Read Tunen 2 Kɔlɛ́ŋɛ́tɛ 1 Bible Online

2 Kɔlɛ́ŋɛ́tɛ 1 - Tunen bible

2 Kɔlɛ́ŋɛ́tɛ 1

¹Ɔwámɛ á Báwolo, mɛ lɛa mɔsɔ́másɔma wa Yə́susu Kilísitusu ɔ tɔ́mbákɛna na uhikiə wɔ́ Huɛlɛ́, na wəsúə́ munísə́ á Timotíó, tɔ ndɔ ilúkunə yɛ́ Huɛlɛ́ tilinə ɔyɛ́á yɛ́ lɛ́á ɔ bətínə́ yɛ Kɔlɛ́ŋɛ́tɛ, nɔ́yɛ́, na bɛláŋa bikimə bɛ́ ilúkunə yɛ́ Huɛlɛ́ ɔbá bá lɛ́á ɔ misí mikimə yɛ Akáyɛ.

²Huɛlɛ́ ɔ yəsúə́ Isə́ na yəsúə́ Isə́lúkú á Yə́susu Kilísitusu bá bənú buɛsɛ kɛáka, bá bənú bumbə́nú índíə́ tɔ́na.

³Tɔ́ Huɛlɛ́ á Isə́ yɛ yəsúə́ Isə́lúkú á Yə́susu Kilísitusu nyamáka, Isə́ ɔwá a lɛ́á na iwə́mɛɛ́lɔ ɛlɔ́áyɛ́ bɛndɔ, Huɛlɛ́ ɔwá a ndɔ bɛndɔ kokoliniə bikúílí bikimə.

⁴Wɛɛ́ya a ndɔ bəsú óníniə ɔ ikúílí yɛ́ məsə́kə ɔkɛaka ɔwá, ɔ tɔ́mbákɛna na máyɛ́á mokokoliniə, bəsú tɔ́na tɔ́ əsú bɔsɔ́kɔ́ bəkimə ónókíníə́ ɔ uwəbú məsə́kə.

⁵Ɔ taká, hɔ́ánánátɔ́ ɛ́sɛ́á Kilísitusu a ná məsə́kə siəkínə ɛlɔ́áyɛ́ əsú, tɔ ndɔ məsə́kə sinə ikúílí tɛ́á ɛ́sɛ́á Kilísitusu a ná ayɛ́ siəkínə. Hɔ́ánánátɔ́, Huɛlɛ́ abáka a bəsú kokolokiniə ɔ ikúílí tɛ́á ɔ tɔ́mbákɛna na Kilísitusu.

⁶Ɛ́sɛ́á ikúílí tɔ lɛ́á ɔ məsə́kə, ɔ́ kɛaka ɔwá Huɛlɛ́ a bənú óníníə́, a bənú núə́kə́níə́ tɔ́na. Ɛ́sɛ́á ikúílí Huɛlɛ́ a ndɔ bəsú kokoliniə, ɔ́ ɔkɛaka ɔwá tɔ ənú kokólókíníə́ tɔ́na, ɔkɛaka ɔwá nɔ mátáyɛ́ məsə́kə ísə́bíníə́ hɔ́ánánátɔ́ ɛ́sɛ́á tɔ əsú lɛ́á ísə́bíníə́tɔ.

⁷Nɔ́yɛ́, tɔ lɛa ɛ́mɛ́nɛ́nátɔ́ ɔwá nɔ sa ndá ɛnɔ́mɛ yɛ́ Huɛlɛ́ níása. Ɔ taká, tɔ ndɔ nɔ́yɛ́ manya muɛsɛ, ɛ́sɛ́á nɔ ná nioko ɛtá ɔ uwəsú məsə́kə, nɔ lɛa tɔ́na na nioko ɔ mokokoliniə ɔmá Huɛlɛ́ ŋɔ bəsú índiə.

⁸Á bənísə́, ɔ taká, tɔ ndɔ siə ɔwá nɔ manyá nəníə́ tɔ ná məsə́kə síə́kínə ɔ misí yɛ Asia. Mááyɛ́ məsə́kə má ka bəsú bá yáyɛ́nátɔ́ ɛmbáta, tɔ ka fɛka ɔwá ɛkasɛ tɔ wə́kúnínə umə́.

⁹Ɛ́ɛ! Tɔ ka fɛka tɔ sɛ́á bá ná ihə́ŋiə ɛta ɔwá ɛkasɛ tɔ́ wə́kúnə. Mba, nɔ́yɛ́ yɛ́ ka ndá bəsú fámɛ́na ɔkɛaka ɔwá, tɔ lɛ níə́súə́ nɛkɔmba tálɛ́ná ɔ uwəsú bɛ́múɛ́tɛ́, mba, á Huɛlɛ́ bíbúə́ tɔ ndɔ fanɛna ɔwá a ndɔ bəwə́nú huŋuəsiə.

¹⁰Wɛɛ́ya a ná bəsú hútúnə́ ɔ yɛ́ɛ́yɛ́ ɛnya yɛ nyɛmbɛ́, wɛɛ́ya a ŋɔ bəsú hutunə tɔ́na. Ɛ́ɛ! Yə́súə́ ɛnánɛna yɛ́ lɛa tálɛ́nátɔ́ ɔ ɔwayɛ́ ɔwá, a ŋɔ bəsú hutunə tɔ́na ɔ nyɛmbɛ́.

¹¹Bənú bɛ́múɛ́tɛ́ tɔ́na, nɔ ndɔ bəsú ɔ́lɔ ɔ uwənú mabɛ́kálɛ́na, nɔ́yɛ́, bɛndɔ bəəŋí bá ŋɔ Huɛlɛ́ bɛ́kálákɛna ɛlɔ́áyɛ́ əsú, a ŋɔ wə́núə́ uŋgə́lə́kí ɔ́kɔ́kɛna, bəəŋí bá ŋɔ wɛɛ́ya mohóloniə híə́niniə ɔ uwəsú ɛlɔ́á.

¹²Bɔkɔa ɔbɔ́á bɔ́ ndɔ bəsú nɛhɔnɔ índiə bɔ́ lɛa ɔwá, tɔ ndɔ manya tɔ sɛ́á wə́súə́ mɔlɛ́má wɔ́ lɛ ndɔ bəsú kə́lə́siə, tɔ ka bítíkə́kə muɛsɛ ɔ misí sulusulu ɔ uwənú ətíə́, na buyoyoní bukimə, na taká ɔyɛ́á yɛ́ ndɔ húlínə na Huɛlɛ́. Nɔ́yɛ́ yɛ́ lɛ ndɔ húlínə na ɛmanya yɛ bɛndɔ bá misí, mba, ɔ tɔ́mbákɛna na mɔlɛ́má muɛsɛ wɔ́ Huɛlɛ́ ɛlɔ́áyɛ́ əsú.

¹³Ɔ taká, tɔ ndɔ bənú tilinə ɔbánɔ́ yatɛ́ ɔyɛ́á nɔ ná fanáka, nɔ ná ɔ́kɔ́kɛ́ná tɔ́na. Nɔ́yɛ́, mɛ lɛa na ɛnánɛna ɔwá nɔ ndɔ ɔ́kɔ muɛsɛ muɛsɛ.

¹⁴Yatɛ́ ɔyɛ́á nɔ sa ɔ́kɔ, yɛ́ lɛa ɔwá, ɔ hinó ɔhɛ́á yəsúə́ Isə́lúkú á Yə́susu a ŋɔ ndahíáná, nɔ ŋɔ báá na nɛhɔnɔ ɛlɔ́áyɛ́ əsú ɛ́sɛ́á bəsú tɔ́na tɔ ŋɔ nɛhɔnɔ ɔ́kɔ́kɛna uwənú ɛlɔ́á.

¹⁵Mɛ ka bá mɛ ndɔ nɔ́yɛ́ manya, ɔ́ ɛlɔ́áyɛ́ nɔ́yɛ́ mɛ ná síə́kə ɔwá mɛ taŋá ɔndáhíáná ɔ uwənú busíə́ ɔ kɛaka ɔwá, nɔ bɛkɔa bɛɛsɛ kusə́nə ɔbɛ́á bɛ́ ndɔ bənú nɛhɔnɔ húlə́ninə.

¹⁶Mɛ ka siəkə taká ɔ ndahíáná ɔ uwənú busíə́, əlimə yɛ nɔ́yɛ́ mbá mɛ ákáná ɔ Masɛtɔánɛ, mɛ sá bənú siəlinə ɔ kətilə́kə ɔkɛaka ɔwá, nɔ wə́míə́ mɔkɛnda nánákɛ́na ɔ wákaka ɔ Yútɛa.

¹⁷Ɛnaka mɛ yɛ́táyɛ́ ihə́ŋiə ɛtá, mɛ ka bá mɛ ndɔ manya muɛsɛ yatɛ́ ɔyɛ́á mɛ ndɔ kɛa. Mɛ sa bílúmíniə ɛ́sɛ́á bɛndɔ bá misí ɔ nindínə́ ɔnɛ́á, ikúílí mɛ ná bɔkɔa lumínə, mɛ bɔɛ́ta sáŋɔ́na.

¹⁸Huɛlɛ́ a báka wamɛ́á mumbóŋímboŋi, yatɛ́ ɔyɛ́á mɛ ná bənú lákɛ́na yɛ́ sa bá «ɛ́ɛ na bóo»,

¹⁹bɔkɔasɛ́á Yə́susu Kilísitusu á Mɔná wa Huɛlɛ́ ɔwá, Silifɛ́nɛ, Timotíó na mɛaŋɔ́á bɛ́múɛ́tɛ́ tɔ́ ná ndá bənú nífúnə́kínə́ ɛ́yánɛ́ a lɛ́á, a lɛa bá «ɛ́ɛ, na bóo.» Ɔ nifəŋə, a lɛa bikúílí bikimə ɛ́ɛ!

²⁰Ɔ taká, Huɛlɛ́ a ndɔ máyɛ́á makaka məkimə úndúsiniə ɔ tɔ́mbákɛna na Yə́susu ɔwá a lɛ́á «Ɛ́ɛ». Nɔ́yɛ́, tɔ ndɔ yəsúə́ Amɛna fə́mə́ləniə ɔ tɔ́mbákɛna na Yə́susu Kilísitusu ɛlɔ́áyɛ́ Huɛlɛ́ ɔ tɔ́áyɛ́á tuúmə uhíə́niniə.

²¹Á Huɛlɛ́ bɛ́múɛ́tɛ́ a ná bəsú tɛfa, a ndɔ kɛa ɔwá bəsú na bənú tɔ bámɛ́nɛ́ná ɔ́nɛ́nátɔ́ na iŋgínə́ á Kilísitusu.

²²Wɛɛ́ya a ná bəsú bílíndíníə́, a ka wə́yíə́ Umbúínyi Mɔnaŋanaŋa háá uwəsú mɔlɛ́má. Nɔ́yɛ́, a ndɔ bəsú ínə́niə ɔwá, a ŋɔ bəsú bɛkɔa bɛɛsɛ índiəkinə ɔbɛ́á a ná bəsú tə́tə́níníə́.

²³Mɛ ndɔ bíkumə á Huɛlɛ́ busíə́, ábá mɛ ndɔ kanja, mɛ́ wə́ə́ háha isíŋáka. Mɛ ka ihə́ŋiə ɛta ɔkɛaka ɔwá mɛ lɛ bənú məsə́kə kɔndɛ́na, ɔ́ ɛ́lɔ́áyɛ́ nɔ́yɛ́ mɛ sa ndahíáná ɔ bətínə́ yɛ Kɔlɛ́ŋɛ́tɛ.

²⁴Tɔ lɛ ndɔ siə ɔwá, tɔ bənú íkíníə́ ɔkɛaka ɔ sɛ́á nɔ́ lumínínə ɔ yəə́kə ɔmbáŋá, ɔ taká, nɔ báka ndíŋímínə́tɔ́ ɔ uwənú ilumininə; mba, tɔ ndɔ siə uwənú uhíkə ɔbánɔ́ ɛlɔ́áyɛ́ búə́núə́ buɛsɛ.