Read Tunen 1 Timotíó 2 Bible Online

1 Timotíó 2 - Tunen bible

1 Timotíó 2

¹Mɛ ndɔ ɛ́mbɛ́nɛna ɔ uwənú ɔlɛna ɔwá, ubusíə́ bɔ́ bikimə, nɔ Huɛlɛ́ bɛkɔa batáka, nɔ wɛɛ́ya bɛ́kálákɛ́na, nɔ wɛɛ́ya bɛ́tɔ́kɔ́lɔ́kɛ́na, nɔ wɛɛ́ya mohóloniə híə́nə́kíníə́ nɔ́yɛ́, ɛlɔ́áyɛ́ bɛndɔ bəkimə,

²ɛlɔ́áyɛ́ bənəni na bááyɛ́ bəkimə ɔbá bá lɛ́á ɔ nɛmanɛna ɔkɛaka ɔwá, tɔ buɔmɔ́ bɔ́ yə́ə́bu bɛ́kɛ́ákɛ́na na bumbə́nú ɛ́sɛ́á bəlumininə bá taká bá Huɛlɛ́, na ɔbɛ́kɔ́bɛ́na.

³Ɔ́ nɔ́yɛ́ yɛ́ lɛ́á yɛɛsɛ yɛmbányɛ á Huɛlɛ́ busíə́ ɔ wəsúə́ Munuəniə.

⁴Wɛɛ́ya a ndɔ hikiə ɔwá bɛndɔ bəkimə bá nibínuəniə kusə́nə, bá káfámá tɔ́na ɔ taká ɔ ɔmanya.

⁵Ɔ taká, Huɛlɛ́ yɛ́ lɛa ɛ́mɔtɛ́, mubísúmbə́niə ɔmɔtɛ́ tɔ́na ətíə́ yɛ Huɛlɛ́ na bɛndɔ, mɔ́táyɛ́ mɔndɔ á Yə́susu Kilísitusu.

⁶Wɛɛ́ya a ná bɔ́áyɛ́á buɔmɔ́ índíə́ ɛlɔ́áyɛ́ bɛndɔ bəkimə ɔháŋɔ́na. Ɔ́ yɛ́táyɛ́ imbóŋi á Kilísitusu a ná índíə́kínə ɛnaka bikúílí bɛ́ ndáfámá ɔbɛ́á Huɛlɛ́ a ná tínímíə́.

⁷Ɔ́ ɛlɔ́áyɛ́ nɔ́yɛ́ bá ná mɛaŋɔ́á tínímíə́ muyəmbələniə wa Imbə́nú Yɛɛsɛ na mɔsɔ́másɔma ɔkɛaka ɔwá, mɛ ilumininə na taká úkúnə́kíə́ ɔ báyɛ́ ɔbá bá lɛ bá Bɛyútɛnɛ. Taká mɛ ndɔ laa, mɛ lɛ ndɔ kanja.

⁸Nɔ́yɛ́, mɛ hikəkiə ɔwá balɛ́mɛndɔ́ bá bɛ́kálákɛ́ná ɔ bɛbɔ́ka ɔbánɔ́ bikimə, makátá bə́líə́tɔ́ ɔ ɔmbáŋá na mɔlɛ́má naŋátɔ, ɛŋaná hilóbi mbá ata mitə́ŋítə́ŋí.

⁹Mɛ hikəkiə tɔ́na ɔwá bəəndú bá lɛŋábáká muɛsɛ, bá lɛ bínə́níə́, bá lɛ mɔlɔ́á bɛ́nɔ́á na bɛmbátámbata, bá lɛ tubilə tɔ́ kóolo biyoŋolo, tɔsɔ́á tɔ́ ɛmbambá, mbá ata bɛlɛŋa bɛ́ mukunə́ mɔŋɛ́ŋa,

¹⁰ɔ nifəŋə, bá búə́búə́ bɔhɛka ínə́níə́ ɔ tɔ́mbákɛna na bíə́búə́ bɛnyɛná bɛɛsɛ ɔ́maná ɛ́sɛ́á bəəndú ɔbá bá ndɔ ínə́niə ɔwá bá ndɔ Huɛlɛ́ bə́tiə hɔ́ánánátɔ.

¹¹Muəndú a ná hɔ́ánána utuənə yə́ə́bu na ibílólosoliə yikimə ɔ ikúílí yɛ́ yɔkɔ́na yɛ́ Ɛtambá yɛ́ Huɛlɛ́.

¹²Mɛ lɛ ndɔ muəndú iŋgínə́ índiə ɔ uwukúniə ata ɔ mɛlɛ́mɛndɔ́ ɔmámɛ́na. A ná hɔ́ánána utuənə yə́ə́bu.

¹³Ɔ taká, a Átama á Huɛlɛ́ a ná taŋá ɔbɔ́ta, əlimə yɛ nɔ́yɛ́, a ná Ɛ́fa tifə́níə́.

¹⁴Átama a sa bɛ́niasa ɔwá bá wɛɛ́ya nimbəkə, mba, á muəndú a ná bɛ́níása ɔwá bá wɛɛ́ya nimbəkə, a ná kinə́ á Huɛlɛ́ ɔwɔkɛ́na.

¹⁵Ata nɔ́yɛ́, ábá a ná tiŋímínə ɔ ilumininə, ɔ nibo, ɔ bɔnaŋanaŋa, a lɛ bínə́níə́, Huɛlɛ́ a ŋɔ wɛɛ́ya nuəkəniə ɔ tɔ́mbákɛna na baná ɔbá a ŋɔ bíə́nəkə.