ɔkɛaka ɔwá tɔ́ mɔsábɔ́náná wɔ́ ikúílíə́kimə kusə́nə.

²⁶Nɔ́yɛ́, ɔwámɛ mɛ ndɔ manya yatɛ́ ɔyɛ́á mɛ ndɔ siə ikúílí ɔyɛ́á mɛ ndɔ tɛbɛna: Mɛ báka tɔ́na ɛ́sɛ́á mɔnɔa ɔwá, ikúílí a ndɔ bikútú ə́mbinə, a ndɔ manya ɔ ɛbɔ́ka ɔyɛ́á a ndɔ ɔsɔ́kɔ́ súbə, mɛ lɛ ndɔ bikútú ə́mbinə ɔ misí itə́mbí.

²⁷Mɛ ndɔ yamɛ́á mɛɛ́lɔ indomí índiə mɛaŋɔ́á bɛ́múɛ́tɛ́ ɔkɛaka ɔwá yɛ́ mɛaŋɔ́á ɔ́kɛna, ɔkɛaka ɔwá Huɛlɛ́ a lɛ mɛaŋɔ́á híə́níə́ na əlimə, ɔwámɛ ɔwá mɛ ná bənə́bənə́ yáyɛ́á ɛtambá nɔŋɔ́nákɛ́na.