Read Tunen 2 Kɔlɛ́ŋɛ́tɛ 8 Bible Online

2 Kɔlɛ́ŋɛ́tɛ 8 - Tunen bible

2 Kɔlɛ́ŋɛ́tɛ 8

¹Á bənísə́, tɔ ndɔ hikiə ɔwá nɔ manyá nəníə́ Huɛlɛ́ a ná wə́yíə́ mɔlɛ́má muɛsɛ fə́mə́lə́níə́ ɔ bilúkunə bɛ́ bəlumininə ɔ nɛkɛ́tɛ nɛ́ misí ɔ Masɛtɔánɛ.

²Bəlumininə bá ka məsə́kə siəkinə ɛmbáta; mba, bá ka bá na nɛhɔnɔ nɛŋɛ́ŋa ɛnya ɔyɛ́á, ata nɔ́yɛ́ ɛ́sɛ́á bá ná báá tɔyɔ́tɔ́ ɔ ɔyáyɛ́na, bá ka bínə́niə ɔwá abáka bá hánaka.

³Mɛ nɔ́yɛ́ báka mumbóŋímboŋi, bá ka índiəkinə ɔ ɔyáyɛ́na ikúílí tɛ́á, ɛŋaná əlimə ɔhiamɛla, ɔwɔŋgɔkɔnɔ bíə́búə́ bɛhámbálɛ́ ɛlɔ́áyɛ́ buolí bɔ́ Huɛlɛ́ uhíkə.

⁴Bá ka bəsú bata na ɔwɛmbɛ́na ɔkɛaka ɔwá, tɔ lumínə bá mɔkátá háá, bá bɛláŋa bɛ́ ilúkunə yɛ́ Huɛlɛ́ yɛ́ Yútɛa ɔlɔ.

⁵Bá ka nɔ́yɛ́ kɛaka yáyɛ́na yatɛ́ ɔyɛ́á tɔ́ ná nánákɛ́na, bá ná taŋá ubíndiə á Isə́lúkú, əlimə yɛ ikúílí, bá ná bɛ́níásá tɔ́na na bəsú ɛ́sɛ́á Huɛlɛ́ a ná híkə́kíə́.

⁶Ɔ́ ɛlɔ́áyɛ́ nɔ́yɛ́ tɔ ná Títi bɛ́tɔ́kɔ́lɔ́kɛ́na ɔkɛaka ɔwá, a ndáhíáná uwənú busíə́, a bənú makɛ́nda índíə́, nɔ hánáka ɔ ɔyáyɛ́na ɛ́sɛ́á nɔ́ ná bótólíə́.

⁷Nɔ lɛa na bɛkɔa bikimə itíə́nə́tɔ́ ɔ ɔyáyɛ́na: Ilumininə, nɔ ɛtambá yɛ́ Huɛlɛ́ nɔŋɔnaka muɛsɛ, nɔ taká manyaka muɛsɛ, ilókí yɛ́ buolí bɔ́ Huɛlɛ́, nibo ɔnɛ́á tɔ ná bənú ínə́kíníə́, nɔ́yɛ́, nɔ́ ínə́níə́ ɔ bɛkɔa ɔbánɔ́ bikimə ɔwá abáka nɔ hánaka.

⁸Mɛ lɛ ndɔ bənú íkíniə ɔ nɛhánɛna uwíndiə, mba, mɛ ndɔ hɛ́na nəníə́ bə́ə́ní bá lɛ́á na ilókí yɛ́ uwíndiə mɔŋɛ́ŋa ɛlɔ́áyɛ́ bəlumininə ɔwɔ́lɔ ɔkɛaka ɔwá, nɔ ínə́níə́ taká nɔ sɛ́á nɔ ndɔ bɔsɔ́kɔ́ hikiə.

⁹Ɔ taká, nɔ ndɔ manya nəníə́ yəsúə́ á Isə́lúkú á Yə́susu Kilísitusu a ná bənú wə́yíə́ mɔlɛ́má muɛsɛ ínə́níə́: Ɔwayɛ́ ɔwá a ná báá bɔ́ŋɔ́tɔ́, a ka híána hɛtɔyɔ́nɔ́ ɛlɔ́áyɛ́ ənú ɔkɛaka ɔwá, nɔ híáná bobóŋí ɔ tɔ́mbákɛna na bɔ́áyɛ́á bɔtɔyɔ́.

¹⁰Mɛ ndɔ bənú lɛna isíŋáka ɛ́sɛ́á mɛ ndɔ bɛ́kɔ́lɔmɔna ɔ wɔŋgɔkɔnɔ nɛ́táyɛ́ nɛhánɛna: Uwənú ɔbá nɔ ná táŋá ɔ bɛndɔ ɔhánɛna ɔ hííní hiɔŋɔ, bənú nɔ́ ná yɛ́táyɛ́ ɛfɛka kolo, nɔ́ ndíŋímínə, nɔ́ ákánána ɔ busíə́.

¹¹Isíŋáka nɔ́ bɔɛ́ta hɔ́nálá na mɔlɛ́má mukimə ɛ́sɛ́á ikúílí ɔyɛ́á nɔ ná bɔɛ́ta botoliíə́ na mɔlɛ́má mukimə, ɔwɔŋgɔkɔnɔ bíə́núə́ bɛhámbálɛ́.

¹²Ikúílí mɔndɔ a ná bɔɔ́la índíə́ á Huɛlɛ́ na mɔlɛ́má úmotí ɔwɔŋgɔkɔnɔ yatɛ́ ɔyɛ́á a lɛ́á itíə́nə́tɔ́, a báka a bɔɛ́ta luminə, mba, ábá ɔ lɛ bá itíə́nə́tɔ́, abáka Huɛlɛ́ a lɛ aŋɔ́á bátá ata bɔɔ́la.

¹³Yɛ́ lɛ bá ɔwá nɔ kɔɛ́na ɔ nɛsɔ́ka, nɔ bɛndɔ bóŋósíə́, əlimə yɛ ikúílí nɔ́ ənú tɔyɔ, yɛ́ lɛa ɔbánɔ́ ɔwá nɔ bámɛ́nɛ́ná bɔkɔa bɔ́mɔtɛ́.

¹⁴Ɔ yɛ́ɛ́yɛ́ ikúílí, ábá nɔ lɛa ɔ nɛmbiaŋɛ, nɔ óso ɔ bááyɛ́ ɔwɔ́lɔ ɔbá bá lɛ́á ɔ nɛsɔ́ka, ábá ɔ bɔ́mɔtɛ́ buɔsɛ́, nɔ ənú lɛa ɔ nɛsɔ́ka, bəə́bu ɔ nɛmbiaŋɛ, bá ənú ɔ́lɔ́kɛna, nɔ́yɛ́ mbá nɔ ŋɔ báá bɔkɔa bɔ́mɔtɛ́.

¹⁵Nɔ́yɛ́, ɛ́sɛ́á bá ná tílə́kə ɔ hiəfulə hɛ́ Huɛlɛ́ bá sɛ́á: «Wɛ́ɛ́yɛ́ ɔwá a ná kɔ́táká məəŋí, a sa bá na maáta ɔ ɔyáyɛ́na, wɛ́ɛ́yɛ́ ɔwá a ná kɔ́táká tɛ́tɛ́á, ata bɔɔ́la bɔ́ sa wɛɛ́ya áŋgɛ́na.»

¹⁶Títi a ka hikəkiə ɔ uwənú ɔwɔ́lɔ ɛ́sɛ́á tɔ́ ndɔ ənú siə ɔ uwənú ɔwɔ́lɔ, á Huɛlɛ́ a ná wɛɛ́ya wútə́yí mɔlɛ́má índíə́, tɔ́ wɛɛ́ya mohóloniə híə́níníə́ ɛlɔ́áyɛ́ nɔ́yɛ́.

¹⁷Tɔ ka wɛɛ́ya bɛ́tɔ́kɔ́lɔkɛna ɔwá, a ndásá ɔ uwənú busíə́ a ná lumínə, a ka nɔ́yɛ́ hikəkiə ɔ nindínə́ ɔnɛ́á, ɔ umisíúmə́, a ná ihə́ŋiə ɛtá ɔwá a ndásá uwənú busíə́.

¹⁸Tɔ ná wɛɛ́ya munísə́ óŋgósíə́ ɔwá yayɛ́á indumə yɛ́ ndɔ tɔ́mba ɔ ətíə́ yɛ bilúkunə bɛ́ Huɛlɛ́ bikimə bɔkɔasɛ́á, a ndɔ Imbə́nú Yɛɛsɛ nɔŋɔna muɛsɛ.

¹⁹Tátá ɔ́maná ɛlɔ́áyɛ́ nɔ́yɛ́, bilúkunə bɛ́ bəlumininə bá ka wɛɛ́ya tɛ́fa ɔkɛaka ɔwá, a bámɛ́nɛ́ná yə́súə́ ikindəniə yɛ́ mɔkɛnda ɛlɔ́áyɛ́ buolí ɔnyɔɔ bɔ́ bɛndɔ ɔwɔ́lɔ, bɔsɔ́ma ɔbɔ́á tɔ ndɔ kɛa bɔ́ lɛa ɛlɔ́áyɛ́ tuúmə tɔ́ Isə́lúkú, na ɔkɛaka ɔwá bíə́súə́ bɛfɛka bɛɛsɛ bɛ́ bíúndúsíníə́.

²⁰Tɔ ndɔ bítə́tə́niə ɔkɛaka ɔwá bá lɛ bəsú sɔ́kɔ́nɛ́na ɔ ɛnya ɔyɛ́á tɔ́ ná mááyɛ́ məndunə́ áfáka ɔmá tɔ ná hulənə.

²¹Tɔ ndɔ siə ɔkɛa yatɛ́ ɔyɛ́á yɛ́ lɛ́á yɛɛsɛ tátá ɔ́maná ɔ busíə́ bɔ́ Isə́lúkú, mba, ɔ busíə́ bɔ́ bɛndɔ tɔ́na.

²²Tɔ ná wɔmɔtɛ́ wəsúə́ mɔndɔ lɔ́má na bááyɛ́ báfandɛ́ tɔ́na. Bikúílí biəŋí, tɔ ka wɛɛ́ya ɔ́kɔ́lɔkɛna, tɔ ná siəkínə ɔwá a lɛa bíndíə́tɔ́ ɔ buolí bɔ́ Huɛlɛ́, isíŋáka a lɛa bíndíə́tɔ́ ɔyáyɛ́na bɔkɔasɛ́á, a ndɔ manya ɔwá nɔ ndɔ bítíkə muɛsɛ.

²³Títi a báka yámɛ́á ikindəniə, na wɛɛ́ya tɔ ndɔ nyɔɔ iŋgində́ ɔ uwənú ɔwɔ́lɔ. Ɔ bááyɛ́ báfandɛ́ ɔbá tɔ́ lɛ́á, bilúkunə bɛ́ bəlumininə bá ná bəə́bu lɔ́má uwənú busíə́. Búə́búə́ buolí bɔ́ ndɔ kɛa ɔwá, bɛndɔ bá Kilísitusu nyamáka.

²⁴Nɔ́yɛ́, nɔ́ bilúkunə ínə́níə́ ɔwá nɔ ndɔ bəə́bu hikiə taká. Nɔ́yɛ́, ndɔ ínə́niə ɔwá, bɛtambá ɔbɛ́á tɔ́ ná hɔ́ɔ́kɔ́ ɛlɔ́áyɛ́ ənú bɛ́ lɛa taká.