Read Tunen Kolósia 4 Bible Online

Kolósia 4 - Tunen bible

Kolósia 4

¹Á bisə́lúkú, nɔ́ bə́núə́ bɔnyɛna bɛ́kɛ́ákɛ́ná tɛ́nɛ́mátɔ́ na taká. Nɔ lɛ fəlíə́ ɔwá bənú tɔ́na nɔ báka na Isə́lúkú ɔ nɔɔ́mɛná.

²Nɔ́ tiŋímínə ɔ mabɛ́kálɛ́na, nɔ́ Huɛlɛ́ hólíə́: Nɔ lɛ tɔmbɔ́ ikúílí nɔ ndɔ bɛ́kálɛ́na, nɔ́ báá ɛmbɛnyɛ́ ɔ yatɛ́ ɔyɛ́á Huɛlɛ́ a ndɔ siə uwənú ɔlɛna.

³Ɔ yɛ́táyɛ́ ikúílí, nɔ́ bɛ́kálákɛ́ná tɔ́na ɛlɔ́áyɛ́ əsú ɔkɛaka ɔwá, Huɛlɛ́ a bəsú ihə́lí índíə́ yɛ́ yáyɛ́á ɛtambá ɔnɛŋɔna, ɔ ɛndɔnɔ yɛ Kilísitusu ɔ yəmbələniə. Ɔ taká ɔ́ ɛlɔ́áyɛ́ nɔ́yɛ́ mɛ́ lɛ́á ɔ ɛbɔka.

⁴Nɔ́ Huɛlɛ́ bɛ́kálákɛ́na tɔ́na ɔkɛaka ɔwá, mɛ yɛ́táyɛ́ imbə́nú yəmbə́lə́kə́níə́ tə́lə́ŋu, ɛ́sɛ́á nɔ́yɛ́ yɛ́ ndɔ bísiə.

⁵Ikúílí tɛ́á ɔyɛ́á nɔ́ lɛ́á na ihə́lí, nɔ́ bítíkə́kə́ na ɛmanya ɔ busíə́ bɔ́ bááyɛ́ ɔbá bá lɛ ndɔ lumininə.

⁶Bíə́núə́ bɛtambá bɛ́ bá hɛkákátɔ, úndúə́tɔ́ na məsiomo ɔkɛaka ɔwá nɔ mɔndɔ tɛ́á bíhíə́níníə́ muɛsɛ.

⁷Wəsúə́ munísə́ muɛsɛ wuhikiə á Tisíkə, a ŋɔ bənú mámɛ́á məmbə́nú məkimə nɔŋɔnakɛna. A lɛa na mɛaŋɔ́á ɔ buolí bɔ́ Isə́lúkú.

⁸Ɛlɔ́áyɛ́ ámɛ, mɛ ná bənú Tisíkə lɔ́mɛ́ná ɔkɛaka ɔwá nɔ manyá ɛ́sɛ́á tɔ ndɔ niŋə, ɔkɛaka tɔ́na ɔwá á yə́núə́ mɛlɛ́má óníníə́.

⁹Wənúə́ munísə́ muɛsɛ wuhikiə á Onɛsímə mɔná wa búə́núə́ bɔnɔŋɔ, a lɛa na wɛɛ́ya, bá ŋɔ bənú lakɛna bikimə ɔbɛ́á bɛ́ ndɔ bɛ́tɔ́mba háha.

¹⁰Alisítakə, ɔwá a lɛ́á ɔ ɛbɔka na mɛaŋɔ́á, a ná bənú bíhólíə́, na Mə́líkusu á munísə́ wa Banábasɛ. Nɔ ka ɔ́kɔ́kɛna yatɛ́ ɔyɛ́á bá ná bənú lákɛ́na ɛlɔ́áyɛ́ Mə́líkusu. Nɔ́ wɛɛ́ya káhá muɛsɛ ábá a ná ndafámá ɔ uwənú ɔmbɛ́la.

¹¹Yə́susu, ɔwá bá ndɔ ɛ́lɛnɛna bá sɛ́á á Yúsútusu, a ndɔ bənú bíhóliə tɔ́na. Bááyɛ́ bɛndɔ bíbúə́ bálálɔ́ bá lɛ́á bəlumininə bá Bɛyútɛnɛ ɔbá bá ndɔ nyɔɔ na mɛaŋɔ́á ɛlɔ́áyɛ́ imbə́nú yɛ Nɛmanɛna nɛ́ Huɛlɛ́ uyəmbələniə; bá ka mɛaŋɔ́á óníniə ɔ yáyɛ́na.

¹²Ɛbafalásɛ, ɔwá a lɛ́á tɔ́na wənu, a ná bənú bíhólíə́; wɛ́ɛ́yɛ́ mɔnyɛna wa Yə́susu Kilísitusu a ndɔ bɛ́kálɛ́na mɔŋɛ́ŋa ɛlɔ́áyɛ́ ənú ɔkɛaka ɔwá, nɔ bámɛ́nɛ́ná tiŋímínə́tɔ́, ɔ́nɛ́nátɔ́ ɔ hɛtányɛ́, nɔ́ hə́ŋíə́ muɛsɛ tɔ́na ɔ ɔkɛa yatɛ́ ɔyɛ́á Huɛlɛ́ a ndɔ hikiə.

¹³Mɛ óso ɔwayɛ́ ɔ yɛ́ɛyɛ imbóŋi uhíə́niniə ɔwá, a ndɔ nyɔɔ mɔŋɛ́ŋa ɛlɔ́áyɛ́ ənú, a ndɔ bənú sə́híniə, na bááyɛ́ bá bətínə́ yɛ Laɔtisə́, na bá Hiəlabolísi.

¹⁴Lúkasɛ, yəsúə́ ɛmɔ́ɛ́nɛ́ mɛɛsɛ yuhikiə na Tɛ́masɛ bá ná bənú bíhólíə́.

¹⁵Nɔ́ bənísə́ bíhólíə́ ɔbá bá lɛ́á ɔ Laɔtisə́ na Nífa, na ilúkunə yɛ́ bəlumininə ɔbá bá ndɔ kɔtana ɔ ɔwayɛ́ miímə.

¹⁶Ikúílí bá ŋɔ bənú híihi hiəfulə fanakɛna, nɔ kɛaka ɔwá bá hiítə fanákɛ́na ɔ ilúkunə yɛ́ bəlumininə yɛ́ Laɔtisə́; uwənú tɔ́na bá bənú hiəfulə hɛ́ ilúkunə yɛ́ Laɔtisə́ fanákɛ́na.

¹⁷Nɔ́ Alisíbə lɛ́na ɔwá: «A manyaka, a buolí nyɔɔkɔ muɛsɛ ɔbɔ́á Isə́lúkú a ná wɛɛ́ya índíə́ ɔkɛaka ɔwá, a bɔɛ́ta úndúsíníə́ muɛsɛ».

¹⁸Mɛaŋɔ́á Báwolo mɛ ndɔ bənú bɛ́ɛbɛ bɛtambá bɛ́ mohóloniə tilinə. Nɔ lɛ fəlíə́ ɔwá mɛ lɛa ɔ ɛbɔka. Mɛ ndɔ Huɛlɛ́ bɛ́kálɛ́na ɔwá, yayɛ́á nyɔnɔ yɛ́ bámɛ́nɛ́ná na bənú.