Read Tunen 2 Tɛsalɔnɛ́ka 3 Bible Online

2 Tɛsalɔnɛ́ka 3 - Tunen bible

2 Tɛsalɔnɛ́ka 3

¹Á bənísə́, ɔ nitifə́, nɔ́ bɛ́kálákɛ́ná ɛlɔ́áyɛ́ əsú ɔkɛaka ɔwá ɛtambá yɛ́ Isə́lúkú yɛ́ yambána, bɛndɔ bá yɛɛ́ta bə́tə́kíə́, ɛ́sɛ́á nɔ́yɛ́ yɛ́ lɛ́á ɔ uwənú ətíə́.

²Nɔ́ Huɛlɛ́ bɛ́kálákɛ́ná tɔ́na ɔkɛaka ɔwá, a bəsú hútúnə́ ɔ makátá má bɛndɔ babɛ́á na baŋgásɔ́ŋgásɔ bɔkɔasɛ́á, tátá bɛndɔ bəkimə bá ná ilumininə kaha.

³Isə́lúkú a báka na yɔkɛ́nana. A ŋɔ bənú óníniə, a ŋɔ bənú tátáka tɔ́na ɔ hɛlaka hɛ́ mubəniə.

⁴Ɛlɔ́áyɛ́ əsú, Isə́lúkú a ndɔ kɛa ɔwá tɔ manyá muɛsɛ tɔ sɛ́á, bikimə ɔbɛ́á tɔ ndɔ bənú lɛna nɔ ndɔ bɛɛ́ta kɛa, nɔ ndɔ ákánana ɔ busíə́ ɔ bɛɛ́ta ɔkɛa.

⁵Isə́lúkú á bə́núə́ kɛ́ndákána ɔkɛaka ɔwá, nɔ Huɛlɛ́ híkə́kíə́ ɔ ɔyáyɛ́na. Á bənú ɔ́lɔ́ ɔ məsə́kə uwisíbiniə ɛ́sɛ́á Kilísitusu.

⁶Á bənísə́, ɔ niínyə nɛ́ yəsúə́ Isə́lúkú á Yə́susu Kilísitusu, tɔ ndɔ bənú bata ɔwá, nɔ ɛnyálɛ́ háá na bɔtɔmbɔ́ bá bɛndɔ, bá ndɔ niŋə tɔ́na nifəŋə na bilə́líə́ ɔbɛ́á tɔ ná bənú ínə́kíníə́.

⁷Uwənú bɛ́múɛ́tɛ́, nɔ ndɔ manya nəníə́ nɔ ná hɔ́ánána ɔwɔŋgɛna ɔ uwəsú iŋgətí, tɔ sa niŋə ɔ uwənú ətíə́ ɛ́sɛ́á bɔtɔmbɔ́.

⁸Tɔ sa bata ata ɔ mɔndɔ ɔmɔtɛ́ ɔwá a bəsú ŋguɛtɛ yɛ buɔsɛ́ índíə́ ndəmə. Mba, tɔ ka bá tɔ ndɔ nyɔɔ bulúə́ na buɔsɛ́ tɛ́á, ətíə́ yɛ məsə́kə na ɔtɔmbɔ mukimə ɔkɛaka ɔwá, tɔ lɛ híáná bɔlɔmɔ́ bɔ́ mɔndɔ ɔ uwənú ətíə́.

⁹Ɛ́ɛ! Há bənú nɔ́ ná hɔ́ánána ɔ uwəsú ulúkə, mba, tɔ ka siəkə ɔwá tɔ bámɛ́nɛ́ná iŋgətí ɔyɛ́á nɔ ɔ́ŋgɔ́kɛ́na.

¹⁰Ɔ taká, ikúílí tɔ ná báá ɔ uwənú ətíə́, tɔ ka bənú lɛna ɔwá, wɛ́ɛ́yɛ́ ɔwá a lɛ ndɔ hikiə ɔnyɔɔ, a sá hɔ́ánana tɔ́na ɔnɛ́á.

¹¹Nɔ́yɛ́, tɔ ndɔ ɔ́kɔ ɔwá, bɔ́mɔtɛ́ ɔ uwənú ətíə́ bá lɛa bɔtɔmbɔ́ bá bɛndɔ, bá bálaka bá lɔɔkɔ, bá húlə́ fíə́kinə ɔ bɛkɔa ɔbɛ́á bɛ́ lɛ ndɔ bəə́bu sinə.

¹²Tɔ ndɔ bátáyɛ́ bɛndɔ bata ɔwá, ɔ niínyə nɛ́ Isə́lúkú á Yə́susu Kilísitusu, bá nyɔ́ɔ́kɔ ɔ yə́ə́bu nuúmə́, bá ŋguɛtɛ yɛ buɔsɛ́ nɛ́áká ɔyɛ́á bəə́bu bɛ́múɛ́tɛ́ bá ná kusə́nə.

¹³Uwənú á bənísə́, nɔ lɛ tɔmbɔ́ ɔ buɛsɛ ɔkɛa.

¹⁴Ábá mɔndɔ a sá ɔ́kɛ́na ɔ yatɛ́ ɔyɛ́á tɔ ndɔ laa ɔ híihi hiəfulə, nɔ́ kɛ́áka ɔwá bəkimə bá wɛɛ́ya manya, nɔ lɛ kində́níə́ na wɛɛ́ya ɔkɛaka ɔwá ɛsɛ́má yɛ́ wɛɛ́ya itíə́.

¹⁵Nɔ lɛ wɛɛ́ya ɛtá ɛ́sɛ́á mubəniə, mba, nɔ́ wɛɛ́ya mbóŋíə́ ɛ́sɛ́á munísə́.

¹⁶Isə́lúkú bɛ́múɛ́tɛ́ ɔwá a lɛ́á hɛnyɔ́nyɔ hɛ́ bumbə́nú, á bənú bumbə́nú índíə́ ɔ bikúílí bikimə, ɔ məndínə́ ɔbánɔ́ məkimə. Isə́lúkú á báá na bənú bəkimə.

¹⁷Ɔwámɛ á Báwolo, wə́míə́ mɔkátá wɔ́ ndɔ máama á məbíhóloniə tilə. Á náana abáka mɛ tɔ́ámɛ́á tuəfulə sánáka, náana abáka mɛ tiləkə.

¹⁸Yəsúə́ Isə́lúkú a Yə́susu Kilísitusu á bənú bəkimə buɛsɛ kɛáka.