Read Tunen Kolósia 3 Bible Online

Kolósia 3 - Tunen bible

Kolósia 3

¹Nɔ ka hɔŋɔa ɔ nyɛmbɛ́ na Kilísitusu, nɔ́yɛ́, nɔ́ siə́kə á buɔmɔ́ bɔ́ nɔɔ́mɛná, ɔ ɛbɔ́ka ɔyɛ́á Kilísitusu a lɛ́á tuənə́tɔ́ ɔ mɔkátá wɔ́ bɛnɔ́mɛ wɔ́ Huɛlɛ́.

²Nɔ́ bɛ́kɔ́lɔ́mɔ́kɔ́na á buɔmɔ́ bɔ́ nɔɔ́mɛná, tátá ɔbɔ́á bɔ́ lɛ́á ɔ misí.

³Ɔ taká nɔ lɛa wə́ə́tɔ, búə́núə́ buɔmɔ́ tɔ́na bɔ́ lɛa bítə́tɔ́ na Kilísitusu á Huɛlɛ́ nuúmə́.

⁴Á Kilísitusu a lɛ́á búə́núə́ buɔmɔ́ bɔ́ taká, ɛnáká á bínə́níə́, bənú tɔ́na nɔ ŋɔ bínə́niə na wɛɛ́ya, nɔ́yɛ́, nɔ ŋɔ nioko ɛta ɔ ɔwayɛ́ tuúmə.

⁵Ɛlɔ́áyɛ́ nɔ́yɛ́, nɔ́ malɔŋa má misí niása ɛ́sɛ́á: Bioŋóŋí, nibítíkə nɛbɛ́á, ilókí yɛ́ bɛkɔa bɛbɛ́á, ɛhɔ́tɔ́hɔ́tɔ, nɔ́yɛ́ yɛ́ lɛ́á ulúbúnə wɔ́ bɛhuɛlɛ́ binə́binə́.

⁶Ɛlɔ́áyɛ́ bɛ́táyɛ́ bɛkɔa, Huɛlɛ́ a ndɔ híə́yíə́ hilóbi fə́mə́ləniə ɔ bááyɛ́ ɔbá bá lɛ ndɔ wɛɛ́ya ɔ́kɛ́na.

⁷Bənú tɔ́na, nɔ́yɛ́ nɔ ná bá nɔ́ ndɔ bítíkə ɔ yɛ́táyɛ́ ikúílí ɛnaka mátáyɛ́ mabɛ́á má bá má ndɔ búə́núə́ buɔmɔ́ manɛna.

⁸Mba isíŋáka, nɔ́ bɛ́táyɛ́ bikimə ombóko: Hilóbi, ɛŋgásɔ́, macaŋa, ata mɔláŋa na bibóló ɔbɛ́á bɛ́ ndɔ fáma ɔ uwənú munuə.

⁹Nɔ lɛ kanjɛ́nána, uwənú ɔbá nɔ ná malɔŋa má buɔnɔ́ niása na bɛ́áyɛ́á bɛnyɛná,

¹⁰nɔ ka híána tɔ́na bɛbɔ́tɛ́ná biɔ́sɔ: Nɔ lɛa bɛndɔ bɔɔ́sɔ ɔbá Huɛlɛ́, ɔ wəsúə́ Mukətiə a ndɔ hunyiə ikúílí tɛ́á ɔ ɔwayɛ́ iŋgətí ɔkɛaka ɔwá, nɔ wɛɛ́ya manya muɛsɛ muɛsɛ.

¹¹Isíŋánána, Yútɛnɛ ata wɛ́ɛ́yɛ́ ɔwá a lɛ bá Yútɛnɛ, miəndí ata injuə́, mɔtɛká ata ifəyí yɛ́ lɛ bámɛ́nɛ́na umə́. Mba, á Kilísitusu a lɛ́á mukimə ɔ nuúmə́ tɔ́na yɛ bəkimə.

¹²Huɛlɛ́ a ka bənú tɛ́fa, a ka siəkə ɔwá nɔ bámɛnɛna báyɛ, a ndɔ bənú hikiə tɔ́na, nɔ́ bá na mahana na mɔlɛ́má wɔ́ tɔmbɔ́kɔ́tɔ, nɔ́ báá bɛbɔ́yɛ́ na mɔlɛ́má wɔ́ nisíbiniə.

¹³Nɔ́ ísə́bə́kínə́níə́, ábá mukúlə́kulə a ndɔ ɔsɔ́kɔ́ bísə́kə́linə, nɔ́ nɛasákɛ́nána, hɔ́ánánátɔ́ ɛ́sɛ́á Isə́lúkú a ná ənú nɛasɛ́na.

¹⁴Mba sulusulu, nɔ́ hikə́kə́níə́ bɔkɔasɛ́á nibo nɛ́ lɛ́á nɛtɔana nɛ́ hɔ́ánánátɔ.

¹⁵Bumbə́nú bɔ́ Kilísitusu bɔ́ yə́núə́ mɛlɛ́má kɛ́ndákána. Huɛlɛ́ a ka bənú ɛ́lɛakɛna ɔ bɔ́táyɛ́ bumbə́nú ɔkɛaka ɔwá, nɔ bá mɛɛ́lɔ ɛ́mɔtɛ́. Bikúílí bikimə nɔ́ wɛɛ́ya mohóloniə híə́níníə́.

¹⁶Ɛtambá yɛ́ Kilísitusu yɛ́ tuə́nə ɔ uwənú mɛlɛ́má nuúmə́ na nɛ́áyɛ́á nɛbɔ́ŋɔ nikimə, nɔ́ lɛ́hákána, nɔ́ makɛ́nda índíə́kínə́nə́ tɔ́na na ɛmanya yikimə ɔ tɔ́mbákɛna na məndínə́ má maŋana məkimə, á Huɛlɛ́ ɔnyama ɔ uwənú mɛlɛ́má nuúmə́ ɔ tɔ́mbákɛna na Umbúínyi Mɔnaŋanaŋa.

¹⁷Ata yatɛ́ nɔ ndɔ kɛa, ata nɔ ndɔ laa, nɔ́ nɔ́yɛ́ kɛ́áka ɔ niínyə nɛ́ Isə́lúkú á Yə́susu, ɔ tɔ́mbákɛna na wɛɛ́ya nɔ́ Huɛlɛ́ á Isə́ mohóloniə híə́níníə́.

¹⁸Uwənú á bəəndú, nɔ́ bílólósólíə́ ɔ busíə́ bɔ́ bíə́núə́ bibə́ ɛ́sɛ́á yɛ́ lɛ́á hɔ́ánánátɔ́ ɔ busíə́ bɔ́ Isə́lúkú.

¹⁹Uwənú á bibə́, nɔ́ bə́núə́ bəəndú híkə́kíə́, nɔ lɛ támbɔ́á ɔ uwəbú busíə́.

²⁰Uwənú á baná, nɔ́ mə́núə́ məkúlə ɔ́kɔ́kɛ́nɛ́na ɔ bɛkɔa ɔbánɔ́ bikimə; nɔ́yɛ́ yɛ́ lɛ́á yɛɛsɛ ɔ busíə́ bɔ́ Isə́lúkú.

²¹Uwənú á məkúlə, nɔ lɛ baná híə́nə́síə́ bikə́tə́ ɔkɛaka ɔwá, bá lɛ yɔ́nɔ́á.

²²Á bɛɔlɛ́, nɔ́ bíə́núə́ bisə́lúkú bɛ́ yɛ́ɛyɛ misí ɔ́kɔ́kɛ́nɛ́na ɔ məndínə́ məkimə, mba, tátá ɔ́maná ikúílí ɔyɛ́á bá ndɔ bənú táta, ɔ ɛnya ɔyɛ́á mbá bɛndɔ bá bənú nyámáka, mba, na mɔlɛ́má naŋátɔ, ɛ́sɛ́á bááyɛ́ ɔbá bá ndɔ Isə́lúkú hibə́təniə híə́niniə.

²³Ata yatɛ́ buolí ɔbɔ́á nɔ ndɔ ənú nyɔɔ, nɔ́ nɔ́yɛ́ kɛ́áká na wə́núə́ mɔlɛ́má mukimə, ɔ́maná ɛ́sɛ́á ɛlɔ́áyɛ́ Isə́lúkú, mba, tátá ɛlɔ́áyɛ́ bɛndɔ,

²⁴Nɔ ndɔ manya ɔwá Isə́lúkú a ŋɔ bənú hánɛna, nɔ́ ŋɔ ilíkinənə kusənə ɔyɛ́á a ná bílíhə́níə́ ɔ ɔwayɛ́ ilúkunə. Tiísi yɛ Isə́lúkú ɔwá nɔ ndɔ nyɛna, á Kilísitusu.

²⁵Mba, wɛ́ɛ́yɛ́ ɔwá a ndɔ bɔbɛ́á kɛa, a ŋɔ mɔsábɔ́náná wɔ́ bɔ́áyɛ́á bɔbɛ́á kusənə, ɔ taká, abáka Huɛlɛ́ a lɛ nifəŋə háá ətíə́ yɛ bɛndɔ.