Read Tunen Ɛfɛ́sɛ 4 Bible Online

Ɛfɛ́sɛ 4 - Tunen bible

Ɛfɛ́sɛ 4

¹Ɔwámɛ ɔwá mɛ lɛ́á mɔndɔ wa ɛbɔka ɔ niínyə nɛ́ Isə́lúkú bɔkɔasɛ́á, mɛ ndɔ Isə́lúkú nyɛna, mɛ ndɔ bənú bɛ́tɔ́kɔ́lɛna, uwənú ɔbá Huɛlɛ́ a ná ɛ́lɛ́ákɛ́na, nɔ́ bítíkə́kə́ hɔ́ánánátɔ́ ɔ nɛ́táyɛ́ nɛɛ́lɛna.

²Nɔ́ báá bikúílí bikimə na nɛlɛaŋɛ, bɛbɔ́yɛ́, na nisíbiniə. Nɔ́ híkə́kə́nə́ bənú na bənú na nibo nikimə.

³Nɔ́ túə́nə́ ɔ bumbə́nú bənú na bənú nɔ́yɛ́ mbá nɔ ŋɔ nɛtɔana nɛ́ Umbúínyi Mɔnaŋanaŋa tə́tə́niə.

⁴Mɛɛ́lɔ yɛ́ lɛa ɛ́mɔtɛ́, Umbúínyi tɔ́na wɔ́ lɛa úmotí, hɔ́ánánátɔ́ ɛ́sɛ́á ɛnánɛna yɛ́ lɛ́á ɛ́mɔtɛ́ ɔyɛ́á Huɛlɛ́ a ná bənú ɛ́lɛ́ákɛ́nɛ́na.

⁵Isə́lúkú yɛ́ lɛa ɛ́mɔtɛ́, ilumininə ɛ́mɔtɛ́, nɛsɔa nɛ́mɔtɛ́;

⁶Huɛlɛ́ ɛ́mɔtɛ́, á Isə́ yɛ bəkimə, ɔwá a ndɔ bikimə manɛna, a ndɔ bɛkɔa bikimə kɛa ɔ tɔ́mbákɛna na bəsú, a lɛa ɔ uwəsú nuúmə́.

⁷Mba, mɔɛ́ta tɛ́á a ka niəbə kusənə ɛ́sɛ́á Yə́susu Kilísitusu a ná híkə́kíə́ ɔ uwəsú ɔ nɛɛ́ta uwíndiə.

⁸Ɔ́ ɛlɔ́áyɛ́ nɔ́yɛ́ Mətilə má ndɔ laa má sɛ́á: «Ɛnaka a báláka ɔ ɔmbáŋá, a ka bábɛ́bɔka ákánána, a ná məəbə afákɛ́ná ɔ bɛndɔ.»[3]

⁹Mba, a ka bálaka, ɔ́ niɔŋɔ́ sɛ́á nəníə́ əə́? Nɔ́yɛ́ yɛ́ ndɔ siə ɔlaa ɔwá, a ka taŋa ɔ tukinə ɔ misí.

¹⁰Wɛ́ɛ́yɛ́ ɔwá a ná túkínə́, a lɛa wɛ́ɛ́yɛ́ tɔ́na ɔwá a ná báláka hə́ə́ní ɔ nɔɔ́mɛná ɔkɛaka ɔwá a bɔɛ́na bukimə ayɛ́na.

¹¹Wɛɛ́ya a ná mɔndɔ tɛ́á niəbə índíə́: Ɔ báaba, buolí bɔ́ basɔ́másɔma, ɔ bɔ́mɔtɛ́ bɔ́ bɔhɛ́nátɔtányɛ́, ɔ bə́ə́ní tɔ́na banɔŋɔna ɛtambá, bakɛndana ata bəkúniə.

¹²Ɔ́ nɔ́yɛ́ a ná ilúkunə yɛ́ Huɛlɛ́ tábɔ́náka ɔ ɔwayɛ́ bɔsɔ́ma uwundúsiniə ɔkɛaka ɔwá, mɛɛ́lɔ yɛ Kilísitusu yɛ́ báá ɔ́nɛ́nátɔ.

¹³Nɔ́yɛ́, bəsú bəkimə tɔ ŋɔ báá tɔanátɔ́ ɔ ətíə́ yɛ ilumininə na ɔmanya wɔ́ Mɔná wa Huɛlɛ́, tɔ ŋɔ báá bahɔ́mɔ́, tɔ ŋɔ ɔmbɔkɔ tɔ́na hɔ́ánánátɔ́ ɛ́sɛ́á Kilísitusu.

¹⁴Ɔ yɛ́ɛ́yɛ́ ikúílí, tɔ sɔ́ ŋɔ báá tɔ́na ɛ́sɛ́á baná batɛ́tɛ́á ɔbá bɛndɔ bá ndɔ húlə́ nímbə na bíə́búə́ bɛkanja, ɔbá bá ndɔ bɔsɔ́kɔ́ nənəsiə na bíə́búə́ bilə́líə́, ɔbá bá lɛ́á ɛ́sɛ́á lánjɛ ɔyɛ́á umbúínyi wɔ́ ndɔ bálana wɔ́ ndɔ lɔɔnɔ.

¹⁵Ɔ nifəŋə, ikúílí tɔ ndɔ taká hɛ́na na nibo nikimə, tɔ ŋɔ ɔmbɔkɔ ɔ bɛkɔa ɔbánɔ́ bikimə ɔkafámáká ɛ́sɛ́á Kilísitusu, ɔwayɛ́ ɔwá a lɛ́á mɔlɔ́á wɔ́ ilúkunə.

¹⁶Nyɔnɔ na wɛɛ́ya á mɛɛ́lɔ yɛ́ lɛ́á ɔ́nɛ́nátɔ́ mikimə, tɔanátɔ́ ɛ́sɛ́á abáka bɛláŋa bɛ́ mɛɛ́lɔ yɛ mɔndɔ yɛ́ bá ɔ́nɛ́nátɔ́ na máyɛ́á mɔɔŋɔ. Nɔ́yɛ́, abáka mɛɛ́lɔ yɛ́ ɔ́mbɔkɔ na nibo nikimə ɛ́bá ɛláŋa tɛ́á yɛ́ ndɔ bɔ́áyɛ́á bɔsɔ́ma úndúsiniə.

¹⁷Náana mɛ ndɔ ɛ́mbɛ́na ɔ uwənú ɔlɛna ɔ niínyə nɛ́ Isə́lúkú ɔwá; nɔ lɛ bítíkə́ tɔ́na ɛ́sɛ́á balɛmanyáhuɛlɛ́ ɔbá yəbúə́ ɛmanya yɛ́ ndɔ bəə́bu ákánana ɔ bɛkɔa bɛ́ ndəmə.

¹⁸Mə́búə́ məbílúmíniə má lɛa ɛ́sɛ́á ibínə́binə, bá lɛ bá na buɔmɔ́ ɔ buɔ́sɔ ɔbɔ́á Huɛlɛ́ a ndɔ índiənə bɔkɔasɛ́á, bá lɛ balɛmanyá, yə́búə́ mɛlɛ́má yɛ́ báka natákátɔ́ ɛ́sɛ́á muɔkɔ.

¹⁹Bá ka ɛsɛ́má sətiə, bá ka yəbúə́ mɛɛ́lɔ hánɛna ɔ bɛkɔa bɛbɛ́á, ɔkafámáká ɔ ɔkɛa há bɛkɔa bɛ́ monyókólí.

²⁰Tátá nɔ́yɛ́ nɔ́ ná ɔ́kɔ́náka ɔ yatɛ́ ɔyɛ́á Kilísitusu a ná úkúnə́kíə́.

²¹Nɔ ka ɔ́kɔ́kɛna muɛsɛ ɛ́sɛ́á bá ná hɔ́kɛ́na ɛlɔ́áyɛ́ ayɛ́, uwənú ɔbá nɔ lɛ́á bəlumininə, bá ka bənú bɛkɔa bɛ́ taká úkúnəkiə ɔbɛ́á a ná fə́mə́lə́kə́níə́.

²²Nɔ́yɛ́, nɔ́ nibítíkə nɛ́ buɔnɔ́ bɛ́sáŋɔ́ná ɛlɔ́áyɛ́ bilókílókí ɔbɛ́á bɛ́ ná bá bɛ́ ndɔ bənú nímbə, bɛ́ búə́núə́ buɔmɔ́ nənəsəkiə.

²³Nɔ́ wə́núə́ mɔlɛ́má na híə́núə́ hɛtányɛ́ kɔŋɔna, nɔ́ bílúmə́kíníə́ á bɛkɔa biɔ́sɔ.

²⁴Nɔ́ ɔ́ŋgɔ́kɛ́na ɔ nibítíkə niɔ́sɔ ɔnɛ́á Huɛlɛ́ a ná tínímíə́ ɔkɛaka ɔwá, nɛ́ báá ɛ́sɛ́á nɛ́áyɛ, nɛ́táyɛ́ nibítíkə nɛ́ lɛa tɛ́nɛ́mátɔ́ taká, nɛ́ báka naŋátɔ́ hɔ́ánánátɔ, Huɛlɛ́ a ndɔ nɛɛ́ta hikiə.

²⁵Ɛlɔ́áyɛ́ nɔ́yɛ́, nɔ́ bɛkanja niása: Mɔɛ́ta tɛ́á á mukúlə́kulə hɔ́kɛ́na há taká bɔkɔasɛ́á, tɔ báka bəsú bəkimə bɛláŋa bɛ́ mɛɛ́lɔ ɛ́mɔtɛ́.

²⁶Ɛ́bá hilóbi hɛ́ ná aŋɔ́á túáná, ɔ lɛ kɔɛ́na ɔ bɔbɛ́á[4], yosíə́ mɔlɛ́má ubusíə́ ɔbɔ́á hiɔtɔ́tɔ́ hɛ́ kásíána.

²⁷Nɔ lɛ ihə́lí níása ɔwá Sátana a bənú mamɛna.

²⁸Wɛ́ɛ́yɛ́ ɔwá a ná bá a ndɔ óbo, á buíbi niása; mba, á nyɔ́ɔ́kɔ́ na máyɛ́á makátá ɔkɛaka ɔwá, a ŋguɛtɛ yɛ buɔsɛ́ kúsə́nə, mbá a bááyɛ́ ɔ́lɔ́kɛ́na tɔ́na ɔbá bá lɛ́á ɔ nɛsɔ́ka.

²⁹Ata ɛtambá yɛbɛ́á ɛ́mɔtɛ́ yɛ́ sá hɔ́ánana ɔfáma ɔ uwənú munuə, mba, nɔ́ fə́mə́lə́kə́níə́ á bɛtambá ɔbɛ́á bɛ́ ndɔ bááyɛ́ óníniə ɔbá bá ndɔ bənú ɔ́kɔ.

³⁰Nɔ lɛ Umbúínyi Mɔnaŋanaŋa líŋgə́síə́; á Huɛlɛ́ a ná bənú índíə́ ɛ́sɛ́á hibílíndíníə́ ɔwá, nɔ lɛa báyɛ ɛlɔ́áyɛ́ buɔsɛ́ bɔ́ nihutunə.

³¹Nɔ́ məliŋgəsəniə húlíə́ ɔ uwənú mɔlɛ́má, bɛkɔa bɛ́ məsə́kə ná hilóbi, biɔmɔ́nɔ na bɛkɔ́bálɛ́; nɔ́ bɛ́ɛ́yɛ́ bikimə húə́síə́ ɔ uwənú ətíə́, nɔ lɛ ŋgásɔ́bɔ́á.

³²Nɔ́ bə́ə́ní yə́kúbúə́kíə́, nɔ́ bá na iwə́mɛɛ́lɔ ɛlɔ́áyɛ́ bəkúlə́kulə, nɔ́ nɛasákɛ́náná ɛ́sɛ́á Huɛlɛ́ a ná bənú nɛ́ásɛ́na ɔ tɔ́mbákɛna na Kilísitusu.