Read Tunen 1 Tɛsalɔnɛ́ka 4 Bible Online

1 Tɛsalɔnɛ́ka 4 - Tunen bible

1 Tɛsalɔnɛ́ka 4

¹Á bənísə́, ɔ nitifə́, tɔ ndɔ bənú lɛna ɔwá, tɔ ka bənú məlíhə́ní na makɛ́nda índiəkinə ɔ niínyə nɛ́ Isə́lúkú á Yə́susu. Tɔ ka bənú úkúnəkiə ɛ́sɛ́á nɔ ná hɔ́ánána ubítíkə ɔkɛaka ɔwá, Huɛlɛ́ á bá na nɛhɔnɔ na bənú. Ɔ taká, ɔ́ nɔ́yɛ́ nɔ ndɔ bítíkə, nɔ manyɔ́ bɛ́nyɛ́ŋɛsala.

²Nɔ ndɔ məlíhə́ní manya ɔmá tɔ ná bənú índíə́kínə ɔmá má ndɔ húlínə na Isə́lúkú á Yə́susu.

³Huɛlɛ́ a ndɔ hikiə ɔwá nɔ bámɛ́nɛ́ná bɛ́ɔ́lɔ́kɔ́kɛ́nátɔ́ ɔ ɔwayɛ́ bikúílí bikimə na nɛbambɛa ubítə́tə́niə.

⁴A ndɔ siə ɔwá, mɔndɔ tɛ́á a manyá nəníə́ a niŋə́kə́ na wayɛ́á muəndú ɔ nindínə́ ɔnɛ́á Huɛlɛ́ a ndɔ hikiə, ɔ nindínə́ ɔnɛ́á bɛndɔ bá siəkínə, bá nyama.

⁵Nɔ lɛ niása ɔwá wə́núə́ mɔlɛ́má wɔ́ báá na ilókí yɛ́ bəəndú ɛ́sɛ́á abáka bááyɛ́ ɔbá bá lɛ ndɔ tiísi yɛ Huɛlɛ́ manya bá kɛaka.

⁶Ɔ bɔ́táyɛ́ bɔkɔa, ata mɔndɔ a lɛ munísə́ kɛ́á yatɛ́ ɔyɛ́á a lɛ ndɔ hikiə, mbá ata ɔwayɛ́ ɔkɔmɛna bɔkɔasɛ́á, Isə́lúkú a ndɔ imbunə híə́niə ɔ bɛ́táyɛ́ bɛkɔa bikimə. Tɔ ka nɔ́yɛ́ bənú lakɛna buɔnɔ́, tɔ ndɔ bənú nɔ́yɛ́ mbóŋiə tɔ́na.

⁷Ɔ taká, Huɛlɛ́ a sa bəsú ɛ́lɛna ɔkɛaka ɔwá tɔ niŋə́kə́ ɔ nɛbambɛa, a ka bəsú ɛ́lɛakɛna ɔkɛaka ɔwá tɔ niŋə́kə́ ɛ́sɛ́á a ndɔ hikiə.

⁸Ɔ́ ɛlɔ́áyɛ́ nɔ́yɛ́, wɛ́ɛ́yɛ́ ɔwá a ndɔ máama məlíhə́ní sáŋɔ́na, tátá má mɔndɔ a ndɔ sáŋɔ́na, mba, má Huɛlɛ́ a ndɔ sáŋɔ́na. Wɛɛ́ya a ndɔ bənú wə́yíə́ Umbúínyi Mɔnaŋanaŋa índiə.

⁹Yɛ́ ndɔ bísiə ɔwá bá bənú tílə́kínə́ tɔ́na ɔ ɛsalɛ yɛ́ nibo na bənísə́ əə́? Ɔ taká, bənú bɛ́muɛ́tɛ́ Huɛlɛ́ a ka bənú úkúnəkiə nəníə́ nɔ hikə́kə́níə́ bənú na bənú.

¹⁰Ɔ́ nɛ́táyɛ́ nibo nɛ́ bənú lɛ́á ətíə́ yɛ bənísə́ bəkimə ɔ nɛkɛ́tɛ nɛ́ misí yɛ Masɛtɔánɛ. Á bənísə́, tɔ ndɔ bənú óníniə tɔ́na ɔwá nɔ manyɔ́ bɛ́nyɛ́ŋɛsala.

¹¹Nɔ́ siə́kə ɔ uniŋə ɔ bumbə́nú, nɔ́ bímbíkísə́kíə́ ɔ uwənú bɛkɔa bɛ́ bɛ́múɛ́tɛ́, nɔ́ nyɔ́ɔ́kɔ na mə́núə́ makátá ɛ́sɛ́á tɔ ná bənú lɛhaka.

¹²Nɔ́yɛ́, bááyɛ́ ɔbá bá lɛ ndɔ níə́búə́ nɛkɔmba tálɛ́na á kilísitusu, bá ŋɔ níə́núə́ nindínə́ nɛ́ nibítíkə siəkinə, bá ŋɔ bənú bə́təkiə. Nɔ́yɛ́, nɔ sɔ́ ŋɔ bata ɔwá mɔndɔ a bímbíkísə́kíə́ ɛlɔ́áyɛ́ ənú.

¹³Á bənísə́, tɔ ndɔ siə ɔwá nɔ taká manyá ɔ tɛ́ŋgɛakɛnɛa bəwə́nú, ɔkɛaka ɔwá nɔ lɛ busə́kə ɔ́kɔ́ ɛ́sɛ́á bááyɛ́ ɔbá bá lɛ ndɔ táta ata bɔkɔa.

¹⁴Ɔ taká, ɛ́sɛ́á tɔ ndɔ luminə ɔwá Yə́susu a ka wə́ə́, Huɛlɛ́ a ná wɛɛ́ya huŋúə́síə́ ətíə́ yɛ bəwə́nú, ɔ́ nɛ́táyɛ́ nindínə́, bááyɛ́ ɔbá bá ná wə́kúnə na ilumininə á Yə́susu, Huɛlɛ́ a ŋɔ bəə́bu huŋuəsiə ɔ tɔ́mbákɛna na Yə́susu.

¹⁵Yatɛ́ ɔyɛ́á tɔ ndɔ bənú lɛna isíŋáka, ɔ́ ɛtambá ɔyɛ́á yɛ́ ndɔ húlínə na Isə́lúkú, uwəsú a bɔɔmɔ́ ɔbá tɔ lɛ́á háha ɔ misí, ɔ buɔsɛ́ ɔbá Isə́lúkú a ŋɔ ndahíáná, tátá bəsú tɔ ŋɔ taŋa na ɔhɔŋɔa na bəwə́nú.

¹⁶Ɔ bɔ́táyɛ́ buɔsɛ́, Huɛlɛ́ a ŋɔ manɛna, Isə́lúkú yɛ bɛáŋgɛlɛ a ŋɔ yə́mə, áŋgɛlɛ a ŋɔ mɔsɛ́bɛ́ wɔ́ Huɛlɛ́ lɔ́ŋɔ́kɔ, Isə́lúkú wɛɛ́ya bɛ́múɛ́tɛ́ a ŋɔ tukinə ɔ húlə́kinə ɔ nɔɔ́mɛná, bəwə́nú ɔbá bá ná níə́búə́ nɛkɔmba tálɛ́na á Kilísitusu, bá ŋɔ taŋa ɔhɔŋɔa.

¹⁷Əlimə yɛ ikúílí, uwəsú á bɔɔmɔ́, Huɛlɛ́ a ŋɔ bəsú húliə na bəə́bu ɔ bɛlɔndɔ́, ɔ nɛnyáná na Isə́lúkú ɔ ɔmbáŋá, nɔ́yɛ́ tɔ ŋɔ bámɛnɛna ikúílíə́kimə na wɛɛ́ya.

¹⁸Nɔ́ makɛ́nda índíə́kínə́nə́ bənú na bənú, ɔ tɔ́mbákɛna na bɛ́ɛbɛ bɛtambá.