Read Tunen 1 Timotíó 5 Bible Online

1 Timotíó 5 - Tunen bible

1 Timotíó 5

¹Ɔ lɛ ɛnatákɛ yɛ́ mɔndɔ kɔ́áyɛ́ná mɔbɛ́á, mba, lɛ́háká wɛɛ́ya ɛ́sɛ́á yawɔ́á isə́ yɛ bɛ́múɛ́tɛ́, bɛnɔ́kɔ́ bɛ́ bɛndɔ tɔ́na ɛ́sɛ́á báwɔ́á bənísə́,

²bɛkámɔ bɛ́ bəəndú ɛ́sɛ́á bɛ́áwɔ́á binyə́, milóní tɔ́na ɛ́sɛ́á báwɔ́á bənísə́ ɔ bəəndú ɔ bɔnaŋanaŋa bukimə.

³Sókóbókíə́ bilíkə́ ɔbɛ́á bɛ́ lɛ́á təkə́lə́kə́tɔ.

⁴Ábá ɔ taká, ilíkə́ a lɛa na baná ata banana, báaba bá lɛa hɔ́ánánátɔ́ ɔbáá bə́búsíə́ ɔ uwəbú hikúlə hɛ́ bɛ́múɛ́tɛ́ ɔ buɛsɛ uwinə́niə, na bíə́búə́ bisə́ usókóbiə ɛ́sɛ́á bá ná kɛ́áka ɛlɔ́áyɛ́ əbú. Ɛ́ɛ! Nɔ́yɛ́ abáka Huɛlɛ́ á hikəkiə mɔŋɛ́ŋa.

⁵Tiísi yɛ ilíkə́, ɔ́ ɔyɛ́á yɛ́ lɛ bá na mɔndɔ ɔ ɔwayɛ́ ɔwɔ́lɔ, a ná yáyɛ́á ɛnánɛna bɛ́lɛ́nɛ́na á Huɛlɛ́, a báka tiŋímínə́tɔ́ bulúə́ na buɔsɛ́ tɛ́á ɔ ɛmbɛ́kɛ́tɛ́ na mabɛ́kálɛ́na.

⁶Ɔ nifəŋə, yɛ́ɛ́yɛ́ ɔyɛ́á yɛ́ ndɔ bɛ́kɔ́lɔmɔna ɔbánɔ́ á mətəkunə, ata nɔ́yɛ́ ɛ́sɛ́á a lɛ́á muɔmɔ́, a lɛ wə́ə́tɔ.

⁷Nɔ́yɛ́, ɔ ná hɔ́ánána ɔ uwəbú ɔbɛ́kɔ́lɔmɔnɛna ɔkɛaka ɔwá, bá báá ɛŋaná hɛkabalɛ.

⁸Ábá mɔndɔ a lɛ ndɔ bɔayɛ́ sókóbiə, sulusulu á bɛláŋa bɛ́ nɛ́áyɛ́á nikúlə, a lɛa ilumininə bɛ́sáŋɔ́nátɔ. A lɛa mɔbɛ́á ɔ ɔyáyɛ́ná wɛ́ɛ́yɛ́ ɔwá a lɛ ndɔ lumininə.

⁹Bá ŋɔ niínyə nɛ́ muəndú tiləkə ɔ ilúkunə yɛ́ bilíkə́ ábá a lɛa ɔ bɔtɛ́tɛ́á bukimə na moómo álɛ́ndálɔ má tuɔŋɔ, ɔwá a ná bá tɔ́na na ibə́ ɛ́mɔtɛ́.

¹⁰A ná hɔ́ánána ɔbáá manyánátɔ́ ɛlɔ́áyɛ́ bɛ́áyɛ́á bɛnyɛná bɛɛsɛ ɔbɛ́á a ná kɛ́áka: Ɔwá a ná báyɛ́á baná tábɔ́náká muɛsɛ, mɔkáhá bəkiníə́nú ɔ ɔwayɛ́ ɔmbɛ́la, ɔwá a ná makɔlɔ́ má bəlumininə sɔáka[2], a ná bɛ́mɔ́kɛ́ ɔ́lɔ́kɛ́na, a ná məndínə́ məkimə má bɛnyɛná bɛɛsɛ kɛáka.

¹¹Mba ɔ lɛ bɛnɔ́kɔ́nɔkɔ bɛ́ bilíkə́ fánɛ́na, ɔ taká, ikúílí ilókí yɛ́ ná bəə́bu itíə́ bá botoliə ɔ ubísúə́ na Kilísitusu, ba siəkə ɔwá bá manyɔ́ ɔlɔ́nɔ,

¹²nɔ́yɛ́, bá lɛa kɔ́átɔ́ ɔ hɛkɔma bɔkɔasɛ́á, bá ná níə́búə́ nɛkaka níbúsíə́ nɔkɔ́ ɔwɔŋgɔkɔnɔ na Kilísitusu.

¹³Ɔ yáyɛ́na nɔ́yɛ́, ɛ́sɛ́á bá lɛ́á ɛŋaná bɔkɔa bɔ́ ɔkɛa, bá bálaka bá lɔɔkɔ ɔmbɛ́la na ɔmbɛ́la tɛ́á; bá mɔláŋa kɛaka tɔ́na, bá lɛ manyá ɔ hɛtɔkɔ utə́tə́niə, bá bɛkɔa hɔ́ɔ́kɔ ɔbɛ́á bɛ́ lɛ bá bɛɛsɛ ɔ ɔhɔ́ɔ́.

¹⁴Nɔ́yɛ́, mɛ hikəkiə ɔwá bɛnɔ́kɔ́nɔkɔ bɛ́ bilíkə́ bá manyɔ́ lɔ́nɔ́kɔ, bá baná kúsə́nə, bá wə́búə́ ɔmbɛ́la kɛndákáná muɛsɛ, bá lɛ wə́súə́ mubəniə ihə́lí índíə́ ɔkɛaka ɔwá á bəsú hɔ́kɛ́ná mɔbɛ́á.

¹⁵Ɔ taká, bɛ́mɔtɛ́ bilíkə́ bá ka báá bá nɔ́ əbú nanaka, bá ná ɔ́ŋgɔ́ á Sátana.

¹⁶Ábá mulumininə ɔ muəndú a lɛa na bilíkə́ ɔ ɔwayɛ́ nikúlə, á bəə́bu ɔ́lɔ́kɛ́na; yɛ́ lɛ bá muɛsɛ ɔwá yɛ́ híáná bɔlɔmɔ́ bɔ́ Ilúkunə yɛ́ Huɛlɛ́ ɔkɛaka ɔwá, ilúkunə yɛ́ bilíkə́ bɛ́ təkə́lə́kə́tɔ́ ɔ́lɔ́kɛ́na.

¹⁷Bɛkámɔ ɔbɛ́á bɛ́ ndɔ ilúkunə yɛ́ Huɛlɛ́ kɛndana muɛsɛ, bá ná hɔ́ánána ɔbáá na mɔsábɔ́náná[3] ɔ ɔyáyɛ́na, sulusulu bááyɛ́ ɔbá bá lɛ́á na ɛlɛmákɛ yɛ́ bɔsɔ́ma bɔ́ ɔnɔŋɔna wɔ́ Ɛtambá na bɔ́ uwinə́niə.

¹⁸Ɔ taká, Mətilə má ndɔ laa má sɛ́á: «Abáka bá lɛ ɛfɔŋɔ sáŋɔnɛ́ná ɔ ɔnɛ́á ikúílí ɔyɛ́á yɛ́ lɛ́á ɔ buolí.» Má ndɔ laa tɔ́na má sɛ́á: «Mɔnyɛna a ná hɔ́ánána ɔwayɛ́ mɔsábɔ́náná ukusənə.»

¹⁹Ɔ lɛ ɛsɔ́mɛna yɛ́ ɛkámɔ yɛ́ Ilúkunə luminə ɛŋaná imbóŋi yɛ́ bɛndɔ báfandɛ́ ata bálálɔ́ ɔwɔ́kɔ.

²⁰Ábá mɔndɔ a ná kɔɛ́na ɔ bɔbɛ́á, kɔ́áyɛ́ná wɛɛ́ya ɔ nɛnáka ɔkɛaka ɔwá, bənə́bənə́ bá kɔ́lɔ́mála.

²¹Mɛ ndɔ aŋɔ́á manɛna na iŋgínə́ yikimə ɔ busíə́ bɔ́ Huɛlɛ́, bɔ́ Yə́susu Kilísitusu na bɔ́ bɛáŋgɛlɛ bɛ́ tɛ́fákátɔ́ ɔwá, ɔ bɛ́ɛ́yɛ́ bɛtɛ́nɛ́mɛ́ná ɔ́ŋgɔ́kɔ ɛŋaná nifəŋə ɔháá, ɛŋaná uhíkə ata mɔndɔ.

²²Ɔ lɛ hútú mɔndɔ makátá tálɛ́na, ɔ lɛ bɛ́látá ɔ mabɛ́á má bɔsɔ́kɔ́. Bítíkə́kə́ aŋɔ́á bɛ́múɛ́tɛ́ naŋátɔ.

²³Ɛ́sɛ́á abáka ɔ náákɛna ɔ tɔna, ɔ lɛ sulú nyáá á mənífə́ bíbúə́, ɛ́yaka ɔ məluku nyálɛla.

²⁴Abáka mabɛ́á má bɔ́mɔtɛ́ bɛndɔ má fámálakana ubusíə́ ɔbɔ́á bá bəə́bu kə́lə́sə́kíə́, mba, má bɔ́mɔtɛ́ má tíkə́ fámálana əlimə yɛ ikúílí.

²⁵Hɔ́ánánátɔ́, abáka bɛnyɛná bɛɛsɛ bɛ́ fámálakana tə́lə́ŋu, ata bɛ́ɛ́yɛ́ ɔbɛ́á bɛ́ lɛ ndɔ sulu ɛ́nána.