Read Tunen Kalátɛ 5 Bible Online

Kalátɛ 5 - Tunen bible

Kalátɛ 5

¹Kilísitusu a ka bəsú sɔ́ŋɔ́na ɔkɛaka ɔwá, tɔ bámɛ́nɛ́ná taká na bukuənjə. Nɔ́ ɔ́nɛ́ná nə́ə, nɔ lɛ bɛ́níása ɔwá bá bənú híə́níə́ ɔ ɛhɔka yɛ́ buɔlɛ́.

²Ɔwámɛ á Báwolo, mɛ ndɔ bənú nɔ́yɛ́ lɛna ɔwá, ábá nɔ ná kɛ́áka bá ná bənú ándá, Kilísitusu a ŋɔ báá bɔɔ́la bɔ́ ndəmə ɛlɔ́áyɛ́ ənú.

³Mɛ ndɔ nɔ́yɛ́ manyɔ lɛna ɔ mɔndɔ mukimə, wɛ́ɛ́yɛ́ ɔwá a ŋɔ bɛ́niasa a sɛ́á bá wɛɛ́ya andá, a ná hɔ́ánána ɔ umbə́ndə́ mukimə ubítə́tə́niə.

⁴Ábá nɔ ndɔ siə nɔ sɛ́á bá bənú síə́kínə́ bátaká ɔwɔŋgɔkɔnɔ umbə́ndə́, nɔ lɛ bɛ́álɔ́nátɔ́ na Kilísitusu. Huɛlɛ́ a sa ndá bənú yayɛ́á nyɔnɔ índíə́.

⁵Uwəsú, na ilumininə ɔ tɔ́mbákɛna na Umbúínyi Mɔnaŋanaŋa, tɔ ndɔ taká táta ɔyɛ́á tɔ ndɔ nánɛna.

⁶Ɔ taká, ɛlɔ́áyɛ́ wɛ́ɛ́yɛ́ ɔwá a lɛ́á ɔ Kilísitusu, tátá buəndí mbá ata bunjuə́ bɔ́ lɛ́á na mɔsɛ́ŋɛ́, ɔ́maná ilumininə ɔyɛ́á yɛ́ ndɔ bínə́niə ɔ tɔ́mbákɛna na nibo.

⁷Nɔ ka ɛnɔ́mɛ yɛɛsɛ ɛta, ɛ́yánɛ́ a ná bənú kótíə́ ɔwá nɔ lɛ taká ɔ́kɛ́ná əə́?

⁸Yɛ́ɛ́yɛ́ ɛfɛka yɛ́ lɛ ndɔ húlínə na Huɛlɛ́ ɔwá a ndɔ bənú ɛ́lɛna.

⁹Tɛ́tɛ́á yɛ mətəkí abáka yɛ́ kɛaka ɔwá ilufə́lufə yɛ́ nyɔtáka.

¹⁰Ɔwámɛ, nɛ́ámɛ́á nɛkɔmba nɛ́ lɛa tálɛ́nátɔ́ á Isə́lúkú ɛlɔ́áyɛ́ ənú; mɛ ndɔ manya taká ɔwá, nɔ sɔ́ ŋɔ bá na ɛfɛka yinə́yinə́ yáyɛ́ná yɛ́ ámɛ. Mba wɛ́ɛ́yɛ́ ɔwá a ndɔ undumbú háá ɔ uwənú ətíə́, ata nəníə́ a lɛ́á, Huɛlɛ́ a ŋɔ wɛɛ́ya sɔ́kɔ́tɛa.

¹¹Ɛlɔ́áyɛ́ ámɛ, á bənísə́, ábá buəndí mɛ́ ndɔ nɔŋɔna, ɛlɔ́áyɛ́ yatɛ́ bá ndɔ mɛaŋɔ́á təkəsinə əə́? Ɔ taká, ɔnɔŋɔna wɔ́ ɔmbásá wɔ́ Kilísitusu wɔ́ lɛ bá tɔ́na hɛkɔma hɛbɛ́á!

¹²Nɔ́yɛ́, bááyɛ́ ɔbá bá ndɔ undumbú háá ɔ uwənú ətíə́, bá híáná tɔaka ikúílí ɛ́mɔtɛ́.

¹³Á bənísə́, Huɛlɛ́ a ka bənú ɛ́lɛakɛna ɛlɔ́áyɛ́ bukuənjə, mba, nɔ lɛ bítímínə ɔ bɔ́ɛ́yɛ́ bukuənjə ɛlɔ́áyɛ́ ɔwɔŋgɛna ɔ bilókílókí bɛ́ búə́núə́ bɔlɔŋa bɔ́ mɛɛ́lɔ. Mba, nɔ́ híkə́kə́nə́ bənú na bə́nú ɔ tɔ́mbákɛna na nibo.

¹⁴Ɔ taká, umbə́ndə́ mukimə wɔ́ ndɔ bíúndúsiniə na yɛ́ɛyɛ ɛtambá ɛ́mɔtɛ́ ɔwá: Ɔ ŋɔ wawɔ́á mukúlə́kulə hikəkiə ɛ́sɛ́á aŋɔ́á bɛ́múɛ́tɛ́.

¹⁵Mba, nɔ bɛ́tátáka, ábá nɔ ndɔ nɛ́ána, nɔ tɔ́bɔ́kɔnɔ bənú na bənú, nɔ ŋɔ bɛ́sákataka bənú na bənú.

¹⁶Mɛ ndɔ laa ɔwá nɔ bɛ́níása Umbúínyi Mɔnaŋanaŋa wɔ́ bənú kɛ́ndákána, nɔ́yɛ́ mbá nɔ sɔ́ ŋɔ bilókílókí bɛ́ yənúə́ mɛɛ́lɔ bɛ́kɛna.

¹⁷Ɔ taká bilókílókí bɛ́ mɛɛ́lɔ, bɛ́ɛ́yɛ́ bɛkɔa bɛ́fandɛ́ bɛ́ ndɔ bányána ɔkɛaka ɔwá, nɔ lɛ ósó ɔkɛa yatɛ́ ɔyɛ́á nɔ ndɔ siə.

¹⁸Mba, ábá Umbúínyi Mɔnaŋanaŋa wɔ́ ndɔ bənú kɛndana, nɔ lɛ bá tɔ́na ɔ nɛmanɛna nɛ́ umbə́ndə́.

¹⁹Abáka bɛnyɛná bɛ́ mɛɛ́lɔ bɛ́ siəkinənə: Ɛ́sɛ́á nilókóno, nibítífílə, bɛmbátámbata,

²⁰nibə́tiə nɛ́ bililí, mabɔ́á, ɛbányána, bɛɔmɔ́nɔ, ɛhɛ́tɛ́, tulóbi, biəmə́niə, kɛsalɛ́á, bɛbasɛa,

²¹məə́sə matatánɛ, uhíólo, manɛ́ákanɛaka na bɛ́ɛ́yɛ́ binə́binə́ á bɛhɔ́ánakana; mɛ ndɔ bənú mənyəsiə, ɛ́sɛ́á mɛ ná bənú nɔ́yɛ́ lákɛ́na, bááyɛ́ ɔbá bá lɛ́á na yɛ́ɛ́yɛ́ ɛnya yɛ bɔlɔŋa, bá sa ndə́fínə́ ɔ nɛmanɛna nɛ́ Huɛlɛ́.

²²Mba ɔ nifəŋə, ɔ́ bɛnyɛná bɛ́ Umbúínyi Mɔnaŋanaŋa bɛ́ɛbɛ: Nibo, nɛhɔnɔ, bumbə́nú, nisíbiniə, buɛsɛ, mɔlɛ́má wɔ́ tɔmbɔ́kɔ́tɔ, yɔkɛ́nana, ilumininə,

²³bɔbɔ́yɛ́, nɛbɛ́hálɛna; umbə́ndə́ wɔ́ lɛ bá ɔwɔŋgɔkɔnɔ yɛ́ɛ́yɛ́ ɛnya yɛ bɛkɔa.

²⁴Bááyɛ́ ɔbá bá lɛ́á ɔ bɔlatɔ́ na Kilísitusu, bá ka búə́búə́ bɔlɔŋa bɔ́ mɛɛ́lɔ kataka ɔ ɔmbásá na bilókílókí bɛ́ búə́búə́ buɔmɔ́.

²⁵Ábá tɔ ndɔ niŋə ɔwɔŋgɔkɔnɔ na Umbúínyi Mɔnaŋanaŋa, tɔ́ bɛ́níása Umbúínyi wɔ́ bəsú kɛ́ndákána.

²⁶Tɔ lɛ niə́mə kɛána, tɔ lɛ sə́mə́níə́, tɔ lɛ məə́sə matatánɛ kɛáná bəsú na bəsú.