Read Tunen 2 Kɔlɛ́ŋɛ́tɛ 6 Bible Online

2 Kɔlɛ́ŋɛ́tɛ 6 - Tunen bible

2 Kɔlɛ́ŋɛ́tɛ 6

¹Nɔ́yɛ́, uwəsú ɔbá tɔ lɛ́á ɔ buolí na Huɛlɛ́, tɔ ndɔ bənú bata ɔwá, nɔ lɛ bɛsɔ́nɔ bɛ́ Huɛlɛ́ ndɛ́ŋɛ́lɛ́na ɔbɛ́á a ná bənú sána.

²Ɔ taká, a ndɔ laa ɔ Mətilə a sɛ́á: «Ɔ ikúílí yɛɛsɛ, mɛ ka wə́wúə́ uŋgə́lə́kí ɔ́kɔ́kɛna, ɔ ikúílí ɔyɛ́á yɛ́ ná bá ɔwá mɛ bɛndɔ núə́kə́níə́, mɛ ka aŋɔ́á ɔ́lɔ.» Nɔ́yɛ́, ɔ́ ikúílí yɛ́ɛyɛ isíŋáka ɔyɛ́á ɛkasɛ Huɛlɛ́ á bəsú buɛsɛ kɛáka, ɔ́ buɔsɛ́ bɔ́ɔbɔ ɔbɔ́á Huɛlɛ́ a ndɔ siə ɔ bɛndɔ unuəniə.

³Tɔ lɛ ndɔ əsú siə ɔ bɔkɔa ɔkɛa ɔbɔ́á ɛkasɛ bɔ́ mɔndɔ kuəsíə́ ɔ bɔbɛ́á, ɔ́ ɔkɛaka ɔwá búə́súə́ buolí bɔ́ báá ɛŋaná hɛkɔma.

⁴Ɔ nifəŋə, tɔ ndɔ ínə́niə ɔwá tɔ lɛa tiísi yɛ bɔnyɛna bá Huɛlɛ́ ɔ bɛkɔa ɔbánɔ́ bikimə ɔbɛ́á tɔ ndɔ kɛa. Tɔ ndɔ nɔ́yɛ́ ínə́niə ɔ tɔ́mbákɛna na nisíbiniə, na mətəkəsənə, na məsə́kə, na bɔkɔ́lɔ́ma.

⁵Tɔ ndɔ nɔ́yɛ́ ínə́niə ikúílí bá ndɔ bəsú súbə, ikúílí tɔ́ lɛ́á ɔ ɛbɔka, ikúílí bá ndɔ bɛndɔ kítiniə ɔ uwəsú unuəsiə, ikúílí tɔ lɛ́á tɔmbɔ́tɔ́, ikúílí tɔ lɛ bá na ihə́lí yɛ́ hinó uhúliə, ikúílí tɔ lɛ bá na ihə́lí yɛ́ ɔnɛ́á.

⁶Tɔ ndɔ nɔ́yɛ́ ínə́niə ikúílí tɔ lɛ ndɔ bɛkɔa bɛ́ məhilə́ kɛa, ɔ tɔ́mbákɛna na imənyí, na nilímbə́tənə, na wə́súə́ mɔlɛ́má muɛsɛ, ɔ tɔ́mbákɛna na Umbúínyi Mɔnaŋanaŋa ɔwá wɔ́ lɛ́á ɔ uwəsú mɔlɛ́má, na bɛndɔ uhikiə ɛŋaná nifəŋə ɔháá.

⁷Tɔ ndɔ nɔ́yɛ́ ínə́niə ikúílí tɔ ndɔ taká nɔŋɔnɛna ɔ bɛndɔ, ɔ tɔ́mbákɛna na injiŋə ɔyɛ́á yɛ́ ndɔ húlínə na Huɛlɛ́, na bikúlúmə́ bɛ́ bilə́ ɛlɔ́áyɛ́ unímə́siə na ɛlɔ́áyɛ́ níə́súə́ nibíhóyiə ɔ ɛnɔ́mɛ yɛ́ taká.

⁸Tɔ ndɔ nɔ́yɛ́ ínə́niə ikúílí bá ndɔ bəsú úmə́siə, ata ikúílí bá ndɔ bəsú yəniə, bá ndɔ bəsú kɔ́ba, ata ikúílí bá ndɔ bəsú bə́tiə. Ikúílí bá ndɔ bəsú sinə ɛ́sɛ́á bakanjakanja, mbá nɔ́yɛ́ tɔ ndɔ hɔ́ɔ́ á taká,

⁹Tɔ ndɔ nɔ́yɛ́ ínə́niə ikúílí bɛndɔ bá ndɔ kɛa ɛ́sɛ́á tɔ lɛ bá manyánátɔ, mbá nɔ́yɛ́ bá ndɔ bəsú manya muɛsɛ, bá bəsú siəkinə ɛ́sɛ́á biwə́wə́, mbá nɔ́yɛ́ tɔ lɛ́á bɔɔmɔ́. Bá bəsú nɔkɔlɔkɔna na məsə́kə, mba, tɔ lɛ wəə.

¹⁰Bá bəsú liŋgəsəkiə, mba bikúílí bikimə tɔ lɛa ɔ nɛhɔnɔ, bá fɛkaka ɔwá tɔ lɛa tɔyɔ́tɔ́ mba, tɔ bɛndɔ bəəŋí bóŋósokiə, yɛ́ kɛaka ɔwá tɔ lɛa tɔndɔ́ányɛ́ mba, tɔ lɛa na bikimə itíə́nə́tɔ!

¹¹Uwənú á bɛndɔ bá Kɔlɛ́ŋɛ́tɛ ɔ bíə́súə́ bɛŋgɔ́áyɛ́, tɔ ka bənú hɔ́kɛna ɔ mianyɔ́, tɔ sa bítə yatɛ́ ɔyɛ́á yɛ́ lɛ́á ɔ uwəsú mɔlɛ́má nuúmə́.

¹²Tɔ ka bənú hikəkiə mɔŋɛ́ŋa, bənú nɔ́ sa əsú hikiə.

¹³Nɔ́yɛ́, mɛ ndɔ bənú hɛ́na ɛ́sɛ́á bámɛ́á baná, bənú tɔ́na, nɔ́ lɛ əsú bɛsaŋɔna, nɔ́ əsú híkə́kíə́ ɛ́sɛ́á tɔ́ ná ənú híkə́kíə́!

¹⁴Nɔ lɛ tɔáná na bɛndɔ ɔbá bá lɛ bá na nɛkɔmba á Yə́susu. Ɔ taká, nəníə́ bɔɔ́la buɛsɛ bɔ́ óso utuənəniə na bɔbɛ́á əə́? Isəmú na ibínə́binə bá sa ósó bámɛnɛna iŋgində́.

¹⁵Yatɛ́ yɔkɔ́nɔ yɛ́ óso ɔbáá ɔ ətíə́ na Yə́susu na Sátana əə́? Ataná, yatɛ́ nɛtɔana nɛ́ óso ɔbáá na mulumininə na wɛ́ɛ́yɛ́ ɔwá a lɛ ndɔ lumininə əə́?

¹⁶Miímə mɛŋɛ́ŋa yɛ Huɛlɛ́ na bililí yɛ́ sa ósó ɔbáá bɔkɔa bɔ́mɔtɛ́. Ɔ taká, bəsú tɔ lɛ́á tɛ́mbɛlɛ yɛ Huɛlɛ́ ɔwá a lɛ́á muɔmɔ́, wɛɛ́ya bɛ́múɛ́tɛ́ a ná láá a sɛ́á: «Mɛ ŋɔ tuənəkinə, mɛ ŋɔ kɛndaka na bəə́bu, mɛ ŋɔ báá yəbúə́ Huɛlɛ́, bəə́bu tɔ́na yámɛ́á ilúkunə.»

¹⁷Ɔ́ ɛlɔ́áyɛ́ nɔ́yɛ́ Isə́lúkú a ná láá a sɛ́á: «Nɔ́ hɛ́kɛ́á ɔ ətíə́ yɛ bááyɛ́ ɔbá bá lɛ ndɔ lumininə, nɔ́ lɛ tuənə́ iŋgində́ na bəə́bu. Nɔ lɛ bɛɛ́la bɛ́ məhilə́ bɛ́tɔ́mɛ́na, ɔwámɛ tɔ́na mɛ ŋɔ bənú káha.»

¹⁸Isə́lúkú yɛ injiŋə yikimə a ka laa tɔ́na a sɛ́á: «Mɛ ŋɔ báa isə́ ɛlɔ́áyɛ́ ənú, bənú tɔ́na nɔ ŋɔ báá baná balɛ́mɛndɔ́ na bəəndú ɛlɔ́áyɛ́ ámɛ.»