Read Tunen Filíbo 2 Bible Online

Filíbo 2 - Tunen bible

Filíbo 2

¹Ábá nɔ ka makɛ́nda má Kilísitusu kusənə, nɛ́áyɛ́á nibo nɛ́ ndɔ kɛa ɔwá nɔ́ híkə́kə́nə, ábá nɔ lɛa ɔ nɛtɔana na Umbúínyi Mɔnaŋanaŋa, nɔ ndɔ kokolinəniə na mɔlɛ́má muɛsɛ bənú na bənú,

²nɔ ndɔ mɛaŋɔ́á nɛhɔnɔ itiəsiə ɔyáyɛ́na ikúílí nɔ ndɔ niŋə ɔ yɛmɛ́nɛna. Nɔ́ bá na nibo nɛ́mɔtɛ́, mɔlɛ́má úmotí, nɔ́ nɛtɔana siə́kə.

³Nɔ lɛ bɔkɔa kɛɛ́na ɔ yəmə́niə, ata ɔ niə́mə nɛ́ ndəmə, mba, na nɛlɛaŋɛ nikimə, nɔ́ bɔsɔ́kɔ́ síə́kínə́ ɛ́sɛ́á bááyɛ́ ɔbá bá ná bənú yáyɛ́ná.

⁴Mɔndɔ a lɛ mɔsɛ́ŋɛ́ síə́ wɔ́ wɛɛ́ya bɛ́múɛ́tɛ́, mba, á wɔ́ bɔsɔ́kɔ́ bɛ́kɔ́lɔ́mɔ́kɔ́na.

⁵Nɔ́ bítíkə́kə́ nɔ́yɛ́ bənú na bənú ɛ́sɛ́á á Yə́susu Kilísitusu:

⁶Ɔwayɛ́ ɔwá a lɛ́á na bɔlɔŋa bɔ́ Huɛlɛ́, a sa hikiə ɔ bɔ́táyɛ́ bɔlɔŋa ubítə́tə́niniə ɔ bɛkɔa bikimə.

⁷Mba, a ka bɛ́sámbɔ́na, a ná ɛ́tá á bɔlɔŋa bɔ́ mɔnyɛna, a ná híáná ɛhɔ́ánakana yɛ́ bɛndɔ, bá ná wɛɛ́ya manyá tɔ́na ɛ́sɛ́á mɔndɔ,

⁸a ka bílólosoliə na yɔkɛ́nana yikimə á Huɛlɛ́ ɔkafámáká ɔ nyɛmbɛ́, a ná wínə́ tɔ́na ɔ ɔmbásá.

⁹Ɔ́ ɛlɔ́áyɛ́ nɔ́yɛ́, Huɛlɛ́ a ná wɛɛ́ya bə́líə́ ɔ yɔkɔ́ yɛŋɛ́ŋa, a ná wɛɛ́ya niínyə índíə́ ɔnɛ́á nɛ́ ná məə́nyə məkimə yáyɛ́ná

¹⁰ɔkɛaka ɔwá, ɔ niínyə nɛ́ Yə́susu, ɔ nɔɔ́mɛná, ɔ misí mbá ata ɔ misí nuúmə́, moŋgóndi məkimə má kiníə́,

¹¹minuə mikimə yɛ́ fə́mə́lə́kə́níə́ ɔwá, á Yə́susu Kilísitusu a lɛ́á Isə́lúkú ɛlɔ́áyɛ́ tuúmə tɔ́ Huɛlɛ́ á Isə́.

¹²Nɔyɛ́, á bənísə́ búhikiə, uwənú ɔbá nɔ ná báá bikúílí bikimə na yɔkɛ́nana, nɔ́ tuə́nə́ nɔyɛ́, táta ɔ́maná ɔ ikúílí ɔyɛ́á mɛ ná báá na bənú, mba, tɔ́na yáyɛ́ná ɔ ikúílí ɔyɛ́á mɛ sa ndábámɛ́nɛ́na, nɔ́ níə́núə́ nibínuəniə bɛ́kɛ́ákɛ́na na bɔkɔ́lɔ́ma, na hibə́təniə.

¹³Ɔ taká, Huɛlɛ́ a ndɔ nyɔɔ ɔ uwənú ətíə́, a ndɔ bənú híə́niə ɔwá, nɔ báá hɔ́ánánátɔ́ ɔ uhikiə na ɔkɛa yatɛ́ ɔyɛ́á yɛ́ lɛ́á tɛ́nɛ́mátɔ́, ɔwɔŋgɔkɔnɔ wə́yíə́ mɔanɔ wɔ́ bɛ́múɛ́tɛ́.

¹⁴Nɔ́ bɛkɔa bikimə kɛ́áka ɛŋaná tulúləlúlə mbá ata mitə́ŋí,

¹⁵ɔkɛaka ɔwá bá lɛ bənú hɛkɔma lumə, nɔ báá naŋátɔ́, baná bá Huɛlɛ́ ɛŋaná hɛkabalɛ ətíə́ yɛ bakanjakanja na babɛ́á bá yɛ́ɛyɛ misí. Nɔ ná hɔ́ánána ɔnɔma uwəbú ətíə́ ɛ́sɛ́á tusənji tɔ́ ɔmbáŋá,

¹⁶uwənú ɔbá nɔ ndɔ Ɛtambá yɛ́ buɔmɔ́ nɔŋɔna, ɔ́ tɔ́ámɛ tɔ́ɛ́yɛ́ á tuúmə ɛlɔ́áyɛ́ buɔsɛ́ ɔbɔ́á Kilísitusu a ŋɔ ndahíáná bɔkɔasɛ́á, mɛ sa buolí nyɔɔ mbá ata ubísúbə ɛlɔ́áyɛ́ ndəmə.

¹⁷Ata bá nɔ́ mámɛ́á manɔ́ŋɔ́ olokinə ɛ́sɛ́á bɛnamá ɔ nɛhánɛna ɔnɛ́á yə́núə́ ilumininə yɛ́ ndɔ índiə á Huɛlɛ́, mɛ lɛa na nɛhɔnɔ, mɛ ndɔ tiakala na bənú bəkimə;

¹⁸bənú tɔ́na hɔ́ánánátɔ́, nɔ́ bilənəkə, nɔ́ tiakáláká tɔ́na na mɛaŋɔ́á.

¹⁹Mɛ báka na ɛnánɛna ɔwá, mɛ bənú Timotíó lɔ́mɛ́ná ikúílí tɛ́tɛ́á na nɛkɔmba nikimə ɔ Yə́susu Kilísitusu ɔkɛaka ɔwá, məmbə́nú ɔmá má ŋɔ húlínə na bənú, má mɛaŋɔ́á óníníə́.

²⁰Ɔ taká, mɛ lɛ bá na muinə́muinə́ ɔwá a ndɔ nioko ɛta ɔ ɔwámɛ bisíóŋoli, a lɛa tɔ́na na tiísi yɛ isə́hísə́hí ɛlɔ́áyɛ́ ənú.

²¹Bəkimə bá ndɔ sinə ɔbánɔ́ ɔ yə́búə́ mɛsɛ́ŋɛ́ yɛ́ bəə́bu bɛ́múɛ́tɛ́, mba, tátá ɔ wɔ́ Yə́susu Kilísitusu.

²²Bənú bɛ́múɛ́tɛ́, nɔ ndɔ manya nəníə́ Timotíó a ná yáyɛ́á yɔkɛ́nana ínə́níə́ ɛ́sɛ́á mɔná ɔwá a lɛ́á ɔ ɛmɛ́ŋɛ́ yɛ isə́, a ka tuənə na mɛaŋɔ́á ɔ buolí bɔ́ Imbə́nú Yɛɛsɛ uyəmbələniə.

²³Ɔ ɔwayɛ́ mɛ ndɔ nánɛna ɔ uwənú ɔlɔ́mɛ́na ɛnáká mɛ bɛ́ámɛ́á bɛtɛ́nɛ́mɛ́ná mányá muɛsɛ.

²⁴Mɛ lɛa ɛ́mɛ́nɛ́nátɔ́ ɔ busíə́ bɔ́ Isə́lúkú ɔwá, mɛaŋɔ́á bɛ́múɛ́tɛ́ mɛ ŋɔ nda bənú síə́línə́ ikúílí tɛ́tɛ́á.

²⁵Mba, mɛ ná siəkínə ɔwá, mɛ bənú wamɛ́á munísə́, yámɛ́á ɛŋgɔ́áyɛ́ yɛ buolí na yɛ ituəmə á Ɛbalafolotíti tilə́síníə́, ɔwayɛ́ nɔ́ ná mɛaŋɔ́á lɔ́mɛ́ná ɔkɛaka ɔwá, a ndá mɛaŋɔ́á ɔ́lɔ́ ɔ ikúílí ɔyɛ́á mɛ ná bá na ilókí,

²⁶ɛ́sɛ́á ikúílí a ná bá na ilókí yɛ bənú bəkimə ɔ usinə, a ka bá a ndɔ sə́híniə ɛnaka nɔ ɔ́kɔ́ ɔwá a ndɔ náá.

²⁷A ka bá a ndɔ náá taká taká, hoóyi na ɔ uwə́kunə, mba, Huɛlɛ́ a ka bá na mahana ɛlɔ́áyɛ́ ayɛ́, tátá ɔ ɔwayɛ́ bíbúə́, mba, na mɛaŋɔ́á tɔ́na ɔkɛaka ɔwá, mɛ lɛ tuənə́ busə́kə na busə́kə.

²⁸Mɛ ná hútú bənú wɛɛ́ya tiləsiniə ɔkɛaka ɔwá, nɔ báá ɔ nɛhɔnɔ nɛ́ ɔwayɛ́ ɔ manyɔ́ usinə, bɔ́ámɛ́á busə́kə tɔ́na bɔ́ hɔa.

²⁹Nɔ́ wɛɛ́ya káhá muɛsɛ na nɛhɔnɔ nikimə ɛ́sɛ́á munísə́ ɔ bɔlatɔ́ na Isə́lúkú. Nɔ bá na hibə́təniə ɛlɔ́áyɛ́ bɛndɔ ɔbá bá lɛ́á ɛ́sɛ́á wɛɛ́ya bɔkɔasɛ́á,

³⁰a ka bá hoóyi ɔ uwínə ɔ buolí bɔ́ Kilísitusu. A ka bá ɔwá, a bɔ́áyɛ́á buɔmɔ́ nímə́síə́ ɔkɛaka ɔwá a bənú ɔ́lɔ́ ɔ buolí ɔbɔ́á nɔ sa ósó ɔkɛa ɛlɔ́áyɛ́ ámɛ.