Read Tunen 2 Kɔlɛ́ŋɛ́tɛ 11 Bible Online

2 Kɔlɛ́ŋɛ́tɛ 11 - Tunen bible

2 Kɔlɛ́ŋɛ́tɛ 11

¹Isíŋáka, ɛkasɛ mɛ bənú hɔ́kɛ́ná ɛ́sɛ́á mɔmbamɔmbámɔ, ɛ́ɛ! Tɔ́kɔ́lɛ ɔbánɔ́ nɔ ámɛ ísíbiniə.

²Mɛ ndɔ bənú hikiə ɛ́sɛ́á Huɛlɛ́ a ndɔ bənú hikiə. Mɛ ka bənú nɛbɛ́lɛna tábɔ́nakɛna ɔ ɛkɔŋɛna ɛ́mɔtɛ́, á Kilísitusu, mɛ hikəkiə tɔ́na ɔwá nɔ́ báá naŋátɔ́, nɔ́yɛ́ ɔ buɔsɛ́ bɔ́ nɛbɛ́lɛna, mɛ ŋɔ bənú ínə́niə ɔ ɔwayɛ́ ɛ́sɛ́á abáka bá ɛkɔ́njɛ́ índiə á yayɛ́á ibə́.

³Mba, mɛ ndɔ kɔ́lɔ́ma ɔwá, mɔndɔ a lɛ ndá bənú nímbə́ ɔkɛaka ɔwá nɔ lɛ Kilísitusu ɔ́kɛ́ná tɔ́na, ɛ́sɛ́á Ɛ́fa a ná bɛ́níása ɔwá miáhɔ a wɛɛ́ya nənə́síə́ na máyɛ́á maŋgɛ́lɛ́.

⁴Mɛ ndɔ nɔ́yɛ́ laa bɔkɔasɛ́á, ábá mɔndɔ a ná ndasá ɔ uwənú ɔ bɛkɔa ɔlɛna ɛlɔ́áyɛ́ Yə́susu nifəŋə na yatɛ́ ɔyɛ́á tɔ ná bənú nɔ́ŋɔ́nákɛ́na, nɔ ndɔ luminə, bá ndɔ bənú wúmotí umbúínyi índiə nifəŋə na Umbúínyi Mɔnaŋanaŋa, bá ndɔ bənú Imbə́nú Yɛɛsɛ nɔŋɔnɛna nifəŋə na yɛ́ɛ́yɛ́ ɔyɛ́á tɔ ná bənú nɔ́ŋɔ́nákɛ́na, nɔ ənú luminə tɔ́na.

⁵Nɔ ndɔ ənú fɛka ɔwá bááyɛ́ bɛndɔ bá lɛa bɛŋgáŋgáláŋá bɛ́ basɔ́másɔma, mɛ ndɔ fɛka ɔwá bá sá ámɛ yáyɛ́ná.

⁶Yɛ́ óso ɔbáá ɔwá mɛ lɛ ndɔ manya ɔ ɔhɔ́ɔ́ ɛ́sɛ́á bəə́bu, mba, mɛ ndɔ manya muɛsɛ yatɛ́ ɔyɛ́á mɛ ndɔ laa, mɛ ka bənú ínə́niə ɔ manya ɔbánɔ́ məkimə, ɔ bikúílí biəŋí ɔwá, yatɛ́ ɔyɛ́á tɔ ndɔ laa, yɛ́ lɛa taká.

⁷Ɛnaka mɛ bənú Imbə́nú Yɛɛsɛ yɛ Huɛlɛ́ nɔ́ŋɔ́nákɛ́na, mɛ ka nɔ́yɛ́ kɛaka ndəmə; mɛ ka bílólosoliə ɔkɛaka ɔwá nɔ ənú bíbə́lə́líə́. Mɔbɛ́á nɔ́yɛ́ ɛ́sɛ́á mɛ ná kɛ́áka əə́?

⁸Ɛnaka mɛ báá ɔ uwənú busíə́, mɛ ka luminə ɔwá bilúkunə bɛ́ bəlumininə binə́binə́ bá mɛaŋɔ́á sábɔ́náka, mɛ ka bəə́bu toyosiə ɔkɛaka ɔwá mɛ bənú nyɔ́kɛ́na.

⁹Ɛnaka mɛ báá uwənú busíə́, ábá bɔɔ́la bɔ́ ná mɛaŋɔ́á áŋgɛ́ná, mɛ sa bata ɔwá nɔ mɛaŋɔ́á hikə. Bəlumininə bá nɛkɛ́tɛ nɛ́ misí ɔ Masɛtɔánɛ bá ná ndá mɛaŋɔ́á índíə́ yatɛ́ ɔyɛ́á yɛ́ ná bá yɛ́ ndɔ mɛaŋɔ́á áŋgɛ́na. Mɛ ka bítə́tə́niə ɔwá mɛ lɛ híáná búə́núə́ bɔlɔmɔ́ ɔ bɛkɔa ɔbánɔ́ bikimə, mɛ ŋɔ nɔ́yɛ́ bítə́tə́kəniə tɔ́na.

¹⁰Ɔ tɔ́mbákɛna na Kilísitusu ɔwá a lɛ́á ɔ ɔwámɛ mɔlɛ́má, mɛ ndɔ laa taká ɔwá, ata mɔndɔ a sa ndá mɛaŋɔ́á kótíə́ ɔ uniŋə nɔ́yɛ́ ɔ nɛkɛ́tɛ nɛ́ misí ɔ Akáyɛ.

¹¹Ɛlɔ́áyɛ́ yatɛ́ mɛ ndɔ nɔ́yɛ́ lɛna əə́? Bɔkɔasɛ́á mɛ lɛ ndɔ bənú hikiə əə́? Bóo! Mba, Huɛlɛ́ a ndɔ manya muɛsɛ muɛsɛ ɔwá mɛ ndɔ bənú hikiə ndə́ŋi.

¹²Nibítíkə ɔnɛ́á nɛ́ mɛaŋɔ́á lɛ́á isíŋáka, mɛ ŋɔ nɛɛ́ta ákánana ubusíə́ ɔkɛaka ɔwá, bááyɛ́ basɔ́másɔma bá bɛkanja bá lɛ hifílí bɔ́ŋɔ́ hɛ́ ubíbə́liə ɔwá, bá ndɔ nyɔɔ hɔ́ánánátɔ́ ɛ́sɛ́á bəsú.

¹³Bááyɛ́ bɛndɔ bá lɛ ɔbánɔ́ basɔ́másɔma bá bɛkanja, bá ndɔ buolí nyɔɔ ɛlɔ́áyɛ́ bɛndɔ unímbə ɔkɛaka ɔwá, bá bəə́bu siəkínə́ ɛ́sɛ́á basɔ́másɔma bá Kilísitusu.

¹⁴Yatɛ́ ɔyɛ́á bááyɛ́ bɛndɔ bá ndɔ kɛa yɛ́ lɛ bá bɔkɔa bɔ́ yələ́mənə bɔkɔasɛ́á, abáka Sátana wɛɛ́ya bɛ́múɛ́tɛ́ a ayɛ́ bɛndɔ nímbə́kə ɔwá, a lɛa áŋgɛlɛ ɔyɛ́á yɛ́ ndɔ nɔma.

¹⁵Nɔ lɛ ə́lə́mə́nə ɔwá bááyɛ́á bɛndɔ bá ndɔ bɔsɔ́kɔ́ nímbə bá sɛ́á bá lɛa bɔnyɛna bá tiísi yɛ Huɛlɛ́. Ɔ buɔsɛ́ bɔ́ nitifə́, Huɛlɛ́ a ŋɔ bəə́bu sábɔ́na ɔwɔŋgɔkɔnɔ yatɛ́ ɔyɛ́á bá ná kɛ́áka.

¹⁶Mɛ ndɔ híánɔlɔna ɔlaa ɔwá, mɔndɔ a lɛ fɛká a sɛ́á mɛ lɛa mɔmbamɔmbámɔ. Mba, ábá nɔ ndɔ sinə ɔwá mɛ nɔ́yɛ́ báka, nɔ́ niása mɛ ámɛ bíbə́lə́kíə́ ɔ tɛ́tɛ́á yɛ ikúílí.

¹⁷Ikúílí mɛ ndɔ bíbə́liə, mɛ ndɔ manya ɛlɔ́áyɛ́ yatɛ́ mɛ ndɔ bíbə́liniə; yatɛ́ ɔyɛ́á mɛ ndɔ siə ɔhɔ́ɔ́, yɛ́ lɛ ndɔ húlínə na Isə́lúkú, ɛkasɛ mɛ hɔ́ɔ́kɔ́ ɛ́sɛ́á mɔmbamɔmbámɔ.

¹⁸Mba, ɛ́sɛ́á ikúílí bɛndɔ bəəŋí bá ndɔ bíbə́liə ɛlɔ́áyɛ́ bɛkɔa bɛ́ misí, mɛaŋɔ́á tɔ́na ɛkasɛ mɛ ámɛ bíbə́lə́kíə́.

¹⁹Uwənú, nɔ ndɔ ənú bɛ́laa ɔwá nɔ lɛa bəmənyí, mbá nɔ́yɛ́ nɔ ndɔ bááyɛ́ híkə muɛsɛ muɛsɛ ɔbá bá lɛ́á bambamɔ́mbámɔ.

²⁰Nɔ ndɔ luminə ɔwá bá bənú ɛ́tá ɛ́sɛ́á bɛɔlɛ́, bá bənú bɛ́nɛ́ákɛ́na, bá bənú nímbə́kə́ ɔkɛaka ɔwá bá bíə́núə́ bɛɛ́la ɛtáka, bá bənú yómósíə́, bá bənú tə́kə́sə́kə. Mɛ ndɔ sɛ́ma ɔ nɔ́yɛ́ ɔlaa ɔwá, tɔ ka sulu əsú bɛ́tɔ́mbɛna ɛ́sɛ́á bááyɛ́ bɛndɔ. Isíŋáka, ɛkasɛ mɛ hɔ́ɔ́kɔ́ ɛ́sɛ́á mɔmbamɔmbámɔ.

²¹Mɛ ámɛ bíbə́lə́kíə́ tɔ́na ɔ bɛkɔa ɔbɛ́á bɔsɔ́kɔ́ bá ndɔ əbú bibə́liniə.

²²Bá ndɔ laa ɔwá bəə́bu bá Hɛ́bɛlɛ, mɛ ámɛ nɔ́yɛ́ báka. Bá ndɔ laa ɔwá bəə́bu bá ɛndɛkɛ Ísilahɛ́lɛ, mɛ nɔ́yɛ́ báka. Bəə́bu bá ɛndɛkɛ Ábɛlaháma, mɛaŋɔ́á tɔ́na mɔndɛkɛ Ábɛlaháma.

²³Bá ndɔ laa ɔwá bá lɛa bɔnyɛna bá Kilísitusu əə́? Ɛkasɛ mɛ hɔ́lɔ́ ɛ́sɛ́á mɔmbamɔmbámɔ, mɛaŋɔ́á mɔnyɛna ɔ uwəbú ɔyáyákɛna! Mɛ ka nyɔɔkɔ yáyɛ́ná bəə́bu, mɛ ná ɛbɔka nyɔkɛ́ná bikúílí biəŋí yáyɛ́ná bəə́bu, bá ka mɛaŋɔ́á hɔ́ányaka, mɛ ná kɔɛ́ná tɔ́na ɔ yɛmba yɛ́ nyɛmbɛ́ bikúílí biəŋí yáyɛ́ná bəə́bu.

²⁴Bɛyútɛnɛ bá ka mɛaŋɔ́á hɔ́ányaka bikúílí bɛ́lánɔ, ikúílí tɛ́á moómo álálɔ́ má ɛŋɔ́ányɛ́ na ibo.

²⁵Bɛndɔ bá Lɔ́ma bá ka mɛaŋɔ́á súbə́kə bikúílí bɛ́lálɔ́, bɔ́mɔtɛ́ buɔsɛ́ bá ka mɛaŋɔ́á lúmə́kə na miɔkɔ, bikúílí bɛ́lálɔ́ há lánjɛ yɛ́ ka mɛaŋɔ́á lɔnɔ, mɛ ka tuənə buɔsɛ́ na bulúə́ bukimə ɔ mənífə́ nuúmə́.

²⁶Bikúílí biəŋí mɛ ka kɛndaka, mɛ ka məsə́kə siəkinə məə́yi má nɔ́ únduəkə, mɛ ka kɔɛna tɔ́na ɔ yɛmba yɛ́ baŋɛ́na, bámɛ́á bənísə́ á Bɛyútɛnɛ na bááyɛ́ ɔbá bá lɛ bá Bɛyútɛnɛ, bá ka mɛaŋɔ́á ɛmɔ́kɛ́ nyə́kiə. Mɛ ka məsə́kə siəkinə tɔ́na ɔ bətínə́ bəkimə, ɔ makɔ́tákɛ ata ɔ nuíyi nɛ́ ɛsɛ́lɛ́ ɛ́mɔtɛ́. Bɛndɔ ɔbá bá sɛ́á bəə́bu bikilísitənə, bá ka mɛaŋɔ́á məsə́kə índiəkinə.

²⁷Mɛ ka biolí bɛ́ ɛmɔ́kɛ́ nyɔkɛna, ɔ yɛ́mɔtɛ́ ikúílí mɛ lɛ hinó húlíə́, ɔ yɛ́mɔtɛ́ ikúílí, nimótí na mɛtaná yɛ́ mɛaŋɔ́á nɔakɛna, nikə nɛ́ mɛaŋɔ́á nɔakɛna mɛ lɛ bɔ́ŋɔ́ bɔɔ́la bɔ́ ɔbɛ́háá.

²⁸Mɔ́mɔtɛ́ məsə́kə má báka ɔmá mɛ sɔ́ ŋɔ laa tɔ́na. Wə́míə́ mɔlɛ́má wɔ́ bílúmə́kiniə ɔbánɔ́ buɔsɛ́ tɛ́á ɔ bilúkunə bikimə bɛ́ bəlumininə.

²⁹Ábá mɔndɔ a lɛa mɔtɔmbɔ́ ɔ ilumininə, yɛ́ mɛaŋɔ́á sə́kə́kinə ɔ́maná ɛ́sɛ́á mɛaŋɔ́á mɛ lɛ́á mɔtɔmbɔ́. Ábá mɔndɔ a ná kɔ́á ɔ bɔbɛ́á, nɔ́yɛ́ yɛ́ mɛaŋɔ́á sə́kə́kinə mɔŋɛ́ŋa.

³⁰Ábá yɛ́ lɛa ɔwá mɛ bíbə́lə́kíə́, ɛkasɛ mɛ bíbə́lə́kíə́ na bɛkɔa ɔbɛ́á bɛ́ ndɔ ínə́niə ɔwá mɛ lɛa na bɔtɔmbɔ́.

³¹Huɛlɛ́ á Isə́ yɛ yəsúə́ Isə́lúkú á Yə́susu a ndɔ manya ɔwá mɛ lɛ ndɔ kanja. Tuúmə tɔ́ bámɛ́nɛ́ná na wɛɛ́ya ɔ bikúílí bikimə.

³²Ɛnaka mɛ báá ɔ bətínə́ yɛ Tamásɛ, Alɛtásɛ á isə́lúkú yɛ bɔ́táyɛ́ bɔnɔŋɔ, a ka mɔmanɛna bɛ́lɛna ɔ yɛ́táyɛ́ bətínə́, wɔ́ɔwɔ a ná bɛndɔ bɛ́lɛ́ákɛ́ná ɔ tɔkɔ́kɛ tukimə tɔ́ bətínə́ ɔkɛaka ɔwá, bá mɛaŋɔ́á hálɛ́na.

³³Mba, bá ka mɛaŋɔ́á háá ɔ mɔsáŋá wɔ́ ɛkana, bá ná mɛaŋɔ́á fə́míníə́ ɔ itúbə́, bá ná mɛaŋɔ́á lókíə́ ɔ ɔmbambala, nɔ́yɛ́ mɛ ná bɛ́ɔ́lɔ́ ɔ uwəbú makátá.