Read Tunen 2 Kɔlɛ́ŋɛ́tɛ 10 Bible Online

2 Kɔlɛ́ŋɛ́tɛ 10 - Tunen bible

2 Kɔlɛ́ŋɛ́tɛ 10

¹Ɔwámɛ á Báwolo bɛ́múɛ́tɛ́, ɔwámɛ ɔwá mɛ lɛ́á ɛbɔ́yɛ́ ɛ́sɛ́á bá ndɔ laa ikúílí mɛ lɛ́á na bənú busíə́ na busíə́, ikúílí mɛ lɛ́á hata na bənú mɛ kándáka, ɔ tɔ́mbákɛna na buyoyoní na mɔlɛ́má muɛsɛ wɔ́ Kilísitusu, mɛ ndɔ bənú bata ɔwá,

²tɔ́kɔ́lɛ ɔbánɔ́, ɛnáká mɛ ndásá ɔ uwənú busíə́ nɔ lɛ mɛaŋɔ́á íkíníə́ ɔwá mɛ bənú kándákɛ́na. Bɛndɔ bá báka uwənú ətíə́ ɔbá bá ndɔ laa bá sɛ́á mɛ ndɔ buolí nyɔɔ ɔkɛaka ɔwá mɛ bɔɔ́la kusə́nə. Mɛ ŋɔ bəə́bu yamɛ́á iŋgínə́ ínə́niə.

³Ɛ́ɛ! Tɔ lɛa mɔsá, mba, ɛnjála ɔyɛ́á tɔ ndɔ nɔa, yɛ lɛ bá ɛ́sɛ́á yɛ́ bɛndɔ bá yɛ́ɛyɛ misí.

⁴Bikúlúmə́ bɛ́ bilə́ ɔbɛ́á tɔ ndɔ bɛ́kɛna bɛ́ lɛ ndɔ húlinə na mɔsá, ɔ nifəŋə, á Huɛlɛ́ a ndɔ bəsú bɛɛ́ta índiə. Bɛ́ lɛa na injiŋə yɛ bəbəniə bá Huɛlɛ́ ɔ ɔnɔba. Tɔ ndɔ minuə yɛ́ bááyɛ́ bakanjakanja kuiyiə ɔbá bá ndɔ tə́ŋə́niə.

⁵Tɔ ndɔ bɛkɔa bikimə lúŋiə ɔbɛ́á niə́mə nɛ lɛ ndɔ ókóto bɛndɔ bá ná Huɛlɛ́ mánya. Tɔ ndɔ hɔ́ɔ́ ɔkɛaka ɔwá, bɛndɔ bá sə́njíə́ yatɛ́ ɔyɛ́á bá ndɔ fɛka mbá bá Kilísitusu ɔ́kɔ́kɛ́nɛ́na.

⁶Ɛnáká nɔ́ bəsú bəkimə ínə́níə́ ɔwá nɔ ndɔ Huɛlɛ́ ɔ́kɛ́na, tɔ ŋɔ bá hoóyi ɔ bááyɛ́ ɔsɔ́kɔ́tɛa ɔbá bá lɛ ndɔ Huɛlɛ́ ɔ́kɛ́na.

⁷Nɔ bɛkɔa siəkínə́ ɛ́sɛ́á bɛ́ lɛ́á. Ábá mɔndɔ ɔ uwənú ətíə́ a ndɔ laa ɔwá a lɛa wa Kilísitusu, á manyá ikúílí ɛmɔtɛ́ ɔwá, ɛ́sɛ́á a lɛ́á wa Kilísitusu, bəsú tɔ́na tɔ lɛa bá Kilísitusu.

⁸Isə́lúkú a ka əsú nɛmanɛna índiə ɔkɛaka ɔwá mɛ yə́núə́ ilumininə óníníə́, tátá ɔwá mɛ bənú sásáka, ata yɛ́ nɔ́ báá ɔwá mɛ ndɔ bíbə́liə, ɛsɛ́má yɛ́ sɔ́ ŋɔ mɛaŋɔ́á ítiə ɛlɔ́áyɛ́ nɔ́yɛ́ bɔkɔasɛ́á, á Isə́lúkú a ná mɛaŋɔ́á nɛɛ́ta índíə́.

⁹Mɛ lɛ ndɔ siə ɔwá tɔ́ámɛ́á tuəfulə tɔ́ bənú kúlúmə́kíə́.

¹⁰Ɔ taká, bɛndɔ bá ndɔ laa bá sɛ́á: «Tuəfulə ɔtɔ́á Báwolo a ndɔ bəsú tilinə, tɔ́ lɛa natákátɔ, tɔ́ lɛa tɔ́na kɔ́áyákátɔ, mba, ikúílí wɛɛ́ya bɛ́múɛ́tɛ́ a lɛ́á uwəsú busíə́, a lɛa ɛbɔ́yɛ́, bɛ́áyɛ́á bɛtambá tɔ́na tɔmbɔ́kɔ́tɔ.»

¹¹Wɛ́ɛ́yɛ́ ɔwá a ndɔ hɔ́ɔ́ nɔ́yɛ́ á manyá muɛsɛ ɔwá, yatɛ́ ɔyɛ́á tɔ ndɔ bənú tilinə ikúílí tɔ́ lɛ́á hata na bənú, ɛnáká tɔ báá uwənú ətíə́, nɔ ŋɔ siəkinə ɔwá, tɔ ŋɔ kɛaka yatɛ́ ɔyɛ́á tɔ ná tílə́kə.

¹²Ɔ taká, tɔ lɛ ndɔ siə ɔ ubíkə́tiə na bɔ́mɔtɛ́ ɔbá bá ndɔ bísinə bɛndɔ baŋɛ́ŋa, ata ɔ uwəbú ukətiniə, bɛálála bɛ́ bɛndɔ. Bá ndɔ manya ɔwá uwəbú bá ná hɔ́ánána ɔkətiniə, uwəbú bá ná hɔ́ánána ɔmanya ɛ́yánɛ́ mɔndɔ ɔ́ lɛ́á.

¹³Ábá ɛlɔ́áyɛ́ əsú, tɔ ndɔ bíbə́liə ɔbánɔ́ ɔ buolí ɔbɔ́á Huɛlɛ́ a ná bəsú índíə́, mba, tátá ɔ ɔyáyɛ́na nɔ́yɛ́. Tɔ́ ŋɔ nɔ́yɛ́ kɛaka ɔkafámáká ɔ ɛnjɛ́ka yɛ buolí bɔ́ ɛtɔbɔtɔ́bɔ́ ɔbɔ́á Huɛlɛ́ a ná kə́tíə́ ɛlɔ́áyɛ́ əsú, ɛ́sɛ́á a ná kɛ́áka ɔwá tɔ ndáfámá uwənú busíə́.

¹⁴Tɔ lɛ ndɔ kɛa yáyɛ́ná nɔ́yɛ́, ɔ́maná ɛ́sɛ́á tɔ sa ndafáma uwənú busíə́, ɔ taká, bəsú tɔ́ ná báá bə́búsíə́ ɔndafámá uwənú busíə́ na Imbə́nú Yɛɛsɛ yɛ Kilísitusu.

¹⁵Nɔ́yɛ́, tɔ lɛ ndɔ bíbə́liə ɔ ɔyáyɛ́na ɔ́maná ɛ́sɛ́á tɔ ndɔ nɔ́yɛ́ bíbə́liə na buolí bɔ́ bɔsɔ́kɔ́. Mba, yə́súə́ ɛnánɛna yɛ́ lɛa ɔwá, yə́núə́ ilumininə yɛ́ ɔ́mbɔkɔ ɔkɛaka ɔwá búə́súə́ buolí tɔ́na bɔ́ ayɛ́ áyáka ɔ uwənú ətíə́, mba, tɔ sa ósó ɔkɛa yáyɛ́ná yatɛ́ ɔyɛ́á Huɛlɛ́ a ná tínímíə́.

¹⁶Əlimə yɛ nɔ́yɛ́, tɔ ŋɔ ka Imbə́nú Yɛɛsɛ nɔŋɔ́náka ɔ mɔnɔŋɔ mənə́mənə́. Mba, ɛŋaná ubíbə́liə na buolí ɔbɔ́á bɛndɔ bá ná nyɔ́ɔ́kɔ uwəbú ɛtɔbɔtɔ́bɔ́.

¹⁷Mba, Mətilə má ndɔ laa má sɛ́á: «Wɛ́ɛ́yɛ́ ɔwá a ndɔ bíbə́liə, á bíbə́lə́kíə́ ɔbánɔ́ ɛlɔ́áyɛ́ bɛkɔa ɔbɛ́á Isə́lúkú a ná kɛ́áka.»

¹⁸Ɛ́ɛ! Huɛlɛ́ a lɛ ndɔ wɛ́ɛ́yɛ́ káha ɔwá a ndɔ bɛ́nyama, mba, a ndɔ káha ɔ wɛ́ɛ́yɛ́ ɔwá wɛɛ́ya bɛ́múɛ́tɛ́ a ndɔ nyama.