Read Tunen 2 Kɔlɛ́ŋɛ́tɛ 13 Bible Online

2 Kɔlɛ́ŋɛ́tɛ 13 - Tunen bible

2 Kɔlɛ́ŋɛ́tɛ 13

¹Ɔ́ bikúílí bɛ́lálɔ́ ɛkasɛ mɛ ndasá ɔ uwənú busíə́. Tɔ ŋɔ bááyɛ́ kə́lə́səkiə ɔbá bá ndɔ bɔbɛ́á kɛa ɛ́sɛ́á Ɛtambá yɛ́ Huɛlɛ́ yɛ́ ndɔ laa yɛ́ sɛ́á: «Ɛmbakɔ́ yɛ bɛndɔ báfandɛ́ ata bálálɔ́ yɛ́ ná hɔ́ánána ɔ ɛsáká yɛ́ mɔndɔ usúmbə́niə ɔwá bá ná sɔ́mɛ́na.»

²Mɛ ka bənú nɔ́yɛ́ hɔ́kɛna buɔnɔ́, ábá mɛ ná ndáhíáná uwənú busíə́ ɔ bikúílí bɛ́fandɛ́, mɛ ŋɔ bááyɛ́ mənyəsiə ɔbá bá ná mabɛ́á kɛ́áka, na bááyɛ́ bənə́bənə́ bəkimə. Mɛ ndɔ manyɔ́ nɔ́yɛ́ híánɔlɔna uwənú uwokósiə isíŋáka ɔwá, mɛ lɛ bá ɔ uwənú ətíə́, ɛnáká mɛ ndáfámá, mɛ ŋɔ bɛndɔ bəkimə sɔ́kɔ́tɛ́á ɛŋaná mahana uwə́ə́.

³Nɔ ndɔ siə ɔmanya ábá Kilísitusu a ndɔ hɛ́na ɔ tɔ́mbákɛna na wə́míə́ munuə, nɔ ŋɔ siəkinə, ikúílí a ndɔ nyɔɔ uwənú ətíə́, a lɛ ndɔ tɔmbɔ, a ndɔ yayɛ́á injiŋə fə́mə́ləniə ɔ uwənú ətíə́.

⁴Ɛ́ɛ! Ɛnaka bá wɛɛ́ya ɔ́mɔ́kɛ́na ɔ ɔmbásá, a ka báá mɔtɔmbɔ́, mba isíŋáka, a lɛa muɔmɔ́ ɔ tɔ́mbákɛna na injiŋə yɛ Huɛlɛ́. Bəsú tɔ́na, ɛ́sɛ́á tɔ lɛ́á ɔ bɔlatɔ́ na wɛɛ́ya, tɔ lɛa bɔtɔmbɔ́, mba, Huɛlɛ́ a ŋɔ kɛaka ɔwá tɔ əsú báá ɔ buɔmɔ́ ɛ́sɛ́á wɛɛ́ya ɔ tɔ́mbákɛna na yayɛ́á injiŋə. Tɔ ŋɔ bənú nɔ́yɛ́ ínə́niə ɔ tɔ́mbákɛna na buolí ɔbɔ́á tɔ ŋɔ nyɔɔkɔ.

⁵Bənú bɛ́múɛ́tɛ́, nɔ́ bísíə́línə́ muɛsɛ, ábá níə́núə́ nɛkɔmba nɛ́ lɛa tálɛ́nátɔ́ á Kilísitusu. Baánɛ, nɔ lɛ ndɔ bɛ́manya ɔwá Yə́susu Kilísitusu a báka ɔ uwənú mɛlɛ́má əə́? Úhúlíə́ ɔwá, nɔ ná bísíə́línə́ muɛsɛ nɔ sɛ́á a lɛ bá ɔ uwənú mɛlɛ́má.

⁶Mba, mɛ ndɔ manya ɔwá ɛkasɛ nɔ́ funúnə nɔ sɛ́á, ábá ɛlɔ́áyɛ́ əsú, tɔ lɛa tiísi yɛ basɔ́másɔma.

⁷Tɔ ndɔ Huɛlɛ́ bɛ́kálɛ́na ɔwá nɔ lɛ bɔbɛ́á kɛ́á tɔ́na. Tátá ɛlɔ́áyɛ́ uwinə́niə ɔwá tɔ ka buolí buɛsɛ nyɔɔkɔ, tɔ hikəkiə ɔbánɔ́ ɔwá nɔ kɛ́áká há buɛsɛ. Nɔ́yɛ́ mbá bɛndɔ bá ŋɔ siəkinə ɔwá tɔ ka nyɔɔkɔ muɛsɛ uwənú ətíə́.

⁸Ɔ taká, tɔ sa ósó utə́ŋə́niə na taká, tɔ ndɔ əsú kɛa ɔbánɔ́ yatɛ́ ɔyɛ́á taká yɛ́ ndɔ siə.

⁹Ábá yə́núə́ ilumininə yɛ́ lɛa ɔ́nɛ́nátɔ́, wə́súə́ mɔlɛ́má wɔ́ lɛa ɔ nɛhɔnɔ, ata tɔ lɛa tɔmbɔ́tɔ. Ɔ́ ɛlɔ́áyɛ́ nɔ́yɛ́, tɔ ndɔ Huɛlɛ́ bɛ́kálɛ́na ɔwá, nɔ nɔ́yɛ́ bámɛ́nɛ́ná ɔ ɔyáyɛ́na.

¹⁰Ɛlɔ́áyɛ́ náana mɛ ndɔ bənú bɛ́ɛbɛ bɛkɔa tilinə ɔ ikúílí ɔyɛ́á mɛ nalɛ́á hata na bənú ɔkɛaka ɔwá, ɛ́kɛ mɛ ndáfámá uwənú busíə́, mɛ lɛ bənú kɔ́áyɛ́ná na iŋgínə́ ɔyɛ́á Isə́lúkú a ná mɛaŋɔ́á índíə́. Yɛ́táyɛ́ iŋgínə́ yɛ́ lɛa ɔwá, mɛ bənú bɛ́áyɛ́á bɛnɔ́mɛ úkúnə́kíə́, tátá ɔwá mɛ bənú sásáka.

¹¹Á bənísə́, isíŋáka, tɔ nɔ́ sə́mbə́nəniə, mɛ ndɔ bənú lɛna ɔwá, nɔ́ bilənəkə, nɔ́ bámɛ́nɛ́ná bikúílí bikimə ɔ ɛnɔ́mɛ yɛ́ Huɛlɛ́, nɔ́ makɛ́nda índíə́kínə́nə, nɔ́ bá munuə úmotí, nɔ́ niŋə́kə́ ɔ bumbə́nú, nɔ́yɛ́, mbá Huɛlɛ́ ɔwá a lɛ́á hɛnyɔ́nyɔ hɛ́ nibo na bumbə́nú a ŋɔ báá na bənú.

¹²Nɔ́ hólókóníə́, nɔ́ bíə́ŋə́lə́kə́níə́ bənú na bənú ɛ́sɛ́á baná bá ninyə́. Bɛláŋa bikimə bɛ́ ilúkunə yɛ́ bəlumininə bá ndɔ bənú bíhóliə.

¹³Isə́lúkú á Yə́susu Kilísitusu á bənú bəkimə buɛsɛ kɛ́áka, Huɛlɛ́ á bənú bəkimə hikə́kíə́, Umbúínyi Mɔnaŋanaŋa ɔwá wɔ́ ndɔ kɛa wɔ́ sɛ́á tɔ báá munuə úmotí, bá bámɛ́nɛ́ná na bənú bəkimə.