Read Tunen Ɛfɛ́sɛ 1 Bible Online

Ɛfɛ́sɛ 1 - Tunen bible

Ɛfɛ́sɛ 1

¹Ɔwámɛ á Báwolo ɔwá; ɔ tɔ́mbákɛna na usiə wɔ́ Huɛlɛ́, mɛ lɛa mɔsɔ́másɔma wa Yə́susu Kilísitusu, mɛ ndɔ tilinə ɔ bááyɛ́ ɔbá bá bá lɛ́á ilúkunə yɛ́ Huɛlɛ́ ɔ bɔnɔŋɔ bɔ́ Ɛfɛ́sɛ, á bəlumininə ɔbá bá lɛ́á ɔ bɔlatɔ́ na Yə́susu Kilísitusu.

²Huɛlɛ́ ɔ yəsúə́ Isə́ na Isə́lúkú á Yə́susu Kilísitusu bá bənú nyɔnɔ na bumbə́nú índíə́.

³Tɔ́ Huɛlɛ́ á Isə́ yɛ yəsúə́ Isə́lúkú á Yə́susu Kilísitusu nyamáka. A ka bəsú sana ətíə́ yɛ níə́súə́ nɛtɔana na Kilísitusu, a ka bəsú úndúsiə na məndínə́ məkimə má bɛsɔ́nɔ ɔ nɔɔ́mɛná ɛlɔ́áyɛ́ buɛsɛ bɔ́ híə́súə́ hɛtányɛ́.

⁴Nɔ́yɛ́, a ka bəsú tɛ́fa ɔ tɔ́mbákɛna na wɛɛ́ya ubusíə́ bɔ́ nɛbɔ́tɛ́ná nɛ́ misí ɔkɛaka ɔwá, tɔ báá banaŋanaŋa, ɛŋaná hɛkabalɛ tɔ́na ətíə́ yɛ nɛ́áyɛ́á nibo.

⁵A ka bɛtɛ́nɛ́mɛ́ná ɛ́ta ubusíə́ bɔ́ ikúílí ɔwá, tɔ bámɛ́nɛ́ná báyɛ́á baná bá ɔmbɛna ɔ tɔ́mbákɛna na Yə́susu Kilísitusu. A ka nɔ́yɛ́ hikəkiə na wə́yíə́ mɔlɛ́má muɛsɛ ɛlɔ́áyɛ́ əsú.

⁶Tɔ́ Huɛlɛ́ nyámáka nə́ə, a ka nɔ́yɛ́ kɛaka ɔwɔŋgɔkɔnɔ yayɛ́á nyɔnɔ yɛ tuúmə, a ka bəsú úndúsiə na yɛ́táyɛ́ nyɔnɔ bɔkɔasɛ́á, tɔ lɛa ɔ bɔlatɔ́ na wayɛ́á Mɔná wuhikiə.

⁷Ɔ tɔ́mbákɛna na nyɛmbɛ́ yɛ Kilísitusu, Huɛlɛ́ a ka bəsú hutunə, a ná bəsú mə́súə́ mabɛ́á nɛasɛ́ná tɔ́na, ɔwɔŋgɔkɔnɔ nɛbɔ́ŋɔ nɛ́ yayɛ́á nyɔnɔ.

⁸A ka bəsú yɛɛ́ta yɔkɔnɛna, a ná kɛ́áká tɔ́na ɔwá, tɔ ɛŋgɛ́lɛ́ na ɛmanya kusə́nə ɔ ɔyáyɛ́na.

⁹A ka kɛaka tɔ ná yayɛ́á ɛndɔnɔ manyá ətíə́ yɛ wə́yíə́ mɔlɛ́má muɛsɛ, a ka bɛtɛ́nɛ́mɛ́ná ɛ́ta ubusíə́ bɔ́ ikúílí ɔ nɔ́yɛ́ ufə́mə́ləniə ɔ tɔ́mbákɛna na Kilísitusu.

¹⁰Wútə́yí mɔanɔ ɔwá Huɛlɛ́ a ŋɔ hɔ́nala əlimə yɛ ikúílí wɔ́ báka ɔwá, a bɛ́ɛ́yɛ́ bikimə tɔ́á ɔbɛ́á bɛ́ lɛ́á ɔ nɔɔ́mɛná na misí ɔ nɛmanɛna nɛ́ isə́lúkú ɛmɔtɛ́, á Kilísitusu.

¹¹Ɔ uwəsú nɛtɔana na Kilísitusu, tɔ ka nioko kusənə ɔnɛ́á Huɛlɛ́ a ná bəsú bílíhə́níə́. Ɔ taká, uwəsú á Bɛyútɛnɛ, a ka bəsú tɛ́fa ubusíə́ bɔ́ ikúílí ɔwɔŋgɔkɔnɔ wə́yíə́ mɔanɔ. A ka bɛkɔa bikimə úndúsiniə ɔwɔŋgɔkɔnɔ bɛtɛ́nɛ́mɛ́ná ɔbɛ́á a ná ɛtá, a ná hikə́kíə́ tɔ́na.

¹²Uwəsú ɔbá tɔ ná báá bə́búsíə́ ɔ yə́súə́ ɛnánɛna ɔtálɛ́na á Kilísitusu, tɔ́ bɔŋɛ́ŋa bɔ́ Huɛlɛ́ nyámáka.

¹³Ɔ tɔ́mbákɛna na wɛɛ́ya, uwənú tɔ́na ɔbá nɔ lɛ bá Bɛyútɛnɛ, nɔ ka ɛtambá yɛ́ taká ɔ́kɔ́kɛna, ɔ́ Imbə́nú Yɛɛsɛ ɔyɛ́á yɛ́ ndɔ bənú nuəniə. Ɔ tɔ́mbákɛna na wɛɛ́ya, nɔ ka lumininə, nɔ́yɛ́, Huɛlɛ́ a ná bənú hibílíndíníə́ haa, ɔ́ Umbúínyi Mɔnaŋanaŋa ɔwá a ná bílíhə́níə́.

¹⁴Wííyí Umbúínyi Mɔnaŋanaŋa, ɔ́ buɛsɛ búbúsíə́ ɔ ətíə́ yɛ maasɛ ɔ ɛhálálá ɔmá tɔ ná kúsə́nə, wɔ́ ndɔ bəsú óníniə ɔwá, tɔ ŋɔ maáta kusənə ɔmá Huɛlɛ́ a ná tə́tə́níníə́ ɔ ɔwayɛ́ ilúkunə ɛnáká nihutunə nɛ́ bíúndúsíníə́. Tɔ́ bɔŋɛ́ŋa bɔ́ Huɛlɛ́ nyámáka.

¹⁵Ɔ́ Ɛlɔ́áyɛ́ bɛ́ɛ́yɛ́ bɛkɔa bikimə, ɔ botolokiə ikúílí ɔyɛ́á mɛ ná ɔ́kɔ́kɛ́ná bá ndɔ hɛ́na ɔwɔŋgɔkɔnɔ yə́núə́ ilumininə ɔ bɔlatɔ́ na Isə́lúkú á Yə́susu, níə́núə́ nibo tɔ́na na bəlumininə bəkimə,

¹⁶mɛ ndɔ Huɛlɛ́ hóliə ikúílí tɛ́á ɛlɔ́áyɛ́ ənú ɔ ikúílí mɛ ndɔ bɛ́kálɛ́na.

¹⁷Huɛlɛ́ yɛ yəsúə́ Isə́lúkú á Yə́susu Kilísitusu, á Isə́ yɛ tuúmə, á bənú ɛmanya índíə́ ɔyɛ́á yɛ́ ndɔ bənú wɛɛ́ya bɛ́kɔ́lɔmɔnɛna ɔkɛaka ɔwá nɔ wɛɛ́ya manyá taká.

¹⁸Á wə́núə́ mɔlɛ́má úbúnə́ ɔ ɛsakɛsakɛ yɛ́ yáyɛ́á isəmú ɔkɛaka ɔwá, nɔ manyá ɔ yatɛ́ yɔnɛ́nɛna a ná bənú ɛ́lɛ́ákɛ́nɛ́na, yatɛ́ yɛ́ lɛ́á nɛbɔ́ŋɔ nɛ́ tɔ́áyɛ́á tuúmə, nɛ́ ɛhálálá ɔyɛ́á nɔ ndɔ afana na banaŋanaŋa bəkimə,

¹⁹nɔ́ manyá tɔ́na ɔwá, Yatɛ́ injiŋə yɛŋɛ́ŋa a ndɔ sandɔna ɛlɔ́áyɛ́ əsú á bəlumininə; yɛ́táyɛ́ injiŋə, ɔ́ yɛ́ɛ́yɛ́ ɔyɛ́á Huɛlɛ́ a ná fə́mə́lə́níə́ na iŋgínə́ mikimə,

²⁰ɛnaka a Yə́susu huŋúə́síə́ ətíə́ yɛ bəwə́nú, a ná wɛɛ́ya tuəníníə́ ɔ ɔwayɛ́ mɔkátá wɔ́ bɛnɔ́mɛ ɔ nɔɔ́mɛná.

²¹Kilísitusu a báka tuəníníə́tɔ́ umə́ ɔ mɔlɔ́á wɔ́ nɛmanɛna nikimə, nɛ́ iŋgínə́, nɛ́ mənjiŋə, nɛ́ nɛyáyɛ́nana nikimə na mɔ́mɔtɛ́ məndínə́ má məə́nyə məkimə ɔmá bá óso ɔwɛ́lɛnɛna ɔ yɛ́ɛyɛ misí, ɔ nɔɔ́mɛná, ɔ misí yɛ yɛ́ɛyɛ ɛhanyɛ mbá ata ɔ misí tɔ́na yɛ ɔsákɔna.

²²Huɛlɛ́ a ka bɛkɔa bikimə sámbɛa ɔ matá ma makɔlɔ́ má Kilísitusu, a ná wɛɛ́ya bɛ́lɛ́na ɔ mɔlɔ́á wɔ́ bikimə ɔkɛaka ɔwá, a bámɛ́nɛ́ná mɔmanɛna wa ilúkunə yɛ́ bəlumininə.

²³Ilúkunə ɔyɛ́á yɛ́ lɛ́á yayɛ́á mɛɛ́lɔ, ɔ́ yɛ́táyɛ́ ilúkunə á Kilísitusu a lɛ́á tuənə́kínə́tɔ́, ɔwayɛ́ ɔwá a lɛ́á bɔɛ́na bukimə úndúsíə́tɔ.