Read Tunen 1 Tɛsalɔnɛ́ka 3 Bible Online

1 Tɛsalɔnɛ́ka 3 - Tunen bible

1 Tɛsalɔnɛ́ka 3

¹Ɛ́sɛ́á ilókí yɛŋɛ́ŋa yɛ́ ɔ manyɔ uwənú undəsiəlínə́ yɛ́ ná əsú bámɛ́nɛ́na, tɔ ka siəkinə ɔwá, yɛ́ lɛa muɛsɛ utíkə́nə bəsú bíbúə́ ɔ Atɛ́nɛ,

²tɔ ná yɛ́ɛ́yɛ́ ikúílí bənú wəsúə́ munísə́ á Timotíó lɔ́mɛ́ná á mɔnyɛna wa Huɛlɛ́ ɔwá ndɔ buolí nyɔɔ bɔ́ Imbə́nú Yɛɛsɛ yɛ Kilísitusu nɔŋɔnɛna ɔ bɛndɔ. Tɔ ná wɛɛ́ya lɔ́má nɔ́yɛ́ ɔkɛaka ɔwá, a yənúə́ ilumininə óníníə́, a bənú makɛ́nda índíə́kínə́ tɔ́na ɔkɛaka ɔwá,

³ata ɔmɔtɛ́ uwənú ətíə́ a lɛ ndandɛ́ma ɔ busíə́ bɔ́ mətəkəsənə ɔmá bá ndɔ bəsú índiə isíŋáka. Nɔ ndɔ manya muɛsɛ ɔwá, tɔ sa ósó uniŋə ɔ yɛ́ɛyɛ misí ɛŋaná məsə́kə.

⁴Ɔ taká, nɔ ndɔ nɔ́yɛ́ manya ɔwá, ikúílí ɔyɛ́á tɔ ná báá na bənú, tɔ ka bənú mənyəsiə ɔwá tɔ ŋɔ ɔ ɛmɔ́kɛ́ nyááka, nɔ́yɛ́ yɛ́ ná bɛ́kɛ́áka.

⁵Ɛ́sɛ́á yɛ́ ná báá ɔwá mɛ ísə́bíníə́ ɔ uwənú undəsiəlínə, ɔ́ ɛlɔ́áyɛ́ nɔ́yɛ́ mɛ́ ná bənú Timotíó lɔ́mɛ́ná ɔkɛaka ɔwá, a ndá mɛaŋɔ́á lɛ́ná ábá yə́núə́ ilumininə yɛ́ ndɔ ákána ɔ busíə́. Mɛ ka bá mɛ ndɔ kɔ́lɔ́ma ɔwá Muɔkɔ́lɛna a bənú kúə́síə́ ɔ bɔbɛ́á ɔkɛaka ɔwá, búə́súə́ buolí bɔ́ híáná ndəmə.

⁶Timotíó a nɔ́ ndahíáná isíŋáka ɔ húlə́kinə na bənú, a nɔ́ bəsú bɛkɔa bɛɛsɛ húlə́ninə ɔwɔŋgɔkɔnɔ yə́núə́ ilumininə na níə́núə́ nibo; a ndɔ bəsú lɛna ɔwá, nɔ nabáka ɔ uwəsú ubísímənə muɛsɛ, nɔ ndɔ siə ɔ uwəsú usinə tɔ́na ɛ́sɛ́á tɔ ndɔ əsú siə uwənú ɔ manyɔ usinə.

⁷Nɔ́yɛ́, á bənísə́ ɛnaka tɔ́ bɛ́ɛ́yɛ́ bɛkɔa ɔ́kɔ́kɛ́na yə́núə́ ilumininə yɛ́ ka bəsú óníniə ətíə́ yɛ mɔmɔ́kɛ́ na bíə́súə́ bisə́hísə́hí ɔbɛ́á tɔ́ lɛ́á sɔ́bɛ́nátɔ.

⁸Isíŋáka, tɔ lɛa kánjɔ́átɔ́ bɔkɔasɛ́á, nɔ lɛa tiŋímínə́tɔ́ ɔ nɛtɔana na Isə́lúkú.

⁹Nɔ ndɔ kɛa ɔwá wə́súə́ mɔlɛ́má wɔ́ báá na nɛhɔnɔ á yəsúə́ Huɛlɛ́ busíə́, ata nəníə́ tɔ ŋɔ wɛɛ́ya mohóloniə híə́nəkiniə ɔ uwənú ɛlɔ́á, nɔ́yɛ́ sa ósó ɔ ɔhɔ́ánana.

¹⁰Tɔ ndɔ Huɛlɛ́ bɛ́kálɛ́na na iŋgínə́, bulúə́ na buɔsɛ́ tɛ́á ɔkɛaka ɔwá a manyɔ́ uwəsú niasa, tɔ́ bənú síə́kínə, na ɔhɔ́nala yatɛ́ ɔyɛ́á yɛ́ ndɔ bísiə ɛlɔ́áyɛ́ yə́núə́ ilumininə.

¹¹Huɛlɛ́ bɛ́múɛ́tɛ́, ɔ yəsúə́ Isə́ na yəsúə́ Isə́lúkú á Yə́susu, bá bəsú ɛnɔ́mɛ kunínə yɛ́ uwənú undəsiəlínə.

¹²Isə́lúkú á kɛ́áka ɔwá, níə́núə́ nibo ɔnɛ́á nɛ́ lɛ́á ɔ uwənú ətíə́, na bɛndɔ bəkimə, nɛ́ áyáka ɛŋaná nisúki, ɔ́ iŋgətí yɛ níə́súə́ nibo ɛlɔ́áyɛ́ ənú.

¹³Á yə́núə́ mɛlɛ́má óníníə́, nɔ báá ɛŋaná hɛkabalɛ a Huɛlɛ́ busíə́ ɔ yəsúə́ Isə́, ikúílí ɔyɛ́á yə́súə́ Isə́lúkú á Yə́susu a ŋɔ ndahíáná na bɛ́áyɛ́á bɛáŋgɛlɛ bikimə[2].