Read Tunen Filíbo 3 Bible Online

Filíbo 3 - Tunen bible

Filíbo 3

¹Á bənísə́, isíŋáka nɔ́ bílə́nə́kə́ ɛlɔ́áyɛ́ Isə́lúkú. Yɛ́ lɛ ndɔ mɛaŋɔ́á hɔ́mbɔ ɔwá mɛ híánɔ́lɔ́ná yatɛ́ ɔyɛ́á mɛ ná táŋá utilə, yɛ́ lɛa nɔ́yɛ́ ɛlɔ́áyɛ́ uwənú uwoníniə.

²Nɔ́ mááyɛ́ mamɔ́á bítə́tə́kə́níə́, ɔ bááyɛ́ ɔbá bá ndɔ bɔbɛ́á kɛa na bɛndɔ ɔbá bá ndɔ mɔandana mɔbɛ́á híkə.

³Ɔ taká, bəsú tɔ lɛ́á tiísi yɛ miəndí, tɔ ndɔ Huɛlɛ́ lúbúnə ɔ tɔ́mbákɛna na Umbúínyi Mɔnaŋanaŋa, níə́súə́ niə́mə nɛ́ ndɔ húlínə na Yə́susu Kilísitusu, níə́súə́ nɛkɔmba tɔ́na nɛ́ lɛ bá ɛlɔ́áyɛ́ bəsú bɛ́múɛ́tɛ́.

⁴Ata nɔ́yɛ́, mɛ lɛa na hifílí ɔ ɔwámɛ nɛkɔmba bɛ́múɛ́tɛ́. Ábá muinə́muinə́ a ndɔ fɛka ɔ nɛkɔmba ɔbɛ́tálɛ́na, mɛ óso ɔbáá na nɛ́táyɛ́ nɛkɔmba yáyɛ́ná wɛɛ́ya.

⁵Bá ka mɛaŋɔ́á ánda tunó tɔ́námanɛ́ əlimə yɛ nɛ́ámɛ́á nibíbíə́nə, mɛaŋɔ́á mɔndɛkɛ Ísilahɛ́lɛ, ɔ hikúlə hɛ́ Bɛ́nyámɛna, mɔndɛkɛ Hɛ́bɛlɛ, mɔná wa Hɛ́bɛlɛ. Mɛ ka báá tiísi yɛ Mɔfalísia ɔwá a ndɔ umbə́ndə́ bítə́tə́niə;

⁶ɛlɔ́áyɛ́ ilókí yɛŋɛ́ŋa yɛ́ ɔnyɛna wɔ́ Huɛlɛ́, mɛ ka ilúkunə yɛ́ Huɛlɛ́ təkəsəkə. Mɛ ka báá ɛŋaná hɛkabalɛ ɔwɔŋgɔkɔnɔ buɔmɔ́ bɔ́ tɛ́nɛ́mátɔ́ ɔ tɔ́mbákɛna na umbə́ndə́.

⁷Mba, bɛ́ɛ́yɛ́ bɛkɔa bikimə ɔbɛ́á bɛ́ ná bá na mɔsɛ́ŋɛ́ ɛlɔ́áyɛ́ ámɛ, mɛ ka bɛɛ́ta siəkinə bunímə́ ɛlɔ́áyɛ́ Kilísitusu.

⁸Ɛ́ɛ! Mɛ ndɔ bikimə sinə bunímə́ ɔ busíə́ bɔ́ bɔ́ɔbɔ buɛsɛ bɔŋɛ́ŋa ɔbɔ́á bɔ́ lɛ́á ɔmanya wɔ́ yamɛ́á Isə́lúkú á Yə́susu Kilísitusu. Bikimə bɛ́ ka nímínə ɛlɔ́áyɛ́ ayɛ́, mɛ ndɔ bɛɛ́ta sinə ɛ́sɛ́á bɛnáná ɔkɛaka ɔwá mɛ Kilísitusu nɔba,

⁹mɛ́ báá tɔ́na ɔ nɛtɔana nɛ́ hɔ́ánánátɔ́ na wɛɛ́ya. Mɛ lɛ bá na yamɛ́á taká yɛ bɛ́múɛ́tɛ́ ɔwɔŋgɔkɔnɔ ɔbɛ́kɛna wɔ́ umbə́ndə́. Mba, mɛ nɔ́yɛ́ lɛa na mɛɛ́ta ɔ tɔ́mbákɛna na ilumininə á Kilísitusu. Mɛ lɛa tɛ́nɛ́mátɔ́ bɔkɔasɛ́á, nɔ́yɛ́ yɛ́ ndɔ húlínə na Huɛlɛ́ ɔ tɔ́mbákɛna na ilumininə.

¹⁰Yatɛ́ yikimə ɔyɛ́á mɛ lɛ́á na ilókí, yɛ́ lɛa ɔbánɔ́ ɔmanya wɔ́ Kilísitusu na injiŋə yɛ nɛ́áyɛ́á nɛhɔŋɔa, nioko ɔwɛta ɔ ɔwayɛ́ məsə́kə, mɛ wɛɛ́ya hɔ́áká ɔ ɔwayɛ́ nyɛmbɛ́,

¹¹na ɛnánɛna ɔwá, mɛaŋɔ́á bɛ́múɛ́tɛ́ mɛ ŋɔ hɔŋɔa ɔ ətíə́ yɛ bəwə́nú.

¹²Mɛ lɛ ndɔ siə ɔlaa ɔwá mɛ nɔ́ kafámá ɔ nisúki, ataná, mɛ lɛa híánátɔ́ muɛsɛ ɔ ɔyáyɛ́na. Mba, mɛ ndɔ mɔlɛ́lá ákánana ɔ busíə́ ɔkɛaka ɔwá, mɛ ányá mɛ́ mɔsɛ́ŋɛ́ kúsə́nə́ bɔkɔasɛ́á, ɔwámɛ bɛ́múɛ́tɛ́, Yə́susu Kilísitusu a ka mɛaŋɔ́á kusənə.

¹³Á bənísə́, mɛ lɛ ndɔ fɛka ɔwá mɛ nɔ́ mútə́yí mɔsɛ́ŋɛ́ kusənə; mba mɛ ndɔ manya bɔkɔa bɔ́mɔtɛ́, mɛ ndɔ fəliə yatɛ́ ɔyɛ́á yɛ́ ná tɔmba, mɛ ányá ɔbánɔ́ ɔ usiə yatɛ́ ɔyɛ́á yɛ́ lɛ́á ɔ ɔsákɔna.

¹⁴Nɔ́yɛ́, mɛ ndɔ fáha ɔkafámáká ɔ nisúki ɔkɛaka ɔwá, mɛ mɔsɛ́ŋɛ́ kúsə́nə ɔwá Huɛlɛ́ a ndɔ bəsú ɛ́lɛna ɔ ukusənə hə́ə́ní ɔ nɔɔ́mɛná ɔ tɔ́mbákɛna na Yə́susu Kilísitusu.

¹⁵Bəsú bəkimə ɔbá tɔ lɛ́á ɔ́nɛ́nátɔ́ ɔ ilumininə, tɔ́ báá na yɛ́táyɛ́ isíóŋoli, mba, ábá ɔ yɛ́mɔtɛ́ ɛnjɛ́ka nɔ lɛa na nifəŋə nɛ́ ɔfɛka, Huɛlɛ́ a ŋɔ bənú isəmú ínə́niə.

¹⁶Ata nəníə́ bɔ́ lɛ́á, tɔ́ mɔkɛnda ákánána ɔ busíə́ ɔwá tɔ ná botólíə́.

¹⁷Á bənísə́, bənú bəkimə nɔ́ iŋgətí ɛ́tɛ́na ɔ ɔwámɛ, nɔ́ síə́kínínə ɔ bááyɛ́ ɔbá bá ndɔ bítíkə ɔwɔŋgɔkɔnɔ yɛ́táyɛ́ iŋgətí.

¹⁸Ɔ taká, mɛ ka bənú nɔ́yɛ́ lakɛna buɔnɔ́, mɛ ndɔ nɔ́yɛ́ híánɔlɔna isíŋáka na bililíní ɔ məə́sə: Bəəŋí bá ndɔ bítíkə ɛ́sɛ́á bokóyíkoyi bá ɔmbásá wɔ́ Kilísitusu.

¹⁹Níə́búə́ nisúki nɛ́ ŋɔ báá bunímə́, yəbúə́ huɛlɛ́ ɔ́ túə́búə́ tɔna, bá ndɔ bílə́nə ɔ yatɛ́ ɔyɛ́á yɛ́ óso uwəbú ɔ ɛsɛ́má uhúlə́ninə, bá ndɔ bílúmíniə há bɛkɔa bɛ́ misí.

²⁰Ɔ taká, bíə́súə́ bituənínə́ bɛ́ bɛ́múɛ́tɛ́ bɛ́ lɛa ɔ nɔɔ́mɛná, ɔhá tɔ ndɔ wəsúə́ Munuəniə táta ɔ yəsúə́ Isə́lúkú á Yə́susu Kilísitusu.

²¹A ŋɔ yə́súə́ ɛfɔnɔ́kɛ yɛ́ ɛkɔlɛ úŋúnəniə ɔkɛaka ɔwá, a yɛɛ́ta híə́níə́ ɛ́sɛ́á yayɛ́á mɛɛ́lɔ yɛ tuúmə, ɔ tɔ́mbákɛna na injiŋə ɔyɛ́á yɛ́ ndɔ wɛɛ́ya iŋgínə́ índiə ɔ bɛkɔa bikimə ɔbɛ́lɛna ɔ matá ma nɛ́áyɛ́á nɛmanɛna.