Read Tunen 2 Kɔlɛ́ŋɛ́tɛ 9 Bible Online

2 Kɔlɛ́ŋɛ́tɛ 9 - Tunen bible

2 Kɔlɛ́ŋɛ́tɛ 9

¹Mɔsɛ́ŋɛ́ wɔ́ lɛ bá taká ɔwá mɛ bənú tílə́kínə ɔwɔŋgɔkɔnɔ ɛkamɛla ɔyɛ́á tɔ ndɔ lɔ́mákɛna ɔ bɛláŋa bɛ́ ilúkunə yɛ́ Huɛlɛ́ ɔ bɔnɔŋɔ bɔ́ Yútɛa.

²Mɛ ndɔ bíə́núə́ bɛfɛka bɛɛsɛ manya ɛlɔ́áyɛ́ bɛndɔ ɔwɔ́lɔ, mɛ báka tɔ́na na nɛhɔnɔ ɛlɔ́áyɛ́ ənú ɔ busíə́ bɔ́ bɛndɔ bá nɛkɛ́tɛ nɛ misí ɔ Masɛtɔánɛ, mɛ ka bəə́bu lɛna mɛ sɛ́á: «Ɔ́ hiɔŋɔ hikimə híihi, bəlumininə ɔbá bá lɛ́á ɔ nɛkɛ́tɛ nɛ́ misí ɔ Akáyɛ, bá lɛa bɛ́tábɔ́nákátɔ́ ɔ bəlumininə bá Yútɛa ɔwɔ́lɔ.» Ɛnaka mɛ bəə́bu hɔ́kɛ́ná nɔ́yɛ́, bɔ́mɔtɛ́ ɔ uwəbú ətíə́ bá ka báá bunə́tɔ́ ɔkɛaka ɔwá bá bəə́bu ɔ́lɔ́ tɔ́na.

³Nɔ́yɛ́, mɛ ndɔ bənú Títi lɔ́mɛ́na na bɔ́mɔtɛ́ bənísə́ ɔkɛaka ɔwá, nɔ báá taká bɛ́tábɔ́nákátɔ́ ɛ́sɛ́á mɛ ná bənú lɛ́na, nɔ́yɛ́, ɛnáká tɔ ndáfámá uwənú busíə́ yatɛ́ ɔyɛ́á mɛ ná hɔ́kɔ́ ɔ uwənú ɛlɔ́á, yɛ́ lɛ fámá bɛkanja.

⁴Ɔ nifəŋə, ɛnáká tɔ́ ndáfámá na bɛndɔ bá Masɛtɔánɛ, ábá tɔ sá bənú kɔana bɛ́tábɔ́nátɔ́, tɔ ŋɔ sɛ́ma ɔ uwəbú busíə́ bɔkɔasɛ́á, tɔ ka bəə́bu lɛna ɔwá, nɔ lɛa bɛ́tábɔ́nákátɔ. Nɔ ŋɔ ənú sɛ́ma tɔ́na.

⁵Ɛlɔ́áyɛ́ nɔ́yɛ́, mɛ ná siəkínə mɛ sɛ́á yɛ́ lɛa muɛsɛ ɔwá, bənísə́ bá buəkínə uwənú busíə́ ɔkɛaka ɔwá, bá nɛhánɛna tə́tə́níə́ ɔnɛ́á nɔ́ ná kɔ́táká ɛ́sɛ́á nɔ ná bílíhə́níə́. Nɔ́yɛ́, nɛ́ ŋɔ báá hoóyi ikúílí mɛ ŋɔ ndafama, nɔ́yɛ́ yɛ́ ndɔ ínə́niə ɔwá nɔ ná nɛɛ́ta índíə́ na mɔlɛ́má muɛsɛ, mba, tátá ɔ yəə́kə ɔmbáŋá.

⁶Nɔ́ nɔ́yɛ́ manyá muɛsɛ ɔwá: Wɛ́ɛ́yɛ́ ɔwá a ndɔ sɛla tɛ́tɛ́á a ŋɔ huəkə tɛ́tɛ́á; ɔwá a ndɔ sɛla mɔŋɛ́ŋa a ŋɔ huəkə mɔŋɛ́ŋa.

⁷Nɔ́yɛ́, mɔɛ́ta tɛ́á a ná hɔ́ánána uwíndiə yatɛ́ ɔyɛ́á a ná bílúmə́kíníə́ ɔ ɔwayɛ́ mɔlɛ́má, ɛŋaná məliŋə́ mbá ata ɔ yəə́kə ɔmbáŋá bɔkɔasɛ́á, Huɛlɛ́ a ndɔ wɛ́ɛ́yɛ́ hikiə ɔwá a ndɔ índiə na nɛhɔnɔ nikimə.

⁸Huɛlɛ́ tɔ́na a lɛa na iŋgínə́ ɔ uwənú uwundúsiə na məndínə́ má maasɛ məkimə ɔkɛaka ɔwá bikúílí bikimə, nɔ́ kusə́nə́ yatɛ́ ɔyɛ́á nɔ ndɔ sɔ́ka, ɔ ɔyáyɛ́na nɔ́yɛ́, nɔ́ kusə́nə́ tɔ́na mɔŋɛ́ŋa ɛlɔ́áyɛ́ biolí bɛɛsɛ uwundúsiniə.

⁹Mətilə má ndɔ laa má sɛ́á: «A ndɔ tɔtɔyɔ́nɔ́ índiəkinə ɔ ɔyáyɛ́na, wə́yíə́ mɔlɛ́má muɛsɛ wɔ́ ŋɔ bámɛnɛna ɔ bikúílí bikimə[2].»

¹⁰Ɛ́sɛ́á á Huɛlɛ́ a ndɔ məfumə́ índiə ɔ mɔnɛma na bɔɔ́la bɔ́ ɔnɛ́á, a ŋɔ bənú məfumə́ índiəkinə ɔmá nɔ ŋɔ bá na ilókí, a ŋɔ kɛaka má ɔ́mbɔkɔ, má bunə́kə ɔkɛaka ɔwá, nɔ biolí bɛɛsɛ kɛaka ɔ bɛndɔ na taká.

¹¹A ŋɔ bənú bóŋósiə ɔ məndínə́ məkimə ɔkɛaka ɔwá, nɔ bənə́bənə́ índíə́kínə́ na mɔlɛ́má muɛsɛ. Nɔ́yɛ́, bəəŋí bá ŋɔ Huɛlɛ́ mohóloniə híə́niniə ɛlɔ́áyɛ́ mə́núə́ mahánɛna ɔmá tɔ ná bəə́bu índíə́kínə.

¹²Ɔ taká, mahánɛna ɔmá nɔ ná kɔ́táka, má lɛ ndɔ bəlumininə ɔ́lɔ ɔbánɔ́ ɔ yatɛ́ ɔyɛ́á bá ndɔ sɔ́ka, mba, má ndɔ bəəŋí makɛ́nda índiə tɔ́na á Huɛlɛ́ ɔ mohóloniə uhíə́niniə.

¹³Bá ŋɔ bɔ́táyɛ́ buolí nyamaka ɔbɔ́á nɔ ndɔ kɛa, bəəŋí bá ŋɔ Huɛlɛ́ lúbúnəkə ɛlɔ́áyɛ́ yə́núə́ yɔkɛ́nana ɔ Imbə́nú Yɛɛsɛ yɛ Kilísitusu, bá ŋɔ wɛɛ́ya tuúmə híə́nəkiniə bɔkɔasɛ́á, nɔ ndɔ afana na bəə́bu na bɛndɔ bəkimə tɔ́na.

¹⁴Nɔ́yɛ́, bá ŋɔ bɛ́kálákɛna tɔ́na ɛlɔ́áyɛ́ ənú ɔkɛaka ɔwá, nɔ manyá nɔ sɛ́á bá ndɔ bənú hikiə. Bá ndɔ nɔ́yɛ́ kɛaka ɛlɔ́áyɛ́ yɛmbɛlana yɛ́ mɔlɛ́má muɛsɛ ɔwá wɔ́ Huɛlɛ́ lɛ́á uwənú ɛlɔ́á.

¹⁵Tɔ́ Huɛlɛ́ nyámáka ɛlɔ́áyɛ́ yatɛ́ yikimə ɔyɛ́á a ná bəsú índíə́ ɔyɛ́á yɛ́ ná bikimə yáyɛ́ná!