Read Tunen Kalátɛ 6 Bible Online

Kalátɛ 6 - Tunen bible

Kalátɛ 6

¹Á bənísə́, ábá nɔ ná yámá ɔwá mɔndɔ a ná kɔɛ́na ɔ bɔbɛ́á, uwənú ɔbá nɔ lɛ́á bəlumininə, nɔ ndá wɛɛ́ya híə́níə́ ɔ taká na buyoyoní. Bənú bɛ́múɛ́tɛ́, nɔ bɛ́tátáka ɔkɛaka ɔwá, bənú tɔ́na nɔ lɛ kɔɛ́na ɔ mɔkɔ́lɛna.

²Nɔ́ mə́núə́ malɔmɔ́ ɔ́lɔ́kɛ́nána, nɔ́yɛ́ mbá nɔ umbə́ndə́ wɔ́ Kilísitusu úndúsíníə́.

³Ɔ taká, ábá mɔndɔ a ndɔ bíbə́líə́, ɔwayɛ́ ɔwá a lɛ́á bɔɔ́la bɔ́ ndəmə, wɛɛ́ya bɛ́múɛ́tɛ́ a ndɔ bínímbə.

⁴Mba, mɔndɔ tɛ́á á bísíə́línə́ ɛ́sɛ́á a ndɔ bítíkə, ábá a ná hɛkɔma yámá ɔmɔ́yɛ́ ɔhɛ́á hɛ́ ndɔ wɛɛ́ya nɛhɔnɔ índiə, hɛ́ ŋɔ báá ɛlɔ́áyɛ́ wɛɛ́ya bɛ́múɛ́tɛ́, táta ɔ iŋgətí na muinə́muinə́.

⁵Ɔ taká, muɛ́ta tɛ́á a ná hɔ́ánána ɔ ɔwayɛ́ bɔlɔmɔ́ ɔtúána.

⁶Wɛ́ɛ́yɛ́ ɔwá bá ndɔ Ɛtambá yɛ́ Huɛlɛ́ úkúniə, a ná hɔ́ánána ɔ ɛsalɛ yɛ́ máyɛ́á maasɛ məkimə ɔwafana na wɛ́ɛ́yɛ́ ɔwá a ndɔ wɛɛ́ya úkúniə.

⁷Nɔ lɛ binimbə, abáka bá lɛ Huɛlɛ́ kɛ́kɛ́lɛ́na. Ɔ taká, mɔndɔ a ŋɔ huəkə yatɛ́ ɔyɛ́á a ndɔ sɛla.

⁸Wɛ́ɛ́yɛ́ ɔwá a ndɔ sɛla ɛlɔ́áyɛ́ yayɛ́á mɛɛ́lɔ yɛ bɛ́múɛ́tɛ́, a ŋɔ huəkə yatɛ́ ɔyɛ́á mɛɛ́lɔ yɛ́ ndɔ índiə; ɔ́ bunímə́. Ɔwá a ndɔ sɛla ɛlɔ́áyɛ́ Umbúínyi Mɔnaŋanaŋa, a ŋɔ huəkə yatɛ́ ɔyɛ́á Umbúínyi wɔ́ ndɔ índiə; ɔ́ buɔmɔ́ bɔ́ ikúílíə́kimə.

⁹Tɔ lɛ tɔmbɔ́ ɔ buɛsɛ ɔkɛa; ɔ taká, ábá tɔ sá tɔmbɔ, tɔ ŋɔ huəkə ɔ ikúílí yɛɛsɛ.

¹⁰Nɔ́yɛ́, ikúílí ɔyɛ́á yɛ́ nɔ́ bəsú tíkə́nə, tɔ́ nyɔ́ɔ́kɔ ɛlɔ́áyɛ́ buɛsɛ bɔ́ bəkimə, sulusulu ɛlɔ́áyɛ́ bááyɛ́ ɔbá tɔ lɛ́á ilumininə ɛ́mɔtɛ́.

¹¹Nɔ́ siəlínə ɛ́sɛ́á bɛ́ɛbɛ bɛala bɛ́ mətilə bɛ́ lɛ́á bɛŋɛ́ŋa, na wə́míə́ mɔkátá bɛ́múɛ́tɛ́ mɛ́ ndɔ bənú tilinə.

¹²Bááyɛ́ ɔbá bá ndɔ siə ɔ uwənú uwikíniə ɔwá nɔ bɛ́ándáka, ɔ́ bɛndɔ ɔbá bá ndɔ hikiə ɔwá, bɛndɔ bá bəə́bu siəkínə́ muɛsɛ. Ɔ́ ɔkɛaka ɔwá, bá lɛ bəə́bu təkə́sə ɛlɔ́áyɛ́ ɔmbásá wɔ́ Kilísitusu.

¹³Ɔ taká, bááyɛ́ ɔbá bá ndɔ bíánda, bá lɛ ndɔ umbə́ndə́ bɛ́kɛna; bá ndɔ siə ɔbánɔ́ ɔwá, bá bənú ándáka mbá bá tuúmə kusə́nə ɛlɔ́áyɛ́ búə́núə́ buəndí.

¹⁴Ábá ɛlɔ́áyɛ́ ámɛ, bóo! Ɔ́maná ɔmbásá wɔ́ yəsúə́ Isə́lúkú á Yə́susu Kilísitusu wɔ́ lɛ́á tɔ́ámɛ́á tuúmə; ɔ tɔ́mbákɛna na muítə, ɔbáá wɔ́ misí wɔ́ lɛa wə́ə́tɔ́ ɛlɔ́áyɛ́ ámɛ, ɛ́sɛ́á mɛaŋɔ́á tɔ́na ɛlɔ́áyɛ́ ɔbáá wɔ́ misí.

¹⁵Ɔ taká, tátá buəndí ata bunjúə́ bɔ́ lɛ́á na mɔsɛ́ŋɛ́, mba bɛbɔ́tɛ́ná biɔ́sɔ.

¹⁶Búmbə́nú na iwə́mɛɛ́lɔ ɛlɔ́áyɛ́ bááyɛ́ bəkimə ɔbá bá ndɔ yámɛ́á yɔkɔ́na ɔŋgɔ, na ɛlɔ́áyɛ́ ilúkunə yɛ́ Huɛlɛ́.

¹⁷Ɔ ubotolokiə isíŋáka, mɔndɔ a lɛ mɛaŋɔ́á hɔ́mbɔ́ tɔ́na bɔkɔasɛ́á, mɛ báka na bɛndɔ́lándɔ́lá bɛ́ məsə́kə má Yə́susu ɔ ɔwámɛ mɛɛ́lɔ.

¹⁸Á bənísə́, nyɔnɔ yɛ yəsúə́ Isə́lúkú á Yə́susu Kilísitusu yɛ́ bámɛ́nɛ́ná na bənú bəkimə. Amɛna!