Read Tunen Ɛfɛ́sɛ 6 Bible Online

Ɛfɛ́sɛ 6 - Tunen bible

Ɛfɛ́sɛ 6

¹Uwənú á baná, nɔ́ bíə́núə́ bisə́ ɔ́kɔ́kɛ́nɛ́na, nɔ́yɛ́ yɛ́ lɛ́á muɛsɛ ɔ busíə́ bɔ́ Isə́lúkú.

²Bə́tə́kíə́ yáwɔ́á isə́ na yáwɔ́á inyə́, ɔ́ Umbə́ndə́ wúbúsíə́ ɔwá wɔ́ lɛ́á ɔŋgɔ́nɔ́tɔ́ na nɛkaka:

³Ɔkɛaka ɔwá ɔ niŋə́kə́ muɛsɛ mbá ɔ ŋɔ bá tɔ́na na tunó tɔtatánɛ ɔ misí.

⁴Uwənú tɔ́na á bisə́, nɔ lɛ baná híə́nə́síə́ bikə́tə́, nɔ́ bəə́bu tábɔ́náka, nɔ́ bəə́bu lɛhaka, nɔ́ bəə́bu mbóŋókíə́ tɔ́na ɛ́sɛ́á Isə́lúkú a ndɔ siə.

⁵Uwənú á bɛɔlɛ́, nɔ́ bíə́núə́ bisə́lúkú bɛ́ háha ɔ misí ɔ́kɔ́kɛ́nɛ́na na bɔkɔ́lɔ́ma, na hibə́təniə, nɔ́ bəə́bu nyɔkɛ́ná na mɔlɛ́má mukimə, ɔ́maná ɛ́sɛ́á á Kilísitusu nɔ ndɔ nyɛna.

⁶Nɔ lɛ kɛ́á ɔbánɔ́ ɔkɛaka ɔwá, bá bənú nyámáka ɔ ikúílí bá ndɔ bənú tɛ́ka, mba, nɔ́ manyá ɔwá nɔ báka bɔnyɛna bá Kilísitusu, nɔ́ bɛkɔa bikimə kɛ́áká na wə́núə́ mɔlɛ́má mukimə ɛ́sɛ́á Huɛlɛ́ a ndɔ siə.

⁷Nɔ́ bəə́bu nyɔkɛ́ná na wə́núə́ uhikiə mukimə ɔ́maná ɛ́sɛ́á á Kilísitusu nɔ ndɔ nyɛna, mba, tátá á bɛndɔ.

⁸Nɔ́ manyá muɛsɛ ɔwá, mɔndɔ tɛ́á, a bámɛnɛna ɔbánɔ́ yɔlɛ́, ata a lɛ bá yɔlɛ́, a ŋɔ mɔsábɔ́náná kusənə á Isə́lúkú busíə́ ɔwɔŋgɔkɔnɔ yatɛ́ buɛsɛ ɔbɔ́á a ná kɛ́áka.

⁹Uwənú á bisə́lúkú, nɔ́ bítíkə́kə́ muɛsɛ ɔ busíə́ bɔ́ bíə́núə́ bɛɔlɛ́, nɔ lɛ bəə́bu kɔ́áyɛ́na. Nɔ́ manyá ɔwá, ata bənú mbá ata bəə́bu, nɔ báka na Isə́lúkú ɛ́mɔtɛ́ ɔ nɔɔ́mɛná ɔyɛ́á yɛ́ lɛ ndɔ nifəŋə háá ətíə́ yɛ bɛndɔ.

¹⁰Ɔ ɔhɔ́ákɔna, nɔ́ báá ɔ́nɛ́nátɔ́ ɔ bɔlatɔ́ na yəsúə́ Isə́lúkú ətíə́ yɛ yayɛ́á injiŋə yikimə.

¹¹Nɔ́ bɛlɛŋa bɛ́ bilə́ lɛ́ŋábáka ɔbɛ́á Huɛlɛ́ a ná bənú índiə ɔkɛaka ɔwá, nɔ báá ɔ́nɛ́nátɔ́ ɔ ikúílí ɔyɛ́á Sátana a ŋɔ siəkə ɔ uwənú uyúbútə.

¹²Tátá bɛndɔ tɔ ndɔ nuəsiə, imbúínyi mɛbɛ́á tɔ ndɔ nuəsiə ɔyɛ́á yɛ́ lɛ́á ɔ ɔmbáŋá, bíə́búə́ bisə́lúkú, níə́búə́ nɛmanɛna, níə́búə́ nɛyáyɛ́nana ɔ misí yɛ ibínə́binə.

¹³Ɛlɔ́áyɛ́ nɔ́yɛ́, nɔ́ bɛlɛŋa bɛ́ bilə́ bikimə ɛ́tá ɔbɛ́á Huɛlɛ́ a ná bənú índíə́ ɔkɛaka ɔwá, nɔ lɛ tɛbɛ́ná ɛnáká hinó hɛbɛ́á hɛ́ ndáfama, əlimə yɛ ituəmə tɔ́na, nɔ ŋɔ báá ɔ́nɛ́nátɔ.

¹⁴Nɔ́yɛ́, nɔ́ bɛ́tábɔ́náka, nɔ́ báá bɛndɔ bá taká ɔyɛ́á yɛ́ lɛ́á ɛ́sɛ́á hɛlɔ́ŋa ɔ nɛlálá, nɔ́ kɛ́áka á bɛkɔa bɛ́ tɛ́nɛ́mátɔ, ábá nɔ ndɔ nɔ́yɛ́ kɛa, yɛ́ báka ɛ́sɛ́á bɔlɛŋa bɔ́ ilə́ŋú ɔbɔ́á nɔ ná bɛ́háá ɔ mɛɛ́lɔ.

¹⁵Nɔ́ bá na ilókí yɛŋɛ́ŋa yɛ́ Imbə́nú Yɛɛsɛ yɛ bumbə́nú ɔ húlə́ nɔŋɔna, yɛ́ báka ɛ́sɛ́á bɛtafɛ́ná ɔ uwənú makɔlɔ́.

¹⁶Nɔ́ ilumininə tə́tə́níə́ bikúílí bikimə ɛ́sɛ́á abáka bá ɛbásátɔkɔŋɔ́ ítiə ɔkɛaka ɔwá, yɛ́ ɛmbɔ́áŋɛ́ yɛ́ kɔnjɔ́kɔ́tɔ́ nímə́kə ɔyɛ́á Sátana a ndɔ bənú lɔ́mɛ́na.

¹⁷Nɔ́ nibínuəniə ɛtá ɛ́sɛ́á hikóŋgó hɛ́ bilə́, na Ɛtambá yɛ́ Huɛlɛ́ ɔyɛ́á yɛ́ lɛ́á ɛ́sɛ́á mɔkɔ́átá ɔwá Umbúínyi Mɔnaŋanaŋa wɔ́ ndɔ bənú índiə.

¹⁸Nɔ́ bɛ́ɛ́yɛ́ bikimə batáka á Huɛlɛ́ na mɔlɛ́má mukimə. Nɔ́ bɛ́kálákɛ́na ikúílí tɛ́á na ɔwɛmbɛ́na ɔ Umbúínyi Mɔnaŋanaŋa. Ɛlɔ́áyɛ́ nɔ́yɛ́, nɔ́ báá ɛmbɛnyɛ́ na yɔkɛ́nana. Nɔ́ bɛ́kálákɛ́na ɛlɔ́áyɛ́ banaŋanaŋa bəkimə.

¹⁹Nɔ́ bɛ́kálákɛ́ná tɔ́na ɛlɔ́áyɛ́ ámɛ ɔkɛaka ɔwá, Huɛlɛ́ a mɛaŋɔ́á tiísi yɛ bɛtambá ínə́kíníə́ ikúílí mɛ ndɔ hɔ́ɔ́, mɛ́ bá tɔ́na na nɛkɔmba ɔ ɛndɔnɔ yɛ Imbə́nú Yɛɛsɛ ɔnɔŋɔna.

²⁰Ata nɔ́yɛ́ ɛ́sɛ́á mɛ lɛ́á isíŋáka ɔ ɛbɔka, mɛ lɛa mɔsɔ́másɔma ɛlɔ́áyɛ́ yɛ́táyɛ́ Imbə́nú Yɛɛsɛ. Nɔ́yɛ́, nɔ́ Huɛlɛ́ bɛ́kálákɛ́na ɔkɛaka ɔwá mɛ hɔ́ɔ́kɔ́ na nɛkɔmba ɛ́sɛ́á yɛ́ ná hɔ́ánána.

²¹Mɛ ndɔ siə ɔwá, bənú tɔ́na nɔ manyá nəníə́ mɛ lɛ́á, yatɛ́ mɛ ndɔ kɛa. Tisíki á munísə́ ɔwá mɛ ndɔ hikiə, ɔwá a ndɔ buolí bɔ́ Isə́lúkú nyɔɔ na yɔkɛ́nana, a ŋɔ bənú məmbə́nú məkimə lakɛna.

²²Mɛ ná bənú wɛɛ́ya lɔ́mɛ́ná sulusulu ɔkɛaka ɔwá nɔ́ manyá ɛ́sɛ́á tɔ ndɔ niŋə. Ɔkɛaka tɔ́na ɔwá á yə́núə́ mɛlɛ́má óníníə́.

²³Huɛlɛ́ á Isə́ na Isə́lúkú á Yə́susu Kilísitusu bá bənísə́ bəkimə bumbə́nú, nibo na ilumininə índíə́.

²⁴Huɛlɛ́ á bááyɛ́ bəkimə nyɔnɔ índíə́ ɔbá bá ndɔ yəsúə́ Isə́lúkú á Yə́susu Kilísitusu hikiə na nibo ɔnɛ́á nɛ́ sa ndáhɔa.