Read Tunen Kalátɛ 4 Bible Online

Kalátɛ 4 - Tunen bible

Kalátɛ 4

¹Náana mɛ ndɔ siə ɔlaa: Hata yɛ ikúíli ɔyɛ́á mɔɛtilíkinənə a nalɛ́á hɛlɔ́matɔ́, nifəŋə nɛ́ lɛ bá na wɛɛ́ya na yɔlɛ́, ɔwayɛ́ ɔwá a lɛ́á isə́lúkú yɛ bikimə.

²Mba, a lɛa ɔ matá ma nɛmanɛna nɛ́ mininí na bacɛ́kɛa bá bɛ́áyɛ́á bɛɛ́la ɔkafámáká ikúíli ɔyɛ́á yayɛ́á isə́ a ná tínímíə́.

³Ɔ uwəsú tɔ́na, ikúílí tɔ ná báá tɔlɔ́matɔ́ ɔ matá ma məŋgínə́ má misí, tɔ ka bámɛnɛna bɛɔlɛ́.

⁴Mba ɛnaka ikúíli yɛ́ bíúndúsíníə́, Huɛlɛ́ a ka wayɛ́á Mɔná lɔ́ma, wɛ́ɛ́yɛ́ ɔwá muəndú a ná bíə́nə́ bílólósólíə́tɔ́ ɔ matá ma umbə́ndə́ wɔ́ Mósisi,

⁵ɔkɛaka ɔwá a bááyɛ́ háŋɔ́ná ɔbá bá lɛ́á ɔ matá ma umbə́ndə́, na uwəsú ɔ uhíə́nəsiə baná bá Huɛlɛ́.

⁶Mba, ɛ́sɛ́á nɔ lɛ́á baná bá Huɛlɛ́, a ka Umbúínyi wɔ́ wayɛ́á Mɔná háá ɔ uwəsú mɛlɛ́má, wɔ́ ndɔ kɛa ɔwá tɔ láá tɔ sɛ́á: «Á Ába» ɔ́ niɔŋɔ́ a sɛ́á: «Á yamɛ́á Isə́».

⁷Nɔ́yɛ́, ɔ lɛ bá tɔ́na yɔlɛ́, mba ɔ lɛa mɔná; ɛ́sɛ́á mɔná, ɔ lɛa tɔ́na mɔɛtilíkinənə. Nɔ́yɛ́ yɛ́ lɛa ɔ tɔ́mbákɛna na nyɔnɔ yɛ Huɛlɛ́.

⁸Ɔ yɛ́táyɛ́ ikúílí kokóóko, ikúíli nɔ sa bá nɔ nɔ́ Huɛlɛ́ manyá, nɔ ka bámɛnɛna ɔ matá ma nɛmanɛna nɛ́ bɛhuɛlɛ́ ɔbɛ́á bɛ́ lɛ bá ɔ taká bɛhuɛlɛ́.

⁹Mba isíŋáka ɔwá nɔ ndɔ Huɛlɛ́ manya, ataná a ndɔ bənú manya, nəníə́ ɛ́kɛ nɔ ósó ɔ manyɔ ɔhíána ɔ matá ma məŋgínə́ má ɛŋaná nɛmanɛna ata mɔsɛ́ŋɛ́ əə́? Baánɛ, nɔ ndɔ siə ɔhíána tɔ́na bíə́búə́ bɛɔlɛ́ əə́?

¹⁰Nɔ ndɔ sulu hibə́təniə índiə ɔ maŋganda má mɔɔsɛ́, má miilí, má bikúílí na má tuɔŋɔ.

¹¹Mɛ báka na bɔkɔ́lɔ́ma ɔwá, ɛmɔ́kɛ́ ɔyɛ́á mɛ ná nyááká ɛlɔ́áyɛ́ ənú, yɛ́ híána buolí bɔ́ ndəmə.

¹²Á bənísə́, tɔ́kɔ́lɛ nɔ́ bítíkə́kə́ ɛ́sɛ́á mɛaŋɔ́á, ikúíli mɛ ná híáná ɛ́sɛ́á bənú, nɔ sa mɛaŋɔ́á liŋgəsiə.

¹³Nɔ ndɔ nɔ́yɛ́ manya muɛsɛ ɔwá, ikúílí yíbúsíə́ ɔyɛ́á mɛ ná bənú Imbə́nú Yɛɛsɛ nɔŋɔ́nákɛ́na, mɛ ka bá mɛ ndɔ náá.

¹⁴Yamɛ́á mɛɛ́lɔ yɛ́ sa bá yɛ́ ndɔ sinənə muɛsɛ, mba, nɔ sa mɛaŋɔ́á káha ɛ́sɛ́á áŋgɛlɛ yɛ Huɛlɛ́ ata ɛ́sɛ́á á Kilísitusu bɛ́múɛ́tɛ́.

¹⁵Nɔ ka báá na nɛhɔnɔ ɛmbáta! Yatɛ́ yɛ́ nɔ́ nda bənú fámɛ́ná isíŋáka əə́? Ɛ́ɛ! Mɛ óso ɔ yɛ́ɛyɛ imbóŋi uhíə́niniə ɔwá, ata nɔ óso ɔ nɔ́yɛ́ ɔkɛa, há nɔ ka bɛ́hánɛna ɛlɔ́áyɛ́ ámɛ.

¹⁶Mba isíŋáka, mɛ nɔ́ híána wənúə́ mubəniə bɔkɔasɛ́á mɛ nɔ́ bənú taká lɛna əə́?

¹⁷Bááyɛ́ bɛndɔ bá ndɔ bənú hikiə, mba, bá lɛ bá yə́ə́bu, bá ndɔ siə ɔbánɔ́ uwənú ɔwalɔ́na na mɛaŋɔ́á ɔkɛaka ɔwá mbá nɔ́ bəə́bu hikə́kíə́.

¹⁸Ɛ́ɛ! Yɛ́ lɛa muɛsɛ ɔbáá na ilókílókí, mbá nɔ́yɛ́ ɛlɔ́áyɛ́ buɛsɛ ɔ ikúílíə́kimə, tátá ɔ́maná ikúíli mɛ lɛ́á ɔ uwənú ətíə́.

¹⁹Á bámɛ́á baná, mɛ lɛa na busə́kə tɔ́na ɛlɔ́áyɛ́ ənú ɛ́sɛ́á muəndú ɔwá a lɛ́á ɔ ubíə́nə, ɔkafámáká ikúílí ɔyɛ́á nɔ́ ŋɔ Kilísitusu hɔ́áka.

²⁰Ɛ́ɛ! Isíŋáka mɛ lɛa na ilókí yɛ́ utuənə na bənú ɔkɛaka ɔwá, mɛ bənú hɔ́kɛ́ná ɛ́sɛ́á yɛ ndɔ bísiə bɔkɔasɛ́á, mɛ lɛ ndɔ manya ɛ́sɛ́á mɛ kɛ́áká na bənú.

²¹Nɔ́ mɛaŋɔ́á lɛ́na, uwənú ɔbá nɔ ndɔ siə umbə́ndə́ ɔwɔŋgɔ, nɔ ndɔ ɔ́kɔ yatɛ́ wútə́yí umbə́ndə́ wɔ́ ndɔ laa əə́?

²²Ɔ taká, Mətilə má ndɔ laa ɔwá, Ábɛlaháma a ka bá na baná balɛ́mɛndɔ́ báfandɛ́; ɔmɔtɛ́ ɔwá a ná bíə́nə́ na ifəyí yɛ́ muəndú, wɔmɔtɛ́ na yɔlɛ́ yɛ́ muəndú.

²³Mba, mɔná wa yɔlɛ́ yɛ́ muəndú a ka bíbíə́nə na ɛfɛka yɛ́ mɔsá, wa ifəyí yɛ́ muəndú a ka ayɛ́ bíbíə́nə ɔwɔŋgɔkɔnɔ na nɛkaka nɛ́ Huɛlɛ́.

²⁴Hííyí hiyiŋə yɛ́ lɛa na binífúnínə́ ɔ́nɔ́kɛ́nátɔ: Ɔ taká, bááyɛ́ bəəndú báfandɛ́, ɔ́ tɔtɔnyɛ́ tɔ́fandɛ́. Híbúsíə́ hɛ́ ndɔ húlínə ɔ ɔmáá wɔ́ Sináya, hɛ́ ndɔ baná bá buɔlɛ́ bíə́nə: Á Akálɛ.

²⁵Ɔ taká, ɔmáá wɔ́ Sináya wɔ́ booko ɛsalɛ yɛ́ misí yɛ Alabíə́. Ɛ́sɛ́á ikúílí ɔyɛ́á Akálɛ na bɛ́áyɛ́á bɛɔlɛ́, a lɛa hɔ́ákátɔ́ ɔ Yəlúsalɛma yɛ yɛ́ɛyɛ misí.

²⁶Mba, Yəlúsalɛma yɛ nɔɔ́mɛná yɛ́ lɛ́á ifəyí, wɛɛ́ya a lɛ́á yəsúə́ inyə́:

²⁷Ɛ́ɛ! Mətilə ma ndɔ laa má sɛ́á: «Á ɛlɛla yɛ́ muəndú bílə́nə́kə, ɔwáwɔ ɔwá ɔ sa bíə́nə, bə́lə́kíə́ miyə́mə́yə́mə́ yɛ́ nɛhɔnɔ, ɔwáwɔ ɔwá ɔ sa məsə́kə má ubíə́nə ɔ́kɔ; bɔkɔasɛ́á, muəndú wa niasátɔ́ a ŋɔ bá na baná bəəŋí yáyɛ́na wɛ́ɛ́yɛ́ ɔwá a na bá na ibə́.»

²⁸Á bənísə́, uwənú, nɔ lɛa baná bá nɛkaka ɛ́sɛ́á á Ísakɛ.

²⁹Mba hɔ́ánánátɔ́ ɛ́sɛ́á mɔná ɔwá bá ná bíə́nə́ ɔwɔŋgɔkɔnɔ ɛfɛka yɛ́ mɔndɔ, a ka bá a ndɔ wa nɛkaka nɛ́ umbúínyi mɔnaŋanaŋa təkəsə ɔ yɛ́táyɛ́ ikúílí, nɔ́yɛ́ yɛ́ nabáka tɔ́na isíŋáka.

³⁰Mba, Mətilə má ndɔ laa ɔbánɔ́ má sɛ́á: «Bulə́ yɔlɛ́ yɛ́ muəndú na wayɛ́á mɔná, ɔ taká yɛ́ sa hɔ́ánana ɔwá, mɔná wa yɔlɛ́ á ɛhálálá áfáná na wa ifəyí yɛ́ muəndú.»

³¹Nɔ́yɛ́ nə́ə á bənísə́, tɔ lɛ bámɛ́nɛ́ná baná bá yɔlɛ́ yɛ́ muəndú, mba, bá ifəyí yɛ́ muəndú.