Read Tunen Kalátɛ 3 Bible Online

Kalátɛ 3 - Tunen bible

Kalátɛ 3

¹Ə́ə́! Uwənú á bɛála á bɛndɔ bá Kalátɛ, ɛ́yánɛ́ a ná bənú lə́ŋə́síə́, mbá nɔ́yɛ́ bá ná bənú Kilísitusu ínə́níə́ ɔ́mɔ́kɛ́nátɔ́ ɔ ɔmbásá.

²Nɔ́ mɛaŋɔ́á bɛ́kámɔ́sɔ́ná tə́lə́ŋu; baánɛ, nɔ ka Umbúínyi Mɔnaŋanaŋa kusənə bɔkɔasɛ́á nɔ ka umbə́ndə́ bɛ́kɛakɛna ataná, nɔ ka Imbə́nú Yɛɛsɛ kusənə əə́?

³Nɔ lɛa ɔbánɔ́ bɛála əə́? Nɔ sá hɔ́ánana ɔ nɔ́yɛ́ ɔbɛ́kɛna. Yatɛ́ ɔyɛ́á nɔ ná botólíə́ ɔ tɔ́mbákɛna Umbúínyi wɔ́ Huɛlɛ́, nɔ ndɔ siə isíŋáka ɔ yɛɛ́ta ɔhɔ́nala na iŋgínə́ yɛ bənú bɛ́múɛ́tɛ́ əə́?

⁴Mɛ ndɔ fɛka ɔwá nɔ sa nɔ́yɛ́ niŋə ndəmə, nɔ́yɛ́ yɛ́ sá ósó ɔbáá ndəmə.

⁵Wɛ́ɛ́yɛ́ ɔwá a ndɔ bənú Umbúínyi índiə, ɔwá a ndɔ bisə́mə́tə́ kɛa uwənú ətíə́, a ndɔ nɔ́yɛ́ kɛa bɔkɔasɛ́á nɔ ndɔ umbə́ndə́ bɛ́kɛna ataná, nɔ ka Imbə́nú Yɛɛsɛ kusənə, nɔ ná lumínínə əə́?

⁶Ábɛlaháma a ka nɛ́áyɛ́á nɛkɔmba tálɛ́na á Huɛlɛ́, ɔ́ ɛlɔ́áyɛ́ nɔ́yɛ́ a ná wɛɛ́ya ɛtá ɛ́sɛ́á wataká.

⁷Nɔ́ nɔ́yɛ́ ɔ́kɔ́ muɛsɛ ɔwá; bááyɛ́ bəkimə ɔbá bá ná lúmínínə, bəə́bu bá lɛ́á ɛndɛkɛ yɛ Ábɛlaháma.

⁸Mətilə má ka ínə́kiniə ɔwá, bááyɛ́ ɔbá bá lɛ bá Bɛyútɛnɛ, Huɛlɛ́ a ŋɔ bəə́bu híə́niə bátaká ɔ ɔwayɛ́ busíə́ ɔwɔŋgɔkɔnɔ yə́búə́ ilumininə. Ɔ́ ɛlɔ́áyɛ́ nɔ́yɛ́ a ná Ábɛlaháma yɛ́ɛyɛ Imbə́nú Yɛɛsɛ nɔŋɔ́nákɛ́ná a sɛ́á: «Huɛlɛ́ a ŋɔ mɔnɔŋɔ məkimə má misí sana ɔ tɔ́mbákɛna na aŋɔ́á.»

⁹Nɔ́yɛ́, Ábɛlaháma, a ka lumininə, Huɛlɛ́ tɔ́na a ka wɛɛ́ya sana, bááyɛ́ ɔbá bá ná lúmínínə, Huɛlɛ́ a ndɔ bəə́bu sana ɛ́sɛ́á wɛɛ́ya.

¹⁰Ɔ taká, Huɛlɛ́ a ndɔ bááyɛ́ hɔkɛna na indimisi ɔbá bá ndɔ umbə́ndə́ ɔ́ŋgɔ. Bɔkɔasɛ́á Mətilə má ndɔ laa má sɛ́á: «Bááyɛ́ ɔbá bá lɛ ndɔ bɛ́kɛna ikúílíə́kimə yatɛ́ ɔyɛ́á umbə́ndə́ wɔ́ ndɔ laa, Huɛlɛ́ a ndɔ bəə́bu hɔkɛna.»

¹¹Yɛ́ lɛa ɔ́kɔ́nɔ́tɔ́ tə́lə́ŋu ɔwá; ata mɔndɔ a lɛ bá wataká á Huɛlɛ́ busíə́ ɔ tɔ́mbákɛna na umbə́ndə́ bɔkɔasɛ́á, wɛ́ɛ́yɛ́ ɔwá a lɛ́á wataká ɔ tɔ́mbákɛna na ilumininə, a ŋɔ bá na buɔmɔ́.

¹²Mba, umbə́ndə́ na ilumininə yɛ́ lɛ bá bɔɔ́la bɔ́mɔtɛ́. Ɔ taká, Mətilə má ndɔ laa tɔ́na má sɛ́á: «Wɛ́ɛ́yɛ́ ɔwá a ndɔ umbə́ndə́ bɛ́kɛna, a ŋɔ buɔmɔ́ kusinə ɔ tɔ́mbákɛna na muítə.»

¹³Kilísitusu a ka bəsú háŋɔ́na ɔ indimisi yɛ umbə́ndə́, nɔ́yɛ́, Huɛlɛ́ a ka wɛɛ́ya sɔ́kɔ́tɛa na indimisi ɛlɔ́áyɛ́ əsú bɔkɔasɛ́á, Mətilə má ndɔ laa má sɛ́á: «Indimisi na wɛ́ɛ́yɛ́ ɔwá a lɛ́á lɔ́ŋátɔ́ ɔ bɔlɛ́á.»

¹⁴Nɔ́yɛ́, ɔ́ ɔkɛaka ɔwá, bááyɛ́ ɔbá bá lɛ bá Bɛyútɛnɛ bá əbú ɛsɔ́nɔ kusə́nə ɔyɛ́á Huɛlɛ́ a ná Ábɛlaháma bílíhə́níə́ ɔ tɔ́mbákɛna na Yə́susu Kilísitusu, nɔ́yɛ́ bəsú tɔ́na, ɔ tɔ́mbákɛna na ilumininə, tɔ́ umbúínyi kusə́nə ɔwá Huɛlɛ́ a ná bílíhə́níə́.

¹⁵Á bənísə́, tɔ́ iŋgətí ɛ́tɛ́na ɔ buɔmɔ́ ɔbɔ́á tɔ ndɔ niŋə. Ábá mɔndɔ a ná hɛtɔnyɛ́ tíkə́ ɔhɛ́á hɛ́ lɛ́á hɔ́ánánátɔ́, mɔndɔ muinə́muinə́ a sa ósó ɔ bɔkɔa ɔkɔnda, mbá ata uhúliə.

¹⁶Mba Huɛlɛ́ a ka nɛ́áyɛ́á nɛkaka hákɛna ɛlɔ́áyɛ́ Ábɛlaháma na yayɛ́á ɛndɛkɛ. Mətilə má lɛ ndɔ laa ɔwá, na ɛndɛkɛ yɛ bunə́tɔ: Yɛ́ kɛaka ɛlaka ɛlɔ́áyɛ́ bɛndɔ bəəŋí. Mba yɛ́ lɛa ɔbánɔ́ ɛlɔ́áyɛ́ hɛtɔŋɔtɔ́ŋɔ́ hɛ́ nɛ́áyɛ́á nikúlə, á Kilísitusu.

¹⁷Náana mɛ ndɔ siə ɔlaa: Huɛlɛ́ a ka taŋa ɔ hɛtɔnyɛ́ hɛ́ hɔ́ánánátɔ́ uwíndiə. Umbə́ndə́ ɔwá wɔ́ ná tíkə́ húlə əlimə yɛ bɛbɔ́ɛ́yɛa bínisə bɛ́ tuɔŋɔ na moómo álálɔ́, wɔ́ sa óso ɔ hiítə uhúə́siə; Yɛ́ sá bá nɔ́yɛ́, nɛkaka nɛ́ Huɛlɛ́ nɛ́ lɛa ndəmə.

¹⁸Mba ábá bá ndɔ ilíkinənə kusənə ɔ tɔ́mbákɛna na umbə́ndə́, há yɛ́ lɛ bá tɔ́na ɔ tɔ́mbákɛna na nɛkaka. Ɔ taká ɔ tɔ́mbákɛna na nɛkaka á Huɛlɛ́ a ná Ábɛlaháma yɛ́ɛ́yɛ́ nyɔnɔ yɛ niəbə índíə́.

¹⁹Yatɛ́ nə́ə yɛ́ ná báá mɔsɛ́ŋɛ́ wɔ́ umbə́ndə́ əə́? Yɛ́ ka báá bɔɔ́la ɔbɔ́á bɔ́ ná bɛ́kɔ́ndá ɛlɔ́áyɛ́ tɔkɔma ɔ umənyəsiə ɔtɔ́á tɔ lɛ́á nifəŋə na uhikiə wɔ́ Huɛlɛ́, ɔkafámáká ɔ ikúíli ɔtáta ɔyɛ́á hɛtɔŋɔtɔ́ŋɔ́ hɛ́ ŋɔ ndasá ɔhɛ́á a ná bílíhə́níə́. Huɛlɛ́ a ka Mósisi umbə́ndə́ túmbiə ɔ tɔ́mbákɛna na bɛáŋgɛlɛ, ɔ mɔkátá wɔ́ mubísúmbə́niə.

²⁰Mba, wɛ́ɛ́yɛ́ mubísúmbə́niə a lɛ bámɛ́nɛ́na ɛlɔ́áyɛ́ mɔndɔ ɔmɔtɛ́, Huɛlɛ́ a lɛ bá na mubísúmbə́niə, a lɛa bíbúə́.

²¹Umbə́ndə́ wɔ́ ndɔ ayɛ́ makaka má Huɛlɛ́ nuəsiə əə́? Ɔ taká bóo! Ata wúmotí umbə́ndə́ wɔ́ bámɛnɛna ɔwá wɔ́ ndɔ buɔmɔ́ índiə, há taká yɛ́ ndɔ húlínə hɔ́ánánátɔ na umbə́ndə́.

²²Mba Mətilə má ka mɔsá mukimə híə́nəsiə yɔlɛ́ yɛ́ bɔbɛ́á ɔkɛaka ɔwá, Huɛlɛ́ a nɛkaka úndúsíníə́ ɔ tɔ́mbákɛna na nɛkɔmba nɛ́ tálɛ́nátɔ́ á Yə́susu Kilísitusu ɛlɔ́áyɛ́ bəlumininə.

²³Ubusíə́ ɔbɔ́á ikúílí yɛ́ ilumininə yɛ́ ndáfámá, umbə́ndə́ wɔ́ ka bəsú hɔkɛna ɔ ɛbɔka ɔkafámáká ikúíli ɔyɛ́á Huɛlɛ́ a bəsú yɛ́táyɛ́ ilumininə mənyə́síə́.

²⁴Nɔ́yɛ́, umbə́ndə́ wɔ́ ka bámɛ́nɛ́na wəsúə́ mutíkə ɔkɛaka ɔwá, bá bəsú híə́nə́síə́ bátaká ɔ tɔ́mbákɛna na ilumininə, ɔ bɛtátɛ́ná bɛ́ Kilísitusu.

²⁵Isíŋáka ɔwá ilumininə yɛ́ nɔ́ ndafámá, tɔ lɛ bámɛ́nɛ́ná tɔ́na ɔ matá ma nɛmanɛna nɛ́ wɛ́ɛ́yɛ́ mutíkə.

²⁶Ɔ taká, bənú bəkimə nɔ lɛa baná bá Huɛlɛ́ ɔ tɔ́mbákɛna na nɛkɔmba ɔnɛ́á nɔ lɛ́á tálɛ́nátɔ́ á Kilísitusu.

²⁷Ɛ́ɛ! Bənú bəkimə ɔbá nɔ ná nɛsɔa kusə́nə ɔ niínyə nɛ́ Kilísitusu, nɔ ka híána ɛ́sɛ́á wɛɛ́ya.

²⁸Nifəŋə nɛ́ lɛ bá tɔ́na ətíə́ yɛ mɔyútɛnɛ na mɔkɛlɛ́kɛ, ətíə́ yɛ yɔlɛ́ na ifəyí; nifəŋə nɛ́ lɛ bá ətíə́ yɛ mɛlɛ́mɛndɔ́ na muəndú. Ɔ taká nɔ lɛa bɔkɔa bɔ́mɔtɛ́ ɔ niínyə nɛ́ Yə́susu Kilísitusu.

²⁹Ábá nɔ lɛ bámɛ́nɛ́ná bá Kilísitusu, nɔ́yɛ́, yɛ́ ndɔ siə ɔlaa ɔwá, nɔ lɛa ɛndɛkɛ yɛ Ábɛlaháma, ɔwɔŋgɔkɔnɔ nɛkaka nɛ́ Huɛlɛ́, nɔ lɛa bɛtilíkinənə.