Read Tunen 2 Kɔlɛ́ŋɛ́tɛ 12 Bible Online

2 Kɔlɛ́ŋɛ́tɛ 12 - Tunen bible

2 Kɔlɛ́ŋɛ́tɛ 12

¹Mɛ ná hɔ́ánáná ɔ ubíbə́liə ata nɔ́yɛ́ ɛ́sɛ́á yɛ́ lɛ bá muɛsɛ. Isíŋáka ɛkasɛ mɛ hɔ́kɛ́na ɔ binónó na bimənyí ɔbɛ́á Isə́lúkú a ná mɛaŋɔ́á índíə́.

²Mɛ ndɔ kilísitənə manya ɔwá, ɔ́ niómo nɛ́ tuɔŋɔ na túnisə niɔfɛ́nɛ ɛ́sɛ́á Huɛlɛ́ a ná wɛɛ́ya bálákáná ɔ ɛbɔ́ka ɔyɛ́á a lɛ́á. Mɛ lɛ ndɔ manya ábá ɛlɛmá, ataná, muití a ka bálaka na yayɛ́á mɛɛ́lɔ, á Huɛlɛ́ bíbúə́ a ndɔ nɔ́yɛ́ manya.

³Ɛ́ɛ! Mɛ ndɔ manya ɔwá nɔ́yɛ́ yɛ́ lɛa taká. Muití a ka lɛmana ɔbánɔ́ ataná, a ka bálaka na yayɛ́á mɛɛ́lɔ, mɛ lɛ ndɔ manya. Á Huɛlɛ́ bíbúə́ a ndɔ nɔ́yɛ́ manya.

⁴Huɛlɛ́ a ka wɛ́ɛ́yɛ́ mɔndɔ bálakana ɔ balatísi, a ka bɛtambá ɔ́kɔ́kɛna ɔbɛ́á mɔndɔ a sa ósó ɔmanya ɛ́sɛ́á a laa. Ata mɔndɔ a sá ósó ɔmanya nəníə́ a bɛɛ́ta híánɔ́lɔ́na.

⁵Mɛ ŋɔ bíbə́ləkiə ɛlɔ́áyɛ́ mɔ́táyɛ́ mɔndɔ mba, ábá ɛlɔ́áyɛ́ ámɛ, mɛ ósó ubíbə́liə ɛlɔ́áyɛ́ bɛkɔa ɔbɛ́á bɛ́ ndɔ bɔ́ámɛ́á bɔtɔmbɔ́ ínə́niə.

⁶Ata mɛ bá mɛ ndɔ siə ɔ ubíbə́liə há mɛ lɛ báá mɔmbamɔmbámɔ bɔkɔasɛ́á, taká ɔbánɔ́ mɛ ndɔ laa. Mba, mɛ lɛ ndɔ siə ubíbə́liə bɔkɔasɛ́á, mɛ lɛ ndɔ hikiə ɔwá bɛndɔ bá báá na ɛfɛka yinə́yinə́ yáyɛ́ná yatɛ́ ɔyɛ́á bá ná síə́kínə́ mɛ ndɔ kɛa, ata ɔyɛ́á bá ná ɔ́kɔ́kɛ́ná mɛ ndɔ laa.

⁷Nɔ́yɛ́, ɔkɛaka ɔwá wə́míə́ mɔlɛ́má wɔ́ lɛ úndúə́ na niə́mə bɔkɔasɛ́á, Isə́lúkú a ka mɛaŋɔ́á bɛkɔa bɛ́ yələ́mənə ínə́niə, a ka mɛaŋɔ́á məsə́kə índiəkinə ɔ mɛɛ́lɔ, á áŋgɛlɛ yɛ Sátana a ndɔ mɛaŋɔ́á súbə, ɔkɛaka ɔwá mɛ lɛ bíbə́líə́.

⁸Mɛ ka Isə́lúkú bɛ́kálákɛna bikúílí bɛ́lálɔ́ ɔkɛaka ɔwá a mátáyɛ́ məsə́kə álɔ́ná na mɛaŋɔ́á.

⁹Mba, a ná mɛaŋɔ́á lɛ́na a sɛ́á: «Wə́míə́ mɔlɛ́má muɛsɛ ɛlɔ́áyɛ́ áwɔ wɔ́ ná aŋɔ́á hɔ́ánánɛ́na ɔkɛaka ɔwá, ɔ mááyɛ́ məsə́kə ísə́bíníə́ bɔkɔasɛ́á, ikúílí mɛ ná wɛ́ɛ́yɛ́ ɔ́lɔ́ ɔwá a lɛ́á tɔmbɔ́tɔ́, ɔ́ ikúílí ɔyɛ́á muití a ndɔ yamɛ́á injiŋə bɛ́mányɛna.» Nɔ́yɛ́, mɛ hikəkiə ɔbáá na niə́mə ɔ ɔwámɛ bɔtɔmbɔ́ ɔkɛaka ɔwá, injiŋə yɛ Kilísitusu yɛ́ bámɛ́nɛ́na ɔ ɔwámɛ mɛɛ́lɔ.

¹⁰Ɔ́ ɛlɔ́áyɛ́ nɔ́yɛ́, ata nəníə́ mɛ lɛ́á tɔmbɔ́tɔ́, ata nəníə́ bá ndɔ mɛaŋɔ́á kɔ́ba, ata nəníə́ məsə́kə má ndɔ mɛaŋɔ́á kɔɛna, ata nəníə́ bá ndɔ mɛaŋɔ́á nuəsiə, ata nəníə́ mɛ lɛ́á na bɔkɔ́lɔ́ma ɛlɔ́áyɛ́ Kilísitusu, mɛ lɛa bikúílí bikimə ɔ nɛhɔnɔ bɔkɔasɛ́á, ikúílí mɛ lɛ́á tɔmbɔ́tɔ́, ɔ́ ikúílí injiŋə yɛ Kilísitusu yɛ́ ndɔ mɛaŋɔ́á óníniə.

¹¹Mɛ ná hɔ́ɔ́kɔ́ ɛ́sɛ́á wɛ́ɛ́yɛ́ ɔwá a lɛ́á na ɔmbamɔ́, mba bənú nɔ́ ná mɛaŋɔ́á íkíníə́, há bənú ɔbánɔ́ nɔ ná láá ɛ́yánɛ́ mɛ́ lɛ́á. Ɔ taká, ábá mɛ lɛa bɔɔ́la bɔ́ ndəmə ɛ́lɔ́áyɛ́ ənú, mɛ ndɔ manya ɔ ɔwámɛ mɔlɛ́má ɔwá, bááyɛ́ bɛndɔ ɔbá nɔ ndɔ ɛ́lɛnɛna nɔ sɛ́á bɛŋgáŋgáláŋá bɛ́ basɔ́másɔma bá sá ámɛ yáyɛ́na.

¹²Ikúílí mɛ ná báá uwənú ətíə́, mɛ ka nyɔɔkɔ na nitiŋiminə nikimə, ɔ tɔ́mbákɛna na injiŋə yɛ Huɛlɛ́, mɛ ka bisə́mə́tə́ na biələ́mənə bɛ́ bɛkɔa kɛaka ɔbɛ́á bɛ́ ndɔ ínə́niə ɔwá mɛ lɛa tiísi yɛ mɔsɔ́másɔma.

¹³Yatɛ́ bɛkɔa bɛɛsɛ mɛ́ ná kɛ́áka ɔ bilúkunə binə́binə́ ɔbɛ́á mɛ sa kɛa ɔ uwənú ətíə́ əə́? Bɔkɔa ɔbɔ́á mɛ sa kɛa bɔ́ lɛa ɔwá, mɛ sa bənú mɔsábɔ́náná bata. Nɔ́ mɛaŋɔ́á nɛ́ásɛ́na ɛlɔáyɛ́ nɔ́yɛ́.

¹⁴Isíŋáka, mɛ lɛa hoóyi ɔ ndasákɔ́na uwənú busíə́ ɔ bikúílí bɛ́lálɔ́, mɛ sɔ́ ŋɔ bənú mɔsábɔ́náná bata bɔkɔasɛ́á, uwənú bɛ́múɛ́tɛ́ mɛ́ ndɔ siə, tátá ɔ mə́núə́ məndunə́. Tátá baná abáka bá bisə́ lúkə́kə, mba, bisə́ ɔbánɔ́ abáka bá baná lúkə́kə.

¹⁵Ábá ɛlɔ́áyɛ́ ámɛ, mɛ ŋɔ báá na nɛhɔnɔ ɔ ɔfɔlɔna bikimə ɔbɛ́á mɛ lɛ́á itíə́nə́tɔ, ɔ ɔbɛ́fɔ́lɔna tɔ́na mɛaŋɔ́á bɛ́múɛ́tɛ́ ɛlɔ́áyɛ́ ənú. Ɔ́maná ɛ́sɛ́á nibo ɔnɛ́á nɛ́ mɛaŋɔ́á lɛ́á ɛlɔ́áyɛ́ ənú nɛ́ ndɔ ɔ́mbɔ, nɛ́ ənú ɛlɔ́áyɛ́ ámɛ, nɛ́ ndɔ mə́hə ɔbánɔ́.

¹⁶Nɔ lɛa ɛ́mɛ́nɛ́nátɔ́ na mɛaŋɔ́á ɔwá, mɛ sa bənú mɔsábɔ́náná bata. Mba, bɔ́mɔtɛ́ uwənú ətíə́ bá sɛ́á mɛaŋɔ́á mɔndɔ wa ɛŋgɛ́lɛ́, a ka bəsú nímbə́kə ɔkɛaka ɔwá a bíə́súə́ bɛɛ́la ɔ́lɔ́kɛ́na.

¹⁷Baánɛ, mɛ ka bənú nímbə́kə ɔ tɔ́mbákɛna na ɔmɔtɛ́ wa bááyɛ́ ɔbá mɛ ná bənú lɔ́mɛ́ná əə́?

¹⁸Mɛ ka Títi bɛ́tɔ́kɔ́lɔkɛna ɔwá a ndásá uwənú busíə́, mɛ ná munísə́ óŋgósíə́ ɔwá nɔ ndɔ manya. Baánɛ, Títi a ka bənú nímbə́kə ɔbánɔ́ əə́? Nɔ sa sinə ɔwá na mɛaŋɔ́á na wɛɛ́ya tɔ báka na bɛfɛka bɛ́mɔtɛ́ əə́? Baánɛ nɔ sa sinə ɔwá na mɛaŋɔ́á na wɛɛ́ya tɔ ka kɛndaka ɛnɔ́mɛ ɛ́mɔtɛ́ əə́?

¹⁹Bikúílí biəŋí, nɔ ndɔ fɛka nɔ sɛ́á tɔ ka bənú tiləkinə ɔkɛaka ɔwá tɔ bɛ́káláká uwənú busíə́ əə́? Mba, bóo! Á bənísə́ bá nibo, tɔ ndɔ bənú bɛ́ɛ́yɛ́ bikimə lɛna ɔ́ busíə́ bɔ́ Huɛlɛ́ ɔ bɔlatɔ́ na Kilísitusu ɔkɛaka ɔwá, yə́núə́ ilumininə yɛ́ ɔ́mbɔkɔ.

²⁰Mɛ ndɔ kɔ́lɔ́ma ɔkɛaka ɔwá, ikúílí mɛ ŋɔ ndafámá uwənú busíə́, mɛ lɛ níə́núə́ nibítíkə nibə́ ɛ́sɛ́á mɛ ndɔ siə, nɔ lɛ nɛ́ámɛ nibə́ tɔ́na ɛ́sɛ́á nɔ ndɔ ənú siə. Mɛ ndɔ kɔ́lɔ́ma ɔwá, ɛnáká mɛ ndáfámá ɔ uwənú busíə́, mɛ́ Bɛɔmɔ́nɔ nibə́ ɔ uwənú ətíə́, ɛhɛ́tɛ́ ɔ uwənú ətíə́, hilóbi ɔ uwənú ətíə́, biəmə́niə bɛ́ báka ɔ uwənú ətíə́, bɛkɔ́bálɛ́ ɔ uwənú ətíə́, mɔláŋa ɔ uwənú ətíə́, niə́mə na lúbə́lubə bɛ́ bá uwənú ətíə́.

²¹Mɛ ndɔ kɔ́lɔ́ma ɔwá, ɛnáká mɛ manyɔ́ ndáhíáná ɔ uwənú busíə́, yəsúə́ Huɛlɛ́ a lɛ mɛaŋɔ́á símə́síə́, ɔwá mɛ lɛláka ɛlɔ́áyɛ́ bəəŋí uwənú ətíə́ ɔbá bá ndɔ bɔbɛ́á kɛa ɛ́sɛ́á ɔ ikúílí yíbúsíə́, bá ndɔ ákánana ɔ busíə́ uniŋə ɔ bɛkɔa bɛ́ mɔnyɔ́kɔ́lɛ́, buɔmɔ́ bɔ́ nɛbambɛa, na bɔ́ nilókóno.