Read Tunen Ɛfɛ́sɛ 3 Bible Online

Ɛfɛ́sɛ 3 - Tunen bible

Ɛfɛ́sɛ 3

¹Ɔ́ ɛlɔ́áyɛ́ nɔ́yɛ́, ɔwámɛ á Báwolo ɔwá mɛ lɛ́á ɔ ɛbɔka ɛlɔ́áyɛ́ buolí bɔ́ Yə́susu Kilísitusu ɛlɔ́áyɛ́ wə́núə́ mɔsɛ́ŋɛ́, ɔ uwənú ɔbá nɔ lɛ bá Bɛyútɛnɛ[2]...

²Nɔ ka ɔ́kɔ́kɛna muɛsɛ bá ndɔ hɛ́na ɛlɔ́áyɛ́ bɔndaka ɔbɔ́á, nyɔnɔ na Huɛlɛ́, ɔkɛaka ɔwá a wə́yíə́ mɔanɔ úndúsíníə́, a ná mɛaŋɔ́á túmbíə́ ɛlɔ́áyɛ́ wə́núə́ mɔsɛ́ŋɛ́.

³Huɛlɛ́ a ka mɛaŋɔ́á mənyəsiə ɔkɛaka ɔwá mɛ wə́yíə́ mɔanɔ bulunə, mɛ nɔ́ nɔ́yɛ́ húlə ɔ uwənú ɔhɔ́lɛna.

⁴Ikúílí ɔyɛ́á nɔ ndɔ fana, nɔ óso ɔwɔ́kɔ nəníə́ mɛ ná káfámá taká ɔ ɛndɔnɔ yɛ Kilísitusu ɔmanya.

⁵Huɛlɛ́ a sa yɛ́táyɛ́ ɛndɔnɔ mənyəsiə ɔ bɛndɔ bá yííní ɛnyɔŋɔnɔ, ɛ́sɛ́á a nɔ́ húlə isíŋáka ɔ umənyəsiə ɔ tɔ́mbákɛna na Umbúínyi Mɔnaŋanaŋa ɔ basɔ́másɔma na bɔhɛ́nátɔtányɛ́ banaŋanaŋa.

⁶Ɔ tɔ́mbákɛna na Imbə́nú Yɛɛsɛ, isíŋáka, bááyɛ́ ɔbá bá lɛ bá Bɛyútɛnɛ, bá lɛa hɔ́ánánátɔ́ ɔ ilíkinənə ɔwafana na Bɛyútɛnɛ, ɔ yáyɛ́á ilúkunə, bá báka bɛláŋa bɛ́ mɛɛ́lɔ ɛmɔtɛ́ na nɛkaka ukusənə tɔ́na ɔnɛ́á Huɛlɛ́ a ná hákɛ́na ɔ bɔlatɔ́ na Yə́susu Kilísitusu.

⁷Mɛ ka híána mɔnyɛna wa Imbə́nú Yɛɛsɛ ɔ tɔ́mbákɛna na niəbə ɔnɛ́á Huɛlɛ́ a ná mɛaŋɔ́á índíə́ na wə́yíə́ mɔlɛ́má muɛsɛ, na yayɛ́á injiŋə yikimə.

⁸Ɔwámɛ ɔwá mɛ lɛ́á itifə́tifə ətíə́ yɛ bitifə́tifə bikimə bɛ́ banaŋanaŋa, mɛ ka yɛ́táyɛ́ nyɔnɔ kusənə ɔkɛaka ɔwá, mɛ bááyɛ́ ɔbá bá lɛ bá Bɛyútɛnɛ nɛbɔ́ŋɔ nɛ́ Kilísitusu nɔŋɔ́nákɛ́na ɔnɛ́á nɛ́ sa ndáhɔa.

⁹Mɛ ná hɔ́ánána ɔ mɔsá mukimə isəmú uwinə́niə, na nindínə́ tɔ́na ɔnɛ́á Huɛlɛ́ a ndɔ yayɛ́á ɛndɔnɔ fə́mə́ləniə. Ɔwayɛ́ ɔwá a lɛ́á mɔbɔ́tá wa bɔɛ́na, a ka yɛ́táyɛ́ ɛndɔnɔ bítə hata yɛ ikúílí.

¹⁰Isíŋáka, a ná hikə́kíə́ ɔwá, nyɔnɔ na ilúkunə yɛ́ Huɛlɛ́, bamanɛna na mənjiŋə má ɔmbáŋá, má káfámá ɔ ɛmanya yɛ Huɛlɛ́ ufununə ɔ ɔwayɛ́ məndínə́ ɔbánɔ́ məkimə.

¹¹Huɛlɛ́ a ka bɛtɛ́nɛ́mɛ́ná ɛ́ta ɔ bɛ́ɛ́yɛ́ bikimə ɔkɛa ubusíə́ bɔ́ nɛbɔ́tɛ́ná nɛ́ misí, ɔwɔŋgɔkɔnɔ na wə́yíə́ mɔanɔ wɔ́ ikúílíə́kimə ɔwá a ná úndúsíníə́, ɔ tɔ́mbákɛna na Yə́susu Kilísitusu ɔ yəsúə́ Isə́lúkú.

¹²Tɔ lɛa na kuənjə ɔ ɔtɛ́nɛ́ma á Huɛlɛ́ busíə́ na yɔnɛ́nɛna yikimə, ɔ nɛtɔana na Kilísitusu ɔ tɔ́mbákɛna tɔ́na na níə́súə́ nɛkɔmba ɔnɛ́á tɔ lɛ́á tálɛ́nátɔ́ ɔ ɔwayɛ́.

¹³Nɔ́yɛ́, mɛ ndɔ bənú bata ɔwá, ɛmɔ́kɛ́ ɔyɛ́á mɛ ndɔ nyáá ɛlɔ́áyɛ́ ənú, yɛ́ lɛ bənú tómbósíə́, yɛ ŋɔ báá túə́núə́ tuúmə ɔkɛaka ɔwá, nɔ manyá nəníə́ Kilísitusu a ndɔ bəsú hikiə.

¹⁴Ɔ́ ɛlɔ́áyɛ́ nɔ́yɛ́, mɛ ndɔ kiniə á Huɛlɛ́ Isə́ busíə́,

¹⁵a lɛa ɔ mɔlɔ́á wɔ́ nikúlə tɛ́á ɔ nɔɔ́mɛná na ɔ misí;

¹⁶Mɛ ndɔ wɛɛ́ya bata ɔwá, ɔwɔŋgɔkɔnɔ na nɛbɔ́ŋɔ nɛ́ tɔ́áyɛ́á tuúmə, á túə́núə́ tɔtányɛ́ óníníə́ ɔ tɔ́mbákɛna na injiŋə yɛ wə́yíə́ Umbúínyi Mɔnaŋanaŋa.

¹⁷Kilísitusu á tuənə́kínə ɔ uwənú mɛlɛ́má ɔ tɔ́mbákɛna na ilumininə. Mɛ ndɔ bata ɔwá, nɔ báá bɛ́ɔ́lɔ́kɔ́kɛ́nátɔ́, ɔ́nɛ́nátɔ́ ətíə́ yɛ nibo.

¹⁸Nɔ́yɛ́ mbá nɔ ŋɔ bá na iŋgínə́ yɛ ɔwɔ́kɔ na banaŋanaŋa bəkimə yatɛ́ yɛ́ lɛ́á mabahɔ́, bɔtatánɛ, mɔtɛ́nɛ́ na yuúndúndə yɛ́ nibo nɛ́ Kilísitusu.

¹⁹Nɔ ŋɔ óso ɔ nɛ́áyɛ́á nibo ufununə ata nɔ́yɛ́ ɛ́sɛ́á nɛ́ ná ɛmanyana yikimə yáyɛ́ná ɔkɛaka ɔwá, Huɛlɛ́ a tuənə́kínə ɔ ɔyáyɛ́na ɔ uwənú mɛlɛ́má.

²⁰A lɛa na iŋgínə́ yɛ ɔkɛa yáyɛ́ná yatɛ́ yikimə ɔyɛ́á tɔ ndɔ bata, ata ɔyɛ́á tɔ ná hɔ́ánána ɔfɛka, ɔ tɔ́mbákɛna na injiŋə ɔyɛ́á yɛ́ ndɔ nyɔɔ ɔ uwəsú nuúmə́, tɔ́ wɛɛ́ya nyamáka nə́ə.

²¹Tuúmə tɔ báá na wɛɛ́ya ətíə́ yɛ ilúkunə yɛ́ bəlumininə, ɔ tɔ́mbákɛna na Yə́susu Kilísitusu, ɛlɔ́áyɛ́ bɛnyɔŋɔnɔ bikimə, ɔ tɔɛya na tɔɛya tɔ́na. Amɛna!