Read Tunen Ɛfɛ́sɛ 2 Bible Online

Ɛfɛ́sɛ 2 - Tunen bible

Ɛfɛ́sɛ 2

¹Uwənú ɔbá nɔ ná báá wə́kúnə́tɔ́ ɛlɔ́áyɛ́ yə́núə́ mɛɔ́kɔ na mə́núə́ mabɛ́á,

²nɔ ka bá nɔ ndɔ niŋə ɛ́sɛ́á bááyɛ́ ɔbá bá ndɔ ɔŋgɛna ɔ bɛhuɛlɛ́ bɛ́ yɛ́ɛyɛ misí, á isə́lúkú yɛ mənjiŋə ɔwá a lɛ́á ɔ ətíə́ yɛ nɔɔ́mɛná na misí, wííyí umbúínyi ɔwá wɔ́ lɛ́á ɔ mɛlɛ́má yɛ́ bááyɛ́ ɔbá bá ndɔ Huɛlɛ́ nuəsiə.

³Bəsú bəkimə, tɔ ka bá tɔ́na ɛ́sɛ́á bəə́bu, tɔ ka bá tɔ ndɔ niŋə ɔwɔŋgɔkɔnɔ bilókílókí bɛ́ yəsúə́ mɛɛ́lɔ, tɔ ka bá tɔ ndɔ kɛa yatɛ́ ɔyɛ́á yəsúə́ mɛɛ́lɔ na híə́súə́ hɛtányɛ́ hɛ́ ndɔ hikiə. Nɔ́yɛ́, ɛlɔ́áyɛ́ búə́súə́ bɔlɔŋa, tɔ ka bá hɔ́ánánɛ́nátɔ́ ɔwá Huɛlɛ́ a bəsú kə́lə́sə́kíə́ ɛ́sɛ́á bááyɛ́ bəkimə.

⁴Mba, Huɛlɛ́ a lɛa mɔmbiaŋɛ wa iwə́mɛɛ́lɔ ɔwɔŋgɔkɔnɔ na nɛ́áyɛ́á nibo ɔnɛ́á a ná bəsú híkə́kíə́.

⁵A ka kɛaka tɔ ná híáná ɔ buɔmɔ́ na Kilísitusu, mbá nɔ́yɛ́ tɔ́ ná báá wə́kúnə́tɔ́ ɛlɔ́áyɛ́ yə́súə́ mɛɔ́kɔ. Ɔ tɔ́mbákɛna na nyɔnɔ á Huɛlɛ́ a ná bəsú núə́kə́níə́.

⁶A ka bəsú huŋuəsiə na Kilísitusu, a ná kɛ́áka tɔ ná tuə́nə ɔ nɔɔ́mɛná ɔ bɔlatɔ́ na Yə́susu Kilísitusu.

⁷Nɔ́yɛ́, ɔ tɔ́mbákɛna na wə́yíə́ mɔlɛ́má muɛsɛ ɛlɔ́áyɛ́ əsú ɔ bɔlatɔ́ na Yə́susu Kilísitusu, a ka hikəkiə ɔ nɛmbiaŋɛ nɛ́ ɛŋaná iŋgətí nɛ́ yayɛ́á nyɔnɔ uwinə́niə ɔ tɔɛya tɔ́ ɔsákɔna.

⁸Ɔ taká, na yayɛ́á nyɔnɔ á Huɛlɛ́ a ná bənú núə́kə́níə́ ɔ tɔ́mbákɛna na yəsúə́ ilumininə. Nɛ́ɛ́yɛ́ nibínuəniə nɛ́ lɛ ndɔ húlínə na bənú bɛ́múɛ́tɛ́, nɛ́ báka ɔbánɔ́ niəbə nɛ́ Huɛlɛ́.

⁹Nɔ́yɛ́ yɛ́ lɛ ndɔ húlínə na mə́núə́ makɛ́nda ɔkɛaka ɔwá muɛ́ta tɛ́á a bíbə́lə́kíə́.

¹⁰Ɔ taká, nɔ́yɛ́ Huɛlɛ́ a ná kɛ́áka ɛlɔ́áyɛ́ əsú, a ka bəsú buɔmɔ́ buɔ́sɔ índiə ɔ nɛtɔana na Yə́susu Kilísitusu ɛlɔ́áyɛ́ biolí bɛɛsɛ ɔbɛ́á a ná kə́tə́kíə́ ubusíə́ bɔ́ ikúílí, ɔkɛaka ɔwá tɔ bɛɛ́ta úndúsə́kíníə́.

¹¹Nɔ́yɛ́, nɔ́ bɛ́kɔ́lɔ́mɔ́ná ɛ́sɛ́á nɔ ná báá buɔnɔ́! Nɔ lɛ bá bibíə́nəkənə bɛ́ Bɛyútɛnɛ; bá ndɔ bənú sinə ɔbánɔ́ ɛ́sɛ́á binjúə́ bɛ́ bɛndɔ, mbá nɔ́yɛ́ bá ndɔ əbú bísinə ɔwá bá lɛa miəndí bɔkɔasɛ́á, bá ka bəə́bu andaka.[1]

¹²Nɔ́ bílúmíníə́ ɔwá ɔ yɛ́táyɛ́ ikúílí, nɔ ka báá álɔ́nátɔ́ na Kilísitusu, nɔ ka báá batɛká, nɔ sa bá fanɛ́nátɔ́ ɔ ilúkunə yɛ́ Huɛlɛ́ mbá ata ɔ nɛkaka, ɛŋaná yɔnɛ́nɛna, ɛŋaná Huɛlɛ́ ɔ yɛ́ɛyɛ misí yɛ bɔbɛ́á.

¹³Mba, isíŋáka, uwənú ɔbá nɔ ná báá bísúə́lə́tɔ́, ɔ bɔlatɔ́ na Yə́susu Kilísitusu, bá ka bənú nyiləliə ɔ tɔ́mbákɛna na máyɛ́á manɔ́ŋɔ́.

¹⁴Ɔ taká, wɛɛ́ya a ná bəsú bumbə́nú húlə́nínə, ɔ bááyɛ́ ɔbá bá nalɛ́á salɛ́átɔ́, a ná bəə́bu tɔ́á ilúkunə ɛ́mɔtɛ́. Ɛnaka á yayɛ́á mɛɛ́lɔ hánɛ́na, a ná ɔmbambala katáka ɔwá wɔ́ ná bá wɔ́ ndɔ bəə́bu sələniə: Á ɛhɛ́tɛ́.

¹⁵A ka umbə́ndə́ wɔ́ Bɛyútɛnɛ húə́siə, bíə́búə́ bɛtɛ́nɛ́mɛ́ná na bíə́búə́ bɛkɛndɛ́ná ɔkɛaka ɔwá, Bɛyútɛnɛ na bááyɛ́ ɔbá bá lɛ bá Bɛyútɛnɛ, bá híáná ilúkunə yɔɔ́sɔ ɔ nɛtɔana na wɛɛ́ya. Nɔ́yɛ́, a ná bumbə́nú haa,

¹⁶ɔ tɔ́mbákɛna na yayɛ́á nyɛmbɛ́ ɔ ɔmbásá, Kilísitusu a ka bəə́bu tɔa mɛɛ́lɔ ɛ́mɔtɛ́, a ná kɛ́áka bá ná ɛ́mɛ́nɛ́ná na Huɛlɛ́; a ná ɛhɛ́tɛ́ húə́síə́ ɔ uwəbú ətíə́.

¹⁷Kilísitusu a ka ndasá ɔ Imbə́nú Yɛɛsɛ yɛ bumbə́nú ɔnɔŋɔnɛna ɔ bɛndɔ bəkimə, ɔ uwənú ɔbá nɔ́ ná báá bísúə́lə́tɔ, na bááyɛ́ ɔbá bá lɛ́á hoóyi.

¹⁸Ɔ tɔ́mbákɛna na wɛɛ́ya, bəsú bəkimə tɔ óso ɔtɛ́nɛ́ma á Huɛlɛ́ Isə́ busíə́, nyɔnɔ na wútə́yí Umbúínyi Mɔnaŋanaŋa úmotí.

¹⁹Nɔ́yɛ́, nɔ lɛ bá tɔ́na bəkiníə́nú mbá ata bituəniniə; nɔ lɛa hɔ́ánánɛ́nátɔ́ ɔ ɛhálálá ɛ́mɔtɛ́ na banaŋanaŋa ɔ nɛmanɛna nɛ́ Huɛlɛ́, nɔ báka nikúlə nɛ́ Huɛlɛ́.

²⁰Bá ka bənú tɔa ɔ nɛfalaba ɔnɛ́á basɔ́másɔma na bɔhɛ́nátɔtányɛ́ bá lɛ́á nɛtɛ́kɛ́ná, muɔkɔ wɔ́ nihíkíli, á Yə́susu Kilísitusu bɛ́múɛ́tɛ́.

²¹Wɛɛ́ya a ndɔ nɛfalaba óníniə, nɛ́ bálaka tɔ́na ɔkɛaka ɔwá, nɛ́ híáná tɛ́mbɛlɛ mɛnaŋanaŋa yɔmɔ́kɛ́nátɔ́ ɛlɔ́áyɛ́ Isə́lúkú.

²²Bənú bəkimə, ɔ bɔlatɔ́ na wɛɛ́ya, á Huɛlɛ́ a ná bənú tɔ́á iŋgində́ ɔ nɛfalaba ɔkɛaka ɔwá, nɔ híáná miímə ɔyɛ́á Huɛlɛ́ a ndɔ tuənə ɔ tɔ́mbákɛna na wə́yíə́ Umbúínyi.