Read Tunen Ɛfɛ́sɛ 5 Bible Online

Ɛfɛ́sɛ 5 - Tunen bible

Ɛfɛ́sɛ 5

¹Isíŋáka, ɛ́sɛ́á nɔ lɛ́á baná bá Huɛlɛ́ ɔbá a ndɔ hikiə, nɔ́ ɔ́ŋgɔ́kɛ́na ɔ ɔwayɛ́ iŋgətí.

²Nɔ́ niŋə́kə́ ətíə́ yɛ nibo ɛ́sɛ́á Kilísitusu a ná bəsú híkə́kíə́, a ná bɔ́áyɛ́á buɔmɔ́ índíə́ ɛlɔ́áyɛ́ əsú ɔkɛaka ɔwá, a wə́ə́ ɛ́sɛ́á nɛhánɛna nɛ́ inumbí yɛɛsɛ ɔyɛ́á Huɛlɛ́ a ndɔ hikiə.

³Isíŋáka, nɔ báka ilúkunə yɛ́ Huɛlɛ́, ɛlɔ́áyɛ́ nɔ́yɛ́, nɔ lɛ bəəndú siə, nɔ lɛ yɛ́ɛ́yɛ́ ɛnya yɛ bɛ́mɔtɛ́ bɛkɔa bɛbɛ́á kɛa, nɔyɛ́ yɛ́ sá hɔ́ánana ɔ ɔbáá ɔ uwənú ətíə́ ɔwá, nɔ niísə ata bilókílókí hákɛ́na ɔ bɛɛ́la bɛ́ bɛndɔ.

⁴Yɛ́ sá hɔ́ánana ɔwá nɔ bɛtambá bɛbɛ́á bɛ́ məhilə́ fə́mə́lə́kə́níə́ mbá ata bilə́kə́tə́, ɔ nifəŋə, nɔ́ Huɛlɛ́ mohóloniə híə́níníə́ ɔ yatɛ́ yikimə ɔyɛ́á a ná kɛ́áka.

⁵Nɔ́ nɔ́yɛ́ manyá muɛsɛ ɔ taká ɔwá, bɛndɔ bá nɛbambɛa, bá nibítífílə, bá yoŋóŋí, bá bililí ɔbɛ́ɔ́lɔ́kɛna na bááyɛ́ ɔbá bá ndɔ yɛ́ɛ́yɛ́ ɛnya yɛ bɛkɔa bɛbɛ́á kɛa, bá sa ndá nioko kusə́nə ɔ nɛmanɛna nɛ́ Kilísitusu na nɛ́ Huɛlɛ́.

⁶Mɔndɔ a lɛ bənú nə́nə́síə́ na bɛtambá bɛ́ mənímbə́nə́. Ɔ́ yɛ́ɛ́yɛ́ ɛnya yɛ bɛkɔa bɛbɛ́á bɛ́ ndɔ Huɛlɛ́ liŋgəsiə, a ŋɔ bááyɛ́ liŋinə ɔbá bá lɛ ndɔ wɛɛ́ya ɔ́kɛ́na.

⁷Nɔ́yɛ́, nɔ lɛ yɛ́ɛ́yɛ́ ɛnya yɛ bɛndɔ bɛ́bábɛ́na.

⁸Nɔ ka báá buɔnɔ́ ɔ ibínə́binə nuúmə́; isíŋáka, nɔ lɛa ətíə́ yɛ isəmú bɔkɔasɛ́á, nɔ báka ɔ bɔlatɔ́ na Isə́lúkú. Nɔ́yɛ́, nɔ́ bítíkə́kə́ ɛ́sɛ́á baná ɔbá bá lɛ́á ɔ ətíə́ yɛ isəmú.

⁹Ɔ taká, isəmú yɛ́ ndɔ bɛkɔa bɛɛsɛ bikimə húlə́nə, bɛkɔa bɛ́ tɛ́nɛ́mátɔ́ na bɛ́ taká.

¹⁰Nɔ́ ányá ɔ bɛkɔa ubúlúnə ɔbɛ́á Isə́lúkú a ndɔ hikiə.

¹¹Nɔ lɛ bɛ́látɛ́tíáná na bááyɛ́ ɔbá bá ndɔ nyɔɔ á bɛkɔa bɛ́ ibínə́binə, bɛ́ ɛŋaná mɔsɛ́ŋɛ́; ɔ nifəŋə, nɔ́ bəə́bu bɛɛ́ta búlúnə́kínə ɔ mianyɔ́.

¹²Abáka bá sɛ́máka ata ɔ bɛkɔa ɔhɔ́ɔ́ ɔbɛ́á bátáyɛ́ bɛndɔ bá ndɔ kɛa ɔ inditiə.

¹³Mba, ikúílí bá ná bɛkɔa búlúnə́kə́ ɔ mianyɔ́, abáka bá siəkinə muɛsɛ ɛ́sɛ́á bɛ́ lɛ́á.

¹⁴Ɔ taká, yatɛ́ yikimə ɔyɛ́á yɛ́ ná fámálána ɔ mianyɔ́, abáka yɛ́ híána tɔ́na isəmú. Ɔ́ ɛlɔ́áyɛ́ nɔ́yɛ́ bá ná láá bá sɛ́á: «Ɔwáwɔ ɔwá ɔ lɛ́á ɔ hinó, hɔnyɔ́á, hɔalɛ́na ɔ ətíə́ yɛ bəwə́nú ɔkɛaka ɔwá, Kilísitusu á aŋɔ́á yáyɛ́á isəmú ínə́níə́.»

¹⁵Nɔ́yɛ́, nɔ manyaka ɔ́ ɛnya ɔyɛ́á nɔ ndɔ niŋə. Nɔ lɛ bítíkə́ ɛ́sɛ́á bɛála, nɔ́ bítíkə́kə́ ɛ́sɛ́á bəmənyí.

¹⁶Bɛ́ɛbɛ bikúílí bɛ́ lɛa bɛbɛ́á, nɔ́ kɛ́áka á biolí bɛɛsɛ ɛlɔ́áyɛ́ buɛsɛ, nɔ lɛ tɔmbɔ.

¹⁷Nɔ́yɛ́, nɔ lɛ híáná bilə́ŋələ́ŋə, mba, nɔ ɔ́kɔ́ muɛsɛ yatɛ́ ɔyɛ́á Isə́lúkú a ndɔ hikiə ɔwá nɔ kɛ́áka.

¹⁸Nɔ lɛ híóló bɔkɔasɛ́á, abáka bɛmbátámbata bɛ́ ɔnyɛ́na bɛ́ búə́núə́ buɔmɔ́ tɛŋakɛna, mba, nɔ báá úndúə́tɔ́ na Umbúínyi Mɔnaŋanaŋa.

¹⁹Nɔ́ makɛ́nda índíə́kínə́nə́ ɔ tɔ́mbákɛna na tumboŋo, tulə́lə́ na maŋana ɔmá Umbúínyi Mɔnaŋanaŋa wɔ́ ndɔ bənú índiə; nɔ́ maáta Isə́lúkú ósókínə, nɔ́ wɛɛ́ya nyamáká na wə́núə́ mɔlɛ́má mukimə.

²⁰Nɔ́ Huɛlɛ́ á Isə́ mohóloniə híə́níníə́ ɔ niínyə nɛ́ yəsúə́ Isə́lúkú á Yə́susu Kilísitusu, nɔ́ wɛɛ́ya mohóloniə híə́níníə́ ɔ bikúílí ɔbánɔ́ bikimə na ɔ bɛkɔa bikimə.

²¹Uwənú ɔbá nɔ ndɔ Kilísitusu kɔ́lɔ́ma, nɔ́ bílólósólíə́ ɔ busíə́ bɔ́ báaba na bə́ní.

²²Uwənú á bəəndú, mɔɛ́ta tɛ́á á bílólósólíə́ ɔ busíə́ bɔ́ yayɛ́á ibə́, ɛ́sɛ́á nɔ́ lɛ́á bílólósólíə́tɔ́ á Isə́lúkú busíə́.

²³Ɔ taká, á ibə́ á lɛ́á isə́lúkú yɛ muəndú ɛ́sɛ́á Kilísitusu á ayɛ́ lɛ́á isə́lúkú yɛ ilúkunə yɛ́ Huɛlɛ́. Ɔwayɛ́ ɔwá a lɛ́á munuəniə wa ilúkunə, ɔ yayɛ́á mɛɛ́lɔ.

²⁴Ɛ́sɛ́á ilúkunə yɛ́ lɛ́á bílólósólíə́tɔ́ á Kilísitusu, ɛlɔ́áyɛ́ nɔ́yɛ́, bəəndú tɔ́ná bá ná hɔ́ánáná ubílólosoliə ɔ bɛkɔa ɔbánɔ́ bikimə ɔ busíə́ bɔ́ bíə́búə́ bibə́.

²⁵Uwənú á bibə́, nɔ́ bə́núə́ bəəndú híkə́kíə́ ɛ́sɛ́á Kilísitusu á ná ilúkunə yɛ́ Huɛlɛ́ híkə́kíə́, a ná wínə́ tɔ́na ɛlɔ́áyɛ́ ayɛ́.

²⁶A ka nɔ́yɛ́ kɛaka ɔkɛaka ɔwá, a yɛɛ́ta híə́nə́síə́ yɛnaŋanaŋa. A ná yɛɛ́ta nəŋə́síə́ na mənífə́ ɔ tɔ́mbákɛna na Ɛtambá.

²⁷Nɔ́yɛ́, a ka yɛɛ́ta fə́mə́ləniə ɛlɔ́áyɛ́ ayɛ́ bɔkɔasɛ́á, a ka hikəkiə ɔwá, yɛ́ báá ɔwayɛ́ busíə́ na tuúmə, yɛ́ báá ɛŋaná hɛkabalɛ, ɛŋaná məhilə́; a ka hikəkiə tɔ́na ɔwá yáyɛ́á ilúkunə yɛ́ báá yɛnaŋanaŋa, ɛŋaná hɛkɔma.

²⁸Ɔ́ nɔ́yɛ́ á ibə́ á ná hɔ́ánána ɔ wayɛ́á muəndú uhikiə ɛ́sɛ́á wɛɛ́ya bɛ́múɛ́tɛ́. Wɛ́ɛ́yɛ́ ɔwá ndɔ wayɛ́á muəndú hikiə, a ndɔ bíhíkiə wɛɛ́ya bɛ́múɛ́tɛ́.

²⁹Ɔ taká, ata mɔndɔ a sa ndá yayɛ́á mɛɛ́lɔ yɛ bɛ́múɛ́tɛ́ bánya; ɔ nifəŋə, a mɛɛ́ta lúkə́kə, a mɛɛ́ta sókóbokiə ɛ́sɛ́á abáka Kilísitusu a nɔ́yɛ́ kɛaka ɛlɔ́áyɛ́ yáyɛ́á ilúkunə.

³⁰Ɔ taká, tɔ báka bəsú bəkimə bɛláŋa bɛ́ yayɛ́á mɛɛ́lɔ.

³¹Ɔ́ ɛlɔ́áyɛ́ nɔ́yɛ́, mɔndɔ a ŋɔ yayɛ́á isə́ na yayɛ́á inyə́ tíkə, a ŋɔ bɛ́ɔ́lɔ́kɔkɛna á wayɛ́á muəndú, bəə́bu báfandɛ́ bá ŋɔ bámɛnɛna mɔndɔ ɔmɔtɛ́.[5]

³²Yɛ́ɛyɛ ɛtambá yɛ́ lɛa ɛndɔnɔ yɛ lɛmákátɔ. Ɔwámɛ, mɛ ndɔ laa ɔwá, yɛ́ ndɔ Kilísitusu sinə na ilúkunə.

³³Nɔ́yɛ́ yɛ́ lɛ́á tɔ́na ɛlɔ́áyɛ́ bənú bɛ́múɛ́tɛ́. Mɔɛ́ta tɛ́á, á wayɛ́á muəndú híkə́kíə́ ɛ́sɛ́á wɛɛ́ya bɛ́múɛ́tɛ́, muəndú tɔ́na a ná hɔ́ánáná á yayɛ́á ibə́ bə́tə́kíə́.