Read Tunen Filíbo 1 Bible Online

Filíbo 1 - Tunen bible

Filíbo 1

¹Ɔwámɛ á Báwolo na Timotíó, bɔnyɛna bá Yə́susu Kilísitusu, ɔ banaŋanaŋa bəkimə ɔbá bá lɛ́á ɔ bɔnɔŋɔ bɔ́ Filíbo na bə́búə́ bakɛndana na bakamɛlilúkunə;

²Huɛlɛ́ á Isə́ na Isə́lúkú á Yə́susu Kilísitusu bá bənú nyɔnɔ na bumbə́nú índíə́.

³Mɛ ndɔ yamɛ́á Huɛlɛ́ mohóloniə híə́niniə ikúílí tɛ́á ɔyɛ́á mɛ ndɔ bənú kionono;

⁴Bikúílí bikimə ɔbɛ́á mɛ ndɔ bɛ́kálɛ́na ɛlɔ́áyɛ́ ənú, mɛ ndɔ nɔ́yɛ́ kɛa na nɛhɔnɔ,

⁵bɔkɔasɛ́á nɔ ndɔ nioko ɛta na bəsú ɔ Imbə́nú Yɛɛsɛ uwəkə́nəsiə ɔ busíə́ ɔ botolokiə ɔ hinó híbúsíə́ ɔndafámáká isíŋáka.

⁶Mɛ ndɔ manya muɛsɛ mɛ sɛ́á Huɛlɛ́ ɔwá a na yɛ́ɛyɛ ɛmbányɛ yɛ́ buolí bótólíə́ ɔ uwənú ətíə́, a ŋɔ buɛ́ta ákánana ɔ busíə́ ɔkafámáká ɔ ikúílí ɔyɛ́á Yə́susu Kilísitusu a ŋɔ ndahiana.

⁷Yɛ́ lɛa hɔ́ánánátɔ́ ɔwá mɛ bá na bɛ́táyɛ́ bɛtɛ́nɛ́mɛ́ná ɛlɔ́áyɛ́ bənú bəkimə. Ɔ taká, mɛ ndɔ bənú hikiə mɔŋɛ́ŋa, uwənú ɔbá nɔ lɛ́á nioko ɛtátɔ́ ɔ nyɔnɔ ɔyɛ́á Huɛlɛ́ a ná mɛaŋɔ́á índíə́ ɔ ikúílí ɔyɛ́á mɛ́ lɛ́á ɔ ɛbɔka, mbá ata ikúílí mɛ ndɔ imbóŋi híə́niə na iŋgínə́ yikimə ɛlɔ́áyɛ́ Imbə́nú Yɛɛsɛ.

⁸Ɔ taká, Huɛlɛ́ a báka wamɛ́á mumbóŋímboŋi ɔwá, mɛ ndɔ bənú bəkimə hikiə na mokokoliniə má Yə́susu Kilísitusu.

⁹Mɛ ndɔ Huɛlɛ́ bata ɔ ɔwámɛ mabɛ́kálɛ́na náana ɔwá: Níə́núə́ nibo nɛ́ áyáka ɔ ɔyáyɛ́na. Nɔ́ báá úndúə́tɔ́ na tiísi yɛ ɛmanya na nioko nɛ́ taká,

¹⁰ɔkɛaka ɔwá nɔ báá hɔ́ánánátɔ́ ɔ ubílísiə yatɛ́ ɔyɛ́á yɛ́ lɛ́á yɛɛsɛ, nɔ́yɛ́ mbá nɔ ŋɔ báá ɛŋaná bɔbɛ́á, ɛŋaná hɛkabalɛ ɛnáká Kilísitusu á ndáhiana.

¹¹Bíə́núə́ bɛnyɛná ɔbɛ́á bɛ́ ŋɔ siəkinənə, bɛ́ ŋɔ bənú bóŋósiə ɔ tɔ́mbákɛna na Yə́susu Kilísitusu, ɛlɔ́áyɛ́ tuúmə na tɔnyamáná tɔ́ Huɛlɛ́.

¹²Á bənísə́, mɛ hikəkiə mɛ sɛ́á nɔ manyá ɔwá, yatɛ́ ɔyɛ́á yɛ́ ná ndá mɛaŋɔ́á fámɛ́ná, yɛ́ ka kɛaka ɔwá Imbə́nú Yɛɛsɛ yɛ́ áyáka.

¹³Ɔ bituənínə́ na ɔ bɛbɔ́ka bikimə, bɛndɔ bá ndɔ manyá ɔwá, mɛ báka ɔ ɛbɔka ɛlɔ́áyɛ́ buolí bɔ́ Kilísitusu.

¹⁴Bənísə́ bəəŋí bá lɛa ɔ́nɛ́nɛ́nátɔ́ á Isə́lúkú bɔkɔasɛ́á, bá ndɔ Ɛtambá yɛ́ Huɛlɛ́ nɔŋɔna ɛŋaná bɔkɔ́lɔ́ma.

¹⁵Yɛ́ lɛa taká ɔwá, bɔ́mɔtɛ́ ɔ uwəbú ətíə́ bá ndɔ Kilísitusu nɔŋɔna bɔkɔasɛ́á bá ndɔ mɛaŋɔ́á bánya, bá lɛa ɔ yəmə́niə na mɛaŋɔ́á, mba, bɔ́mɔtɛ́ bá nɔŋɔnaka na mɔlɛ́má muɛsɛ.

¹⁶Bá ndɔ kɛa ɔwɔŋgɔkɔnɔ na nibo. Bá manyaka ɔwá, mɛ lɛa háha ɛlɔ́áyɛ́ imbóŋi uhíə́niə ɔ Imbə́nú Yɛɛsɛ.

¹⁷Bəəŋí bá ndɔ Kilísitusu nɔŋɔna na yəmə́niə; mə́búə́ mafɛka má lɛ bá maasɛ, bá ndɔ bɛ́kɔ́lɔmɔna ɔwá, bá ndɔ mɛaŋɔ́á məsə́kə kɔndɛna ɔ ɛbɔka.

¹⁸Nɔ́yɛ́ yɛ́ lɛ ndɔ kɛa ata bɔkɔa! Mə́búə́ mafɛka má báá ɔbánɔ́ maasɛ mbá ata mabɛ́á, Yə́susu a báka nɔŋɔ́nákátɔ́ ɔ məndínə́ məkimə. Mɛ ndɔ bílə́nə, mɛ ŋɔ bílə́nə́kə ɔ ɔyáyɛ́na.

¹⁹Ɔ taká, ɔ tɔ́mbákɛna na mə́núə́ mabɛ́kálɛ́na na ɛkamɛla yɛ́ Umbúínyi wɔ́ Yə́susu Kilísitusu, mɛ ndɔ manya ɔwá, nisúki nɛ́ bɛ́táyɛ́ bɛkɔa bikimə nɛ́ ŋɔ báá nɛ́ámɛ́á nibínuəniə;

²⁰ɔ taká, ɔ wɔŋgɔkɔnɔ yatɛ́ ɔyɛ́á mɛ ndɔ táta, ɔyɛ́á mɛ ndɔ nánɛna na iŋgínə́ yikimə tɔ́na, ata bɔkɔa bɔ́ sɔ́ ŋɔ mɛaŋɔ́á símə́siə. Mba, isíŋáka mbá ata ɔ bikúílí bikimə, ɔ tɔ́mbákɛna na yɔnɛ́nɛna yɛ́ iŋgínə́ na wə́míə́ ɔbáá mukimə, mɛ ŋɔ bɔŋɛ́ŋa bɔ́ Kilísitusu fə́mə́ləniə, mɛ báá ɔ buɔmɔ́ mbá ata wə́ə́tɔ.

²¹Ɔ taká, ábá ɛlɔ́áyɛ́ ámɛ, wə́míə́ uniŋə wɔ́ lɛa na Kilísitusu, nyɛmbɛ́ yɛ́ báka wə́míə́ mɔsɛ́ŋɛ́.

²²Mba, ábá uniŋə tɔ́na ɔ yɛ́ɛ́yɛ́ misí wɔ́ ndɔ mɛaŋɔ́á iŋgínə́ índiə ɔ buolí buɛsɛ uwundúsiniə, mɛ lɛ ndɔ manya yatɛ́ ɔyɛ́á mɛ tɛfa.

²³Mɛ lɛ ə́kə́tɔ́ ətíə́ yɛ bɛkɔa bɛ́fandɛ́, mɛ hikəkiə ɔ bɔ́ɔbɔ buɔmɔ́ utíkə ɔkɛaka ɔwá mɛ báá na Kilísitusu, ɔ́ nɔ́yɛ́ yɛ́ lɛ́á muɛsɛ ɔ ɔyáyɛ́na.

²⁴Mba, mɔsɛ́ŋɛ́ wɔ́ báka mɔŋɛ́ŋa ɛlɔ́áyɛ́ ənú ɔwá, mɛ bámɛ́nɛ́ná tɔ́na ɔ buɔmɔ́.

²⁵Ɛ́sɛ́á mɛ lɛ́á na yɛ́táyɛ́ ɛnánɛna, mɛ ndɔ manya ɔwá mɛ ŋɔ báá na bənú ɔkɛaka ɔwá, mɛ bənú ɔ́lɔ́kɛ́na ɔ nɛbɛ́nyɛ́ŋɛsa na ɔbáá ɔ nɛhɔnɔ ɔ ətíə́ yɛ ilumininə,

²⁶Nɔ́yɛ́, ɛnáká mɛ báá ɔ ɛmɛ́ŋɛ́ na bənú, nɔ ŋɔ nyɔnɔ kusənə ɔ tɔ́mbákɛna na mɛaŋɔ́á yɛ ɔbáá ɔ bɔlatɔ́ na Yə́susu Kilísitusu.

²⁷Nɔ́ bítíkə́kə́ ɔbánɔ́ na nindínə́ nɛ́ buɔmɔ́ hɔ́ánánátɔ́ ɔ Imbə́nú Yɛɛsɛ yɛ Kilísitusu ɔkɛaka ɔwá, ata mɛ nɔ ndasá mbá ata mɛ sá ndáfáma ɔ uwənú ɔndəsiəlínə, mɛ́ ɔ́kɔ́ ɔwá bɛndɔ bá ndɔ hɛ́na ɛlɔ́áyɛ́ ənú, mɛ́ ɔ́kɔ́ tɔ́na ɔwá nɔ báka ndíŋímə́tɔ́ na mɔlɛ́má úmotí, nɔ́ nɔ́áká iŋgində́ na mɔlɛ́má úmotí ɔwɔŋgɔkɔnɔ ilumininə ɔyɛ́á yɛ́ ndɔ húlínə na Imbə́nú Yɛɛsɛ,

²⁸nɔ lɛ bɛ́níása ɔwá bəəŋí bá bənú kúlúmə́kíə́, ata ɔ bɔkɔa bɔ́mɔtɛ́. Nɔ́yɛ́ yɛ́ lɛa hɛŋgɛtɛ́nɛ́á hɛ́ búə́búə́ bunímə́, uwənú, hɛ́ níə́núə́ nibínuəniə; nɔ́yɛ́ yɛ́ ndɔ húlínə na Huɛlɛ́.

²⁹Ɔ taká, Huɛlɛ́ a ka bənú bɛ́táyɛ́ bɛsɔ́nɔ índiə, tátá ɔ níə́núə́ nɛkɔmba ɔtálɛ́na ɔbánɔ́ á Kilísitusu, mba, ɔ ɛmɔ́kɛ́ ɔnyáá tɔ́na ɛlɔ́áyɛ́ ayɛ́.

³⁰Nɔ́ yɛ́táyɛ́ ituəmə nɔ́áka ɔyɛ́á nɔ ná síə́kínínə ɔ ɔwámɛ, nɔ ndɔ manya ɔwá mɛ nabáka ɔ yɛɛ́ta ɔ wákánana ɔ busíə́.