Read Tunen 2 Kɔlɛ́ŋɛ́tɛ 4 Bible Online

2 Kɔlɛ́ŋɛ́tɛ 4 - Tunen bible

2 Kɔlɛ́ŋɛ́tɛ 4

¹Nɔ́yɛ́, Huɛlɛ́ a ka bəsú bɔ́táyɛ́ bɔsɔ́ma índiə ɔ tɔ́mbákɛna na yáyɛ́á iwə́mɛɛ́lɔ, ɔ́ ɛlɔ́áyɛ́ nɔ́yɛ́ tɔ́ əsú lɛ́á ɔ́nɛ́nátɔ.

²Tɔ ka bɛkɔa bɛ́ ɛsɛ́má na bɛ́ inditiə bɛ́sáŋɔ́na, tɔ lɛ ndɔ bɛndɔ nímbə, tɔ lɛ ndɔ ɛtambá yɛ́ Huɛlɛ́ sə́njiə. Ɔ nifəŋə, tɔ ndɔ kɛa ɔwá bá taká mánya ɔkɛaka ɔwá, bɛndɔ bəkimə bá manyá bá sɛ́á tɔ lɛa bátaká á Huɛlɛ́ busíə́.

³Nɔ́yɛ́, ábá Imbə́nú yɛɛsɛ ɔyɛ́á tɔ ndɔ nɔŋɔna yɛ́ lɛ ndɔ bɛ́ɔ́kɔ́nɔ́, bɛndɔ ɔbá bá lɛ́á ɔ ɛnɔ́mɛ yɛ́ bunímə́ bá lɛ ndɔ ɔ́kɔ.

⁴Bá lɛ ndɔ lumininə bɔkɔasɛ́á, Sátana á huɛlɛ́ ɔwá a ndɔ yɛ́ɛyɛ misí manɛna, a ka yəbúə́ ɛmanya ndúmbúlələ ɔkɛaka ɔwá bá lɛ isəmú yɛ́ Imbə́nú Yɛɛsɛ sínə. Yɛ́ɛ́yɛ́ Imbə́nú Yɛɛsɛ yɛ́ ndɔ tuúmə tɔ́ Kilísitusu ínə́niə, ɔwayɛ́ ɔwá a lɛ́á ɛhɔ́ánakana bɛ́múɛ́tɛ́ yɛ́ Huɛlɛ́.

⁵Ɔ taká, ikúílí tɔ ndɔ bənú Imbə́nú Yɛɛsɛ nɔŋɔnɛna, tɔ lɛ ndɔ siə uwənú ɔlɛna banɛ́ tɔ əsú lɛ́á. Tɔ ndɔ siə ɔwá nɔ manyá nɔ sɛ́á á Yə́susu Kilísitusu a lɛ́á Isə́lúkú. Tɔ ndɔ əsú fə́mə́ləniə ɔwá, tɔ lɛa ɔbánɔ́ bə́núə́ bɔnyɛna ɛlɔ́áyɛ́ Yə́susu.

⁶Ɛnaka Huɛlɛ́ a misí bɔ́tá, a ka laa a sɛ́á: «Yɛ́ lɛa muɛsɛ ɔwá, isəmú yɛ́ nɔmáka ɔ ətíə́ yɛ ibínə́binə.» Wɛɛ́ya bɛ́múɛ́tɛ́ a ná kɛ́áka ɔwá, yáyɛ́á isəmú yɛ́ nɔmáka ɔ uwəsú mɛlɛ́má ɔkɛaka ɔ sɛ́á tɔ əsú manyá ɔwá yɛ́táyɛ́ isəmú, ɔ́ tɔ́áyɛ́á tuúmə ɔtɔ́á tɔ ndɔ nɔma ɔ busíə́ bɔ́ Kilísitusu.

⁷Tɔ lɛa ɛ́sɛ́á bibokó bɛ́ ɔmɛtá, mba, Huɛlɛ́ a ka kɛaka ɔwá yáyɛ́á isəmú yɛ́ nɔmáka ɔ uwəsú mɛlɛ́má nuúmə́, nɔ́yɛ́ yɛ́ ndɔ ínə́niə ɔwá, injiŋə yɛ ɛŋaná iŋgətí ɔ ɔwayɛ́ buolí ɔnyɔɔ yɛ́ ndɔ húlínə na wɛɛ́ya, tátá na bəsú.

⁸Məndínə́ məkimə má məsə́kə má ndɔ nda bəsú famɛna, mba, tɔ lɛ bá tɔmbɔ́tɔ. Tɔ ndɔ kónóbo, mba, tɔ mɔlɛ́má lɛa nɔ́mátɔ.

⁹Bɛndɔ bá ndɔ bəsú təkəsə, mba, Huɛlɛ́ a lɛ ndɔ bəsú niasa, bá ndɔ bəsú túlúlə ɔ misí, mba, tɔ lɛ wəə.

¹⁰Ikúílí tɛ́á, bá ndɔ siə ɔ uwəsú ɔwɔ́nɔ ɛ́sɛ́á bá ná Yə́susu ɔ́nɔ́kɔ́, mba, tɔ əsú lɛa ɔ buɔmɔ́ ɔkɛaka ɔwá ɔ tɔ́mbákɛna na bəsú, bɛndɔ bá siəkínə́ bá sɛ́á Yə́susu a lɛa muɔmɔ́.

¹¹Ɔ uwəsú buɔmɔ́ ɔbánɔ́ bukimə, ikúílí tɛ́á, bɛndɔ bá ndɔ siə ɔ uwəsú ɔwɔ́nɔ ɛlɔ́áyɛ́ Yə́susu. Tɔ əsú lɛa ɔ buɔmɔ́ ɔkɛaka ɔwá ɔ tɔ́mbákɛna na bəsú, bɛndɔ bá siəkínə́ bá sɛ́á Yə́susu a lɛa muɔmɔ́. Ata nəníə́ tɔ ŋɔ kɛaka, tɔ ŋɔ wə́kunə.

¹²Tɔ lɛa ikúílí tɛ́á hoóyi ɔ uwə́kunə ɛlɔ́áyɛ́ imbə́nú Yɛɛsɛ ɔnɔŋɔna, nɔ́yɛ́ yɛ́ ndɔ kɛa ɔwá, nɔ buɔmɔ́ kúsə́nə.

¹³Mətilə má ndɔ laa má sɛ́á: «Mɛ ka nɛ́ámɛ́á nɛkɔmba tálɛ́na á Huɛlɛ́, ɔ́ ɛlɔ́áyɛ́ nɔ́yɛ́ mɛ́ ná hɔ́kɛ́na ɔ ɔwayɛ́ Ɛtambá.» Bəsú tɔ́na, tɔ́ ka níə́súə́ nɛkɔmba tálɛ́na á Huɛlɛ́, ɔ́ ɛlɔ́áyɛ́ nɔ́yɛ́ tɔ ndɔ əsú yáyɛ́á Ɛtambá nɔŋɔna.

¹⁴Ɔ taká, tɔ ndɔ manya ɔwá, Huɛlɛ́ ɔwá a ná Isə́lúkú a Yə́susu huŋúə́síə́, a ŋɔ əsú huŋuəsiə tɔ́na. Na bəsú na Yə́susu tɔ ŋɔ bámɛnɛna iŋgində́. Huɛlɛ́ a ŋɔ bəsú na bənú bɛ́lɛna ɔ ɔwayɛ́ ɛmɛ́ŋɛ́.

¹⁵Ata yatɛ́ məsə́kə tɔ ndɔ sinə, ata yatɛ́ ɔyɛ́á tɔ ndɔ kɛa, tɔ ndɔ nɔ́yɛ́ kɛna ɛlɔ́áyɛ́ ənú ɔkɛaka ɔwá, Huɛlɛ́ a bɛndɔ bəəŋí wə́yíə́ mɔlɛ́má muɛsɛ ínə́níə́. Nɔ́yɛ́ mbá bɛndɔ bá ŋɔ báá bunə́tɔ́ ɔbá bá ndɔ wɛɛ́ya mohóloniə híə́niniə, bá ŋɔ wɛɛ́ya nyamaka tɔ́na.

¹⁶Ɔ́ ɛ́lɔ́áyɛ́ nɔ́yɛ́ tɔ́ lɛ ndɔ tɔmbɔ ikúílí tɛ́á. Ata yəsúə́ mɛɛ́lɔ yɛ́ ndɔ hɔ́ɛ́nɛna ɔkafámáká ɔ uwə́kunə, tɔ ndɔ manya ɔ uwəsú mɔlɛ́má ɔwá, tɔ sa ndə́wəə. Huɛlɛ́ a ndɔ bəsú iŋgínə́ índiə buɔsɛ́ na buɔsɛ́ tɛ́á ɔ yɛ́táyɛ́ ɛfɛka ɔ ɔháá ɔ uwəsú mɔlɛ́má.

¹⁷Məsə́kə ɔmá tɔ́ ndɔ sinə isíŋáka, má lɛa hə́hə́nə́tɔ́ yáyɛ́ná tuúmə tɔŋɛ́ŋa tɔ́ ikúílíə́kimə ɔtɔ́á mááyɛ́ məsə́kə má ndɔ bəsú tábɔ́nɛna.

¹⁸Tɔ lɛ ndɔ mɔlɛ́má háá ɔ bɛkɔa ɔbɛ́á bɛ́ ndɔ sinənə, mba, ɔbánɔ́ ɔ yatɛ́ ɔyɛ́á yɛ́ lɛ ndɔ sinənə, yatɛ́ ɔyɛ́á yɛ́ ndɔ sinənə yɛ́ lɛa bɛtɔ́mbáka, mba, ɔyɛ́á yɛ́ lɛ ndɔ sinənə yɛ́ lɛa ɔ bikúílí bikimə.