Read Tunen 1 Tɛsalɔnɛ́ka 2 Bible Online

1 Tɛsalɔnɛ́ka 2 - Tunen bible

1 Tɛsalɔnɛ́ka 2

¹Á bənísə́, bənú bɛ́múɛ́tɛ́ nɔ ndɔ nɔ́yɛ́ manya muɛsɛ, tátá ɔ ndəmə nɔ na bəsú kaha.

²Nɔ ndɔ manya tɔ́na ɔwá, tɛ́tɛ́á yɛ ikúílí, bá ka bəsú kɔ́báka, bá bəsú tə́kə́sə́kə ɛnaka tɔ́ kafámá ɔ bətínə́ yɛ Filíbo, mba, Huɛlɛ́ a ka bəsú makɛ́nda índiə ɔkɛaka ɔwá, tɔ bənú yayɛ́á Imbə́nú Yɛɛsɛ nɔŋɔ́nákɛ́na, ata nɔ́yɛ́ ɛ́sɛ́á bá ná báá bá ndɔ bəsú nuəsiə.

³Ɔ taká, bɛtambá ɔbɛ́á tɔ́ ná bɛ́kɛ́ákɛ́na ɔ uwənú ɔ makɛ́nda uwíndiə ɔkɛaka ɔwá, nɔ Imbə́nú Yɛɛsɛ bítínínə, bɛ́ lɛ bá bɛkanja, bɛ́ lɛ bá bɔkɔa usiə buinə́buinə́, mbá ata bɛ́ ɔsɔ́kɔ́ unímbə.

⁴Mba ɔ nifəŋə, Huɛlɛ́ a ka bəsú bítíbə́kiniə muɛsɛ muɛsɛ ɔkɛaka ɔwá, a bəsú Imbə́nú Yɛɛsɛ bítíə́, tɔ ndɔ yɛɛ́ta nɔŋɔna ɛ́sɛ́á yɛ́ lɛ́á hɔ́ánánátɔ, tɔ lɛ ndɔ kɛa yatɛ́ ɔyɛ́á bɛndɔ bá ndɔ hikiə, mba yatɛ́ ɔyɛ́á Huɛlɛ́ a ndɔ hikiə, ɔwayɛ́ ɔwá a ndɔ manya yatɛ́ ɔyɛ́á yɛ́ lɛ́á ɔ uwəsú mɛlɛ́má nuúmə́.

⁵Nɔ ndɔ nɔ́yɛ́ manya muɛsɛ ɔwá, tɔ sa bɛtambá bɛ́kɛna ɛlɔ́áyɛ́ bɛndɔ unímbə, tɔ sa bá na bɛfɛka bɛ́ wə́súə́ mɔɔsɛ́ŋɛ́ ukusənə, Huɛlɛ́ a ndɔ manya ɔwá nɔ́yɛ́ yɛ́ lɛa taká.

⁶Tɔ sa ndə́siə ɔwá bɛndɔ bá bəsú bə́tə́kíə́, ata bənú, mbá ata bənə́bənə́,

⁷mba hə́níə́, ɛ́sɛ́á tɔ lɛ́á basɔ́másɔma bá Kilísitusu, há tɔ ka bənú íkíniə ɔ uwəsú ubə́tiə, tɔ sa nɔ́yɛ́ bɛ́kɛna. Ɔ nifəŋə tɔ ka báá bɛbɔ́yɛ́ ɔ uwənú ətíə́ ɛ́sɛ́á inyə́ ɔyɛ́á a ndɔ báyɛ́á baná kokoliniə.

⁸Tɔ ka bá na yɛ́mɔtɛ́ ɛnya yɛ nibo ɛlɔ́áyɛ́ ənú ɔ nindínə́ ɔnɛ́á tɔ ka báá hoóyi ɔ uwənú uwíndiə, tátá ɔ́maná Imbə́nú Yɛɛsɛ yɛ́ Huɛlɛ́, mba, na búə́súə́ buɔmɔ́ bɔkɔasɛ́á, nɔ ka bəsú fínə mɔŋɛ́ŋa ɔ mɔlɛ́má.

⁹Á bənísə́, nɔ ndɔ bɛ́kɔ́lɔmɔna nəníə́ buolí bɔ́ ná báá bɔ́ ndɔ bəsú nyɔlɔ, tɔ ka məsə́kə siəkinə, tɔ ka nyɔɔkɔ bulúə́ na buɔsɛ́ tɛ́á ɔkɛaka ɔwá tɔ lɛ híáná búə́núə́ bɔlɔmɔ́ ɔ ikúílí tɔ ndɔ bənú Imbə́nú Yɛɛsɛ yɛ Huɛlɛ́ nɔŋɔnɛna.

¹⁰Nɔ lɛa bəmbóŋímboŋi ɔ nibítíkə ɔnɛ́á tɔ ná bɛ́kɛ́ákɛ́na uwənú ətíə́ á bəlumininə, Huɛlɛ́ a ndɔ nɔ́yɛ́ manya tɔ́na. Níə́súə́ nibítíkə nɛ́ ka báá naŋátɔ, tɛ́nɛ́mátɔ́ ɛŋaná ɔkɛ́kɛ́lɛna.

¹¹Nɔ ndɔ manya ɔwá tɔ ka kɛaka ɔ mɔɛ́ta tɛ́á ɔ uwənú ətíə́, ɛ́sɛ́á abáka isə́ a kɛaka ɔ ɔwayɛ́ baná.

¹²Tɔ ka bənú məlíhə́ní na makɛ́nda índiəkinə, tɔ ka bənú bata na ɔwɛmbɛ́na ɔwá, nɔ bítíkə́kə́ ɛnya ɔyɛ́á Huɛlɛ́ a ndɔ hikiə, ɔwayɛ́ ɔwá a ndɔ bənú ɛ́lɛna ɔ ufínə ɔ ɔwayɛ́ nɛmanɛna, na ɔ ɔwayɛ́ tuúmə.

¹³Bɔkɔa ɔbɔ́á bɔ́ ndɔ kɛa ɔwá tɔ Huɛlɛ́ mohóloniə híə́níníə́ bɔ́ lɛa ɔwá, ikúílí ɔyɛ́á nɔ ná ɛtambá yɛ́ Huɛlɛ́ kúsə́nə ɔyɛ́á tɔ ná bənú nɔ́ŋɔ́nákɛ́na, nɔ ka yɛɛ́ta ɔ́kɔ́kɛna, nɔ ná yɛɛ́ta káha tátá ɛ́sɛ́á ɛtambá ɔyɛ́á yɛ́ ndɔ húlínə na bɛndɔ, mba ɛ́sɛ́á ɛtambá yɛ́ Huɛlɛ́, nɔ́yɛ́ yɛ́ lɛ́á taká. Ɛ́ɛ! Yɛ́ ndɔ húlínə taká na Huɛlɛ́, yɛ́ ndɔ buolí nyɔɔ ɔ uwənú ətíə́ á bəlumininə, bá ndɔ tɔtámátámá sinə.

¹⁴Á bənísə́, nɔ ka iŋgətí ɛ́tɛna ɔ bilúkunə bɛ́ Huɛlɛ́ ɔbɛ́á bɛ́ lɛ́á ɔ nɛkɛ́tɛ nɛ́ misí yɛ Yútɛa, bɛ́ɛ́yɛ́ bilúkunə bɛ́ lɛa tɔanátɔ́ á Yə́susu Kilísitusu, nɔ ka ɔŋgɔkɛna ɔ uwəbú bɔkɔasɛ́á, bə́núə́ bɔnɔŋɔnɔ́ŋɔ́ bá ka bənú təkəsəkə huɛ́ ɛ́sɛ́á Bɛyútɛnɛ bá ná bilúkunə bɛ́ bəlumininə təkə́sə́kə ɔbɛ́á bɛ́ lɛ́á ɔ Yútɛa.

¹⁵Uwəbú ɔwá bá ná Isə́lúkú a Yə́susu na bɔhɛ́nátɔtányɛ́ ɔ́nɔ́kɔ́, bá ka əsú təkəsəkə tɔ́na. Bá ndɔ Huɛlɛ́ liŋgəsiə, bá lɛa bəbəniə bá bɛndɔ bəkimə!

¹⁶Bá ndɔ bəsú kotiə ɔwá tɔ lɛ Imbə́nú Yɛɛsɛ nɔŋɔ́nɛ́na ɔ bááyɛ́ ɔbá bá lɛ́á Bɛyútɛnɛ, ɔyɛ́á yɛ́ óso uwəbú unuəniə. Nɔ́yɛ́ ikúílí yikimə búə́búə́ bɔbɛ́á bɔ́ ndɔ aya. Mba ɔ nitifə́, hilóbi hɛ́ Huɛlɛ́ hɛ́ ŋɔ bəə́bu kɔɛna.

¹⁷Á bənísə́, ábá ɛlɔ́áyɛ́ əsú, tɔ ka báá bíə́kíníə́tɔ́ ɔ usə́mbə́nəniə na bənú ɛlɔ́áyɛ́ tɛ́tɛ́á yɛ ikúílí, hata na məə́sə, mba hoóyi na mɔlɛ́má. Tɔ ka bá na ilókí yɛŋɛ́ŋa ɔ uwənú usinə tɔ́na, ɔ nindínə́ ɔnɛ́á tɔ ka kɛaka manya məkimə ɛlɔ́áyɛ́ nɔ́yɛ́.

¹⁸Tɔ ka siəkə ɔndahíáná uwənú busíə́, ɔwámɛ bɛ́múɛ́tɛ́ á Báwolo mɛ ka bɛ́ɔ́kɔ́lɔkɛna bikúílí biəŋí, mba Sátana a ka bəsú kotiə.

¹⁹Tɔ ndɔ hikiə ɔwá tɔ́ ndáhíáná ɔ uwənú busíə́ bɔkɔasɛ́á, bənú, tátá mɔndɔ muinə́muinə́ nɔ ndɔ kɛa ɔwá tɔ manyá yatɛ́ ɔyɛ́á tɔ ndɔ siə, nɔ ndɔ kɛa ɔwá tɔ́ báá na nɛhɔnɔ, bənú nɔ lɛ́á hitəkə́ hɛ́ níə́súə́ nɛnɔba ɔ busíə́ bɔ́ yəsúə́ Isə́lúkú á Yə́susu, ikúílí ɔyɛ́á a ŋɔ ndahiana.

²⁰Ɛ́ɛ! Bənú nɔ lɛ́á hifílí hɛ́ túə́súə́ tuúmə, níə́súə́ nɛhɔnɔ tɔ́na.