Read Tunen 1 Timotíó 3 Bible Online

1 Timotíó 3 - Tunen bible

1 Timotíó 3

¹Ɔ́ tiísi yɛ ɛtambá yɛ́ɛyɛ ɔyɛ́á bá ná hɔ́ánána ɔ nɛkɔmba ɔtálɛ́na: Ábá mɔndɔ a báka na ilókí yɛ́ ɔhíána mɔkɛndana wa ilúkunə, buolí buɛsɛ a ná bɛtɛfɛna.

²Mɔkɛndana ilúkunə a ná hɔ́ánána ɔbáá ɛŋaná hɛkabalɛ, ibə́ yɛ muəndú ɔmɔtɛ́, a lɛ bɛmbátámbata hikə, na məbílúmíniə maasɛ, malɔŋa maasɛ, mɔkáhábɛndɔ, na nɛhámɔ́ nɛ́ bɛndɔ uwukúniə,

³a sá hɔ́ánana ɔbá mɔnyɛ́nányɛna ata mɔndɔ wa ɛŋgásɔ́, mba ɛbɔ́yɛ́, mɔndɔ wa bumbə́nú, a lɛ mɔlɛ́má háá ɔ mɔnɛ́á.

⁴A ná hɔ́ánána ɔbá na nɛhámɔ́ nɛ́ nɛ́áyɛ́á nikúlə ɔkɛndana muɛsɛ, a kɛaka ɔwá báyɛ́á baná bá wɛɛ́ya ɔ́kɔ́kɛ́nɛ́na na hibə́təniə hikimə:

⁵Ɔ taká, ábá mɔndɔ a lɛ ndɔ manya ɔ nɛ́áyɛ́á nikúlə nɛ́ bɛ́múɛ́tɛ́ ɔkɛndana, nəníə́ a óso ɔ ilúkunə yɛ́ Huɛlɛ́ usókóbiə əə́?

⁶A sá hɔ́ánana ɔbáá mɔndɔ ɔwá a nɔ́ húlə ɔ lumininə; yɛ́ sá bá nɔ́yɛ́, a óso ɔbá úndúə́tɔ́ na niə́mə, utifəkə, a bá hɔkɛ́nátɔ́ ɛ́sɛ́á yití.

⁷A ná hɔ́ánána ubítíkə ɔ nindínə́ ɔnɛ́á balɛmanyáhuɛlɛ́ bá wɛɛ́ya bə́tə́kíə́, bá lɛ wɛɛ́ya yomósíə́, a lɛ kɔɛ́ná tɔ́na ɔ tɔlámba tɔ́ yití.

⁸Bakamɛlilúkunə tɔ́na bá ná hɔ́ánána ɔbáá bááyɛ́ ɔbá bá ndɔ bəə́bu bə́tiə, bá bá na munuə tɛ́nɛ́mátɔ, bá sá hɔ́ánana ɔbáá bɛɔlɛ́ bɛ́ məluku, bá lɛ mɔlɛ́má háá ɔ məndíbə́.

⁹Bá báá tiŋímínə́tɔ́ ɔ taká ɛ́sɛ́á ilumininə yɛ́ ndɔ ínə́niə, na nibíkə́lə́siə nɛ́ naŋátɔ.

¹⁰Bá ná hɔ́ánána ɔ uwəbú ɔháá ɔ mɔkɔ́lɛna; əlimə yɛ nɔ́yɛ́, ábá bá sá hɛkabalɛ bɔ́ŋɔ, bá óso ɔ buolí bɔ́ bakamɛlilúkunə uwundúsiniə.

¹¹Bəəndú[1] tɔ́na bá ná hɔ́ánána ɔbá báyɛ́ ɔbá bá ndɔ bəə́bu bə́tiə, bá lɛ mɔláŋa kɛa; bá lɛ bɛmbátámbata hikə, na yɔkɛ́nana ɔ bɛkɔa bikimə.

¹²Bakamɛlilúkunə bá ná hɔ́ánána ɔbá ibə́ yɛ muəndú ɔmɔtɛ́, na nɛhámɔ́ nɛ́ bə́búə́ baná ɔkɛndana na níə́búə́ nikúlə.

¹³Ɔ́ taká, ábá bakamɛlilúkunə bá ndɔ búə́búə́ buolí nyɔɔ muɛsɛ, bɛndɔ bəkimə bá ŋɔ bəə́bu bə́təkiə, bá ŋɔ hɔ́ɔ́kɔ tɔ́na na nɛkɔmba nikimə ətíə́ yɛ́ ilumininə ɔyɛ́á yɛ́ ndɔ bəsú tɔa na Yə́susu Kilísitusu.

¹⁴Mɛ ndɔ aŋɔ́á híihi hiəfulə tilinə na ɛnánɛna ɔwá ɛkasɛ tɔ hútú siəkinənə.

¹⁵Ata nɔ́yɛ́, ábá mɛ ná nə́ŋə́lə́kíníə́ ɔndafámá, híihi hiəfulə hɛ́ ŋɔ aŋɔ́á ínə́kiniə ɛ́sɛ́á ɔ bítíkə́kə́ ətíə́ yɛ nikúlə nɛ́ Huɛlɛ́, ɔnɛ́á nɛ́ lɛ́á ilúkunə yɛ́ Huɛlɛ́ yɛ bɔnɔmɔ. Yɛ́ɛ́yɛ́ ilúkunə yɛ́ ndɔ taká híkə ɛ́sɛ́á ɛbáka nɛkɔɛnɛ́ nɛ́ muanda wɔ́ miímə híkə.

¹⁶Ɛ́ɛ! Ɔ taká, ɛndɔnɔ yɛ taká yɛ́ lɛa yɛŋɛ́ŋa: Yə́susu Kilísitusu a ka bɛ́tɔ́ŋɔna ɔ mɛɛ́lɔ yɛ mɔsá, Umbúínyi Mɔnaŋanaŋa wɔ́ ka wɛɛ́ya ínə́niə ɔwá a ka bá wataká, bɛáŋgɛlɛ bá ka wɛɛ́ya lə́mbəkiə, bá ka wɛɛ́ya nɔŋɔnakɛna ɔ balɛmanyáhuɛlɛ́, bɛndɔ bəəŋí bá misí bá ka níə́búə́ nɛkɔmba tálɛ́na ɔ ɔwayɛ́, Huɛlɛ́ a ka wɛɛ́ya úmə́kiə.