Read Tunen Kolósia 2 Bible Online

Kolósia 2 - Tunen bible

Kolósia 2

¹Ɔ taká, mɛ ndɔ siə ɔ uwənú ɔlɛna yatɛ́ nindínə́ nɛ́ ɛnjála mɛ ndɔ nɔa ɛlɔ́áyɛ́ ənú, na bááyɛ́ ɔbá bá lɛ́á ɔ bətínə́ yɛ Laɔtisə́, na bəlumininə bəkimə ɔbá bá sa ndá mɛaŋɔ́á ɛ́nyánána;

²Nɔ́yɛ́, ɔkɛaka ɔwá wə́núə́ mɔlɛ́má wɔ́ báá ɔ́nɛ́nátɔ, mɛ siəkə tɔ́na ɔwá nɔ hikə́kə́níə́ ɔmɔtɛ́ na wə́ə́ní, nɔ́yɛ́ mbá nɔ bá tɔanátɔ́ ɔ nibo, úndúə́tɔ́ na nɛkɔmba ɔkɛaka ɔwá, bənú bəkimə nɔ́ yɛmbɛlana yɛ́ Huɛlɛ́ mánya: Ɔ́ niɔŋɔ́ sɛ́á á Kilísitusu.

³Ɔ ɔwayɛ́ bíbúə́ nɔ́ óso ɔ maasɛ məkimə ɔbɔ́ŋɔ má ɛmanya na ɛŋgɛ́lɛ́ yɛ Huɛlɛ́.

⁴Mɛ ndɔ bənú bɛ́táyɛ́ bɛkɔa lɛna ɔkɛaka ɔwá, ata mɔndɔ a lɛ bənú nímbə́ uwənú ɔhɛ́na ɔ nindínə́ nɛɛsɛ, mba, nɛ́ lɛ bá nɔ́yɛ́.

⁵Ɔ taká, ata ɛ́sɛ́á mɛ lɛ bá na bənú, mba, mɛ báka na bənú ɔ hɛtányɛ́. Mɛ lɛa na nɛhɔnɔ ɔ yatɛ́ ɔyɛ́á mɛ ná ɔ́kɔ́kɛ́na na yə́núə́ ilumininə yɛ́ ɔ́nɛ́nátɔ́ á Kilísitusu.

⁶Nɔ́yɛ́, ɔ yatɛ́ ɔyɛ́á mɛ nɔ́ húlə ɔ ɔlaa, nɔ́ mɛaŋɔ́á ɔ́kɔ́ muɛsɛ: Nɔ ná manya ɔwá Yə́susu Kilísitusu a lɛa yənúə́ Isəlúkú. Nɔ́ niŋə́kə á buɔmɔ́ ɔbɔ́á bɔ́ ndɔ bɛndɔ ínə́niə ɔwá nɔ lɛa taká tɔanátɔ́ na wɛɛ́ya.

⁷Ɔ́ niɔŋɔ́ sɛ́á, nɔ́ túə́nə́ muɛsɛ na Kilísitusu, ɛ́sɛ́á bɔlɛ́á bɔ́ ndɔ yə́yíə́ mɛkaŋá háá ɔ misí. Nɔ́ niə́núə́ nɛkɔmba tálɛ́ná ɔ ɔwayɛ́, ɛ́sɛ́á mɔndɔ ɔwá a ndɔ yayɛ́á miímə falaba ɔ́nɔ́kɛ́nátɔ. Nɔ́ túə́nə́ muɛsɛ ɔ yənúə́ ilumininə ɛ́sɛ́á bá ná bənú úkúnə́kíə́, nɔ́ Huɛlɛ́ nyámáká tɔ́na na iŋgínə́ yikimə.

⁸Nɔ́ bɛ́tátáká ɔwá ata mɔndɔ a lɛ ndá bənú kɔŋɔna. Mə́búə́ mafɛka má lɛa ndəmə. Má lɛa tɛ́nɛ́mɛ́nátɔ́ ɔ yatɛ́ ɔyɛ́á bɛnɛ́ma bɛ́ mɔsá na imbə́ndə́ ɔyɛ́á bɛndɔ bá ná tínímə́kíə́ ɔkɛaka ɔwá, bá yɛ́ɛyɛ misí kɛ́ndákána. Mə́búə́ mafɛka má lɛ ndɔ húlínə na Yə́susu Kilísitusu.

⁹Ɔ taká, ata ɛ́sɛ́á Yə́susu Kilísitusu a ná híáná mɔndɔ, a ka tuənə hɔ́ánánátɔ́ Huɛlɛ́.

¹⁰Ɔ tɔ́mbákɛna na wɛɛ́ya nɔ́ ná bikimə kusə́nə́ úndúə́tɔ, ɔwayɛ́ ɔwá a ndɔ mamanɛna məkimə na məŋgínə́ məkimə má tɔtányɛ́ yáyɛ́na.

¹¹Ikúílí ɔyɛ́á nɔ ná tɔ́áná na Kilísitusu, bá ka bənú ánda. Bá sa bənú ánda ɔ mɛɛ́lɔ. Bóo, ɔ́maná á Kilísitusu a ná bənú ándá ɔ hɛtányɛ́, a ná búə́núə́ bɔlɔŋa bɔ́ bɔbɛ́á hutúnə.

¹²Ɔ taká, ikúílí ɔyɛ́á bá ná bənú nɛsɔa índíə́, bá ka bənú nyəə na kilísitusu, nɔ ka hɔŋɔa tɔ́na na wɛɛ́ya bɔkɔasɛ́á, nɔ ka lumininə ɔ injiŋə yɛ Huɛlɛ́ ɔwá a ná wɛɛ́ya huŋúə́síə́ ɔ ətíə́ yɛ bəwə́nú.

¹³Nɔ ka báá buɔnɔ́ salánɛ́átɔ́ na Huɛlɛ́ bɔkɔasɛ́á nɔ ka bɔbɛ́á kɛaka, bɔkɔasɛ́á nɔ sa bá bɛ́ándátɔ, balɛmanyáhuɛlɛ́. Mba, isíŋáka Huɛlɛ́ a ka kɛaka ɔwá nɔ ndáhíáná ɔ buɔmɔ́ na Kilísitusu. A ná bəsú túə́súə́ tɔkɔma tukimə nɛasɛ́na.

¹⁴Ikúílí ɔyɛ́á Kilísitusu a ná wínə́ ɔ ɔmbásá, a ka búə́súə́ buhínə sábɔ́na, a ná bɛsɔ́mɛna bɛ́ umbə́ndə́ sɔtɔkɔ, a ka bɛɛ́ta ɔ́mɔ́kɛna ɔ ɔmbásá.

¹⁵Huɛlɛ́ a ka mənyəsiə ɔ məə́sə má bɛndɔ bəkimə ɔwá, Kilísitusu a ka mamanɛna na məŋgínə́ yáyɛ́na. A ka bɛɛ́ta fámána ɔ nɛnáka ɛ́sɛ́á bɛndɔ bá ɛbɔka ɔ umúlə wɔ́ nɛnɔba nɛ́ wayɛ́á Mɔná.

¹⁶Nɔ́yɛ́, nɔ lɛ bíndíə́ ɔ bɛndɔ ɔbá bá bá ndɔ bənú kɛ́kɛ́lɛna ɛlɔ́áyɛ́ yatɛ́ ɔyɛ́á nɔ ndɔ nɛ́á, mbá ata ɛlɔ́áyɛ́ ɛsalɛ yɛ́ ɛŋganda, yɛ́ matáka má muilí, ata tunó tɔ́ Sábatɛ.

¹⁷Nɔ lɛ bəə́bu ɔkɛna, bɛ́táyɛ́ bikimə bɛ́ báka ɔbánɔ́ ɛ́sɛ́á ihúə́húə́ yɛ́ bɛkɔa bɛɛsɛ bɛ́ ɔsákɔna. Mba á Kilísitusu á lɛ́á taká yɛ bɛ́ɛ́yɛ́ bɛkɔa bikimə.

¹⁸Nɔ lɛ niása ata mɔndɔ a ná bənú óbínə tɔ́na uwənú ɔwɔ́lɔ yatɛ́ ɔyɛ́á yɛ́ lɛ́á yə́nu, bááyɛ́ ɔbá bá ndɔ bínə́niə ɔwá bá lɛa na nɛlɛaŋɛ, na nilúbúnə nɛ́ bɛáŋgɛlɛ, bá ndɔ bɛ́ɔ́lɔ́kɛna ɔ uwəbú bɛlɛmá. Nɛ́táyɛ́ nindínə́ nɛ́ bɛndɔ bá lɛa úndúə́tɔ́ na niə́mə ɔ tɔ́mbákɛna na níə́búə́ nindínə́ nɛ́ məbílúmíniə má mɔsá.

¹⁹Bá lɛ ndɔ bɛ́ɔ́lɔ́kɛna á Kilísitusu ɔwá a lɛ́á mɔlɔ́á wɔ́ ilúkunə. Tɔ ákáná usinə, mɔlɔ́á wɔ́ ndɔ mɛɛ́lɔ mikimə lúkə, tɔanátɔ́ muɛsɛ na máyɛ́á mɔɔŋɔ, nyɔnɔ na Kilísitusu, yɛ́ ɔ́mbɔkɔ tɔ́na ɛ́sɛ́á Huɛlɛ́ a ndɔ hikiə.

²⁰Nɔ ndɔ manya ɔwá ikúílí ɔyɛ́á nɔ́ ná tɔáná na Kilísitusu, nɔ báka wə́ə́tɔ́ na wɛɛ́ya: Məŋgínə́ ɔmá má ndɔ misí kɛndana má lɛ ndɔ bənú manɛna tɔ́na. Nɔ́yɛ́, ɛlɔ́áyɛ́ yatɛ́ nɔ ndɔ niŋə ɔ́maná ɛ́sɛ́á ɔ́ mátáyɛ́ məŋgínə́ má ndɔ bənú manɛna əə́? Nɔ ndɔ ɔ́kɛ́na á bɛndɔ ɔbá bá ndɔ bənú lɛna bá sɛ́á:

²¹«Nɔ lɛ bɔ́ɔbɔ itíə́lə. Nɔ lɛ búíní ɔ́kɔ́lɛ́na ata ɔ bɔɛ́ta ɔbɛ́tɔ́mɛna.»

²²Bá ndɔ bɛ́táyɛ́ bikiní bɛ́kɛna ɔ bɛkɔa ɔbɛ́á bɛ́ sa ósó ɔmɔŋa. Bɛ́ɛ́yɛ́ bitilínə́ na bilə́líə́ bɛ́ lɛa ɔbánɔ́ bɛ́ mɔsá.

²³Bɛ́ɛ́yɛ́ bikiní bɛ́ ndɔ sinənə ɛ́sɛ́á bɛ́ ɛmanya bɔkɔasɛ́á, bá ndɔ bənú lɛna ɔwá, nɔ bɛ́níásá na wə́núə́ uhikiə ɔ bɛnyɛná bɛ́ ilumininə, ɔ bɔlɔŋa bɔ́ nɛlɛaŋɛ ata ɔ yəə́kə yɛ́ nibítə́kəsə; ɔ taká, bɛ́ lɛ bá na mɔsɛ́ŋɛ́ ɛlɔ́áyɛ́ bilókílókí bɛ́ búə́súə́ bɔlɔŋa ɔmanɛna.