Read Tunen 1 Timotíó 1 Bible Online

1 Timotíó 1 - Tunen bible

1 Timotíó 1

¹Ɔwámɛ á Báwolo mɔsɔ́másɔma wa Yə́susu Kilísitusu, ɔ tɔ́mbákɛna na kuənjə yɛ Huɛlɛ́ ɔ wəsúə́ munuəniə na Yə́susu Kilísitusu ɔ yə́súə́ yɔnɛ́nɛna,

²mɛ ndɔ tilinə ɔ yamɛ́á tiísi yɛ mɔná ɔ ilumininə á Timotíó: Huɛlɛ́ á Isə́ na Yə́susu Kilísitusu ɔ yəsúə́ Isə́lúkú bá aŋɔ́á nyɔnɔ, iwə́mɛɛ́lɔ na bumbə́nú índíə́.

³Tíkə́nə ɔ Ɛfɛ́sɛ ɛ́sɛ́á mɛ ná aŋɔ́á hɔ́kɛ́na ɔ wə́míə́ wákaka ɔ Masɛtɔánɛ. Nɔ́yɛ́, ɔkɛaka ɔwá ɔ bɔ́mɔtɛ́ bɛndɔ lɛ́na ɔ sɛ́á bá lɛ bilə́líə́ bɛbɛ́á ínə́níə́.

⁴Bá tɔŋanáŋana tɔ́ bɛkanja níásá na ɛmbana yɛ́ məə́nyə má bɛndɔ bá məkúlə; ɔ taká, nɔ́yɛ́ yɛ́ ndɔ mitə́ŋítə́ŋí yɛ́ ndəmə húlə́nə ɔ uwəbú ətíə́ ɔkɛaka ɔwá, mɔanɔ wɔ́ Huɛlɛ́ wɔ́ lɛ bíúndúsíníə́ ɔ ikúílí ɔyɛ́á bɛndɔ bá ndɔ lumininə,

⁵Mɛ ndɔ nɔ́yɛ́ la ɔkɛaka ɔwá nibo nɛ́ húlínə́ ɔ mɔlɛ́má wɔ́ naŋátɔ, na nibíkə́lə́siə nɛɛsɛ ɔnɛ́á nɛ́ ndɔ nifəŋə ínə́niə ətíə́ yɛ buɛsɛ na bɔbɛ́á, na taká yɛ ilumininə.

⁶Bɔ́mɔtɛ́ bá ka yɛ́táyɛ́ ɛnɔ́mɛ niasa, bá ná nanáká, bá ná ɔŋgɔ́ á mitə́ŋítə́ŋí yɛ́ ndəmə.

⁷Bá ndɔ siə ɔbáá bamanyumbə́ndə́ mbá nɔ́yɛ́ bá lɛ ndɔ manya yatɛ́ ɔyɛ́á bá ndɔ laa, ata yatɛ́ ɔyɛ́á bá ndɔ ɛ́mbɛ́nɛna.

⁸Ɛ́ɛ! Tɔ ndɔ manya ɔwá Umbə́ndə́ bɔɔ́la buɛsɛ ábá tɔ ndɔ muítə bɛ́kɛna ɛ́sɛ́á yɛ́ ndɔ bísiə.

⁹Ɔ taká, tɔ manyá náana muɛsɛ ɔwá, Umbə́ndə́ wɔ́ lɛ bá ɛlɔ́áyɛ́ bááyɛ́ ɔbá bá ndɔ bítíkə muɛsɛ, mba, ɛlɔ́áyɛ́ bááyɛ́ ɔbá bá lɛ ndɔ muítə ɔŋgɔ: Bəcəŋə, bá lɛ Huɛlɛ́ bə́tíə́, bakɛamabɛ́á, balɛbə́tíə́ Huɛlɛ́, balɛbə́tíə́ bɛkɔa bɛnaŋanaŋa, bɔnɔ́bisə́ ata binyə́, bɔnɔ́bɛndɔ,

¹⁰babambɛa, bolókóno bəə́bu na bəə́bu, basɛma bɛɔ́ndɔ, bakanjakanja, bəbíkumə ɔ ndəmə na uwinə́niə, ɛlɔ́áyɛ́ bááyɛ́ tɔ́na ɔbá bá lɛ ndɔ hikiə ɔ bilə́líə́ bɛ́ taká ɔwɔ́kɔ.

¹¹Bɛ́ɛ́yɛ́ binə́níníə́ bɛ́ báka ɔ Imbə́nú Yɛɛsɛ ɔyɛ́á bá ná mɛaŋɔ́á índíə́, ɔyɛ́á yɛ́ ndɔ húlínə tɔ́na na Huɛlɛ́ yɛ tuúmə ɔwá a lɛ́á hɛyábálá hɛ́ buɛsɛ.

¹²Mɛ ndɔ yəsúə́ Isə́lúkú á Yə́susu Kilísitusu mohóloniə híə́niniə mɔŋɛ́ŋa ɔwá a ná mɛaŋɔ́á iŋgínə́ índíə́ ɔkɛaka ɔwá mɛ wɛɛ́ya nyɔkɛ́ná bɔkɔasɛ́á, a ka siəkinə ɔwá mɛ báka wɔ́ɔwɔ ɔwá bá ná hɔ́ánáná ɔ nɛkɔmba ɔtálɛ́na,

¹³ɔwámɛ ɔwá, ubusíə́ bɔ́ ikúílí mɛ Huɛlɛ́ kɔ́báka, mutəkəsə wa bəlumininə, mɔndɔ wa hilóbi. Mba, Huɛlɛ́ a ka mɛaŋɔ́á mɛɛ́luwə́ə́ bɔkɔasɛ́á, mɛ ka nɔ́yɛ́ kɛaka ɔ bɔlɛmanyá, ɛŋaná ilumininə.

¹⁴Yəsúə́ Isə́lúkú a ka mɛaŋɔ́á yayɛ́á nyɔnɔ yɔkɔnɛna, a ná mɛaŋɔ́á ilumininə na nibo índíə́ ɔbɛ́á bɛ́ ndɔ húlínə ɔwámɛ ɔwá mɛ lɛ́á ɔ bɔlatɔ́ na Yə́susu Kilísitusu.

¹⁵Ɔ́ tiísi yɛ ɛtambá yɛ́ɛyɛ ɔyɛ́á bá ná hɔ́ánána ɔ nɛkɔmba ɔtálɛ́na, mɔndɔ mukimə a ná hɔ́ánána ɔ yɛɛ́ta uluminə ɔwá: Yə́susu Kilísitusu a ka ndasá ɔ misí ɔkɛaka ɔwá a bakɛamabɛ́á nuəkə́níə́. Mɛaŋɔ́á mɛ lɛ́á wəbusíə́.

¹⁶Mba, ábá Huɛlɛ́ a ka mɛaŋɔ́á mɛɛ́luwə́ə́, ɔ́ ɔkɛaka ɔwá Yə́susu Kilísitusu a taŋá ɔ wə́yíə́ mɔlɛ́má muɛsɛ ɔ uwinə́niə ɔwámɛ, ɛ́sɛ́á iŋgətí ɛlɔ́áyɛ́ bááyɛ́ ɔbá bá ŋɔ níə́búə́ nɛkɔmba tálɛ́na ɔ ɔwayɛ́, ɛlɔáyɛ́ buɔmɔ́ bɔ́ ikúílíə́kimə ukusənə.

¹⁷Hibə́təniə na tuúmə tɔ́ báá ɔ tɔɛya na tɔɛya á Munəni wa bɔnɔmɔ bɔ́ ikúílíə́kimə, ɔ Huɛlɛ́ ɛmɔtɛ́, ɔyɛ́á bá sa ósó usinə, ɔyɛ́á yɛ́ sa ndə́wəə. Nɔ́yɛ́ bɔ́ lɛ́á.

¹⁸Á wamɛ́á mɔná á Timotíó, ɔ́ binə́níníə́ bɛ́ɛ́yɛ́ ɔbɛ́á mɛ ndɔ aŋɔ́á índiə, hɔ́ánánátɔ́ na bɛtambá bɛ́ bimənyə́síníə́ ɔbɛ́á bɔhɛ́nátɔtányɛ́ bá ná hɔ́ɔ́kɔ́ ɛlɔ́áyɛ́ áwɔ, ɔkɛaka ɔwá bɛ́ aŋɔ́á óníníə́ mbá ɔ tiísi yɛ ituəmə nɔáka,

¹⁹ɔ tɔ́mbákɛna ilumininə na nibíkə́lə́siə nɛɛsɛ. Ɛ́sɛ́á bɔ́mɔtɛ́ bá sa bɛɛ́ta bɛ́kɛna, yə́búə́ ilumininə yɛ́ ka kɔa.

²⁰Himəníə́ na Alɛkɛsándɛlɛ bá báka ɔ uwəbú ətíə́; mɛ ka bəə́bu túmbiə ɔ makátá má Sátana ɔkɛaka ɔwá bá bɛ́mánya, bá lɛ́ tíkə́ Huɛlɛ́ kɔ́ba tɔ́na.