Read Tunen Kolósia 1 Bible Online

Kolósia 1 - Tunen bible

Kolósia 1

¹Ɔwámɛ á muɔŋgəlimə wa Yə́susu Kilísitusu, ɔ tɔ́mbákɛna na uhikiə wɔ́ Huɛlɛ́, na wəsúə́ munínyə́ á Timotíó,

²Tɔ ndɔ bááyɛ́ hóliə bá bɔnɔŋɔ bɔ́ Kolósia ɔbá Huɛlɛ́ a ná ɛ́lɛ́ákɛ́na ɔ bə́súə́ bənísə́ bəəndú na balɛ́mɛndɔ́ ɔbá bá ná lúmínínə́ á Kilísitusu; Huɛlɛ́ á yəsúə́ Isə́ á bənú sána, á bənú bumbə́nú índíə́ tɔ́na.

³Tɔ ndɔ Huɛlɛ́, á Isə́ yɛ yəsúə́ Isə́lúkú á Yə́susu Kilísitusu mohóloniə híə́níníə́ ikúílí ɔyɛ́á tɔ ndɔ bɛ́kálɛ́na ɛlɔ́áyɛ́ ənú.

⁴Ɔ taká, tɔ ka ɔ́kɔ́kɛna bá sɛ́á nɔ ndɔ lumininə á Kilísitusu, nɔ ndɔ hikiə bááyɛ́ bəkimə tɔ́na ɔbá bá lɛ́á bá Huɛlɛ́.

⁵Ɛnaka ɛtambá yɛ́ taká, á Imbə́nú Yɛɛsɛ yɛ́ ndá bənú fámɛ́ná ikúílí yíbúsíə́, nɔ ka mɔsábɔ́náná ɔ́kɔ́kɛna ɔwá Huɛlɛ́ a ná bənú tə́tə́níníə́ ɔ nɔɔ́mɛná, nɔ́ ənú nɛkɔmba na níə́núə́ nibo tálɛ́ná ɔ yɛ́táyɛ́ ɛnánɛna.

⁶Imbə́nú Yɛɛsɛ tɔ́na yɛ́ ndɔ yambana, yɛ́ ndɔ tɔtámátámá háá ɔ misí mikimə, hɔ́ánánátɔ́ ɛ́sɛ́á yɛ́ ná kɛ́áka uwənú ətíə́, ɔ botolokiə ɔ buɔsɛ́ ɔbɔ́á nɔ ná nyɔnɔ yɛ́ Huɛlɛ́ fúnúnə, nɔ ná manyá ɔwá Huɛlɛ́ a ndɔ bənú hikiə.

⁷Ə́bafalásɛ ɔ yə́súə́ ikindəniə yɛ́ buolí, wɛɛ́ya a ná bənú yɛ́táyɛ́ imbə́nú úkúnə́kíə́. A ndɔ nyɔɔ ɛlɔ́áyɛ́ ənú ɛ́sɛ́á mɔnyɛna muɛsɛ wa Kilísitusu.

⁸A ka bəsú mənyəsiə yatɛ́ nibo á Umbúínyi Mɔnaŋanaŋa wɔ́ ná háá ɔ uwənú mɛlɛ́má.

⁹Ɛlɔ́áyɛ́ nɔ́yɛ́, tɔ lɛ ndɔ tɔmbɔ ɔ ɔbɛ́kálɛ́na ɛlɔ́áyɛ́ ənú, ɔ botolokiə ɔ buɔsɛ́ ɔbɔ́á tɔ ná ɔ́kɔ́kɛ́ná ɛ́sɛ́á nɔ ndɔ niŋə ɛlɔ́áyɛ́ Kilísitusu. Tɔ ndɔ Huɛlɛ́ bata ɔwá a bənú ɛŋgɛ́lɛ́ na ɛmanya índíə́ ɔyɛ́á yɛ́ ndɔ húlínə na wə́yíə́ Umbúínyi. Nɔ́yɛ́ mbá nɔ ŋɔ manya muɛsɛ yatɛ́ a ndɔ siə a sɛ́á nɔ kɛ́áka ɛlɔ́áyɛ́ ayɛ́.

¹⁰Nɔ́yɛ́, nɔ óso ubítíkə muɛsɛ ɛ́sɛ́á Isə́lúkú a ndɔ hikiə. Nɔ ŋɔ məndínə́ məkimə má bɛkɔa bɛɛsɛ kɛaka, nɔ ŋɔ Huɛlɛ́ manya tɔ́na ɔ yáyɛ́ná.

¹¹Yáyɛ́á injiŋə yɛ́ ŋɔ bənú óníniə ɔ bɛkɔa ɔbánɔ́ bikimə, əlimə yɛ nɔ́yɛ́ mbá nɔ sɔ́ ŋɔ tɔmbɔ, nɔ́ bikimə ísə́bíníə́ na nitiŋiminə.

¹²Nɔ́ Huɛlɛ́ á Isə́ mohóloniə híə́níníə́ na nɛhɔnɔ, a ka kɛaka a sɛ́á, nɔ́ maasɛ kusə́nə ɔmá a ná tə́tə́níníə́ ɔ isəmú yɛ́ nɔɔ́mɛná ɔ bááyɛ́ ɔbá bá lɛ́á bá ayɛ́.

¹³A ka bəsú húliə ɔ iŋgínə́ yɛ ibínə́binə, a ná kɛ́áka tɔ ná fínə́ ɔ nɛmanɛna nɛ́ wayɛ́á Mɔná wuhikiə,

¹⁴Ɔ tɔ́mbákɛna na wɛɛ́ya, Huɛlɛ́ a ka bəsú hutunə, a ná bəsú mə́súə́ mabɛ́á nɛasɛ́na.

¹⁵Kilísitusu a lɛa iŋgətí yɛ Huɛlɛ́ ɔyɛ́á bá lɛ ndɔ sinə, a lɛa Mɔná wəbusíə́ ɔ bíbíə́nə, yáyɛ́ná bɛbɔ́tɛ́ná bikimə.

¹⁶Ɔ taká, Huɛlɛ́ a ka bɛɛ́la bikimə bɔ́táka ɔ tɔ́mbákɛna na wɛɛ́ya ɔ nɔɔ́mɛná na ɔ misí; bɛ́ɛ́yɛ́ ɔbɛ́á tɔ ndɔ sinə, na bɛ́ɛ́yɛ́ ɔbɛ́á tɔ lɛ ndɔ sinə, Mənjiŋə, Imbúínyi, na Mamanɛna. A ka bikimə bɔ́táka ɔ tɔ́mbákɛna na wɛɛ́ya ɛlɔ́áyɛ́ ayɛ́.

¹⁷Yə́susu a ka bámɛnɛna ubusíə́ bɔ́ bɛkɔa bikimə, bikimə bɛ́ ndɔ niŋinə tɔ́na ɔ tɔ́mbákɛna na wɛɛ́ya.

¹⁸Wɛɛ́ya a ndɔ yáyɛ́á ilúkunə kɛndana, a ndɔ kɛa ɔwá yɛ́ niŋə́kə́, ɛ́sɛ́á mɔlɔ́á wɔ́ ndɔ mɛɛ́lɔ kɛndana. Wɛɛ́ya a lɛ́á nɛbalɛ́ná, wɛ́ɛ́yɛ́ ɔwá a ná táŋá ɔ ɔhɔŋɔa ɔ ətíə́ yɛ bəwə́nú ɔkɛaka ɔwá, a bámɛ́nɛ́ná wəbusíə́ ɔ bɛkɔa bikimə.

¹⁹Ɔ taká, Huɛlɛ́ a ka hikəkiə utuənə wɛɛ́ya mukimə á wayɛ́á mɔná nuúmə́,

²⁰a ka hikəkiə tɔ́na ɔwá misí na nɔɔ́mɛná bá bámɛ́nɛ́ná ɛ́mɛ́nɛ́nátɔ́ ɔ tɔ́mbákɛna na wayɛ́á mɔná, a ná bumbə́nú háá ɔ tɔ́mbákɛna na manɔ́ŋɔ má wayɛ́á mɔná ɔmá má ná ólókókíə́ ɔ ɔmbásá.

²¹Uwənú tɔ́na, nɔ ka bámɛnɛna hata na Huɛlɛ́ ɔ yɛ́táyɛ́ ikúílí, nɔ ka báá báyɛ́á bəbəniə ɔwɔŋgɔkɔnɔ na mabɛ́á ɔmá nɔ lɛ fɛkaka, nɔ lɛ kɛaka tɔ́na,

²²mba isíŋáka, ɔ tɔ́mbákɛna na uwə́ə́ wɔ́ mɛɛ́lɔ yɛ́ wayɛ́á Mɔná, Huɛlɛ́ a ka hikəkiə ɔwá nɔ ɛ́mɛ́nɛ́ná na wɛɛ́ya, ɔkɛaka ɔwá nɔ bínə́níə́ banaŋanaŋa ɔwayɛ́ busíə́ ɛŋaná hɛkɔma, ɛŋaná hɛkabalɛ.

²³Mba, nɔ ná hɔ́ánána utiŋiminə ɔ ilumininə yɛ́ ɔ́nɔ́kɛ́nátɔ́, na iŋgínə́ yikimə, ɛŋaná ɔbɛ́niasa ɔwá nɔ ákáná hata na yɔnɛ́nɛna ɔyɛ́á nɔ ná kúsə́nə́ ɛnaka nɔ Imbə́nú Yɛɛsɛ ɔ́kɔ́kɛ́na, Imbə́nú ɔyɛ́á bá ná nɔ́ŋɔ́náka ɔ misí mikimə na ɔ bɛbɔ́ka ɔbánɔ́ bikimə, ɔwámɛ á Báwolo, mɛ lɛa mɔnyɛna wa Huɛlɛ́ ɔwá a ndɔ yɛ́tána Imbə́nú Yɛɛsɛ nɔŋɔna.

²⁴Isíŋáka mɛ lɛa na nɛhɔnɔ ɛlɔ́áyɛ́ məsə́kə ɔmá mɛ ndɔ sinə ɛlɔ́áyɛ́ ənú, na wə́míə́ mɔlɛ́má mukimə tɔ́na mɛ́ ndɔ ɛmɔ́kɛ́ nyáá ɛlɔ́áyɛ́ Kilísitusu, ɛlɔ́áyɛ́ yayɛ́á mɛɛ́lɔ ɔyɛ́á yɛ́ lɛ́á ilúkunə yɛ́ bəlumininə.

²⁵Mɛ ka híána mɔnyɛna wa ilúkunə yɛ́ bəlumininə ɛlɔ́áyɛ́ buolí uwundúsiniə ɔbɔ́á Huɛlɛ́ a ná mɛaŋɔ́á báta. Mɛ ná hɔ́ánána uwənú ɛtambá yɛ́ Huɛlɛ́ ɔnɔŋɔnɛna yikimə,

²⁶mɔanɔ ɔwá a ná bítə́ ikúílíə́kimə ɔ bɛnyɔŋɔnɔ bikimə, mba ɔwá a ná fə́mə́lə́níə́ isíŋáka ɔ bəlumininə.

²⁷Huɛlɛ́ a ka hikəkiə uwəbú ɔ wúuwu mɔanɔ wɔ́ bítə́tɔ́ umənyəsiə, mɔanɔ wɔ́ nɛbɔ́ŋɔ na tuúmə, ɔ́ niɔŋɔ́ sɛ́á: «Kilísitusu a lɛa na bənú» a ndɔ bənú óníniə ɔwá, nɔ ŋɔ tuúmə tɔ́ Huɛlɛ́ afakana.

²⁸Yɛ́tána Kilísitusu ɔyɛ́á tɔ ndɔ nɔŋɔnɛna ɔ bɛndɔ bəkimə, ɔ uwəbú umənyəsiə, ɔ uwəbú uwukúniə na ɛmanya yikimə ɔkɛaka ɔwá, mɔndɔ mukimə á híáná hɔ́ánánátɔ́ ɔ nɛtɔana na wɛɛ́ya.

²⁹Ɛlɔ́áyɛ́ nɔ́yɛ́, mɛ ndɔ nyɔɔ, mɛ ndɔ nɔa tɔ́na na yayɛ́á iŋgínə́, na injiŋə ɔyɛ́á yɛ́ ndɔ mɛaŋɔ́á húlínə na Kilísitusu.