Read Tunen 2 Kɔlɛ́ŋɛ́tɛ 7 Bible Online

2 Kɔlɛ́ŋɛ́tɛ 7 - Tunen bible

2 Kɔlɛ́ŋɛ́tɛ 7

¹Á bənísə́ bá nibo, Huɛlɛ́ a ka bəsú bɛ́ɛ́yɛ́ bɛkɔa bikimə bílíhə́niə, tɔ́ məhilə́ má mɛɛ́lɔ na má mɔlɛ́má bínə́ŋə́síə́, tɔ́ ənú ányá ɔbáá ɛŋaná hɛkabalɛ na Huɛlɛ́ ɔwɔkɛ́na.

²Nɔ́ bəsú ɛbɔ́ka tə́tə́níníə́ ɔ uwənú mɛlɛ́má nuúmə́, tɔ sa liŋgəsiə ata mɔndɔ, tɔ sa ilumininə yɛ́ mɔndɔ nənəsiə, tɔ sa mɔndɔ nímbə ɔkɛaka ɔwá tɔ bɔ́áyɛ́á bɔɔ́la ɛta.

³Mɛ lɛ ndɔ nɔ́yɛ́ laa ɛlɔ́áyɛ́ uwənú ɔhɔkɛna. Mɛ ka taŋa uwənú ɔ nɔ́yɛ́ ɔlɛna, nɔ lɛ ɔ uwəsú mɛlɛ́má nuúmə́, ata tɔ lɛa ɔ uwə́kunə, tɔ báka iŋgində́, ata tɔ lɛa buɔmɔ́, tɔ báka iŋgində́.

⁴Nɛ́ámɛ́á nɛkɔmba nɛŋɛ́ŋa nɛ́ lɛa tálɛ́nátɔ́ ɔ uwənú, mɛ lɛa na nɛhɔnɔ na bənú. Mɛ lɛa úndúə́tɔ́ na mokokoliniə, mɛ lɛa tɔ́na na nɛhɔnɔ nikimə ɔ ətíə́ yɛ mə́súə́ mɔmɔ́kɛ́ məkimə.

⁵Ɔ taká, ata ikúílí tɔ ná káfámá ɔ nɛkɛ́tɛ nɛ́ misí ɔ Masɛtɔánɛ, tɔ sa bá na buhuhə, tɔ ka məndínə́ má məsə́kə siəkinə, bá bəsú nuəkiə ɔ bɛsalɛ ɔbánɔ́ bikimə, bɔkɔ́lɔ́ma tɔ́na ɔ uwəsú mɔlɛ́má nuúmə́.

⁶Mba, Huɛlɛ́ ɔwá a ndɔ bááyɛ́ kokoliniə ɔbá bá lɛ́á ɔ mətuŋulə, a ka bəsú óníniə bɔkɔasɛ́á Títi a ka ndafáma.

⁷Tátá ɔ́maná nɛ́áyɛ́á nɛndafámá bíbúə́ nɛ́ ná wə́súə́ mɔlɛ́má óníníə́, mba, wə́súə́ mɔlɛ́má wɔ́ ka ɔ́nɛ́na ɔ ikúílí a ná bəsú lákɛ́ná nəníə́ nɔ́ ná ənú wɛɛ́ya óníníə́. A ka bəsú lɛna tɔ́na ɔwá nɔ ndɔ siə ɔ ɔwámɛ usinə, a ka bəsú lakɛna tɔ́na nəníə́ nɔ lɛ́á na busə́kə ɛlɔ́áyɛ́ bɛkɔa ɔbɛ́á bɛ́ ndɔ nda mɛaŋɔ́á famɛna, nəníə́ nɔ ndɔ siə tɔ́na ɔ ɔwámɛ unuəniə ɔ makátá má bokóyíkoyi. Ɛnaka mɛ ɔ́kɔ́kɛ́ná nɔ́yɛ́, nɛhɔnɔ nɛ́ ka mɛaŋɔ́á báa ɔ ɔyáyɛ́ná.

⁸Ɔ taká, ábá hiəfulə ɔhɛ́á mɛ́ ná bənú tílə́kínə hɛ́ ka bənú liŋgəsiə, mɛ lɛ ndɔ sə́híniə ata bɔkɔa isíŋáka. Mɛ ka sə́hə́kiniə mɔŋɛ́ŋa ikúílí mɛ́ ná bínúnə́ ɔwá hɛ́ ka bənú liŋgəsiə ɔ tɛ́tɛ́á yɛ ikúílí.

⁹Mba isíŋáka, mɛ lɛa na nɛhɔnɔ tátá bɔkɔasɛ́á mɛ ná bənú líŋgə́síə́, mba, ɛlɔ́áyɛ́ ɔwá búə́núə́ busə́kə bɔ́ ka yə́núə́ mɛlɛ́má kɔ́ŋɔ́na. Bɔ́táyɛ́ busə́kə á Huɛlɛ́ a ná nɔ́yɛ́ híkə́kíə́, ɔ́ niɔŋɔ́ sɛ́á, tɔ sa əsú tɛŋɛnɛna ata mɔndɔ.

¹⁰Ɔ taká, ikúílí Huɛlɛ́ a ná hikə́kíə́ ɔwá mɔndɔ á busə́kə ɔ́kɔ́kɛ́na, tátá ɔkɛaka ɔwá wə́yíə́ mɔlɛ́má wɔ́ wɛɛ́ya kə́lə́sə́kíə́ mba, ɔkɛaka ɔwá bɔ́táyɛ́ busə́kə bɔ́ wɛɛ́ya ɔ́lɔ́ ɔ mɔlɛ́má kɔ́ŋɔ́na, nɔ́yɛ́ mbá Huɛlɛ́ a wɛɛ́ya nuəkə́níə́. Ábá mɔndɔ a lɛa na busə́kə ɔ ɛnya yɛ bɛndɔ bá misí, ɔ́ niɔŋɔ́ sɛ́á, a lɛa wə́ə́tɔ.

¹¹Nɔ́ ɛmbakɔ́ yɛ busə́kə siəlínə isíŋáka ɔyɛ́á yɛ́ ndɔ húlínə na Huɛlɛ́: Yɛ́ ka kɛaka ɔwá nɔ lɛ tɔkɔma tɔ́ mɔndɔ tə́tə́níə́ tɔ́na, ɔwá nɔ mə́núə́ mabɛ́á sə́hə́kíníə́, ɔwá ɛsɛ́má yɛ́ bənú itíə́ ɔ bɛkɔa ɔbɛ́á nɔ ná kɛ́áka, ɔwá nɔ báá na bɔkɔ́lɔ́ma ɔ yatɛ́ ɔyɛ́á ɛkasɛ yɛ́ ndá bənú famɛna, ɔwá nɔ báá na ilókí yɛŋɛ́ŋa ɔkɛaka ɔ sɛ́á nɔ manyɔ́ mɛaŋɔ́á siəkinə, ɔwá nɔ báá na ilókí yɛ́ buolí bɔ́ Huɛlɛ́ ɔ ɔnyɔɔ, ɔwá nɔ hikəkiə ɔ mɔndɔ ɔsɔ́kɔ́tɛa ɔwá a ná bɔbɛ́á kɛ́áka. Ɔwá nɔ ka ínə́niə ɔ məndínə́ məkimə ɔwá, wə́núə́ mɔlɛ́má wɔ́ lɛa ɛŋaná hɛkɔma ɔ bɔ́táyɛ́ bɔkɔa.

¹²Nɔ́yɛ́, ábá mɛ ka bənú tiləkinə, tátá ɛlɔ́áyɛ́ wɛ́ɛ́yɛ́ ɔwá a ná kɔ́ɛ́na ɔ bɔbɛ́á, ataná, ɛlɔ́áyɛ́ wɛ́ɛ́yɛ́ ɔwá bá ná bɔbɛ́á kɛ́áka. Mba, ɔkɛaka ɔwá nɔ manyá muɛsɛ á Huɛlɛ́ busíə́ nɔ sɛ́á nɔ ndɔ bəsú hikiə na mɔlɛ́má úmotí.

¹³Ɔ́ ɛ́lɔ́áyɛ́ nɔ́yɛ́ wə́súə́ mɔlɛ́má wɔ́ ná yɔtɔ, ɔ ɔyáyɛ́ná nɔ́yɛ́, tɔ ka busiomo ɔ́kɔ ɔ usinə nəníə́ Títi a lɛ́á úndúə́tɔ́ na nɛhɔnɔ bɔkɔasɛ́á, nɔ ka wɛɛ́ya óníniə.

¹⁴Ábá mɛ ka nɛhɔnɔ ɔ́kɔ́kɛna ɛlɔ́áyɛ́ ənú, mɛ sa bíbə́liə ndəmə á Títi busíə́. Nɔ sa mɛaŋɔ́á símə́siə, bikúílí bikimə tɔ ka bənú hɔ́kɛna á taká, ata indumə ɔyɛ́á tɔ́ ná bənú híə́níníə́ ɔ busíə́ bɔ́ Títi, yɛ́ ka ɛ́nána taká.

¹⁵Ɛnaka a ndáfámá uwənú busíə́, nɔ ka wɛɛ́ya káha muɛsɛ, na bɔkɔ́lɔ́ma bukimə, bənú bəkimə nɔ ka wɛɛ́ya ɔ́kɛ́na, ikúílí a ndɔ nɔ́yɛ́ bɛ́kɔ́lɔmɔna, a bənú hikəkiə ɔ ɔyáyɛ́na.

¹⁶Mɛ lɛa na nɛhɔnɔ bɔkɔasɛ́á, mɛ ndɔ manya ɔwá, mɛ óso ɔ nɛkɔmba ɔtálɛ́na ɔ uwənú ɔ bɛkɔa bikimə.