Read Tunen Filíbo 4 Bible Online

Filíbo 4 - Tunen bible

Filíbo 4

¹Ɛlɔ́áyɛ́ nɔ́yɛ́, nɔ́ ɔ́nɛ́nɛ́na ɔ nɛ́táyɛ́ nindínə́ ɔ uwənú buɔmɔ́ na Isə́lúkú. Á bámɛ́á bənísə́ búhikiə, mɛ báka na ilókí yɛ́ uwənú usinə tɔ́na, uwənú ɔbá nɔ lɛ́á nɛ́ámɛ́á nɛhɔnɔ na híə́míə́ hitəkə́ hɛ́ nɛnɔba.

²Á Əfotíə́ na Sinitísi, tɔ́kɔ́lɛ, mɛ ndɔ bənú bɛ́táŋɔ́na, nɔ́ niŋə́kə́ na yɛmɛ́nɛna ɛ́mɔtɛ́ ɔ bɔlatɔ́ na Isə́lúkú.

³Ɔwáwɔ tɔ́na ɔ yámɛ́á ikindəniə yɛ́ taká, mɛ ndɔ aŋɔ́á bata ɔwá ɔ nda bəə́bu ɔlɔ, ɔ taká, bá ka ituəmə nɔaka na mɛaŋɔ́á ɔkɛaka ɔwá Imbə́nú Yɛɛsɛ yɛ́ yambána, hɔ́ánánátɔ́, Kɛlɛmánɛ na bɛŋgɔ́áyɛ́ bikimə bɛ́ buolí ɔbá məə́nyə má lɛ́á tilə́kə́tɔ́ ɔ hiəfulə hɛ́ buɔmɔ́.

⁴Ɔ bikúílí ɔbánɔ́ bikimə, nɔ́ bílə́nə́kə́ ɛlɔ́áyɛ́ Isə́lúkú; mɛ ndɔ nɔ́yɛ́ híánɔlɔna, nɔ́ bilənəkə.

⁵Bɛndɔ bəkimə bá ná hɔ́ánána ɔ búə́núə́ buɛsɛ ɔmanya. Isə́lúkú a lɛa hoóyi ɔ ɔsákɔna.

⁶Nɔ lɛ sə́híníə́ ata bɔkɔa, mba, bikúílí bikimə, nɔ́ Huɛlɛ́ bátá yatɛ́ ɔyɛ́á nɔ ndɔ sɔ́ka, ɔ tɔ́mbákɛna na mabɛ́kálɛ́na, nɔ́ nɔ́yɛ́ kɛ́áká na ubíhóliə mukimə.

⁷Bumbə́nú tɔ́na bɔ́ Huɛlɛ́ ɔbɔ́á bɔ́ ná ɛmanya yikimə yáyɛ́ná, bɔ́ ŋɔ yə́núə́ mɛlɛ́má na mə́núə́ mafɛka tə́tə́kəniə ɔ bɔlatɔ́ na Yə́susu Kilísitusu.

⁸Ɔ nitifə́, á bənísə́, ɔ uwənú mafɛka, nɔ́ bílísíə́ muɛsɛ, ɔ yatɛ́ yikimə ɔyɛ́á yɛ́ lɛ́á yɛɛsɛ, hɔ́ánánátɔ́ na tɔnyamáná; ɔ yatɛ́ yikimə ɔyɛ́á yɛ́ lɛ́á taká na hibə́təniə, tɛ́nɛ́mátɔ, naŋátɔ, yatɛ́ ɔyɛ́á yɛ́ lɛ́á yɛmbányɛ na tuúmə.

⁹Nɔ́ bɛ́kɛ́ákɛ́ná yatɛ́ ɔyɛ́á mɛ ná bənú úkúnə́kíə́, yatɛ́ ɔyɛ́á nɔ ná kúsə́nə ɔ tɔ́mbákɛna na mɛaŋɔ́á, yatɛ́ ɔyɛ́á nɔ ná ɔ́kɔ́kɛ́ná mɛ ndɔ laa, yatɛ́ ɔyɛ́á nɔ ná síə́kínínə ɔ ɔwámɛ, nɔ́ bɛ́ɛ́yɛ́ bikimə bɛ́kɛ́ákɛ́na. Huɛlɛ́ ɔwá a ndɔ bumbə́nú índiə, a ŋɔ báá na bənú.

¹⁰Mɛ ndɔ bílə́nə ɛlɔ́áyɛ́ Isə́lúkú, nɔ ka ínə́niə tɔ́na ɔwá, nɔ lɛa na isə́hísə́hí ɛlɔ́áyɛ́ ámɛ. Ɛ́ɛ! Nɔ báka na yɛ́táyɛ́ isə́hísə́hí, mba, nɔ sa bá na ihə́lí ɔwá nɔ mɛaŋɔ́á yɛɛ́ta ínə́níə́.

¹¹Mɛ lɛ ndɔ nɔ́yɛ́ hɔ́ɔ́ bɔkɔasɛ́á mɛ lɛa ɔ nɛsɔ́ka, ɔ taká, mɛ ka ɔ́kɔ́naka ɔ ubílə́nínə ɔ yatɛ́ ɔyɛ́á mɛ lɛ́á itíə́nə́tɔ.

¹²Mɛ ndɔ manya uniŋə ətíə́ yɛ bɔtɔyɔ́ mbá ata ɔ nɛmbiaŋɛ. Ɔ bikúílí bikimə, ɔ məndínə́ ɔbánɔ́ məkimə, mɛ ka ɔ́kɔ́naka ɔbáá nibínə́tɔ́ mbá ata ɔbáá mɛtaná, ɔ uniŋə ətíə́ yɛ nɛmbiaŋɛ mbá ata ətíə́ yɛ nɛsɔ́ka.

¹³Mɛ óso ɔ mɔmɔ́kɛ́ məkimə uwisíbiniə ɔ tɔ́mbákɛna na Yə́susu Kilísitusu ɔwá a ndɔ mɛaŋɔ́á iŋgínə́ índiə.

¹⁴Ata nɔ́yɛ́, nɔ ka kɛaka muɛsɛ ɔ nioko ɔwɛta ɔ ɔwámɛ məsə́kə.

¹⁵Bənú bɛ́múɛ́tɛ́ á bəlumininə bá Filíbo, nɔ ndɔ nɔ́yɛ́ manya muɛsɛ ɔwá, ɔ bibotólíníə́ bɛ́ nɛnɔŋɔna nɛ́ Imbə́nú Yɛɛsɛ, ɔ ikúílí ɔyɛ́á mɛ ná báá ɔhɔalakɛna ɔ bɔnɔŋɔ bɔ́ Masɛtɔánɛ, ata ilúkunə ɛ́mɔtɛ́ yɛ́ bəlumininə yɛ́ sa mɛaŋɔ́á ɔ́lɔ, ɔ yatɛ́ ɔyɛ́á ilúkunə yɛ́ ná kúsə́nə mbá ata ɔyɛ́á a ná fə́míə́, úhúlíə́ ɔ́maná bənú bíbúə́.

¹⁶Mɛaŋɔ́á buɔnɔ́ ɔ Tɛsalɔnɛ́ka, nɔ ka mɛaŋɔ́á lɔ́mákɛna yatɛ́ ɔyɛ́á mɛ ná bá mɛ ndɔ sɔ́ka.

¹⁷Tátá mahánɛna mɛ ndɔ siə; mba, mɔsɛ́ŋɛ́ ɔkɔnda ɔ uwənú bɛnyɛná bɛɛsɛ.

¹⁸Mɛ ka bɛkɔa bikimə kusənə. Mɛ lɛa ɔ nɛmbiaŋɛ ikúílí mɛ ná bɛ́ɛ́yɛ́ kusə́nə ɔbɛ́á nɔ ná mɛaŋɔ́á lɔ́mɛ́ná á Ɛbalafolotíti mɔkátá. Mátáyɛ́ mahánɛna má báka ɛ́sɛ́á bunumbə bɔ́ inumbí yɛɛsɛ, ɛ́sɛ́á bɛnamá ɔbɛ́á Huɛlɛ́ a ndɔ hikiə, ɔbɛ́á a ná lumínə́ tɔ́na.

¹⁹Yamɛ́á Huɛlɛ́ a ŋɔ bənú índiə yatɛ́ ɔyɛ́á yɛ́ ndɔ bənú bísiə ɔwɔŋgɔkɔnɔ nɛ́áyɛ́á nɛbɔ́ŋɔ na tuúmə tukimə ɔ tɔ́mbákɛna na Yə́susu Kilísitusu.

²⁰Tuúmə tɔ́ báá na Huɛlɛ́ ɔ yəsúə́ Isə́ ɔ tɔɛya na tɔɛya. Amɛna!

²¹Nɔ́ banaŋanaŋa bəkimə bíhólókíə́ ɔ niínyə nɛ́ Yə́susu Kilísitusu. Bənísə́ bəkimə ɔbá bá lɛ́á na mɛaŋɔ́á bá ndɔ bənú bíhóliə.

²²Banaŋanaŋa bəkimə, sulusulu bááyɛ́ ɔbá bá lɛ́á bɔnyɛna ɔ miímə yɛ Káyɛsa, bá ndɔ bənú bíhóliə.

²³Nyɔnɔ yɛ Isə́lúkú á Yə́susu Kilísitusu yɛ́ báá na bənú bəkimə.