Read Tunen 2 Tɛsalɔnɛ́ka 1 Bible Online

2 Tɛsalɔnɛ́ka 1 - Tunen bible

2 Tɛsalɔnɛ́ka 1

¹Mɛaŋɔ́á Báwolo, Sílasɛ na Timotíó, tɔ ndɔ híihi hiəfulə tilinə ɔ ilúkunə yɛ́ bəlumininə ɔ bətínə́ yɛ Tɛsalɔnɛ́ka, ɔyɛ́á yɛ́ lɛ́á yɛ́ Huɛlɛ́ ɔ yəsúə́ Isə́, na yɛ́ Isə́lúkú á Yə́susu Kilísitusu.

²Huɛlɛ́ ɔ yəsúə́ Isə́ na Isə́lúkú á Yə́susu Kilísitusu bá bənú buɛsɛ kɛáka, bá kɛ́áká tɔ́na ɔwá nɔ bámɛ́nɛ́na ɔ bumbə́nú.

³Á bənísə́, tɔ ná hɔ́ánána á Huɛlɛ́ ɔ mohóloniə uhíə́niniə ikúílí tɛ́á ɛlɔ́áyɛ́ ənú. Yɛ́ lɛa muɛsɛ ɔwá tɔ nɔ́yɛ́ kɛ́áka bɔkɔasɛ́á, yə́núə́ ilumininə yɛ́ ndɔ áŋána mɔŋɛ́ŋa, nibo tɔ́na ɔnɛ́á nɛ́ lɛ́á bənú na bənú nɛ́ ndɔ aya ɔ ɔyáyɛ́na.

⁴Ɔ́ ɛlɔ́áyɛ́ nɔ́yɛ́ tɔ ndɔ hɛ́na ɔ uwənú ɛlɔ́á na niə́mə ɔ ətíə́ yɛ bilúkunə bɛ́ Huɛlɛ́ bɔkɔasɛ́á, yə́núə́ ilumininə yɛ́ lɛa ɔ́nɛ́nátɔ, ata nɔ́yɛ́ ɛ́sɛ́á bá ndɔ bənú indəkəsə índiə, bá ndɔ bənú ɛmɔ́kɛ́ nyə́siə.

⁵Yə́núə́ ilumininə na níə́núə́ nitiŋiminə nɛ́ lɛa ɛ́nánátɔ́ ɔwá, bikə́lə́síníə́ bɛ́ Huɛlɛ́ bɛ́ lɛa tɛ́nɛ́mátɔ. Nisúki nɛ́ báka ɔwá, ɛmɔ́kɛ́ ɔyɛ́á nɔ ndɔ nyáá, yɛ́ bənú ɛnɔ́mɛ kunínə ɔkɛaka ɔwá, nɔ bámɛ́nɛ́ná hɔ́ánánátɔ́ ɔ ufíə́kinə ɔ nɛmanɛna nɛ́ Huɛlɛ́. Ɔ́ ɛlɔ́áyɛ́ nɔ́yɛ́ nɔ ndɔ məsə́kə sinə.

⁶Ɔ taká, yɛ́ lɛa hɔ́ánánátɔ́ ɔwá Huɛlɛ́ a ŋɔ híə́niniə məsə́kə ɔ mɛɛ́lɔ yɛ məsə́kə ɔ bááyɛ́ ɔbá bá ndɔ bənú təkəsə.

⁷Uwənú ɔbá nɔ ndɔ məsə́kə sinə, a ŋɔ bənú buhuhə índiə ɔ lataka na bəsú. Huɛlɛ́ a ŋɔ nɔ́yɛ́ kɛaka ɔ ikúílí ɔyɛ́á Isə́lúkú á Yə́susu a ŋɔ fámálana ɔ nɔɔ́mɛná, a ŋɔ tukinə na bɛ́áyɛ́á bɛáŋgɛlɛ bɛ́ injiŋə.

⁸A ŋɔ húlə ɔ musoŋó wɔ́ hiwə ɔkɛaka ɔwá, a bááyɛ́ fúnə́ ɔbá bá lɛ ndɔ siə á Huɛlɛ́ ɔmanya, bááyɛ́ tɔ́na ɔbá bá lɛ ndɔ hikiə ɔkɛa yatɛ́ ɔyɛ́á Imbə́nú Yɛɛsɛ yɛ́ ndɔ laa ɔwɔŋgɔkɔnɔ yəsúə́ Isə́lúkú á Yə́susu.

⁹Mə́búə́ məsə́kə má ŋɔ báá bunímə́ bɔ́ ikúílíə́kimə, bá ŋɔ bámɛnɛna hata na busíə́ bɔ́ Isə́lúkú, hata tɔ́na na ɛsakɛsakɛ yɛ́ tɔ́áyɛ́á tuúmə.

¹⁰Ɛnáká á ndásá ɔ bɔ́táyɛ́ buɔsɛ́ ɔkɛaka ɔwá, bááyɛ́ ɔbá bá ná níə́búə́ nɛkɔmba tálɛ́ná ɔ ɔwayɛ́ ná bááyɛ́ ɔbá bá lɛ́á báyɛ, bá wɛɛ́ya úmə́kíə́, bá wɛɛ́ya bə́tə́kíə́. Bənú tɔ́na nɔ ŋɔ bá fanɛ́nátɔ́ ɔ uwəbú ɔmbana bɔkɔasɛ́á, nɔ ka Imbə́nú luminə ɔyɛ́á tɔ ná bənú nɔ́ŋɔ́nákɛ́na.

¹¹Ɔ́ ɛlɔ́áyɛ́ nɔ́yɛ́ tɔ ndɔ bɛ́kálɛ́na ikúílí tɛ́á ɔ uwənú ɛlɔ́á, tɔ ndɔ yəsúə́ Huɛlɛ́ bata ɔwá, a kɛáka nɔ báá hɔ́ánánátɔ́ ɔ buɔmɔ́ ɔbɔ́á a ná bənú ɛ́lɛ́ákɛ́nɛ́na, á kɛ́áka ɔwá nɔ buɛsɛ bukimə úndúsíníə́ ɔbɔ́á nɔ ndɔ fɛka ɔ tɔ́mbákɛna na yayɛ́á injiŋə, á kɛ́áká tɔ́na ɔwá nɔ úndúsíníə́ yatɛ́ ɔyɛ́á yə́núə́ ilumininə yɛ́ ndɔ bata.

¹²Nɔ́yɛ́, ɔ tɔ́mbákɛna na bənú, bá ŋɔ yəsúə́ Isə́lúkú á Yə́susu bə́təkiə, bá ŋɔ bənú bə́təkiə tɔ́na ɔ tɔ́mbákɛna na wɛɛ́ya, bá ŋɔ nɔ́yɛ́ kɛaka ɛlɔ́áyɛ́ iwə́mɛɛ́lɔ yɛ́ yəsúə́ Huɛlɛ́ na yɛ́ Isə́lúkú á Yə́susu ɔ uwənú ɛlɔ́á.