Read Tunen 1 Timotíó 4 Bible Online

1 Timotíó 4 - Tunen bible

1 Timotíó 4

¹Umbúínyi wɔ́ ndɔ la tə́lə́ŋu ɔwá ɔ bikúílí bɛ́ nitifə́, bɔ́mɔtɛ́ bá ŋɔ ilumininə bɛ́sáŋɔna, bá ɔŋgɔ́kɔ á imbúínyi ɔyɛ́á yɛ́ ndɔ nímbə́nə, na binə́níníə́ ɔbɛ́á bɛ́ ndɔ húlínə na yítə́yí imbúínyi.

²Bá ŋɔ bɛ́niasa nɛbɛ́nyɔ́nyɔlɔ nɛ́ bakanjakanja ɔbá mɔlɛ́má wɔ́ lɛ́á úfə́tɔ́ ɔ bɔbɛ́á, nɛ́ bəə́bu nənə́síə́. (Níə́búə́ nibíkə́lə́siə nɛ́ lɛ́á wə́ə́tɔ)

³Bá ndɔ sáŋɔ́na ɔwá bá lɛ bɛ́lɛ́nána, bá lɛ yɛ́mɔtɛ́ ɛnya yɛ bɛ́labɔ́nɛ́á nɛa, mbá nɔ́yɛ́, Huɛlɛ́ a ná bɛɛ́ta tábɔ́náka ɔkɛaka ɔwá bəlumininə ɔbá bá ndɔ taká manya muɛsɛ, bá bɛɛ́ta bɛ́kɛ́ákɛ́ná na ɔwayɛ́ ɔ mohóloniə uhíə́niniə.

⁴Ɛ́ɛ! Bikimə ɔbɛ́á Huɛlɛ́ a ná tábɔ́náka bɛ́ lɛa bɛɛsɛ, ata bɔ́mɔtɛ́ bɔ́ uwomboko bɔ́ lɛ bámɛ́nɛ́na. Mba, bá ná hɔ́ánána ɔ bɛɛ́ta ɔkáha bikimə na ɔwayɛ́ ɔ mohóloniə uhíə́niniə.

⁵Ɔ taká, ɛtambá yɛ́ Huɛlɛ́ na mabɛ́kálɛ́na bɛ́ ndɔ bɛɛ́ta nəŋəsiə.

⁶Ínə́kíníə́ bɛ́ɛ́yɛ́ bɛkɔa bikimə ɔ bənísə́, nɔ́yɛ́, ɔ ŋɔ bá mɔnyɛna muɛsɛ wa Yə́susu Kilísitusu ɔwá, bɛtambá bɛ́ ilumininə na tiísi yɛ bilə́líə́ ɔbɛ́á ɔ ná ɔ́kɔ́náka muɛsɛ muɛsɛ bɛ́ ndɔ lúkə.

⁷Bɛ́sáŋɔ́ná tɔŋanáŋana tɔ́ itə́mbí ɔtɔ́á tɔ́ lɛ́á nifəŋə na ilumininə. Mba, ánya ɔbánɔ́ ɔ ɔwayɛ́ ubə́tiə.

⁸Ninyosiə nɛ́ mɛɛ́lɔ nɛ́ báka na mɔsɛ́ŋɛ́ ɔ tɛ́tɛ́á yɛ bɛkɔa, ɔ nifəŋə, nibə́tiə nɛ́ Huɛlɛ́ nɛ́ báka na mɔsɛ́ŋɛ́ ɔ bɛkɔa ɔbánɔ́ bikimə. Nɛ́ ndɔ bɛkɔa bɛɛsɛ bílíhə́niə ɔ buɔmɔ́ bɔ́ isíŋáka ɔ misí mbá ata əlimə yɛ nyɛmbɛ́.

⁹Ɔ́ tiísi yɛ ɛtambá yɛ́ɛyɛ ɔyɛ́á bá ná hɔ́ánána ɔ nɛkɔmba ɔtálɛ́na, mɔndɔ mukimə a ná hɔ́ánána ɔ yɛɛ́ta uluminə.

¹⁰Ɔ taká, ábá tɔ ndɔ ɛmɔ́kɛ́ nyáá, tɔ ndɔ bílútúnə tɔ́na, ɔ́ bɔkɔasɛ́á yə́súə́ ɛnánɛna yikimə yɛ́ lɛ tálɛ́nátɔ́ á Huɛlɛ́ yɛ bɔnɔmɔ, ɔwá a ndɔ bɛndɔ bəkimə nuəniə, sulusulu á bəlumininə.

¹¹Nɔ́yɛ́ ɔ́ ná hɔ́ánána ɔmanɛna na uwukúniə.

¹²Mɔndɔ a lɛ tíkə́ aŋɔ́á yəniə bɔkɔasɛ́á ɔ nabáka ɛnɔ́kɔ́nɔkɔ. Mba, bámɛ́nɛ́ná iŋgətí ɛlɔ́áyɛ́ bəlumininə ɔ ɔwáwɔ bɛtambá, ɔwáwɔ nibítíkə, ɔwáwɔ nibo, ɔwáwɔ ilumininə na bɔ́áwɔ́á bɔnaŋanaŋa.

¹³Ubusíə́ ɔbɔ́á mɛ ndáfámá, bíndíə́ aŋɔ́á mukimə ɔ Mətilə ɔfana ɔ nɛnáka, índíə́kínə́ bɔsɔ́kɔ́ makɛ́nda, úkúnə́kíə́ bəə́bu.

¹⁴Ɔ lɛ niəbə yəníə́ ɔnɛ́á nɛ́ aŋɔ́á lɛ́á, nɛ́ɛ́yɛ́ ɔnɛ́á ɔ ná kúsə́nə ɔ tɔ́mbákɛna na bimənyí ɔ ikúílí ɔyɛ́á bɛkámɔ bɛ́ ilúkunə bá ná aŋɔ́á makátá tálákɛ́na.

¹⁵Ɔ́ bɛkɔa bɛ́ɛ́yɛ́ ɔbɛ́á ɔ ná hɔ́ánána utə́tə́niə ɔ mɔlɛ́má. Á bɛ́táyɛ́ ɔ ná hɔ́ánána utiŋiminə. Nɔ́yɛ́, bəkimə bá ŋɔ siəkinə ɛ́sɛ́á ɔ ndɔ bɛ́nyɛ́ŋɛsa.

¹⁶Bɛ́tátáká aŋɔ́á bɛ́múɛ́tɛ́ na bɛ́áwɔ́á bilə́líə́, ɔ́nɛ́nɛ́na ɔmɔ́tɔ́yɛ́. Ɔ taká, ábá ɔ ndɔ nɔ́yɛ́ bɛ́kɛna, ɔ ŋɔ yawɔ́á mɛɛ́lɔ nuəkəniə, ɔ bááyɛ́ núə́kə́níə́ tɔ́na ɔbá bá ndɔ aŋɔ́á ɔ́kɔ.